របៀបដែលវិភាគទានរបស់អ្នកបានត្រូវប្រើ
ការមានអ្វីដែលលើសពីសេចក្ដីត្រូវការ អាចបំពេញការខ្វះខាត
ថ្ងៃទី១ ខែតុលា ឆ្នាំ២០២០
សាក្សីព្រះយេហូវ៉ាធ្វើកិច្ចការសំខាន់ដើម្បីជួយមនុស្សនៅជាង២០០ប្រទេស។ ប៉ុន្តែក្នុងចំណោមប្រទេសទាំងនោះ មានតែ៣៥ប្រទេសប៉ុណ្ណោះដែលទទួលវិភាគទានស្មើនឹងចំនួនដែលសាក្សីព្រះយេហូវ៉ានៅប្រទេសនោះចំណាយ។ តើប្រទេសឯទៀតដែលមានការខ្វះខាតត្រូវធ្វើយ៉ាងដូចម្ដេច?
គណៈអភិបាលនៃសាក្សីព្រះយេហូវ៉ាបានគិតពិចារណាអំពីអ្វីដែលសាក្សីព្រះយេហូវ៉ានៅទូទាំងពិភពលោកត្រូវការ ដើម្បីគោរពប្រណិប័តន៍ព្រះយេហូវ៉ានិងដើម្បីផ្សព្វផ្សាយដំណឹងល្អ។ ពួកគាត់រៀបចំថវិកាសម្រាប់សេចក្ដីត្រូវការតាមការិយាល័យសាខានីមួយៗ។ បើការិយាល័យសាខាណាមួយមិនត្រូវការប្រើថវិកាទាំងអស់ដែលពួកគេបានទទួល នោះពួកគេនឹងប្រើថវិកាដែលនៅសល់ដើម្បីជួយបងប្អូននៅប្រទេសណាដែលមានការខ្វះខាត។ ការរៀបចំនេះគឺដូចគ្នានឹងគំរូរបស់គ្រិស្តសាសនិកនៅសតវត្សរ៍ទី១ដែលបានជួយគ្នាទៅវិញទៅមក‹ដើម្បីឲ្យបងប្អូនដែលមានអ្វីលើសពីសេចក្ដីត្រូវការ អាចបំពេញការខ្វះខាតរបស់បងប្អូនឯទៀត›។ (កូរិនថូសទី២ ៨:១៤) ពួកគេប្រើថវិកាដែលលើសពីសេចក្ដីត្រូវការរបស់ពួកគេ ដើម្បីបំពេញការខ្វះខាតរបស់គ្រិស្តសាសនិកឯទៀត។
តើបងប្អូនរបស់យើងដែលបានទទួលថវិកាពីការិយាល័យសាខាឯទៀតមានអារម្មណ៍យ៉ាងណា? ជាឧទាហរណ៍ នៅប្រទេសតង់សានី មានមនុស្សជាង៥០ភាគរយដែលរស់នៅដោយមានលុយតិចជាងពីរដុល្លារក្នុងមួយថ្ងៃ ហើយថវិកាពីការិយាល័យសាខាឯទៀតបានត្រូវប្រើដើម្បីជួសជុលសាលប្រជុំរបស់ក្រុមជំនុំម៉ាហ្វីងហ្កា។ ក្រុមជំនុំនោះបានសរសេរថា៖«តាំងពីសាលប្រជុំយើងបានត្រូវជួសជុលហើយ មានមនុស្សជាច្រើនបានចូលរួមកិច្ចប្រជុំរបស់យើង! យើងពិតជាដឹងគុណអង្គការព្រះយេហូវ៉ានិងបងប្អូនរួមជំនឿនៅទូទាំងពិភពលោកណាស់ ចំពោះចិត្តសប្បុរសរបស់ពួកគេ ដែលបានជួយយើងឲ្យមានកន្លែងគោរពប្រណិប័តន៍ដ៏ស្រស់ស្អាតនេះ»។
ដោយសារជំងឺកូវីដ-១៩ បងប្អូនរបស់យើងខ្លះនៅប្រទេសស្រីលង្កាមិនមានអាហារគ្រប់គ្រាន់នោះទេ។ បងស្រីអេម៉ារ៉ា ហ្វេណានដូនិងអេណុស ដែលជាកូនប្រុសរបស់គាត់ក៏ដូចគ្នាដែរ។ ប៉ុន្តែ ដោយសារមានវិភាគទានពីប្រទេសផ្សេងៗ ពួកគេបានទទួលជំនួយដែលពួកគេត្រូវការ។ ពួកគេបានធ្វើកាតមួយដោយសរសេរថា៖«យើងអរគុណបងប្អូនណាស់ដែលបានបង្ហាញសេចក្ដីស្រឡាញ់ក្នុងអំឡុងគ្រាលំបាកនេះ។ យើងពិតជាសប្បាយរីករាយណាស់ដែលយើងនៅក្នុងក្រុមគ្រួសាររបស់ព្រះយេហូវ៉ា ហើយយើងនឹងបន្តអធិដ្ឋានទៅព្រះយេហូវ៉ាឲ្យជួយបងប្អូនរបស់យើងក្នុងគ្រាចុងក្រោយបង្អស់នេះ»។
អេម៉ារ៉ានិងអេណុសហ្វេណានដូ
មិនថាបងប្អូនរបស់យើងរស់នៅកន្លែងណានោះទេ ពួកគេចង់ចែករំលែកអ្វីដែលពួកគេមាន។ ជាឧទាហរណ៍ ប្អូនប្រុសអេណុសធ្វើប្រអប់វិភាគទានតូចមួយដើម្បីសន្សំលុយឲ្យក្រុមគ្រួសារឯទៀតដែលត្រូវការជំនួយ។ បងស្រីក្វាដាលូពី អាល់វ៉ារែសក៏បានបង្ហាញចិត្តសប្បុរសដូច្នេះដែរ។ គាត់រស់នៅក្នុងប្រទេសម៉ិកស៊ិក ដែលមនុស្សភាគច្រើនទទួលប្រាក់ខែតិចបំផុត ហើយមិនទៀងទាត់ទេ។ ប៉ុន្តែ គាត់ដាក់វិភាគទានតាមដែលអាចធ្វើបាន។ គាត់សរសេរថា៖«ខ្ញុំដឹងគុណព្រះយេហូវ៉ាចំពោះគុណធម៌និងសេចក្ដីស្រឡាញ់ដ៏ស្មោះត្រង់របស់លោក។ ខ្ញុំដឹងថាវិភាគទានរបស់ខ្ញុំនឹងត្រូវបូកបញ្ចូលជាមួយវិភាគទានរបស់បងប្អូនឯទៀត ហើយអាចផ្ដល់ជំនួយដល់បងប្អូនដែលត្រូវការ»។
ការិយាល័យសាខាជាច្រើនសប្បាយក្នុងការផ្ញើថវិកាទៅកន្លែងផ្សេងៗដែលមានសេចក្ដីត្រូវការ។ បងប្រុសអានថូនី ខាវ៉ាហូដែលជាគណៈកម្មាធិការការិយាល័យសាខាប្រទេសប្រេស៊ីលនិយាយថា៖«អស់ជាច្រើនឆ្នាំ យើងត្រូវការថវិកាពីប្រទេសផ្សេងៗដើម្បីគាំទ្រកិច្ចការក្នុងប្រទេសរបស់យើង។ ដោយសារជំនួយទាំងនេះ យើងឃើញការរីកចម្រើនយ៉ាងអស្ចារ្យ។ សព្វថ្ងៃនេះ យើងលែងមានការខ្វះខាតទៀត ហើយយើងមានឯកសិទ្ធិក្នុងការជួយអ្នកឯទៀត។ បងប្អូនរបស់យើងនៅប្រទេសប្រេស៊ីលគិតអំពីកិច្ចការផ្សព្វផ្សាយនៅទូទាំងពិភពលោក ហើយព្យាយាមជួយអស់ពីសមត្ថភាព»។
តើអ្វីជាវិធីដ៏ល្អបំផុតដែលសាក្សីព្រះយេហូវ៉ាអាចជួយបងប្អូនដែលខ្វះខាត? គឺដោយដាក់វិភាគទានដើម្បីគាំទ្រកិច្ចការរបស់យើងទូទាំងពិភពលោក មិនមែនដោយផ្ញើលុយទៅការិយាល័យសាខានៅប្រទេសណាមួយដោយផ្ទាល់នោះទេ។ យើងអាចធ្វើដូច្នេះដោយដាក់វិភាគទានក្នុងប្រអប់វិភាគទានសម្រាប់«កិច្ចការទូទាំងពិភពលោក»នៅសាលប្រជុំ ឬដាក់វិភាគទានតាមគេហទំព័រdonate.jw.org។ យើងពិតជាដឹងគុណបងប្អូនណាស់សម្រាប់វិភាគទានទាំងអស់របស់បងប្អូន។