Lusadisu Yina Lenda Pesa Beto Ngolo ya Kutelama

Bantangu ya nkaka, bampasi mpi mimekamu lenda lutila beto kibeni, yo lenda lembisa beto, mpi yo lenda sala nde beto landa kunwana. Kansi, na bantangu yina ya mpasi, beto lenda zwa kikesa kana beto ke yindula mambu ya ke pesa kikesa yina kele na mbona-meso ya Ezekiele ya ke tubila mutindu Nzambi ta vutula lusambu ya bunkete. Sambu na nki? Mbikudulu yai ke longa beto nde Nzambi yina kele ti ngolo ya kupesa mikwa ya kufwa luzingu lenda pesa beto kibeni ngolo yina beto kele na yo mfunu sambu na kunwana ti bampasi, nkutu ata bampasi yina bantu ke mona nde beto lenda nunga ve.—Tanga Nkunga 18:29; Bafil. 4:13.

Beto vila ve nde bamvula mingi na ntwala ya bilumbu ya Ezekiele, profete Moize tubaka nde Yehowa ke vandaka ve kaka ti ngolo kansi yandi ke vandaka mpi ti mpusa ya kusadila ngolo na yandi sambu na mambote ya bansadi na yandi. Moize sonikaka nde: “Nzambi kele kitininu katuka bantangu ya ntama, maboko na yandi ya kimakulu kele na nsi na nge.” (Kul. 33:27) Ee, beto ke ndima kibeni nde kana beto ke sosa lusadisu ya Yehowa na bantangu ya mpasi, yandi ta tula maboko na yandi ya zola na nsi na beto, ta tedimisa beto na mawete yonso, mpi ta pesa beto lusadisu yina ta pesa beto ngolo ya kutelama.—Ezek. 37:10.