Мұсаның 5-жазбасы
11 Ехоба Құдайларыңды сүйіңдер+, әрқашан оның алдындағы міндеттеріңді, сондай-ақ оның нұсқауларын, шешімдері мен заңдарын орындаңдар. 2 Біліп алыңдар, мен бүгін балаларыңа емес, сендерге сөйлеп тұрмын. Олар Ехоба Құдайларыңның қалай тәрбиелегенін+, сондай-ақ оның ұлылығын+, қуатты да құдіретті қолын+ көрген де емес, өз бастарынан кешірген де емес. 3 Олар оның Мысыр патшасы перғауынға және бүкіл еліне жасаған кереметтері мен істерін+, 4 сендерді қуып келе жатқан Мысырдың күллі әскерін, салт аттылары мен соғыс арбаларын Қызыл теңіздің суына батырып, Ехобаның оларды түгелімен жойғанын+ көрген жоқ. 5 Осы жерге жеткенше, Құдайларың сендерді шөл далада қамқорлап келгенін де, 6 рубен руынан шыққан Елияптың ұлдары Датан мен Әбирамға не істегенін, яғни бүкіл Исраилдің көзінше жер аранын ашып, оларды үй ішімен, шатырларымен, малымен және соңдарына ергендермен қоса жұтып қойғанын+ да көрген жоқ. 7 Ал сендер Ехобаның осы ұлы істеріне куә болдыңдар.
8 Мен бүгін сендерге беріп отырған бүкіл заңды орындайтын болыңдар. Сонда күш-қуатқа ие боласыңдар және арғы бетке өтіп, сол жерді иемденесіңдер. 9 Сондай-ақ Ехоба ата-бабаларың мен оның ұрпақтарына беруді уәде еткен өлкеде+, ағы мен балы ағыл-тегіл мол жерде+, ұзақ жасайсыңдар+.
10 Иеліктеріңе алатын жер өздерің шыққан Мысыр жеріне ұқсамайды. Сендер ол жақта егіндіктеріңді бақша суғарғандай* ауыр еңбектеніп суғаратын едіңдер. 11 Ал арғы беттен иемденетін жерлерің — таулы әрі жазықты+, жаңбырмен суғарылатын+, 12 Ехоба Құдайларың өз қамқорлығына алған жер. Оны Ехоба Құдайларың жылдың басынан аяғына дейін жіті бақылап тұрады.
13 Егер сендер бүгін мен бұйырып отырған заңдарға барынша мойынсұнатын және Құдайларың Ехобаны сүйіп, оған бар жүректеріңмен, бүкіл жан-тәндеріңмен қызмет ететін болсаңдар+, 14 ол* жерлеріңе күзгі және көктемгі жаңбырды өз мезгілінде жауғызады. Сонда астық та, жаңа шарап та, май да болады+. 15 Ол малдарың жейтін дала шөбін қалың етіп өсіреді, өздерің де тойына ішіп-жейтін боласыңдар+. 16 Бірақ байқаңдар, азғырылып, басқа құдайларға тағзым етіп, табынып жүрмеңдер+. 17 Әйтпесе Ехобаның қаһарына ұшырайсыңдар. Ол аспанды жауып тастайды, сонда жаңбыр жаумайды+, жерлерің өнім бермейді. Ал өздерің Ехоба бергелі жатқан шұрайлы жерден тез-ақ құрып жоқ боласыңдар+.
18 Мен жеткізген осы сөздерді жүректеріңе ұялатып, көңілдеріңе түйіп алыңдар. Олар қолдарыңа байланған белгі, маңдайларыңа таңылған ескертпе іспетті болсын+. 19 Оларды балаларыңа үйретіп, үйде отырғанда да, жол жүргенде де, жатқанда да, тұрғанда да айтатын болыңдар+. 20 Оларды есіктеріңнің жақтауларына, қалаларыңның қақпаларына жазып қойыңдар. 21 Сонда Ехоба ата-бабаларыңа беремін деп уәде еткен мекенде+ өздерің де, ұрпақтарың да ұзақ, аспан жер үстінде қанша тұрса сонша жасайсыңдар+.
22 Мен сендерге айтқан осы заңдарды бұлжытпай орындасаңдар, Ехоба Құдайларыңды сүйіп+, оның жолымен жүріп, оған етене жақын болсаңдар+, 23 Ехоба алдарыңда жатқан мына халықтарды түгел қуып шығады+. Сонда өздеріңнен әлдеқайда көп әрі күшті сол халықтардың жерін тартып аласыңдар+. 24 Аяқтарың басқан жердің бәрі сендердікі болады+. Өлкелерің шөл даладан Ливанға дейін, Евфрат өзенінен батыстағы теңізге* дейін созылып жатады+. 25 Сендерге ешкім қарсы келе алмайды+. Ехоба Құдайларың, өзі уәде еткендей, қайда барсаңдар да, сол елдің күллі жұртын сендерден шошытып, үрейлерін ұшырады+.
26 Міне, бүгін сендерге бата мен қарғыс ұсынып отырмын+: 27 егер мен сендерге бүгін бұйырған Ехоба Құдайларыңның заңдарына мойынсұнсаңдар, батаға кенелесіңдер+. 28 Ал егер Ехоба Құдайларыңның заңдарына мойынсұнбай, бүгін көрсеткен жолдан тайып, өздеріңе бейтаныс басқа құдайларға бет бұрсаңдар, қарғысқа ұшырайсыңдар+.
29 Ехоба Құдайларың сендерді иемденетін жерлеріңе апарғанда, Гаризим тауының етегінде тұрып бата, Евал тауының етегінде тұрып қарғыс жариялаңдар+. 30 Бұл таулар Иорданның арғы бетінде, яғни батыс жағында, Арабада тұратын қанахандықтардың жерінде, Ғылғалдың қарсы бетінде, үлкен ағаштар өсетін Моренің маңында+ емес пе?! 31 Ехоба Құдайларың бергелі жатқан жерді иемдену үшін, сендер Иорданның арғы бетіне өткелі тұрсыңдар+. Сол жерді иеленіп, жайғасып алғанда, 32 мен бүгін жариялаған нұсқаулар мен шешімдердің бәрін ұқыптылықпен орындайтын болыңдар+.