-
តើដំណឹងល្អកំពុងត្រូវផ្សព្វផ្សាយតាមរបៀបណា?សប្បាយនឹងជីវិតដែលគ្មានទីបញ្ចប់! អញ្ជើញទទួលប្រយោជន៍ពីការរៀនគម្ពីរ
-
-
មេរៀនទី២១
តើដំណឹងល្អកំពុងត្រូវផ្សព្វផ្សាយតាមរបៀបណា?
មិនយូរទៀត ព្រះយេហូវ៉ានឹងបំបាត់ចោលបញ្ហាទាំងអស់របស់យើងតាមរយៈរាជាណាចក្ររបស់លោក។ នេះជាដំណឹងដ៏ល្អដែលមនុស្សគ្រប់គ្នាត្រូវដឹង។ លោកយេស៊ូចង់ឲ្យពួកអ្នកកាន់តាមលោកប្រាប់ដំណឹងនេះដល់មនុស្សទាំងអស់! (ម៉ាថាយ ២៨:១៩, ២០) តើសាក្សីព្រះយេហូវ៉ាធ្វើតាមបង្គាប់របស់លោកយេស៊ូយ៉ាងដូចម្ដេច?
១. តើម៉ាថាយ ២៤:១៤ កំពុងកើតឡើងនៅសព្វថ្ងៃនេះយ៉ាងដូចម្ដេច?
លោកយេស៊ូបានប្រាប់ទុកជាមុនថា៖ «ដំណឹងល្អនេះអំពីរាជាណាចក្រនឹងត្រូវផ្សព្វផ្សាយនៅគ្រប់ទីអាស្រ័យនៅផែនដី»។ (ម៉ាថាយ ២៤:១៤) សាក្សីព្រះយេហូវ៉ាសប្បាយចិត្តណាស់ដែលបានរួមចំណែកក្នុងកិច្ចការដ៏សំខាន់នេះ។ យើងកំពុងផ្សព្វផ្សាយដំណឹងល្អជាង១.០០០ភាសានៅទូទាំងពិភពលោក! កិច្ចការដ៏អស្ចារ្យនេះតម្រូវឲ្យមានការខំព្យាយាមយ៉ាងខ្លាំងនិងការរៀបចំល្អ។ ប៉ុន្តែ យើងមិនអាចធ្វើកិច្ចការនេះដោយគ្មានជំនួយពីព្រះយេហូវ៉ាបានឡើយ។
២. តើយើងខំព្យាយាមផ្សព្វផ្សាយប្រាប់មនុស្សតាមវិធីណាខ្លះ?
យើងផ្សព្វផ្សាយប្រាប់មនុស្សនៅគ្រប់ទីកន្លែង។ ដូចគ្រិស្តសាសនិកនៅសតវត្សរ៍ទី១ យើងផ្សព្វផ្សាយ«ពីផ្ទះមួយទៅផ្ទះមួយ»។ (សកម្មភាព ៥:៤២) ជារៀងរាល់ឆ្នាំ វិធីផ្សព្វផ្សាយដ៏សំខាន់នេះជួយយើងឲ្យប្រាប់មនុស្សរាប់លាននាក់។ ដោយសារមនុស្សមិនសូវនៅផ្ទះ យើងក៏ផ្សព្វផ្សាយនៅតាមទីសាធារណៈដែរ។ យើងតែងតែរកឱកាសដើម្បីប្រាប់អ្នកឯទៀតអំពីព្រះយេហូវ៉ានិងគោលបំណងរបស់លោក។
៣. តើអ្នកណាមានភារកិច្ចផ្សព្វផ្សាយដំណឹងល្អ?
គ្រិស្តសាសនិកពិតទាំងអស់មានភារកិច្ចប្រាប់ដំណឹងល្អដល់អ្នកឯទៀត។ យើងបំពេញភារកិច្ចរបស់យើងដោយយកចិត្តទុកដាក់។ យើងខំផ្សព្វផ្សាយច្រើនបំផុតតាមដែលយើងអាចធ្វើបាន ដោយសារយើងដឹងថាកិច្ចការនេះអាចសង្គ្រោះជីវិតមនុស្ស។ (សូមអាន ធីម៉ូថេទី១ ៤:១៦) យើងមិនទទួលប្រាក់ខែពីកិច្ចការនេះទេ ព្រោះគម្ពីរចែងថា៖ «អ្នករាល់គ្នាបានទទួលដោយឥតបង់ថ្លៃ ចូរឲ្យដោយឥតគិតថ្លៃដែរ»។ (ម៉ាថាយ ១០:៧, ៨) ទោះជាមនុស្សខ្លះមិនព្រមស្ដាប់ដំណឹងដែលយើងផ្សព្វផ្សាយក៏ដោយ យើងនៅតែបន្តផ្សព្វផ្សាយ ព្រោះកិច្ចការនេះជាផ្នែកមួយនៃការគោរពប្រណិប័តន៍ព្រះយេហូវ៉ា ហើយជាកិច្ចការដែលធ្វើឲ្យលោកសប្បាយរីករាយ។
បង្កើនចំណេះ
សូមរៀនថែមទៀតអំពីការខំព្យាយាមរបស់សាក្សីព្រះយេហូវ៉ានៅទូទាំងពិភពលោក ហើយសូមមើលរបៀបដែលព្រះយេហូវ៉ាជួយយើង។
ការផ្សព្វផ្សាយជុំវិញពិភពលោក: (ក) កូស្ដារីកា (ខ) សហរដ្ឋអាម៉េរិក (គ) បេណាំង (ឃ) ថៃ (ង) យ៉ាប់ (ច) ស៊ុយអែត
៤. យើងខំព្យាយាមផ្សព្វផ្សាយដល់មនុស្សទាំងអស់
សាក្សីព្រះយេហូវ៉ាខំព្យាយាមយ៉ាងខ្លាំងដើម្បីផ្សព្វផ្សាយដល់មនុស្សគ្រប់ទីកន្លែង។ លេងវីដេអូ រួចពិភាក្សាសំណួរដូចតទៅ៖
តើអ្នកកោតស្ងើចអ្វីខ្លះអំពីការខំព្យាយាមផ្សព្វផ្សាយរបស់សាក្សីព្រះយេហូវ៉ា?
សូមអាន ម៉ាថាយ ២២:៣៩ និងរ៉ូម ១០:១៣-១៥ រួចពិភាក្សាសំណួរដូចតទៅ៖
ពេលយើងផ្សព្វផ្សាយដល់អ្នកជិតខាង ហេតុអ្វីនេះបង្ហាញថាយើងស្រឡាញ់ពួកគេ?
តើព្រះយេហូវ៉ាមានអារម្មណ៍យ៉ាងណាចំពោះអស់អ្នកដែលផ្សព្វផ្សាយដំណឹងល្អ? (សូមមើលខ១៥)
៥. យើងជាអ្នករួមការងារជាមួយនឹងព្រះ
បទពិសោធន៍ជាច្រើនបង្ហាញថាព្រះយេហូវ៉ាកំពុងដឹកនាំកិច្ចការរបស់យើង។ ជាឧទាហរណ៍ មានបទពិសោធន៍របស់បងប្រុសម្នាក់ឈ្មោះផលនៅប្រទេសនូវែលសេឡង់។ នៅព្រឹកថ្ងៃមួយ មានស្ត្រីម្នាក់បានអធិដ្ឋានទៅព្រះដោយប្រើនាមរបស់ព្រះគឺយេហូវ៉ា ហើយសុំលោកឲ្យចាត់អ្នកណាម្នាក់មកជួបនាង។ នៅរសៀលថ្ងៃដដែលនោះ ផលកំពុងផ្សព្វផ្សាយពីផ្ទះមួយទៅផ្ទះមួយ ហើយបានជួបស្ត្រីនោះ។ ផលនិយាយថា៖ «បីម៉ោងក្រោយមក[គឺបន្ទាប់ពីស្ត្រីនោះបានអធិដ្ឋាន] ខ្ញុំបានមកដល់មុខផ្ទះរបស់គាត់»។
សូមអាន កូរិនថូសទី១ ៣:៩ រួចពិភាក្សាសំណួរនេះ៖
តើបទពិសោធន៍ដូចនៅប្រទេសនូវែលសេឡង់បង្ហាញយ៉ាងណាថា ព្រះយេហូវ៉ាកំពុងដឹកនាំកិច្ចការផ្សព្វផ្សាយ?
សូមអាន សកម្មភាព ១:៨ រួចពិភាក្សាសំណួរនេះ៖
ហេតុអ្វីយើងត្រូវការជំនួយពីព្រះយេហូវ៉ា ដើម្បីបំពេញកិច្ចបម្រើផ្សាយរបស់យើង?
តើអ្នកដឹងទេ?
រៀងរាល់សប្ដាហ៍ នៅឯកិច្ចប្រជុំកិច្ចបម្រើនិងជីវិត យើងទទួលការបង្ហាត់បង្រៀនដើម្បីជួយយើងក្នុងកិច្ចបម្រើផ្សាយ។ បើអ្នកធ្លាប់ចូលរួមកិច្ចប្រជុំនេះ តើអ្នកគិតយ៉ាងណាអំពីការបង្ហាត់បង្រៀននោះ?
៦. យើងផ្សព្វផ្សាយតាមបង្គាប់របស់ព្រះ
នៅសតវត្សរ៍ទី១ ពួកអ្នកប្រឆាំងបានព្យាយាមបញ្ឈប់ពួកអ្នកកាន់តាមលោកយេស៊ូមិនឲ្យផ្សព្វផ្សាយ។ គ្រិស្តសាសនិកនៅសម័យមុនបានការពារសិទ្ធិផ្សព្វផ្សាយរបស់ពួកគេ ដោយ«ធ្វើឲ្យដំណឹងល្អមានការទទួលស្គាល់តាមផ្លូវច្បាប់»។ (ភីលីព ១:៧) នៅសព្វថ្ងៃសាក្សីព្រះយេហូវ៉ាក៏ធ្វើដូចគ្នាដែរ។a
សូមអាន សកម្មភាព ៥:២៧-៤២ រួចពិភាក្សាសំណួរនេះ៖
មនុស្សខ្លះប្រហែលជាសួរថា៖ «ហេតុអ្វីសាក្សីព្រះយេហូវ៉ាផ្សព្វផ្សាយពីផ្ទះមួយទៅផ្ទះមួយ?»។
តើអ្នកនឹងឆ្លើយយ៉ាងណា?
សេចក្ដីសង្ខេប
លោកយេស៊ូបានបង្គាប់ពួកអ្នកកាន់តាមលោកឲ្យផ្សព្វផ្សាយដំណឹងល្អដល់គ្រប់ប្រជាជាតិ។ ព្រះយេហូវ៉ាកំពុងជួយរាស្ត្ររបស់លោកឲ្យធ្វើកិច្ចការនេះ។
រៀនសាឡើងវិញ
តើយើងកំពុងផ្សព្វផ្សាយដំណឹងល្អនៅទូទាំងពិភពលោកយ៉ាងដូចម្ដេច?
ពេលយើងផ្សព្វផ្សាយដល់អ្នកជិតខាង ហេតុអ្វីនេះបង្ហាញថាយើងស្រឡាញ់ពួកគេ?
តើអ្នកគិតថាការផ្សព្វផ្សាយនាំឲ្យមានសុភមង្គលឬទេ? ហេតុអ្វី?
ស្វែងយល់ថែមទៀត
សូមមើលរបៀបដែលសាក្សីព្រះយេហូវ៉ាផ្សព្វផ្សាយនៅក្រុងធំៗ។
តើសាក្សីព្រះយេហូវ៉ាបានធ្វើអ្វីខ្លះដើម្បីផ្សព្វផ្សាយដល់ជនភៀសខ្លួន?
ការផ្សព្វផ្សាយដល់ជនភៀសខ្លួនដែលស្រេកឃ្លានចំណេះអំពីព្រះ (៥:៥៩)
សូមស្ដាប់បងស្រីម្នាក់ប្រាប់អំពីមូលហេតុដែលកិច្ចផ្សព្វផ្សាយពេញពេលធ្វើឲ្យជីវិតគាត់មានន័យខ្លឹមសារ។
ខ្ញុំសប្បាយចិត្តណាស់ដែលខ្ញុំជ្រើសរើសជីវិតបែបនេះ (៦:២៩)
សូមរៀនអំពីជ័យជម្នះរឿងក្ដីធំៗនៅតុលាការ ដែលបានធ្វើឲ្យកិច្ចការផ្សព្វផ្សាយដំណឹងល្អរីកចម្រើន។
a ព្រះជាអ្នកបង្គាប់យើងឲ្យផ្សព្វផ្សាយ ហេតុនេះហើយសាក្សីព្រះយេហូវ៉ាមិនចាំបាច់សុំការអនុញ្ញាតពីពួកអាជ្ញាធរដើម្បីផ្សព្វផ្សាយដំណឹងល្អទេ។
-
-
ការជ្រមុជទឹក ជាគោលដៅដ៏ល្អប្រសើរ!សប្បាយនឹងជីវិតដែលគ្មានទីបញ្ចប់! អញ្ជើញទទួលប្រយោជន៍ពីការរៀនគម្ពីរ
-
-
មេរៀនទី២៣
ការជ្រមុជទឹក ជាគោលដៅដ៏ល្អប្រសើរ!
លោកយេស៊ូបានបង្រៀនថា អ្នកណាដែលចង់ទៅជាគ្រិស្តសាសនិក អ្នកនោះត្រូវទទួលការជ្រមុជទឹក។ (សូមអាន ម៉ាថាយ ២៨:១៩, ២០) ប៉ុន្តែ តើការជ្រមុជទឹកមានអត្ថន័យអ្វី? ហើយតើបុគ្គលម្នាក់ត្រូវធ្វើអ្វីខ្លះដើម្បីអាចទទួលការជ្រមុជទឹក?
១. តើការជ្រមុជទឹកមានអត្ថន័យអ្វី?
ពាក្យ«ជ្រមុជទឹក»មកពីពាក្យភាសាក្រិច ដែលមានន័យថា«ពន្លិច»នៅក្នុងទឹក។ ពេលលោកយេស៊ូទទួលការជ្រមុជទឹក លោកបានត្រូវពន្លិចនៅក្នុងទន្លេយ៉ូដាន់ រួចមកលោកក៏«ងើបពីទឹក»។ (ម៉ាកុស ១:៩, ១០) ដូចលោកយេស៊ូដែរ ពេលគ្រិស្តសាសនិកពិតណាម្នាក់ទទួលការជ្រមុជទឹក គឺរូបកាយគាត់ទាំងមូលបានត្រូវពន្លិចនៅក្នុងទឹក។
២. តើការជ្រមុជទឹកបង្ហាញយ៉ាងណា?
ពេលអ្នកណាម្នាក់ទទួលការជ្រមុជទឹក គាត់បង្ហាញថាគាត់បានប្រគល់ខ្លួនជូនព្រះយេហូវ៉ាហើយ។ តើបុគ្គលម្នាក់ប្រគល់ខ្លួនជូនព្រះតាមរបៀបណា? មុនទទួលការជ្រមុជទឹក គាត់ប្រគល់ខ្លួនជូនព្រះតាមរយៈសេចក្ដីអធិដ្ឋានផ្ទាល់ខ្លួនមួយ ដោយប្រាប់ព្រះយេហូវ៉ាថាគាត់ចង់បម្រើលោកអស់មួយជីវិត។ គាត់ថែមទាំងសន្យាថាគោរពប្រណិប័តន៍តែព្រះយេហូវ៉ាប៉ុណ្ណោះ ហើយចាត់ទុកការធ្វើតាមបំណងប្រាថ្នារបស់លោកថាសំខាន់បំផុតក្នុងជីវិតរបស់គាត់។ គាត់សម្រេចចិត្ត‹ប្រគល់ខ្លួនជូនព្រះ រួចធ្វើតាម›សេចក្ដីបង្រៀននិងគំរូរបស់លោកយេស៊ូជានិច្ច។ (ម៉ាថាយ ១៦:២៤) ការប្រគល់ខ្លួនជូនព្រះនិងការជ្រមុជទឹកអាចជួយគាត់ឲ្យមានចំណងមិត្តភាពជិតស្និទ្ធជាមួយនឹងព្រះយេហូវ៉ា និងអស់អ្នកដែលគោរពប្រណិប័តន៍លោក។
៣. តើបុគ្គលម្នាក់ត្រូវធ្វើអ្វីខ្លះដើម្បីអាចទទួលការជ្រមុជទឹក?
មុនអ្នកអាចទទួលការជ្រមុជទឹក ជាការសំខាន់ដែលអ្នកត្រូវរៀនអំពីព្រះយេហូវ៉ានិងមានជំនឿលើលោក។ (សូមអាន ហេប្រឺ ១១:៦) កាលដែលអ្នកមានចំណេះកាន់តែច្រើន និងមានជំនឿកាន់តែខ្លាំង នោះអ្នកនឹងកាន់តែស្រឡាញ់ព្រះយេហូវ៉ា។ រួចមក អ្នកច្បាស់ជាចង់ផ្សព្វផ្សាយអំពីលោក និងចង់រស់នៅស្របតាមខ្នាតតម្រារបស់លោក។ (ធីម៉ូថេទី២ ៤:២; យ៉ូហានទី១ ៥:៣) ពេលបុគ្គលណាម្នាក់មានរបៀបរស់នៅ«សមជាអ្នកបម្រើរបស់ព្រះយេហូវ៉ា ដើម្បីធ្វើឲ្យលោកពេញចិត្តទាំងស្រុង» នោះគាត់ទំនងជាចង់ប្រគល់ខ្លួនជូនលោក និងទទួលការជ្រមុជទឹក។—កូឡុស ១:៩, ១០a
បង្កើនចំណេះ
សូមមើលថាយើងអាចទាញមេរៀនអ្វីពេលលោកយេស៊ូទទួលការជ្រមុជទឹក និងរបៀបដែលបុគ្គលម្នាក់អាចត្រៀមខ្លួនសម្រាប់ជំហានដ៏សំខាន់នេះ។
៤. យើងអាចទាញមេរៀនពីកំណត់ហេតុអំពីលោកយេស៊ូទទួលការជ្រមុជទឹក
សូមអាន ម៉ាថាយ ៣:១៣-១៧ ដើម្បីរៀនព័ត៌មានល្អិតល្អន់អំពីលោកយេស៊ូទទួលការជ្រមុជទឹក។ រួចពិភាក្សាសំណួរដូចតទៅ៖
តើលោកយេស៊ូទទួលការជ្រមុជទឹកពេលដែលលោកជាទារកឬទេ?
តើលោកយេស៊ូទទួលការជ្រមុជទឹកយ៉ាងដូចម្ដេច? តើលោកត្រូវគេប្រោះទឹកឬចាក់ទឹកលើក្បាលឬទេ?
ក្រោយពីលោកយេស៊ូទទួលការជ្រមុជទឹកហើយភ្លាម លោកចាប់ផ្ដើមធ្វើកិច្ចការពិសេសដែលព្រះបានប្រគល់ឲ្យលោកធ្វើនៅផែនដី។ សូមអាន លូកា ៣:២១-២៣ និងយ៉ូហាន ៦:៣៨ រួចពិភាក្សាសំណួរនេះ៖
ក្រោយពីលោកយេស៊ូទទួលការជ្រមុជទឹកហើយ តើលោកបានចាត់ទុកកិច្ចការអ្វីថាសំខាន់បំផុតក្នុងជីវិតរបស់លោក?
៥. ការជ្រមុជទឹកគឺជាគោលដៅដែលអ្នកអាចធ្វើបាន
លើកដំបូងដែលអ្នកឮអំពីការប្រគល់ខ្លួនជូនព្រះនិងការជ្រមុជទឹក អ្នកប្រហែលជាមានអារម្មណ៍ភ័យព្រួយ។ ទោះជាយ៉ាងនោះក៏ដោយ អ្នកអាចរីកចម្រើនរហូតដល់អ្នកមានអារម្មណ៍ស្រួលអំពីការសម្រេចចិត្តដ៏សំខាន់នេះ។ ដើម្បីមើលគំរូរបស់អ្នកខ្លះដែលបានធ្វើដូច្នោះ សូមលេងវីដេអូ។
សូមអាន យ៉ូហាន ១៧:៣ និងយ៉ាកុប ១:៥ រួចពិភាក្សាសំណួរនេះ៖
តើអ្វីអាចជួយបុគ្គលម្នាក់ឲ្យត្រៀមខ្លួនដើម្បីទទួលការជ្រមុជទឹក?
ក. យើងសម្រេចចិត្តប្រគល់ខ្លួនជូនព្រះយេហូវ៉ា ដោយអធិដ្ឋានប្រាប់លោកថាយើងចង់បម្រើលោកអស់មួយជីវិត
ខ. ពេលយើងទទួលការជ្រមុជទឹក យើងបង្ហាញអស់អ្នកដែលមើលថា យើងបានប្រគល់ខ្លួនជូនព្រះហើយ
៦. ពេលទទួលការជ្រមុជទឹក យើងទៅជាសមាជិកក្រុមគ្រួសាររបស់ព្រះយេហូវ៉ា
ពេលយើងទទួលការជ្រមុជទឹក យើងទៅជាសមាជិកក្នុងក្រុមគ្រួសារមួយដែលមានសាមគ្គីភាពនៅទូទាំងពិភពលោក។ ទោះជាយើងមកពីកន្លែងណាឬមានមជ្ឈដ្ឋានបែបណាក៏ដោយ យើងមានជំនឿនិងខ្នាតតម្រាសីលធម៌ដូចគ្នាក្នុងការរស់នៅ។ សូមអាន ចម្រៀងសរសើរព្រះ ២៥:១៤ និងពេត្រុសទី១ ២:១៧ រួចពិភាក្សាសំណួរនេះ៖
ពេលបុគ្គលណាម្នាក់ទទួលការជ្រមុជទឹក តើនេះជួយគាត់ឲ្យមានចំណងមិត្តភាពបែបណាជាមួយព្រះ និងជាមួយអ្នកឯទៀតដែលគោរពប្រណិប័តន៍លោក?
មនុស្សខ្លះនិយាយថា៖ «ខ្ញុំមិនទាន់ត្រៀមខ្លួនដើម្បីទទួលការជ្រមុជទឹកទេ»។
បើអ្នកមានអារម្មណ៍ដូច្នោះ តើអ្នកគិតថាការជ្រមុជទឹកនៅតែជាគោលដៅដ៏ល្អប្រសើរឬទេ?
សេចក្ដីសង្ខេប
លោកយេស៊ូបង្រៀនថា អ្នកណាដែលចង់ទៅជាគ្រិស្តសាសនិក អ្នកនោះត្រូវទទួលការជ្រមុជទឹក។ ដើម្បីសម្រេចគោលដៅនេះ បុគ្គលម្នាក់ត្រូវមានជំនឿរឹងមាំលើព្រះយេហូវ៉ា រស់នៅស្របតាមខ្នាតតម្រារបស់លោក និងប្រគល់ខ្លួនជូនលោក។
រៀនសាឡើងវិញ
តើការជ្រមុជទឹកមានអត្ថន័យអ្វី? ហើយហេតុអ្វីនេះជាការសំខាន់?
តើការប្រគល់ខ្លួនជូនព្រះនិងការជ្រមុជទឹក ទាក់ទងគ្នាយ៉ាងណា?
តើមានជំហានអ្វីខ្លះដែលនាំទៅដល់ការប្រគល់ខ្លួនជូនព្រះនិងការជ្រមុជទឹក?
ស្វែងយល់ថែមទៀត
សូមរៀនអំពីអត្ថន័យនៃការជ្រមុជទឹក និងអ្វីដែលមិនមែនជាការជ្រមុជទឹក។
សូមមើលវិធីផ្សេងៗដែលបុគ្គលម្នាក់អាចរីកចម្រើនរហូតដល់ទទួលការជ្រមុជទឹក។
សូមអានអំពីអ្វីដែលជំរុញចិត្តបុរសម្នាក់ឲ្យសម្រេចចិត្តទទួលការជ្រមុជទឹក។
សូមពិចារណាមូលហេតុដែលការជ្រមុជទឹកគឺជាគោលដៅដ៏ល្អប្រសើរ និងរបៀបដែលអ្នកអាចរីកចម្រើនដើម្បីទទួលការជ្រមុជទឹក។
a ទោះជាបុគ្គលម្នាក់ធ្លាប់ទទួលការជ្រមុជទឹកនៅសាសនាផ្សេងក៏ដោយ គាត់នៅតែត្រូវទទួលការជ្រមុជទឹកម្ដងទៀត។ ហេតុអ្វី? ដោយសារសាសនាពីមុនមិនបានបង្រៀនសេចក្ដីពិតពីគម្ពីរទេ (សូមមើលសកម្មភាព ១៩:១-៥ និងមេរៀនទី១៣)។
-