ಒಂದು ಉದಾಹರಣೆಯೋಪಾದಿ, 2 ಕೊರಿಂಥ 7:1ರಲ್ಲಿ ಕಂಡುಕೊಳ್ಳಲ್ಪಡುವ ಅಪೊಸ್ತಲ ಪೌಲನ ಮಾತುಗಳ ಕುರಿತು ಮನನಮಾಡಲು ಪ್ರಯತ್ನಿಸಿರಿ: “ಪ್ರಿಯರೇ, ಈ ವಾಗ್ದಾನಗಳು ನಮಗಿರುವದರಿಂದ ನಾವು ಶರೀರಾತ್ಮಗಳ ಕಲ್ಮಶವನ್ನು ತೊಲಗಿಸಿ ನಮ್ಮನ್ನು ಶುಚಿಮಾಡಿಕೊಂಡು ದೇವರ ಭಯದಿಂದ ಕೂಡಿದವರಾಗಿ ಪವಿತ್ರತ್ವವನ್ನು ಸಿದ್ಧಿಗೆ ತರುವದಕ್ಕೆ ಪ್ರಯತ್ನಿಸೋಣ.” ಈ ಮಾತುಗಳ ಅರ್ಥವನ್ನು ಗ್ರಹಿಸಿಕೊಳ್ಳಿರಿ. ನಿಮ್ಮನ್ನೇ ಹೀಗೆ ಕೇಳಿಕೊಳ್ಳಿ, ‘ಪೌಲನು ಸೂಚಿಸುವ “ಈ ವಾಗ್ದಾನ”ಗಳಾದರೂ ಏನಾಗಿವೆ?’ ಪೂರ್ವಾಪರ ಸಂದರ್ಭವನ್ನು ಓದುವ ಮೂಲಕ, ಮುಂಚಿನ ವಚನಗಳು ಹೀಗೆ ಹೇಳುವುದನ್ನು ನೀವು ಗಮನಿಸುವಿರಿ: “ಅನ್ಯಜನರ ಮಧ್ಯದಲ್ಲಿಂದ ಹೊರಟು ಬಂದು ಪ್ರತ್ಯೇಕವಾಗಿರಿ; ಅಶುದ್ಧವಾದ ಯಾವದನ್ನೂ ಮುಟ್ಟದಿರಿ ಎಂದು ಕರ್ತನು [“ಯೆಹೋವನು,” NW] ಹೇಳುತ್ತಾನೆ. ಇದಲ್ಲದೆ—ನಾನು ನಿಮ್ಮನ್ನು ಸೇರಿಸಿಕೊಂಡು ನಿಮಗೆ ತಂದೆಯಾಗಿರುವೆನು; ನೀವು ನನಗೆ ಕುಮಾರ ಕುಮಾರಿಯರು ಆಗಿರುವಿರೆಂದು ಸರ್ವಶಕ್ತನಾದ ಕರ್ತನು [“ಯೆಹೋವನು,” NW] ಹೇಳುತ್ತಾನೆ.”—2 ಕೊರಿಂಥ 6:17, 18.

‘ಶರೀರಾತ್ಮಗಳ ಕಲ್ಮಶದಿಂದ ನಮ್ಮನ್ನು ಶುದ್ಧಗೊಳಿಸಿ’ಕೊಳ್ಳುವ ಪೌಲನ ಆಜ್ಞೆಗೆ ಈಗ ಹೆಚ್ಚಿನ ಬಲವಿದೆ! ಇದನ್ನು ಮಾಡಲಿಕ್ಕಾಗಿರುವ ಶಕ್ತಿಶಾಲಿ ಪ್ರಚೋದನೆಯಾಗಿ, ದೇವರು ‘ನಮ್ಮನ್ನು ಸೇರಿಸಿಕೊಳ್ಳುವ’ ವಾಗ್ದಾನ ಮಾಡುತ್ತಾನೆ, ಅಂದರೆ, ಆತನ ರಕ್ಷಣಾತ್ಮಕ ಪರಾಮರಿಕೆಯ ಕೆಳಗೆ ನಮ್ಮನ್ನು ಇರಿಸುತ್ತಾನೆ. ‘ಆತನೊಂದಿಗೆ ಒಂದು ನಿಕಟ ಸಂಬಂಧದಲ್ಲಿ—ಒಬ್ಬ ತಂದೆಯೊಂದಿಗೆ ಮಗನ ಇಲ್ಲವೆ ಮಗಳ ಸಂಬಂಧ—ನಾನು ಆನಂದಿಸುವೆನೊ?’ ಎಂದು ನೀವು ನಿಮ್ಮನ್ನೇ ಕೇಳಿಕೊಳ್ಳಬಹುದು. ಒಬ್ಬ ವಿವೇಕಿ, ಪ್ರೀತಿಪರ ದೇವರಿಂದ ‘ಸೇರಿಸಿಕೊಳ್ಳಲ್ಪಡುವ’ ಇಲ್ಲವೆ ಪ್ರೀತಿಸಲ್ಪಡುವ ವಿಚಾರವು ಬಹಳಷ್ಟು ಆಕರ್ಷಕವಾಗಿರುವುದಿಲ್ಲವೊ? ಆ ವಿಚಾರವು ನಿಮಗೆ ಅಸಂಗತವಾಗಿ ತೋರುವಲ್ಲಿ, ಪ್ರೀತಿಪರ ತಂದೆಯಂದಿರು ತಮ್ಮ ಮಕ್ಕಳ ಕಡೆಗೆ ಪ್ರೀತಿ ಮತ್ತು ಮಮತೆಯನ್ನು ವ್ಯಕ್ತಪಡಿಸುವ ವಿಧವನ್ನು ಗಮನಿಸಿರಿ. ಈಗ, ನಿಮ್ಮ ಹಾಗೂ ಯೆಹೋವನ ನಡುವೆ ಅಂತಹ ಒಂದು ಬಂಧವು ಅಸ್ತಿತ್ವದಲ್ಲಿರುವುದನ್ನು ಊಹಿಸಿಕೊಳ್ಳಿರಿ! ನೀವು ಅದರ ಕುರಿತು ಹೆಚ್ಚಾಗಿ ಮನನಮಾಡಿದಷ್ಟು, ಅಂತಹ ಒಂದು ಸಂಬಂಧಕ್ಕಾಗಿರುವ ಅಭಿಲಾಷೆಯು ಹೆಚ್ಚಾಗಿ ಬೆಳೆಯುತ್ತದೆ.

ಆದರೆ ಗಮನದಲ್ಲಿಡಿ: ನೀವು ‘ಅಶುದ್ಧವಾದ ಯಾವದನ್ನೂ ಮುಟ್ಟದೆ’ ಇದ್ದರೆ ಮಾತ್ರ, ದೇವರೊಂದಿಗೆ ನಿಕಟತೆಯು ಸಾಧ್ಯ. ನಿಮ್ಮನ್ನೇ ಹೀಗೆ ಕೇಳಿಕೊಳ್ಳಿ: ‘ಹೊಗೆಸೊಪ್ಪಿನ ಗೀಳು, ದೇವರು ಖಂಡಿಸುವ “ಅಶುದ್ಧವಾದ” ವಿಷಯಗಳಲ್ಲಿ ಒಂದಾಗಿರುವುದಿಲ್ಲವೊ? ಅದರ ಬಳಕೆಯು, ನನ್ನನ್ನು ಎಲ್ಲ ಬಗೆಯ ಆರೋಗ್ಯ ಅಪಾಯಗಳಿಗೆ ಒಡ್ಡುತ್ತಾ, “ಶರೀರಾತ್ಮಗಳ ಕಲ್ಮಶ”ವಾಗಿರುವುದಿಲ್ಲವೊ? ಯೆಹೋವನು ಶುದ್ಧನಾದ, ಇಲ್ಲವೆ “ಪರಿಶುದ್ಧ” ದೇವರಾಗಿರುವುದರಿಂದ, ಈ ವಿಧದಲ್ಲಿ ಉದ್ದೇಶಪೂರ್ವಕವಾಗಿ ನನ್ನನ್ನೇ ನಾನು ಕಳಂಕಿಸಿಕೊಳ್ಳುವುದನ್ನು ಆತನು ಮೆಚ್ಚಸಾಧ್ಯವಿದೆಯೊ?’ (1 ಪೇತ್ರ 1:15, 16) ಪೌಲನು ಮಾನಸಿಕ ಪ್ರವೃತ್ತಿ ಇಲ್ಲವೆ ‘ಒಬ್ಬನ ಆತ್ಮದ ಕಲ್ಮಶದ’ ವಿರುದ್ಧವೂ ಎಚ್ಚರಿಸುತ್ತಾನೆಂಬುದನ್ನು ಗಮನಿಸಿರಿ. ನಿಮ್ಮನ್ನೇ ಹೀಗೆ ಕೇಳಿಕೊಳ್ಳಿರಿ: ‘ಈ ಗೀಳು ನನ್ನ ಆಲೋಚನೆಯ ಮೇಲೆ ಅಧಿಕಾರ ನಡೆಸುತ್ತದೊ? ನನ್ನ ಬಯಕೆಯನ್ನು ಪೂರೈಸಲು—ಬಹುಶಃ ನನ್ನ ಆರೋಗ್ಯ, ನನ್ನ ಕುಟುಂಬ, ಅಥವಾ ದೇವರೊಂದಿಗಿನ ನನ್ನ ನಿಲುವನ್ನೂ ಗಂಡಾಂತರಕ್ಕೆ ಈಡುಮಾಡುತ್ತಾ—ಏನು ಮಾಡುವುದಕ್ಕೂ ನಾನು ಸಿದ್ಧನಾಗಿರುವೆನೊ? ನನ್ನ ಜೀವನವನ್ನು ಹಾನಿಗೊಳಿಸುವಂತೆ ನಾನು ಎಷ್ಟರ ಮಟ್ಟಿಗೆ ನನ್ನ ಹೊಗೆಸೊಪ್ಪಿನ ಗೀಳಿಗೆ ಅನುಮತಿ ನೀಡಿದ್ದೇನೆ?’ ಕ್ಷೋಭೆಗೊಳಿಸುವಂತಹ ಈ ಪ್ರಶ್ನೆಗಳನ್ನು ಎದುರಿಸುವುದು, ಗೀಳನ್ನು ಬಿಟ್ಟುಬಿಡಲು ನಿಮಗೆ ಬೇಕಾದ ಧೈರ್ಯವನ್ನು ಕೊಡಬಹುದು!

ಸತ್ಯವನ್ನು ಕಲಿಯುವ ಮೊದಲು, ಲಿನ್‌ ದಂಪತಿಗಳು ತಮ್ಮ ಜಮೀನಿನಲ್ಲಿ 1,300 ಅಡಕೆ ಮರಗಳನ್ನು ನೆಟ್ಟಿದ್ದರು. ಆ ಮರಗಳು ಫಲಕೊಡಲು ಐದು ವರ್ಷಗಳು ಹಿಡಿಯುತ್ತವಾದರೂ, ಒಮ್ಮೆ ಅವು ಪೂರ್ಣವಾಗಿ ಉತ್ಪಾದಿಸುವಲ್ಲಿ, ಲಿನ್‌ ದಂಪತಿಗಳು ಪ್ರತಿ ವರ್ಷ 77,000 ಡಾಲರುಗಳಷ್ಟು ಹಣವನ್ನು ನಿರೀಕ್ಷಿಸಸಾಧ್ಯವಿತ್ತು. ಪ್ರಥಮ ಕೊಯ್ಲಿನ ಸಮಯವು ಹತ್ತಿರವಾದಂತೆ, ಲಿನ್‌ ದಂಪತಿಗಳು ಪ್ರಾಮುಖ್ಯವಾದ ನಿರ್ಣಯವೊಂದನ್ನು ಮಾಡಬೇಕಿತ್ತು. ಕ್ರೈಸ್ತರು, ಹೊಗೆಸೊಪ್ಪಿನ ಸೇವನೆ, ಅಮಲೌಷಧದ ದುರುಪಯೋಗ, ಮತ್ತು ಅಡಕೆಯನ್ನು ಜಗಿಯುವಂತಹ ಅಶುದ್ಧ ಅಭ್ಯಾಸಗಳ ಬಳಕೆ, ಇಲ್ಲವೆ ಪ್ರವರ್ಧನೆಯಿಂದ ದೂರವಿರುವ ಮೂಲಕ, ತಮ್ಮನ್ನು “ಶರೀರಾತ್ಮಗಳ ಕಲ್ಮಶ”ದಿಂದ ಶುದ್ಧಗೊಳಿಸಿಕೊಳ್ಳಬೇಕೆಂದು, ಅವರು ತಮ್ಮ ಬೈಬಲಿನ ಅಭ್ಯಾಸದಿಂದ ಕಲಿತಿದ್ದರು. (2 ಕೊರಿಂಥ 7:1) ಅವರು ಏನು ಮಾಡಲಿದ್ದರು?

ಪಾಪಪ್ರಜ್ಞೆಯುಳ್ಳ ಮನಸ್ಸಾಕ್ಷಿಯ ಒತ್ತಡದಿಂದ, ಶ್ರೀ. ಲಿನ್‌ ತಮ್ಮ ಅಭ್ಯಾಸವನ್ನು ನಿಲ್ಲಿಸಲು ನಿರ್ಧರಿಸಿದರು. ಈ ಮಧ್ಯೆ ಶ್ರೀಮತಿ ಲಿನ್‌, ಕೆಲವು ಬಲಿತ ಮರಗಳಿಂದ ತೆಗೆದ ಅಡಕೆಗಳ ಮಾರಾಟಮಾಡಿ, 3,000ಕ್ಕಿಂತಲೂ ಹೆಚ್ಚು ಡಾಲರುಗಳ ಲಾಭವನ್ನು ಗಳಿಸಿದರು. ಇದು, ಅವರು ತಮ್ಮ ಮರಗಳನ್ನು ನಾಶಮಾಡದೆ ಇಟ್ಟುಕೊಳ್ಳುವುದಾದರೆ ಬೇಗನೆ ಬರಲಿದ್ದ ಲಾಭದ ಪೂರ್ವಾನುಭವ ಆಗಿತ್ತಷ್ಟೇ. ಆದಾಗಲೂ, ಶ್ರೀ. ಲಿನ್‌ ಅವರ ಮನಸ್ಸಾಕ್ಷಿಯು ಅವರನ್ನು ಕಾಡಿಸುತ್ತ ಇತ್ತು.

ತನಗಾಗಿ ತನ್ನ ಅಡಕೆ ಮರಗಳನ್ನು ಕಡಿದುಹಾಕುವಂತೆ ಅವನು ಸ್ಥಳೀಯ ಸಾಕ್ಷಿಗಳ ಬಳಿ ಕೇಳಿಕೊಂಡ ದಿನದ ವರೆಗೆ, ಅವನು ಈ ವಿವಾದಾಂಶದೊಂದಿಗೆ ಹೆಣಗಾಡಿದನು. ಅದು, ಅವರು ಮಾಡಬೇಕಾದ ನಿರ್ಣಯವಾಗಿತ್ತೆಂದು ಸಾಕ್ಷಿಗಳು ವಿವರಿಸಿದರು; ಆದುದರಿಂದ, ಅವರು ‘ತಮ್ಮ ಸ್ವಂತ ಹೊರೆಯನ್ನು ಹೊತ್ತುಕೊಳ್ಳ’ಬೇಕಿತ್ತು ಮತ್ತು ತಾವೇ ಮರಗಳನ್ನು ಕಡಿದುಹಾಕಬೇಕಿತ್ತು. (ಗಲಾತ್ಯ 6:4, 5) 1 ಕೊರಿಂಥ 10:13ರಲ್ಲಿರುವ ವಾಗ್ದಾನವನ್ನು ಸ್ಮರಿಸಿಕೊಳ್ಳುವಂತೆ ಸಾಕ್ಷಿಗಳು ಅವರನ್ನು ಉತ್ತೇಜಿಸಿದರು. ಅದು ಹೇಳುವುದು: “ಮನುಷ್ಯರು ಸಹಿಸಬಹುದಾದ ಶೋಧನೆಯೇ ಹೊರತು ಬೇರೆ ಯಾವದೂ ನಿಮಗೆ ಸಂಭವಿಸಲಿಲ್ಲ. ದೇವರು ನಂಬಿಗಸ್ಥನು; ನಿಮ್ಮ ಶಕ್ತಿಯನ್ನು ಮೀರುವ ಶೋಧನೆಯನ್ನು ನಿಮಗೆ ಬರಗೊಡಿಸದೆ ನೀವು ಅದನ್ನು ಸಹಿಸುವದಕ್ಕೆ ಶಕ್ತರಾಗುವಂತೆ ಶೋಧನೆಯಾಗುತ್ತಲೇ ತಪ್ಪಿಸಿಕೊಳ್ಳುವ ಮಾರ್ಗವನ್ನು ಸಿದ್ಧಮಾಡುವನು.” ಸಾಕ್ಷಿಗಳು ಹೀಗೆ ಹೇಳುತ್ತಾ ಅವರೊಂದಿಗೆ ತರ್ಕಿಸಿದರು ಸಹ: “ನಿಮಗಾಗಿ ನಾವು ನಿಮ್ಮ ಮರಗಳನ್ನು ಕಡಿದುಹಾಕುವುದಾದರೆ, ನೀವು ಅದಕ್ಕಾಗಿ ವಿಷಾದಪಟ್ಟು, ಆದ ನಷ್ಟಕ್ಕಾಗಿ ನಮ್ಮನ್ನು ದೂಷಿಸಬಹುದು.” ಸ್ವಲ್ಪ ಸಮಯದ ಅನಂತರ, ಶ್ರೀಮತಿ ಲಿನ್‌ ಸರಪಣಿ ಗರಗಸದ ಶಬ್ದವನ್ನು ಕೇಳಿ ಎಚ್ಚೆತ್ತರು. ಅವರ ಗಂಡ ಮತ್ತು ಮಕ್ಕಳು ಅಡಕೆ ಮರಗಳನ್ನು ಕಡಿದುಹಾಕುತ್ತಿದ್ದರು!

ಯೆಹೋವನು ತನ್ನ ವಾಗ್ದಾನಕ್ಕೆ ನಿಷ್ಠಾವಂತನಾಗಿದ್ದಾನೆಂದು ಶ್ರೀ. ಲಿನ್‌ ಕಂಡುಕೊಂಡರು. ಯೆಹೋವನ ಸ್ತುತಿಗಾರರಾಗುವಂತೆ ಅವರನ್ನು ಶಕ್ತಗೊಳಿಸುತ್ತಾ, ಶುದ್ಧವಾದ ಮನಸ್ಸಾಕ್ಷಿಯನ್ನು ಹೊಂದುವಂತೆ ಅನುಮತಿಸಿದ ಕೆಲಸವನ್ನು ಅವರು ಕಂಡುಕೊಂಡರು. ಅವರು 1996ರ ಎಪ್ರಿಲ್‌ ತಿಂಗಳಿನಲ್ಲಿ ನಡೆದ ಯೆಹೋವನ ಸಾಕ್ಷಿಗಳ ಸರ್ಕಿಟ್‌ ಸಮ್ಮೇಳನದಲ್ಲಿ ದೀಕ್ಷಾಸ್ನಾನ ಪಡೆದುಕೊಂಡರು.