Beto Bakaka Lukanu ya Kuvanda ti Luzingu ya Kukonda Mindondo

Madián ti Marcela kele Bambangi ya Yehowa. Bo vandaka ti luzingu mosi ya mbote kibeni na Medellín na Colombie. Madián vandaka kusala kisalu mosi ya bo vandaka kufuta yandi mbote mpi kisalu yango vandaka kusadisa bo na kuzinga na nzo mosi ya kitoko mpenza. Kansi kima mosi pusaka bo na kutadila diaka mambu yina bo vandaka kutula na kisika ya ntete mpi kisika yina bo vandaka kutula kisalu ya Yehowa na luzingu na bo. Bo ke tuba nde: “Na 2006, beto kwendaka na lukutakanu ya sipesiali. Yo vandaka ti ntu-diambu “Vanda ti Disu ya Petepete.” Na badiskure mingi, bo vandaka kumonisa nde kuvanda ti luzingu ya kukonda mindondo kele mfunu sambu na kusadila Nzambi mbote-mbote. Ntangu beto vandaka kuvutuka, beto bakisaka nde beto vandaka kusala mambu mutindu ya nkaka: beto vandaka kusumba bima mingi kukonda kuyindula mpi beto vandaka mpi ti bamfuka mingi ya kufuta.”

Ntangu Madián ti Marcela bakisaka mambu yina, bo yantikaka kusala na mpila nde bo kuma kunata luzingu ya kukonda mindondo. Bo ke tuba nde: “Beto kumaka kusala badepanse fioti. Beto kwendaka kukota na nzo mosi ya fioti, beto tekaka vwatire na beto mpi beto sumbaka kamoto (vespa).” Bo vandaka kukwenda diaka ve na bisika yina bantu ya mumbongo ke tekaka bima sambu bo bwa ve na mutambu ya kulanda kusumba bima. Bo yantikaka kulutisa ntangu mingi na kisalu ya kulonga bantu ya nkaka Biblia. Diaka, bo kumaka banduku ya bampangi yina vandaka kulonga mingi kibeni nsangu ya mbote (bapasudi-nzila ya nene) mpi ya vandaka kusadila Yehowa ti kikesa.a

Kukonda kusukinina, Madián ti Marcela bakaka lukanu ya kusadila diaka Yehowa mingi. Bo bakala lukanu ya kukwenda kuzinga na bwala mosi, kisika yina dibundu mosi ya fioti vandaka ti mfunu ya lusadisu. Sambu na yo, yo lombaka nde Madián kuyambula kisalu na yandi. Mfumu na yandi ya kisalu vandaka ve kubakisa lukanu yina Madián bakaka. Yo yina, Madián songaka yandi nde: “Nge ke zwaka mbongo mingi, kansi, keti nge ke vandaka na kiese?” Mfumu na yandi yai ya vandaka nkento tubaka nde ve, sambu yandi vandaka ti mambu mingi ya yandi vandaka ve kukuka kumanisa. Yo yina Madián songaka yandi nde: “Kima ya kele mfunu kele ve, mingi ya mbongo yina beto ke zwaka, kansi kuzwa kima yina lenda pesa beto kibeni kiese. Kima ya ke pesaka beto kiese, mono ti nkento na mono, kele kulonga bantu ya nkaka mambu ya Nzambi. Beto ke zola kuvanda diaka na kiese ya mingi. Yo yina beto ke zola kusala kisalu yango bantangu mingi.”

Madián ti Marcela monaka nde kusumba bima mingi mpi kubaka bamfuka mingi vandaka kaka kunatila bo bampasi mingi na luzingu. Yai bamvula 13 banda bo ke sadisa mabundu ya kele ti mfunu ya lusadisu ya mingi na ndambu ya nordi-westi ya Colombie. Kansi kulonga bantu mambu ya Nzambi vandaka kupesa bo kibeni kiese.