អត្ថបទសិក្សា ១៤
តើអ្នកកំពុងបំពេញកិច្ចបម្រើរបស់អ្នកគ្រប់ជំពូកឬទេ?
«[ចូរ]បំពេញកិច្ចការជាអ្នកផ្សព្វផ្សាយដំណឹងល្អ ហើយបំពេញកិច្ចបម្រើរបស់អ្នកគ្រប់ជំពូក»។—២ធី. ៤:៥
ចម្រៀងលេខ៥៧ ចូរផ្សព្វផ្សាយដល់មនុស្សគ្រប់ប្រភេទ
សេចក្ដីសង្ខេបa
ក្រោយពីលោកយេស៊ូបានត្រូវប្រោសឲ្យរស់ឡើងវិញ លោកបានទៅជួបពួកអ្នកកាន់តាមលោក ហើយបានប្រាប់ពួកគេឲ្យ‹ទៅបង្រៀនមនុស្សគ្រប់ជាតិសាសន៍ឲ្យក្លាយទៅជាអ្នកកាន់តាមលោក› (សូមមើលវគ្គ១)
១. តើអ្នកបម្រើទាំងអស់របស់ព្រះចង់ធ្វើអ្វី ហើយហេតុអ្វី? (សូមមើលរូបភាពនៅក្រប)
លោកយេស៊ូគ្រិស្តបានបង្គាប់អ្នកកាន់តាមលោកថា៖ «ចូរទៅបង្រៀនមនុស្សគ្រប់ជាតិសាសន៍ឲ្យក្លាយទៅជាអ្នកកាន់តាមខ្ញុំ»។ (ម៉ាថ. ២៨:១៩) អ្នកបម្រើដ៏ស្មោះត្រង់ទាំងអស់របស់ព្រះចង់រៀនអំពីរបៀប‹បំពេញកិច្ចបម្រើនេះគ្រប់ជំពូក›ដែលពួកគេបានត្រូវបង្គាប់ឲ្យធ្វើ។ (២ធី. ៤:៥) កិច្ចការនេះគឺសំខាន់ជាង មានប្រយោជន៍ជាង និងបន្ទាន់ជាងកិច្ចការណាទាំងអស់ក្នុងជីវិត។ ប៉ុន្តែ ទោះជាយើងចង់ផ្សព្វផ្សាយច្រើនក្ដី ជួនកាលយើងពិបាកធ្វើដូច្នេះ។
២. តើយើងប្រឈមមុខនឹងការពិបាកអ្វីខ្លះក្នុងការបំពេញកិច្ចបម្រើរបស់យើង?
២ មានកិច្ចការដ៏សំខាន់ផ្សេងទៀតដែលតម្រូវឲ្យយើងចំណាយពេលវេលានិងកម្លាំង។ យើងប្រហែលជាត្រូវធ្វើការច្រើនម៉ោងជារៀងរាល់ថ្ងៃ ដើម្បីផ្គត់ផ្គង់សេចក្ដីត្រូវការរបស់ខ្លួននិងក្រុមគ្រួសារ។ យើងប្រហែលជាមានការពិបាកដោយសារយើងត្រូវបំពេញភារកិច្ចផ្សេងទៀតក្នុងក្រុមគ្រួសារ ឬក៏យើងប្រហែលជាឈឺ ធ្លាក់ទឹកចិត្ត ឬមានបញ្ហាផ្សេងៗដែលមកពីភាពចាស់ជរា។ ដូច្នេះ តើយើងអាចបំពេញកិច្ចបម្រើរបស់យើងគ្រប់ជំពូកយ៉ាងដូចម្ដេច ពេលយើងកំពុងតយុទ្ធនឹងការពិបាកបែបនេះ?
៣. តើយើងអាចយល់យ៉ាងណាពីប្រសាសន៍របស់លោកយេស៊ូនៅម៉ាថាយ ១៣:២៣?
៣ បើយើងមិនអាចចំណាយពេលច្រើនក្នុងកិច្ចបម្រើព្រះយេហូវ៉ាដោយសារកាលៈទេសៈរបស់យើង យើងមិនគួរធ្លាក់ទឹកចិត្តឡើយ។ លោកយេស៊ូដឹងថាយើងមិនអាចបង្កើតផលនៃរាជាណាចក្រដូចៗគ្នាទេ។ (សូមអាន ម៉ាថាយ ១៣:២៣) ព្រះយេហូវ៉ាឲ្យតម្លៃយ៉ាងខ្លាំងចំពោះគ្រប់ការទាំងអស់ដែលយើងធ្វើក្នុងកិច្ចបម្រើលោក ដរាបណាអ្វីដែលយើងធ្វើគឺអស់ពីសមត្ថភាព។ (ហេ. ៦:១០-១២) ប៉ុន្តែ យើងប្រហែលជាមានអារម្មណ៍ថាយើងអាចធ្វើច្រើនជាង។ ក្នុងអត្ថបទនេះ យើងនឹងពិចារណាអំពីរបៀបដែលយើងអាចចាត់ទុកកិច្ចបម្រើផ្សាយថាជាអ្វីដ៏សំខាន់បំផុតក្នុងជីវិត រក្សាជីវិតឲ្យសាមញ្ញ និងបង្កើនភាពប៉ិនប្រសប់ក្នុងការផ្សព្វផ្សាយនិងការបង្រៀន។ ប៉ុន្តែ តើការបំពេញកិច្ចបម្រើរបស់យើងគ្រប់ជំពូកមានន័យយ៉ាងណា?
៤. តើការបំពេញកិច្ចបម្រើរបស់យើងគ្រប់ជំពូកមានន័យយ៉ាងណា?
៤ បើនិយាយឲ្យស្រួលយល់ ការបំពេញកិច្ចបម្រើរបស់យើងគ្រប់ជំពូកមានន័យថាយើងត្រូវផ្សព្វផ្សាយនិងបង្រៀនមនុស្សឲ្យបានច្រើនបំផុតតាមដែលអាចធ្វើបាន។ ប៉ុន្តែ នេះមិនគ្រាន់តែរួមបញ្ចូលចំនួនម៉ោងដែលយើងផ្សព្វផ្សាយប៉ុណ្ណោះទេ បំណងចិត្តរបស់យើងក្នុងកិច្ចបម្រើផ្សាយក៏សំខាន់ចំពោះព្រះយេហូវ៉ាដែរ។ ដោយសារយើងស្រឡាញ់ព្រះយេហូវ៉ានិងអ្នកជិតខាង យើងខំអស់ពីកម្លាំងកាយកម្លាំងចិត្តក្នុងកិច្ចបម្រើរបស់យើងជាគ្រិស្តសាសនិក។b (ម៉ាក. ១២:៣០, ៣១; កូឡ. ៣:២៣) ការបម្រើព្រះអស់ពីកម្លាំងកាយកម្លាំងចិត្តមានន័យថាយើងខំអស់ពីសមត្ថភាពក្នុងកិច្ចបម្រើលោក។ ពេលយើងឲ្យតម្លៃចំពោះឯកសិទ្ធិផ្សព្វផ្សាយ យើងខំអស់ពីសមត្ថភាពដើម្បីប្រាប់មនុស្សច្រើនបំផុតអំពីដំណឹងល្អតាមដែលអាចធ្វើបាន។
៥-៦. សូមលើកឧទាហរណ៍មួយដែលបង្ហាញថាបុគ្គលម្នាក់ដែលមិនសូវមានពេល អាចចាត់ទុកកិច្ចបម្រើផ្សាយថាជាអ្វីដ៏សំខាន់បំផុត។
៥ សូមស្រមៃគិតអំពីបុរសវ័យក្មេងម្នាក់ដែលចូលចិត្តលេងហ្គីតា។ គាត់លេងភ្លេងនៅពេលណាក៏ដោយឲ្យតែគាត់អាចមានឱកាសលេង។ ក្រោយមក គាត់ធ្វើការជាអ្នកលេងហ្គីតានាចុងសប្ដាហ៍នៅក្នុងហាងមួយ។ ប៉ុន្តែ ចំណូលដែលមកពីការលេងភ្លេងគឺមិនគ្រប់គ្រាន់សម្រាប់ចំណាយផ្សេងៗរបស់គាត់ទេ។ ដូច្នេះ គាត់ធ្វើការមួយទៀតជាអ្នកគិតលុយនៅហាងលក់ទំនិញ ចាប់ពីថ្ងៃច័ន្ទដល់ថ្ងៃសុក្រ។ ទោះជាគាត់ចំណាយពេលភាគច្រើនធ្វើការនៅហាងលក់ទំនិញក្ដី អ្វីដ៏សំខាន់បំផុតចំពោះគាត់គឺការលេងភ្លេង។ គាត់ចង់បង្កើនសមត្ថភាពរបស់គាត់ ហើយចង់មានអាជីពជាអ្នកលេងភ្លេងពេញពេល។ ប៉ុន្តែទម្រាំដល់ពេលនោះគាត់ស្វែងរកគ្រប់ឱកាសដើម្បីលេងភ្លេង ទោះជាគាត់អាចលេងបានតែមួយភ្លែតក្ដី។
៦ ស្រដៀងគ្នាដែរ អ្នកប្រហែលជាមិនអាចចំណាយពេលច្រើនក្នុងកិច្ចបម្រើផ្សាយដូចដែលអ្នកចង់ធ្វើនោះទេ។ ប៉ុន្តែ នេះជាកិច្ចការដែលអ្នកស្រឡាញ់។ អ្នកព្យាយាមបង្កើនសមត្ថភាពដើម្បីធ្វើឲ្យដំណឹងល្អជ្រាបចូលក្នុងចិត្តរបស់មនុស្សដែលអ្នកជួប។ ដោយសារអ្នកមានអ្វីៗជាច្រើនដែលអ្នកត្រូវធ្វើ អ្នកប្រហែលជាឆ្ងល់ថាតើតាមរបៀបណាអ្នកអាចចាត់ទុកកិច្ចបម្រើផ្សាយថាជាអ្វីដ៏សំខាន់បំផុតក្នុងជីវិតរបស់អ្នក?
របៀបចាត់ទុកកិច្ចបម្រើផ្សាយថាជាអ្វីដ៏សំខាន់បំផុត
៧-៨. តើយើងអាចមានចិត្តគំនិតដូចលោកយេស៊ូចំពោះកិច្ចបម្រើផ្សាយយ៉ាងដូចម្ដេច?
៧ លោកយេស៊ូបានទុកគំរូដ៏ល្អប្រសើរស្តីអំពីចិត្តគំនិតរបស់លោកចំពោះកិច្ចបម្រើផ្សាយ។ អ្វីដ៏សំខាន់បំផុតក្នុងជីវិតរបស់លោកគឺការប្រាប់អ្នកឯទៀតអំពីរាជាណាចក្ររបស់ព្រះ។ (យ៉ូន. ៤:៣៤, ៣៥) លោកបានធ្វើដំណើរដោយថ្មើរជើងអស់រាប់រយគីឡូម៉ែត្រដើម្បីផ្សព្វផ្សាយដល់មនុស្សឲ្យបានច្រើនបំផុត។ លោកប្រើគ្រប់ឱកាសដើម្បីនិយាយជាមួយនឹងមនុស្សទាំងនៅទីសាធារណៈទាំងនៅផ្ទះរបស់ពួកគេ។ លោកយេស៊ូចាត់ទុកកិច្ចបម្រើផ្សាយថាជាអ្វីដែលសំខាន់បំផុតក្នុងជីវិតរបស់លោក។
៨ យើងអាចយកតម្រាប់គ្រិស្តដោយប្រើគ្រប់ឱកាសដើម្បីប្រាប់មនុស្សអំពីដំណឹងល្អតាមដែលអាចធ្វើបាន ទោះជានៅពេលណានិងកន្លែងណាក៏ដោយ។ យើងសុខចិត្តធ្វើការលះបង់ផ្សេងៗដើម្បីយើងអាចផ្សព្វផ្សាយ។ (ម៉ាក. ៦:៣១-៣៤; ១ពេ. ២:២១) បងប្អូនខ្លះក្នុងក្រុមជំនុំអាចបម្រើជាអ្នកត្រួសត្រាយពិសេស អ្នកត្រួសត្រាយពេញពេល ឬអ្នកត្រួសត្រាយជំនួយ។ បងប្អូនខ្លះទៀតបានរៀនភាសាថ្មី ឬបានរើទៅតំបន់ដែលត្រូវការអ្នកផ្សាយច្រើនជាង។ ប៉ុន្តែ កិច្ចបម្រើផ្សាយជាច្រើនកំពុងសម្រេចដោយសារបងប្អូនជាអ្នកផ្សព្វផ្សាយធម្មតាដែលព្យាយាមអស់ពីសមត្ថភាពក្នុងកិច្ចការនោះ។ ទោះជាយើងអាចធ្វើច្រើនឬតិចក្ដី ព្រះយេហូវ៉ាមិនបានសុំយើងឲ្យធ្វើលើសពីអ្វីដែលយើងអាចធ្វើបានឡើយ។ លោកចង់ឲ្យយើងទាំងអស់គ្នាសប្បាយក្នុងកិច្ចបម្រើដ៏ពិសិដ្ឋ ពេលដែលយើងប្រកាស«ដំណឹងល្អដ៏រុងរឿងរបស់ព្រះដែលមានសេចក្ដីសប្បាយ»។—១ធី. ១:១១; ចោ. ៣០:១១
៩. (ក) ទោះជាប៉ូលត្រូវធ្វើការក្ដី តើគាត់បានចាត់ទុកកិច្ចការផ្សព្វផ្សាយថាជាអ្វីដ៏សំខាន់បំផុតយ៉ាងដូចម្ដេច? (ខ) តើសកម្មភាព ២៨:១៦, ៣០, ៣១បង្ហាញថាប៉ូលមានចិត្តគំនិតបែបណាចំពោះកិច្ចបម្រើផ្សាយ?
៩ សាវ័កប៉ូលបានទុកគំរូល្អស្តីអំពីការចាត់ទុកកិច្ចបម្រើផ្សាយថាជាកិច្ចការដ៏សំខាន់បំផុតក្នុងជីវិតរបស់គាត់។ ពេលគាត់នៅក្រុងកូរិនថូសក្នុងអំឡុងដំណើរលើកទី២របស់គាត់ជាសាសនទូត គាត់មានលុយតែបន្ដិចបន្តួច ហើយត្រូវចំណាយពេលខ្លះដើម្បីធ្វើការជាអ្នកធ្វើត្រសាល។ ប៉ុន្តែ ប៉ូលមិនបានចាត់ទុកការងារធ្វើត្រសាលថាជាអ្វីដ៏សំខាន់បំផុតក្នុងជីវិតរបស់គាត់ទេ។ គាត់ធ្វើការងារនេះដើម្បីគាំទ្រកិច្ចការផ្សព្វផ្សាយ យ៉ាងនេះគាត់អាចប្រកាសដំណឹងល្អដល់អ្នកក្រុងកូរិនថូស«ដោយមិនយកថ្លៃ»។ (២កូ. ១១:៧) ទោះជាប៉ូលត្រូវធ្វើការក្ដី គាត់បានបន្តចាត់ទុកកិច្ចបម្រើផ្សាយថាជាអ្វីដ៏សំខាន់បំផុត ហើយគាត់បានផ្សព្វផ្សាយរាល់ថ្ងៃឈប់សម្រាក។ ក្រោយពីកាលៈទេសៈរបស់គាត់ប្រសើរជាង គាត់បានផ្សព្វផ្សាយច្រើនជាង។ គាត់«ចាប់ផ្ដើមផ្ចង់អារម្មណ៍ទាំងស្រុងទៅលើការផ្សព្វផ្សាយបណ្ដាំរបស់ព្រះ ដោយធ្វើជាសាក្សីបញ្ជាក់ហេតុផលប្រាប់ជនជាតិយូដាថា លោកយេស៊ូជាគ្រិស្ត»។ (សកម្ម. ១៨:៣-៥; ២កូ. ១១:៩) ក្រោយមក ពេលគាត់បានត្រូវគេឃុំឃាំងនៅក្នុងផ្ទះ អស់រយៈពេលពីរឆ្នាំនាក្រុងរ៉ូម ប៉ូលបានផ្សព្វផ្សាយដល់អ្នកដែលមកសួរសុខទុក្ខគាត់ ហើយក៏បានសរសេរសំបុត្រមួយចំនួន។ (សូមអាន សកម្មភាព ២៨:១៦, ៣០, ៣១) ប៉ូលបានតាំងចិត្តមិនឲ្យអ្វីណាក៏ដោយបំបែរអារម្មណ៍គាត់ពីកិច្ចបម្រើផ្សាយឡើយ។ គាត់បានសរសេរថា៖ «ដោយសារយើងមានកិច្ចបម្រើនេះ . . . នោះយើងមិនឈប់តស៊ូទេ»។ (២កូ. ៤:១) ដូចប៉ូល ទោះជាយើងត្រូវធ្វើការក្ដី យើងនៅតែអាចចាត់ទុកកិច្ចការរាជាណាចក្រថាជាអ្វីដ៏សំខាន់បំផុតក្នុងជីវិត។
មានវិធីផ្សេងៗដែលយើងអាចបំពេញកិច្ចបម្រើរបស់យើងគ្រប់ជំពូក (សូមមើលវគ្គ១០-១១)
១០-១១. បើយើងមានបញ្ហាសុខភាព តើយើងអាចបំពេញកិច្ចបម្រើរបស់យើងគ្រប់ជំពូកតាមរបៀបណា?
១០ បើយើងមិនអាចផ្សព្វផ្សាយពីផ្ទះមួយទៅផ្ទះមួយដូចដែលយើងចង់ធ្វើដោយសារភាពចាស់ជរា ឬដោយសារបញ្ហាសុខភាព យើងនៅតែអាចផ្សព្វផ្សាយតាមរបៀបផ្សេងទៀត។ អ្នកផ្សព្វផ្សាយដំណឹងល្អនៅសតវត្សរ៍ទី១ បានផ្សព្វផ្សាយនៅកន្លែងណាក៏ដោយដែលពួកគេអាចជួបមនុស្ស។ ពួកគេប្រើគ្រប់ឱកាសដើម្បីប្រាប់មនុស្សអំពីសេចក្ដីពិត ពោលគឺពួកគេបានផ្សព្វផ្សាយពីផ្ទះមួយទៅផ្ទះមួយ នៅកន្លែងសាធារណៈ និងក្រៅផ្លូវការដល់‹អស់អ្នកដែលពួកគេជួប›។ (សកម្ម. ១៧:១៧; ២០:២០) បើយើងពិបាកដើរ យើងប្រហែលជាអាចអង្គុយនៅកន្លែងសាធារណៈណាមួយ ហើយផ្សព្វផ្សាយដល់ពួកអ្នកដែលដើរកាត់ទីនោះ។ ឬយើងប្រហែលជាអាចផ្សព្វផ្សាយក្រៅផ្លូវការ សរសេរសំបុត្រ ឬផ្សព្វផ្សាយតាមទូរស័ព្ទ។ ការផ្សព្វផ្សាយតាមរបៀបទាំងនេះនាំឲ្យអ្នកផ្សាយជាច្រើនស្កប់ស្កល់និងមានអំណរជាខ្លាំង ទោះជាពួកគេពិបាកផ្សព្វផ្សាយពីផ្ទះមួយទៅផ្ទះមួយដោយសារបញ្ហាសុខភាពក្ដី។
១១ សូម្បីតែអ្នកមានបញ្ហាសុខភាព ក៏អ្នកនៅតែអាចបំពេញកិច្ចបម្រើផ្សាយរបស់អ្នកគ្រប់ជំពូក។ ហេតុអ្វីយើងអាចនិយាយដូច្នេះ? សូមពិចារណាម្ដងទៀតអំពីគំរូរបស់សាវ័កប៉ូល។ គាត់និយាយថា៖ «ខ្ញុំមានកម្លាំងសម្រាប់អ្វីៗទាំងអស់ ដោយសារលោកដែលផ្ដល់កម្លាំងឲ្យខ្ញុំ»។ (ភី. ៤:១៣) ប៉ូលត្រូវការកម្លាំងនេះពេលគាត់បានឈឺនៅពេលមួយក្នុងអំឡុងការធ្វើដំណើរជាសាសនទូត។ គាត់បានពន្យល់គ្រិស្តសាសនិកនៅខេត្តកាឡាទីថា៖ ‹នៅលើកដំបូង ខ្ញុំប្រកាសដំណឹងល្អដល់អ្នករាល់គ្នាពីព្រោះខ្ញុំឈឺ›។ (កាឡ. ៤:១៣) ស្រដៀងគ្នាដែរ បញ្ហាសុខភាពរបស់អ្នកអាចបើកឱកាសឲ្យអ្នកផ្សព្វផ្សាយដំណឹងល្អដល់អ្នកឯទៀតដូចជា គ្រូពេទ្យ គិលានុបដ្ឋាក និងអ្នកឯទៀតដែលជួយថែទាំអ្នក។ ពួកគេជាច្រើននាក់ប្រហែលជានៅកន្លែងធ្វើការពេលដែលអ្នកផ្សាយទៅផ្ទះរបស់ពួកគេ។
របៀបរក្សាជីវិតឲ្យសាមញ្ញ
១២. តើពាក្យ«ភ្នែករបស់អ្នកមើលរបស់តែមួយ»មានន័យយ៉ាងណា?
១២ លោកយេស៊ូបានមានប្រសាសន៍ថា៖ «ភ្នែកជាចង្កៀងនៃរូបកាយ។ ប្រសិនបើភ្នែករបស់អ្នកមើលរបស់តែមួយ នោះរូបកាយទាំងមូលរបស់អ្នកនឹងបានភ្លឺ»។ (ម៉ាថ. ៦:២២) តើលោកចង់មានន័យយ៉ាងណា? លោកចង់មានន័យថាយើងត្រូវរក្សាជីវិតឲ្យសាមញ្ញ ឬផ្ដោតអារម្មណ៍ទៅលើគោលដៅឬគោលបំណងតែមួយ ហើយមិនឲ្យអ្វីបំបែរអារម្មណ៍យើងពីគោលដៅនោះ។ លោកយេស៊ូផ្ទាល់បានទុកគំរូឲ្យយើង ដោយចាត់ទុកកិច្ចបម្រើផ្សាយថាជាអ្វីដ៏សំខាន់បំផុតក្នុងជីវិតរបស់លោក ហើយលោកបានបង្រៀនអ្នកកាន់តាមលោកឲ្យបន្តផ្ដោតអារម្មណ៍ទៅលើការបម្រើព្រះយេហូវ៉ានិងទៅលើរាជាណាចក្ររបស់លោក។ យើងយកតម្រាប់លោកយេស៊ូ ដោយចាត់ទុកថាកិច្ចបម្រើរបស់យើងជាគ្រិស្តសាសនិកជាអ្វីដ៏សំខាន់បំផុតក្នុងជីវិតរបស់យើង ពោលគឺដោយ«ស្វែងរករាជាណាចក្រនិងសេចក្ដីសុចរិតរបស់ព្រះជាមុន»។—ម៉ាថ. ៦:៣៣
១៣. តើអ្វីអាចជួយយើងឲ្យផ្ដោតអារម្មណ៍លើកិច្ចបម្រើរបស់យើងជាគ្រិស្តសាសនិក?
១៣ របៀបមួយដែលយើងអាចផ្ដោតអារម្មណ៍ទៅលើកិច្ចបម្រើរបស់យើងជាគ្រិស្តសាសនិក គឺដោយធ្វើឲ្យជីវិតរបស់យើងសាមញ្ញជាង យ៉ាងនេះយើងអាចចំណាយពេលច្រើនជាងក្នុងការជួយអ្នកឯទៀតឲ្យស្គាល់និងស្រឡាញ់ព្រះយេហូវ៉ា។c ជាឧទាហរណ៍ តើយើងអាចផ្លាស់ប្ដូរឬកាត់បន្ថយម៉ោងធ្វើការ ដើម្បីយើងអាចចំណាយពេលច្រើនជាងក្នុងកិច្ចបម្រើផ្សាយពីថ្ងៃច័ន្ទដល់ថ្ងៃសុក្រឬទេ? តើយើងអាចកាត់បន្ថយការកម្សាន្តខ្លះដែលប្រហែលជាស៊ីពេលច្រើនឬទេ?
១៤. តើប្ដីប្រពន្ធមួយគូបានធ្វើអ្វីខ្លះដើម្បីផ្ដោតអារម្មណ៍និងមានពេលច្រើនជាងក្នុងកិច្ចបម្រើផ្សាយ?
១៤ អ្នកចាស់ទុំម្នាក់ឈ្មោះអ៊ីឡាយអឺសនិងប្រពន្ធរបស់គាត់បានធ្វើដូច្នេះ។ គាត់ពន្យល់ថា៖ «យើងមិនអាចចាប់ផ្ដើមត្រួសត្រាយភ្លាមៗបានទេ ប៉ុន្តែមានអ្វីមួយចំនួនដែលយើងអាចធ្វើដើម្បីចូលរួមក្នុងកិច្ចបម្រើផ្សាយច្រើនជាង។ ជាឧទាហរណ៍ យើងបានកាត់បន្ថយការចំណាយរបស់យើង កាត់បន្ថយពេលច្រើនពេកដែលយើងប្រើក្នុងការកម្សាន្ត និងបានសុំចៅហ្វាយផ្លាស់ប្ដូរម៉ោងធ្វើការដើម្បីយើងអាចចូលរួមក្នុងកិច្ចបម្រើផ្សាយច្រើនជាង។ ជាលទ្ធផល យើងអាចផ្សព្វផ្សាយពេលល្ងាច ដឹកនាំការសិក្សាគម្ពីរច្រើនជាង និងថែមទាំងចូលរួមក្នុងកិច្ចបម្រើផ្សាយក្រៅពីថ្ងៃសៅរ៍និងថ្ងៃអាទិត្យពីរដងក្នុងមួយខែ។ យើងពិតជាសប្បាយចិត្តណាស់!»។
របៀបបង្កើនភាពប៉ិនប្រសប់ក្នុងការផ្សព្វផ្សាយ និងការបង្រៀន
ការធ្វើតាមអ្វីដែលយើងរៀននៅកិច្ចប្រជុំ សម្រាប់កិច្ចបម្រើនិងជីវិតជាគ្រិស្តសាសនិក នឹងជួយយើងឲ្យបន្តរីកចម្រើនក្នុងកិច្ចបម្រើផ្សាយ (សូមមើលវគ្គ១៥-១៦)d
១៥-១៦. តាមធីម៉ូថេទី១ ៤:១៣, ១៥ តើយើងអាចបន្តបង្កើនសមត្ថភាពក្នុងកិច្ចបម្រើផ្សាយតាមរបៀបណា? (សូមមើលដែរនូវប្រអប់ដែលមានចំណងជើងថា «គោលដៅដែលនឹងជួយខ្ញុំឲ្យបំពេញកិច្ចបម្រើរបស់ខ្ញុំគ្រប់ជំពូក»)
១៥ របៀបមួយទៀតដើម្បីបំពេញកិច្ចបម្រើរបស់យើងឲ្យកាន់តែប្រសើរឡើងថែមទៀត គឺដោយបង្កើនភាពប៉ិនប្រសប់ក្នុងកិច្ចបម្រើផ្សាយ។ ដូចដែលអ្នកជំនាញខ្លះត្រូវបន្តទទួលការបង្ហាត់បង្រៀនជារឿយៗ ដើម្បីពួកគេអាចមានចំណេះនិងសមត្ថភាពច្រើនជាង យើងដែលជាអ្នកផ្សព្វផ្សាយអំពីរាជាណាចក្រព្រះ ក៏ត្រូវបន្តរៀនអំពីរបៀបបង្កើនសមត្ថភាពរបស់យើងក្នុងកិច្ចបម្រើផ្សាយ។—សុភ. ១:៥; សូមអាន ធីម៉ូថេទី១ ៤:១៣, ១៥
១៦ តើយើងអាចបន្តបង្កើនសមត្ថភាពរបស់យើងក្នុងកិច្ចបម្រើផ្សាយយ៉ាងដូចម្ដេច? គឺដោយយកចិត្តទុកដាក់យ៉ាងដិតដល់ចំពោះការណែនាំដែលយើងទទួលប្រចាំសប្ដាហ៍ក្នុងកិច្ចប្រជុំកិច្ចបម្រើនិងជីវិត។ តាមរយៈកិច្ចប្រជុំនោះ យើងទទួលការបង្ហាត់បង្រៀនដើម្បីជួយយើងឲ្យបង្កើនសមត្ថភាពក្នុងកិច្ចបម្រើផ្សាយបន្ដិចម្ដងៗ។ ជាឧទាហរណ៍ ពេលអធិការីឲ្យយោបល់ដល់អ្នកដែលបានថ្លែងសុន្ទរកថា យើងអាចរៀនចំណុចដែលនឹងជួយយើងឲ្យរីកចម្រើនក្នុងកិច្ចបម្រើផ្សាយ។ យើងអាចអនុវត្តយោបល់នោះ ពេលដែលយើងផ្សព្វផ្សាយដំណឹងល្អ។ យើងក៏អាចសុំជំនួយពីអ្នកត្រួតពិនិត្យក្រុមផ្សព្វផ្សាយ ឬទៅផ្សព្វផ្សាយជាមួយនឹងគាត់ ឬជាមួយនឹងអ្នកផ្សាយឯទៀតដែលមានបទពិសោធន៍ច្រើនដូចជាអ្នកត្រួសត្រាយ ឬអ្នកត្រួតពិនិត្យប្រចាំមណ្ឌលជាដើម។ កាលដែលយើងកាន់តែចេះប្រើឧបករណ៍ផ្សេងៗដែលយើងមានដើម្បីបង្រៀនគម្ពីរ យើងនឹងកាន់តែចូលចិត្តផ្សព្វផ្សាយនិងបង្រៀនគេ។
១៧. តើការបំពេញកិច្ចបម្រើរបស់អ្នកគ្រប់ជំពូកនឹងនាំឲ្យអ្នកទទួលលទ្ធផលអ្វី?
១៧ យើងមានឯកសិទ្ធិដ៏អស្ចារ្យមែន ដែលព្រះយេហូវ៉ាឲ្យយើងធ្វើជា«អ្នករួមការងារ»ជាមួយនឹងលោក! (១កូ. ៣:៩) ពេលអ្នក«ពិចារណាឲ្យដឹងប្រាកដថាការអ្វីដែលសំខាន់ជាង» និងផ្ដោតអារម្មណ៍ទៅលើកិច្ចបម្រើរបស់អ្នកជាគ្រិស្តសាសនិក អ្នកនឹង«គោរពប្រតិបត្ដិដល់ព្រះយេហូវ៉ាដោយអរសប្បាយ»។ (ភី. ១:១០; ទំនុក. ១០០:២) ក្នុងនាមជាអ្នកបម្រើព្រះ អ្នកអាចមានទំនុកចិត្តថាលោកនឹងផ្ដល់កម្លាំងដែលអ្នកត្រូវការដើម្បីបំពេញកិច្ចបម្រើរបស់អ្នក មិនថាអ្នកជួបប្រទះនឹងការពិបាកអ្វី ឬអ្វីដែលអ្នកអាចធ្វើមានកម្រិតក្ដី។ (២កូ. ៤:១, ៧; ៦:៤) ទោះជាកាលៈទេសៈរបស់អ្នកធ្វើឲ្យអ្នកចូលរួមតិចឬច្រើនក្នុងកិច្ចបម្រើផ្សាយក៏ដោយ អ្នកអាច«មានហេតុត្រេកអរ» ពេលអ្នកខំអស់ពីសមត្ថភាពក្នុងកិច្ចបម្រើផ្សាយ។ (កាឡ. ៦:៤) ពេលអ្នកបំពេញកិច្ចបម្រើរបស់អ្នកគ្រប់ជំពូក អ្នកបង្ហាញសេចក្ដីស្រឡាញ់ចំពោះព្រះយេហូវ៉ានិងចំពោះមនុស្ស។ «ដោយធ្វើដូច្នេះ អ្នកនឹងសង្គ្រោះទាំងខ្លួនអ្នក ទាំងពួកអ្នកដែលស្ដាប់អ្នក»។—១ធី. ៤:១៦
ចម្រៀងលេខ៥៨ ចូរស្វែងរកអ្នកដែលចង់បានសេចក្ដីសុខ
a លោកយេស៊ូបានបង្គាប់យើងឲ្យផ្សព្វផ្សាយដំណឹងល្អអំពីរាជាណាចក្រ ហើយបង្រៀនមនុស្សឲ្យក្លាយទៅជាអ្នកកាន់តាមលោក។ ក្នុងអត្ថបទនេះ យើងនឹងពិចារណាអំពីរបៀបដែលយើងអាចបំពេញកិច្ចបម្រើរបស់យើងគ្រប់ជំពូក ទោះជាយើងមានការពិបាកជាច្រើនក្ដី។ យើងក៏នឹងរៀនដែរអំពីរបៀបដែលយើងអាចបង្កើនភាពប៉ិនប្រសប់ក្នុងកិច្ចបម្រើផ្សាយនិងកាន់តែមានអំណរ។
b ការពន្យល់ពាក្យ: កិច្ចបម្រើរបស់យើងជាគ្រិស្តសាសនិករួមបញ្ចូលកិច្ចការមួយចំនួន ដូចជាការផ្សព្វផ្សាយនិងការបង្រៀន ការសាងសង់និងថែទាំអគារឬសាលផ្សេងៗរបស់អង្គការយើង ព្រមទាំងកិច្ចការផ្ដល់ជំនួយពេលមានគ្រោះមហន្តរាយធម្មជាតិ។—២កូ. ៥:១៨, ១៩; ៨:៤
c សូមមើលចំណុច៧យ៉ាងក្នុងប្រអប់ដែលមានចំណងជើងថា «របៀបធ្វើឲ្យជីវិតរបស់អ្នកសាមញ្ញជាង» ក្នុងទស្សនាវដ្ដីប៉មយាម ខែកក្កដា ឆ្នាំ២០១៦ ទំព័រ៨។
d ការពណ៌នាអំពីរូបភាព: បងស្រីម្នាក់សម្ដែងអំពីការធ្វើការត្រឡប់ទៅជួបក្នុងអំឡុងកិច្ចប្រជុំសម្រាប់កិច្ចបម្រើនិងជីវិតជាគ្រិស្តសាសនិក។ ក្រោយមក ពេលដែលអធិការីសម្រាប់កិច្ចប្រជុំនោះផ្ដល់យោបល់ បងស្រីនោះសរសេរកំណត់ក្នុងសៀវភៅស្តើងការបង្រៀន។ បន្ទាប់មកនៅចុងសប្ដាហ៍ក្នុងកិច្ចបម្រើផ្សាយ គាត់ធ្វើតាមអ្វីដែលគាត់បានរៀននៅកិច្ចប្រជុំនោះ។