ಮೆಸ್ಸೀಯನ ಪ್ರವಾದನೆಗಳು ಯೇಸುವೇ ಮೆಸ್ಸೀಯ ಅಂತ ತೋರಿಸಿಕೊಡುತ್ತಾ?

ಹೌದು. ಯೇಸು ಭೂಮಿಯಲ್ಲಿದ್ದಾಗ ’ಅಭಿಷಿಕ್ತನಾದ ಪ್ರಭುವಿನ’ ಬಗ್ಗೆ ಇರೋ ತುಂಬ ಪ್ರವಾದನೆಗಳನ್ನ ನೆರವೇರಿಸಿದನು. ಆತನೇ “ಲೋಕದ ರಕ್ಷಕ” ಆಗಲಿದ್ದನು. (ದಾನಿಯೇಲ 9:25; 1 ಯೋಹಾನ 4:14) ಯೇಸು ಸತ್ತ ಮೇಲೂ ಮೆಸ್ಸೀಯನ ಪ್ರವಾದನೆಗಳನ್ನು ನೆರವೇರಿಸ್ತಿದ್ದನು.—ಕೀರ್ತನೆ 110:1; ಅಪೊಸ್ತಲರ ಕಾರ್ಯ 2:34-36.

• “ಮೆಸ್ಸೀಯ” ಪದದ ಅರ್ಥ ಏನು?

• ಮೆಸ್ಸೀಯನ ಪ್ರವಾದನೆಗಳನ್ನು ನೆರವೇರಿಸೋದು ಒಬ್ಬನೇನಾ ತುಂಬ ಜನರಾ?

• ಮೆಸ್ಸೀಯ ಮುಂದೇನಾದರೂ ಬರುತ್ತಾನಾ?

• ಮೆಸ್ಸೀಯನ ಬಗ್ಗೆ ಬೈಬಲಲ್ಲಿ ಎಷ್ಟು ಪ್ರವಾದನೆಗಳು ಇವೆ?

• ಯೇಸು ನೆರವೇರಿಸಿದ ಕೆಲವು ಪ್ರವಾದನೆಗಳು

ಮಾಶೀಯಕ್‌ (ಮೆಸ್ಸೀಯ) ಅನ್ನೋ ಹೀಬ್ರು ಪದ, ಕ್ರಿಸ್ಟೋಸ್‌ (ಕ್ರಿಸ್ತ) ಅನ್ನೋ ಗ್ರೀಕ್‌ ಪದ ಎರಡರ ಅರ್ಥ “ಅಭಿಷಿಕ್ತ.” ಹಾಗಾಗಿ ಯೇಸು ಕ್ರಿಸ್ತ ಅಂದ್ರೆ “ಅಭಿಷಿಕ್ತನಾದ ಯೇಸು” ಅಥವಾ “ಮೆಸ್ಸೀಯನಾದ ಯೇಸು.”

ಹಿಂದಿನ ಕಾಲದಲ್ಲಿ ಒಬ್ಬ ವ್ಯಕ್ತಿಯನ್ನ ಒಂದು ವಿಶೇಷ ಅಧಿಕಾರ ಸ್ಥಾನಕ್ಕೆ ನೇಮಿಸುವಾಗ ಅವನ ತಲೆ ಮೇಲೆ ಎಣ್ಣೆ ಸುರಿದು ಅಭಿಷೇಕ ಮಾಡ್ತಿದ್ರು. (ಯಾಜಕಕಾಂಡ 8:12; 1 ಸಮುವೇಲ 16:13) ದೇವರು ಯೇಸುವನ್ನು ಮೆಸ್ಸೀಯನನ್ನಾಗಿ ಅಭಿಷೇಕ ಮಾಡಿದನು. ಅದೊಂದು ದೊಡ್ಡ ಅಧಿಕಾರ ಸ್ಥಾನ. (ಅಪೊಸ್ತಲರ ಕಾರ್ಯ 2:36) ಆದ್ರೆ ದೇವರು ಯೇಸುವನ್ನು ಎಣ್ಣೆ ಸುರಿದು ಅಭಿಷೇಕ ಮಾಡಲಿಲ್ಲ, ಪವಿತ್ರಾತ್ಮದಿಂದ ಅಭಿಷೇಕ ಮಾಡಿದನು.—ಮತ್ತಾಯ 3:16.

ಒಬ್ಬನೇ ನೆರವೇರಿಸೋದು. ಒಂದು ಬೆರಳಚ್ಚು ಹೇಗೆ ಒಬ್ಬ ವ್ಯಕ್ತಿಯನ್ನಷ್ಟೇ ಸೂಚಿಸುತ್ತೋ ಅದೇ ತರ ಬೈಬಲ್‌ ಪ್ರವಾದನೆಗಳ ನೆರವೇರಿಕೆ ಕೂಡ ಮೆಸ್ಸೀಯ ಅಥವಾ ಕ್ರಿಸ್ತ ಒಬ್ಬನೇ ಅಂತ ಸೂಚಿಸುತ್ತೆ. ಆಗಿದ್ರೂ “ಸುಳ್ಳು ಕ್ರಿಸ್ತರೂ ಸುಳ್ಳು ಪ್ರವಾದಿಗಳೂ ಎದ್ದು ಸಾಧ್ಯವಾದರೆ ಆಯ್ದುಕೊಳ್ಳಲ್ಪಟ್ಟವರನ್ನೂ ತಪ್ಪುದಾರಿಗೆ ಎಳೆಯಲಿಕ್ಕಾಗಿ ಮಹಾ ಸೂಚಕಕಾರ್ಯಗಳನ್ನೂ ಅದ್ಭುತಕಾರ್ಯಗಳನ್ನೂ ಮಾಡಿತೋರಿಸುವರು” ಎಂದು ಬೈಬಲ್‌ ಎಚ್ಚರಿಕೆ ಕೊಡುತ್ತೆ.—ಮತ್ತಾಯ 24:24.

ಇಲ್ಲ. ಇಸ್ರಾಯೇಲಿನ ರಾಜ ದಾವೀದನ ವಂಶದಲ್ಲಿ ಮೆಸ್ಸೀಯ ಬರುತ್ತಾನೆಂದು ಬೈಬಲ್‌ ಮುಂಚೆನೇ ಹೇಳಿತ್ತು. (ಕೀರ್ತನೆ 89:3, 4) ದಾವೀದನಿಂದ ಯೇಸುವಿನ ತನಕ ಇರೋ ಯೆಹೂದಿ ಪೂರ್ವಜರ ದಾಖಲೆಗಳು ಕಳೆದು ಹೋಗಿವೆ. ಕ್ರಿ.ಶ. 70 ರಲ್ಲಿ ರೋಮನ್ನರು ಯೆರೂಸಲೇಮನ್ನು ವಶಪಡಿಸಿಕೊಂಡಾಗ ಬಹುಶಃ ಆ ದಾಖಲೆಗಳು ನಾಶ ಆಗಿರಬಹುದು.a ಆಮೇಲಿಂದ ಯೇಸು ದಾವೀದನ ರಾಜವಂಶದವನು ಅಂತ ಯಾರಿಂದನೂ ಸಾಬೀತು ಮಾಡಲು ಆಗಲಿಲ್ಲ. ಆದ್ರೆ ಯೇಸು ಭೂಮಿಯಲ್ಲಿ ಇದ್ದಾಗ ಪೂರ್ವಜರ ಆ ದಾಖಲೆಗಳು ಇದ್ದವು. ಆದ್ದರಿಂದ ಯೇಸು ತಾನು ದಾವೀದನ ವಂಶದವನು ಅಂತ ಹೇಳಿದಾಗ ಅವನ ಶತ್ರುಗಳು ಕೂಡ ಅವನನ್ನ ಪ್ರಶ್ನಿಸಲು ಧೈರ್ಯ ಮಾಡಲಿಲ್ಲ.—ಮತ್ತಾಯ 22:41-46.

ಇಷ್ಟೇ ಅಂತ ಹೇಳಕ್ಕಾಗಲ್ಲ. ಏಕೆಂದ್ರೆ ಮೆಸ್ಸೀಯನ ಬಗ್ಗೆನೇ ಇರೋ ಪ್ರವಾದನೆಯ ಭಾಗಗಳನ್ನ ಒಬ್ಬೊಬ್ಬರೂ ಒಂದೊಂದು ತರ ಲೆಕ್ಕ ಮಾಡ್ತಾರೆ. ಉದಾಹರಣೆಗೆ, ಯೆಶಾಯ 53:2-7 ರಲ್ಲಿರೋ ಮೆಸ್ಸೀಯನ ಪ್ರವಾದನೆ ನೋಡಿ. ಅದರಲ್ಲಿ ಮೆಸ್ಸೀಯನಿಗೆ ಏನೇನು ಆಗುತ್ತೆ ಅಂತ ಬೇರೆ ಬೇರೆ ವಿಷ್ಯಗಳನ್ನ ತಿಳಿಸಲಾಗಿದೆ. ಕೆಲವರು ಆ ಎಲ್ಲ ವಿಷ್ಯಗಳನ್ನ ಒಂದೇ ಪ್ರವಾದನೆ ಅಂತ ಲೆಕ್ಕ ಮಾಡ್ತಾರೆ. ಇನ್ನು ಕೆಲವರು ಒಂದೊಂದು ವಿಷ್ಯವನ್ನು ಬೇರೆ ಬೇರೆ ಪ್ರವಾದನೆ ಅಂತ ನೆನಸ್ತಾರೆ.