Onhumhwafo yaJakob
4 Oshike tashi etifa omashilafano nomalwoodi mokati keni? Mbela itaa etwa komahalo eni mai opambelela oo taa pangele omalutu eni?* 2 Osho mwa hala ihamu shi pewa. Omu tondafane* nomu na efupandubo, ashike inamu dula okumona sha. Ohamu kondjifafana nokulwifafana. Inamu mona sha molwaashi inamu pula sha. 3 Ngeenge tamu pula sha, ihamu shi pewa molwaashi ohamu indile nomalinyengotomheno a puka, opo mu wanife po omahalo eni opambelela.
4 Ovanyoni vohombo nye,* mbela kamu shi shii kutya ngeenge omwa pange oukaume nounyuni otamu ningi ovatondi vaKalunga? Onghee hano, keshe oo a hala okukala kaume kounyuni ote liningi omutondi waKalunga. 5 Ile otamu diladila kutya omushangwa owa popya oinima yongaho ou tau ti: “Oikala yondubo oyo i li mufye ohai tu xwaxwameke tu kale twa hala keshe shimwe”? 6 Kalunga oku na efilonghenda linene. Omushangwa owa ti: “Kalunga oha katukile onghatu ovalinenepeki, ndele oha file onghenda ovalininipiki.”
7 Onghee hano, dulikeni kuKalunga; kondjifeni Ondiaboli, ndele tai mu i onhapo. 8 Eheneni popepi naKalunga, opo nee ota ka ehena popepi nanye. Yelifeni omake eni nye ovalunde; yelifeni omitima deni nye ovanamitimambali. 9 Kaleni mwa nyika oluhodi nokulila. Okuyola kweni naku shituke oluhodi, nehafo leni nali shituke enyeme. 10 Lininipikeni koshipala shaJehova, opo e mu nenepeke.
11 Ovamwatate, efeni po okupopilafana mowii. Keshe ou ha popile mowii noha tokola omumwaxe ota sheke nota tokola omhango. Ngeenge oho tokola omhango, kungaho iho dulika kuyo, ndele ou li omutokoli. 12 Oku na ashike Omuyandjimhango nOmutokoli umwe aeke, oo ta dulu okuxupifa nokuhanauna. Ndele oove lyelye eshi to tokola mukweni?
13 Pwilikineni nye ovo hamu ti: “Ohatu i koshilando shonhumba nena ile mongula, hatu ka kala ko omudo aushe, opo tu ka landife tu mone oimaliwa,” 14 ofimbo muhe shii kutya oshike tashi ke mu ningilwa mefiku lomongula. Osheshi omwa fa omwifi oo hau holoka po okafimbo kanini, ndele tau kana po. 15 Ponhele yaasho, omu na okutya: “Ngeenge Jehova e shi hala, ohatu kala nomwenyo, ndele hatu ningi eshi naashinya.” 16 Paife ohamu litange omolwounhwa weni, ashike elitango la tya ngaho kaliwa. 17 Onghee hano, ngeenge ope na ou e shii okulonga ouwa, ndele ite u longo, ota nyono.