Na Nki Mitindu Yehowa Ke Monisilaka Beto Zola?

 1. Ntumwa Yoane ke siamisa beto na kuyindula nki diambu, mpi sambu na nki?

NTUMWA YOANE ke siamisa beto na kuyindula mingi zola ya nene yina Yehowa ke monisilaka beto. Yandi sonikaka na 1 Yoane 3:1 nde: “Beno tala mutindu ya zola yina Tata me monisilaka beto!” Kana beto ke yindulula zola ya nene yina Yehowa ke monisilaka beto, beto ta kwenda kibeni pene-pene na yandi mpi beto ta kuma kuzola yandi diaka mingi.

 2. Sambu na nki bantu ya nkaka ke ndimaka ve nde Nzambi ke zolaka bo?

² Diambu ya mawa kele nde, bantu ya nkaka ke ndimaka ve nde Nzambi ke zolaka bo. Bo ke yindulaka nde Nzambi ke kudibanzaka ve sambu na bantu. Ziku, bo ke yindulaka nde Nzambi me tulaka kaka bansiku mpi ke pesaka ndola na bantu yina ke lemfukilaka yandi ve. Malongi ya luvunu me pusaka bantu ya nkaka na kuyindula nkutu nde Nzambi kele nku, mpi nde muntu lenda zola yandi ve. Bankaka diaka ke yindulaka nde, Nzambi ke zolaka bantu yonso kukonda kutula dikebi na mambu yina bo ke salaka. Kansi kulonguka na nge ya Biblia me sadisaka nge na kubakisa kieleka na yina me tala Yehowa. Nge me zabaka nde zola kele kikalulu ya Yehowa ya kuluta nene mpi nde yandi pesaka Mwana na yandi bonso nkudulu sambu na nge. (Yoane 3:16; 1 Yoane 4:8) Ata mpidina, mambu ya nkaka ya luzingu na nge lenda sala nde nge bakisa ve zola ya mingi yina Yehowa ke monisilaka nge.

 3. Inki ke sadisa beto na kubakisa nde Yehowa ke zolaka beto?

³ Sambu na kubakisa nde Yehowa ke zolaka beto, ntete beto fwete zaba nde yandi muntu gangaka beto. Yandi muntu pesaka beto luzingu. (Tanga Nkunga 100:3-5.) Yo yina Biblia ke bingaka Adami, muntu ya ntete yina Nzambi gangaka nde “mwana ya Nzambi.” (Luka 3:38) Mpi Yezu longaka beto na kubinga Yehowa, “Tata na beto yina kele na zulu.” (Matayo 6:9) Yo ke monisa nde Yehowa kele Tata na beto, mpi nde yandi ke zolaka beto mutindu tata ya mbote ke zolaka bana na yandi.

 4. (a) Yehowa kele Tata ya nki mutindu? (b) Inki beto ta tadila na disolo yai mpi na yina ke landa?

⁴ Bantu ya nkaka ke ndimaka ve nde tata kele muntu mosi yina ke zolaka bana. Ziku, sambu bo ke yibukaka mambu ya nku yina tata sadilaka bo ntangu bo vandaka bana-fioti. Yehowa lenda sadila ve bana na yandi mambu ya nku ata fioti. Yandi kele Tata ya kuluta mbote sambu na beto. (Nkunga 27:10) Yandi ke zolaka beto mingi mpi ke sadisaka beto na mitindu mingi. Kana beto ke bakisa nde Yehowa ke zolaka beto, beto ta kuma mpi kuzola yandi mingi. (Yakobo 4:8) Na disolo yai, beto ta tubila mitindu iya yina ke monisa nde Yehowa ke zolaka beto. Na disolo yina ke landa, beto ta mona mitindu iya yina beto lenda monisila Yehowa zola.

 5. Inki Nzambi me pesaka bantu yonso?

⁵ Ntangu ntumwa Polo vandaka na mbanza Atene na insi Grese, yandi monaka banzambi ya biteki mingi mpi bantu vandaka kuyindula nde luzingu na bo katukaka na banzambi na bo yina. Yo yina, yandi zabisaka bo mambu ya me tala “Nzambi yina salaka nsi-ntoto mpi bima yonso yina kele na kati na yo.” Yandi tubaka nde Nzambi “ke pesaka bantu yonso luzingu, mpema mpi bima yonso” mpi “na nzila na yandi beto kele na luzingu, ke tambulaka, mpi ke zingaka.” (Bisalu 17:24, 25, 28) Yehowa ke pesaka beto bima yonso yina beto ke vandaka na yo mfunu sambu na kuzinga mbote. Yindula bima ya nkaka yina yandi me pesaka beto sambu yandi ke zolaka beto.

 6. Kisika ya nki mutindu Yehowa me pesaka beto sambu na kuzinga? (Tala kifwanisu yina kele na luyantiku ya disolo.)

⁶ Mu mbandu, Yehowa yidikaka ntoto kitoko sambu beto zinga na kati. (Nkunga 115:15, 16) Na baplanete yonso yina Nzambi me gangaka, ntoto kele planete mosi kaka ya mbote yina bantu fwete zinga. Bantu ya siansi me salaka bansosa na zulu mpi me monaka baplanete mingi, kansi bo me monaka ve planete yina kele ti bima yonso yina bantu ke vandaka na yo mfunu sambu na kuzinga, mutindu yo kele na ntoto. Yehowa me pesaka beto ve kaka bima yonso yina beto kele na yo mfunu sambu na kuzinga, kansi yandi me salaka mpi ntoto kisika ya kitoko, ya mbote, mpi ya lutaninu sambu beto zinga. (Yezaya 45:18) Ntangu beto ke talaka ntoto, kisika yina Yehowa Tata na beto me pesaka beto, beto ke bakisaka kibeni nde yandi ke zolaka beto mingi.​—Tanga Yobi 38:4, 7; Nkunga 8:4-6.

 7. Inki ke ndimisa nde Yehowa me monisilaka beto zola ya mingi na mutindu yandi me gangaka beto?

⁷ Mutindu ya nkaka yina Yehowa me monisilaka beto zola na yandi kele mutindu yandi me gangaka beto ti makuki ya kulanda mbandu na yandi. (Kuyantika 1:27) Yo ke tendula nde beto kele ti mayele ya kubakisa nde yandi ke zolaka beto, ebuna beto lenda monisila yandi zola. Yandi ke zabaka nde makuki na beto yai ke pesaka beto kiese kibeni. Beto me zaba nde bana ke vandaka na kiese mingi kana bo me bakisa nde bibuti ke zolaka bo. Kuvila ve nde, Yezu longaka beto nde beto ta vanda na kiese kana beto ke kangama ti Yehowa, Tata na beto. (Matayo 5:3) Yandi muntu ke pesaka beto “bima yonso yina beto kele na yo.” Yo kele pwelele nde, yandi ke zolaka beto mingi kibeni mpi ke pesaka beto bima.​—1 Timoteo 6:17; Nkunga 145:16.

 8. Sambu na nki beto ke zolaka nde Yehowa kulonga beto?

⁸ Batata ke zolaka bana na bo mpi bo ke sepelaka ve nde bantu kunata bana na bo na nzila ya mbi to kukusa bo. Kansi bibuti mingi bubu yai ke ndimaka ve minsiku ya Biblia ya me tala mambu ya mbote mpi ya mbi. Yo yina, bo ke kukaka ve kutwadisa bana na bo na mutindu ya me fwana, ebuna bana na bo ke zingaka ve na kiese mpi ke bakisaka ve nzila ya mbote ya kulanda. (Bingana 14:12) Kansi, Yehowa ke pesaka bana na yandi lutwadisu ya kuluta mbote sambu yandi kele “Nzambi ya kieleka.” (Nkunga 31:5) Yandi ke sepelaka kulonga beto kieleka ya me tala yandi mpi mutindu ya kusambila yandi. Diaka, yandi ke monisaka beto mutindu ya mbote ya kuzinga. (Tanga Nkunga 43:3.) Inki mambu Yehowa me longaka beto yina ke monisa nde yandi ke zolaka beto mingi?

9, 10. (a) Sambu na nki Yehowa ke longaka beto mambu ya me tala yandi? (b) Inki yandi ke zabisaka beto na yina me tala lukanu na yandi?

⁹ Ntete-ntete, Yehowa ke longaka beto kieleka ya me tala yandi. Yandi ke zolaka nde beto zaba yandi. (Yakobo 4:8) Yandi me zabisaka beto zina na yandi. Nkutu, zina na yandi na Biblia kele mbala mingi kuluta bazina ya nkaka. Yehowa me zabisaka beto mpi kimuntu na yandi. Ntangu beto ke talaka bima yina yandi me gangaka, beto ke bakisaka nde yandi kele ngolo mpi mayele mingi. (Baroma 1:20) Diaka, ntangu beto ke tangaka Biblia, beto ke bakisaka nde yandi kele Nzambi ya lunungu mpi yandi ke zolaka beto mingi. Ntangu beto ke longukaka kimuntu ya kitoko ya Yehowa, beto ke kwendaka pene-pene na yandi.

¹⁰ Yehowa ke zabisaka beto mpi lukanu na yandi. Yandi ke zabisaka beto nde beto kele na kati ya dibuta na yandi. Yandi ke tendudilaka beto mpi mambu yina yandi ke zolaka nde beto sala sambu beto sala na bumosi mpi na ngemba ti bantu yonso ya dibuta na yandi. Biblia ke monisa pwelele nde Nzambi gangaka beto mpi pesaka beto kimpwanza ya kupona mambu yina beto fwete sala. (Yeremia 10:23) Yehowa ke zabaka mambu yina kele mbote sambu na beto. Yo yina, beto ta kuma na ngemba mpi ta kuma kuzinga mbote kaka kana beto ke ndima kiyeka na yandi mpi ke lemfukila yandi. Yehowa me zabisaka beto bakieleka yai ya mfunu sambu yandi ke zolaka beto.

11. Inki Tata na beto ya zola me zabisaka beto sambu na bilumbu ke kwisa?

¹¹ Tata ya zola ke yindulaka mingi sambu na luzingu ya bana na yandi ya bilumbu ke kwisa. Yandi ke zolaka nde bo vanda ti luzingu mosi ya mbote. Diambu ya mawa kele nde, bubu yai bantu mingi ke kudiyangisaka sambu na luzingu na bo ya bilumbu ke kwisa, mpi bo ke bebisaka ntangu na bo na kusala mambu yina ta zinga ntangu fioti. (Nkunga 90:10) Beto kele na ntonda kibeni na mutindu Yehowa, Tata na beto, me zabisaka beto kaka ve mutindu ya mbote ya kuzinga bubu yai, kansi yandi me silaka beto mpi luzingu ya kitoko na bilumbu ke kwisa!

12. Inki mutindu Yehowa sadisaka Kaini mpi Baruki?

¹² Ntangu Yehowa monaka nde Kaini ke zola kusala diambu mosi ya mbi kibeni, yandi sadisaka Kaini ntangu yandi yulaka yandi nde: ‘Sambu na nki nge me wa makasi? Sambu na nki nge me kanga ilungi? Kana nge sala mbote keti mono ta ndima nge ve?’ (Kuyantika 4:6, 7) Kaini buyaka lusadisu yina Yehowa pesaka yandi, yo yina yandi niokwamaka na malanda ya diambu ya mbi yina yandi salaka. (Kuyantika 4:11-13) Kilumbu ya nkaka, Yehowa monaka nde Baruki vandaka ti mabanza ya mbi yina vandaka kulembisa yandi nitu. Yo yina Yehowa zabisaka Baruki nde bangindu na yandi kele ya mbi mpi nde yandi fwete soba yo. Baruki ndimaka ndongisila ya Yehowa mpi yo sadisaka yandi na kuguluka.​—Yeremia 45:2-5.

13. Inki mambu bansadi ya kwikama ya Yehowa longukaka na bampasi yina bo kutanaka ti yo?

¹³ Yehowa ke twadisaka beto mpi yandi ke pesaka beto disipline sambu yandi ke zolaka beto. Yandi ke sungikaka beto ve kaka ntangu mambu me beba, kansi yandi ke longaka beto mpi. (Baebreo 12:6) Na Biblia, beto ke tangaka masolo ya bansadi ya kwikama ya Yehowa yina yandi sadisaka sambu na kukuma bantu ya mbote. Mu mbandu, Yozefi, Moize, mpi Davidi kutanaka ti mambu ya mpasi kibeni. Yehowa sadisaka bo na bantangu yina ya mpasi. Mpi mambu yina bo longukaka na bampasi yina bo kutanaka ti yo sadisaka bo na nima ntangu Yehowa pesaka bo mikumba ya nene. Masolo ya Biblia yina ke monisaka mutindu Yehowa sadisaka mpi longaka bansadi na yandi, ke ndimisaka beto nde, ya kieleka yandi ke zolaka beto.​—Tanga Bingana 3:11, 12.

14. Kana beto me sala diambu mosi ya mbi, inki mutindu Yehowa ke monisilaka beto zola?

¹⁴ Ata ntangu beto ke salaka diambu mosi ya mbi, Yehowa ke landaka kumonisila beto zola. Kana beto me ndima disipline na yandi mpi me balula ntima, yandi ta lolula beto “na luzolo yonso.” (Yezaya 55:7) Yo ke tendula nki? Mambu yina Davidi tubaka sambu na kikalulu ya Yehowa ya kulolula ke monisa nde Yehowa kele Tata yina ke lolulaka, Davidi tubaka nde: “Yandi ke wilaka mono mawa sambu na masumu na mono, yandi ke landaka yo diaka ve; yandi ke belulaka bamaladi na mono yonso, yandi ke katulaka mono na lufwa; yandi ke yika mono kiese mingi na kuzola ya yandi ke zolaka mono ti mawa ya yandi ke wilaka mono; mutindu este kele ntama na weste, mutindu yo yina mpi yandi ke losa ntama masumu na beto.” (Nkunga 103:3, 4, 12) Yehowa ke pesaka beto disipline mpi ke twadisaka beto na mitindu mingi. Keti nge kele ya kuyilama na kusala bansoba yina me fwana? Yibuka ntangu yonso nde, Yehowa ke pesaka beto disipline sambu yandi ke zolaka beto.​—Nkunga 30:6.

15. Inki kele mutindu ya nkaka yina Yehowa ke monisilaka beto zola?

¹⁵ Tata ya zola ke taninaka dibuta na yandi na bigonsa. Yehowa, Tata na beto ke taninaka beto mpi na bigonsa. Muyimbi-bankunga tubaka sambu na Yehowa nde: “Yandi ke kebaka luzingu ya bantu na yandi, yandi ke gulusaka bo na maboko ya bantu ya mbi.” (Nkunga 97:10) Simba diambu yai: Kaka mutindu nge ke taninaka meso na nge nswalu na ntwala ya kigonsa sambu nge ke bakaka yo na mbalu, Yehowa ke taninaka mpi nswalu bansadi na yandi sambu yandi ke bakaka bo na mbalu.​—Tanga Zekaria 2:8.

16, 17. Inki mutindu Yehowa me taninaka bansadi na yandi ya ntangu ya ntama mpi ya bilumbu na beto?

¹⁶ Yehowa taninaka bansadi na yandi ya ntangu ya ntama mpi yandi ke landaka kutanina bansadi na yandi ya bilumbu na beto na nsadisa ya bawanzio na yandi. (Nkunga 91:11) Wanzio mosi fwaka basoda ya Asiria 185 000 na mpimpa mosi mpi yandi gulusaka bansadi ya Nzambi. (2 Bantotila 19:35) Na mvu-nkama ya ntete, bawanzio gulusaka Piere, Polo mpi bantu ya nkaka na boloko. (Bisalu 5:18-20; 12:6-11) Ntama mingi ve, mvita mosi ya nene salamaka na insi mosi na Afrika. Mavwanga kotaka na insi yango sambu bantu vandaka kunwana, kuyiba, kuladisa bankento na kingolo-ngolo mpi kufwa bantu. Bampangi mingi vidisaka bima na bo yonso, kansi ata mpangi mosi ve fwaka. Bo yonso bakisaka nde Yehowa ke zolaka bo mpi ke kudibanzaka sambu na bo. Bo vandaka kaka na kiese ata bo kutanaka ti mambu yina ya mpasi. Biro ya Bambangi ya Yehowa yina ke twadisaka kisalu na ntoto ya mvimba tindaka mpangi mosi na kukwenda kutala bo, ntangu yandi kumaka kuna, yandi yulaka bo kana bo kele mbote, bo tubaka nde: “Na nsadisa ya Yehowa, beto yonso kele mbote!”

¹⁷ Ya kieleka, bansadi ya nkaka ya Yehowa, mu mbandu Etiene mpi balongoki ya nkaka, fwaka sambu na kwikama na bo. Bantangu ya nkaka, Yehowa ke pesaka nzila nde mambu ya mbi kukumina bansadi na yandi. Kansi, yandi ke taninaka bansadi na yandi na kimvuka ntangu yandi ke kebisaka bo na mitambu yina Satana ke sadilaka sambu na kubwisa bo. (Baefezo 6:10-12) Balukebisu yai ya Yehowa kele na Biblia mpi na mikanda yina organizasio na yandi ke basisaka. Mu mbandu, beto ke bakaka balukebisu na yina me tala Internet, zola ya mbongo, bafilme, mikanda mpi bansaka ya mansoni mpi ya mubulu. Ya kieleka, Yehowa ke zolaka beto mpi ke taninaka beto.

18. Inki mutindu nge ke kudiwaka sambu na zola yina Yehowa ke monisilaka nge?

¹⁸ Ntangu Moize yindulaka bamvula yonso yina yandi sadilaka Yehowa, yandi ndimaka nde Yehowa ke zolaka yandi. Moize tubaka nde: “Konso suka songa beto nde nge ke zolaka beto mingi, mpidina beto ta zaba kuyimba bankunga [mpi] kuvanda na kiese na luzingu na beto yonso.” (Nkunga 90:14) Yehowa me sakumunaka beto na mutindu yandi me sadisaka beto na kubakisa nde yandi ke zolaka beto. Beto kele ti dibaku ya nene kibeni sambu Yehowa ke zolaka beto! Beto ke kudiwaka bonso ntumwa Yoane, yina tubaka nde: “Beno tala mutindu ya zola yina Tata me monisilaka beto.”​—1 Yoane 3:1.