Kal Mudimw ni Biit Bidyobw Bahang bwa Kulongweesh Baan Biibuh Myand Habitaatal Yehow

 1. I biny bidy balel bakaam bwa baan baabab?

BALEL, tudy bamanyik neey nudy bakat menmen bwa kwambulwiish baan biinun bwa bamanyik ni bakat Yehow. Ki Mawej kiishoh bend umweek. I mushind kaay uwudy mwa kwambulwiish baan biibuh bwa kumutalobw bu Muut a biin-biin ni mudyobw mwa kufweej habwiih nend eeny?—Jak 4:8.

 2. I mushind kaay udy balel mwa kulongweesh baan baabw habitaatal biikadil bya Yehow?

² Mushind a buseeb a kulong i kwiibambulwiish bwa kufweejobw habwiih ni Yehow hakulong naab Bibl. (2 Tim. 3:14-17) Cikwaabw, Bibl uleeleej mushind mukwaabw udy mwa kwambulwiish baasand bwa kulong myand habitaatal Yehow. Mu mukand a Tusumw, taat udy mwa kuvulwiij biin-biin mwaan indiy bwa kaay wa vulamin biikadil bya Yehow, bidyey mwiituleej mu biit bidyey muhang. (Tus. 3:19-21) Twiiyiiy kutal yimw mishind yidy balel mwa kukal naay mudimw habitaatal biit bihang bwa kwambulwiish baan baababw bwa kwiibalongweesh habitaatal biikadil bya Yehow.

 3. Bwa kwambulwiish baan baababw bikaam balel balong biny?

³ Bibl uleeleeb neey: “bukash bwindiy bwa mwendelel ni buumawej bwindiy bikiish bimweek ku mees bimweemweekel mu biit bidyey muhang.”(Rom 1:20) Nun balel, misang yikwaabw nudy bakat kuhitij diib hanj ni baan biinun. Kalaay mudimw ni diib dya naak bwa kwambulwiish baan biinun bwa kutalobw kuhetangan kudy hakacy ha “biit bidyey muhang” ni biikadil bya Yehow bilengel byeeh. Bwa bwaal oobw, tutalaayaak mudy balel mwa kulongel ku cileejel cya Yeez habitaatal mushind waakadyey ulongweesh.

 4. I mushind kaay ukadil Yeez mudimw ni biit bihang bwa kulongweesh biiyij bindiy? (Luuk 12:24, 27-30)

⁴ Tal mwaakady Yeez ukal mudimw ni biit bihang bwa kulongweesh naaby baat. Cileejel, musang mukwaabw, wambiil biiyij bindiy bwa kutalobw toony twa bikolol ni bilong bya mu madimy. (Bal Luuk 12:24, 27-30.) Yeez waakady mwa kuteel nyam kaay woos eecy mutond, ki waakady mutwaal cileejel cya koony ni cilong byaakady biiyij bindiy bamanyik bilengel. Biiyij ba Yeez baakady mwa kutal bikolol bihit mwiiwul muleeh ni bilong hadyeby bitolok mu budimy. Udy mwa kwiifwaanyikij bu waakadyok haakady Yeez ufukut ku biit eeby haakadyey uleeb eeny? Ni i biny bilongeley kuunyim kwa yiy muman kutwaal bileejel eeby? Ulongweeshel biiyij bindiy dilongweesh dya bukash habitaatal lukat lwa kwaakish baat biit ni bulengel bidy naaby Taat indiy udy mu diiwul: Yehow wiiyiiy kudiish ni kuvwiik biin mudimw bindiy ba lulamat teng bu mudyey ulong bwa bikolol ni bilong bya mu budimy.

 5. I bileejel kaay bya mu biit bidy Mawej muhang bidy balel mwa kukal naaby mudimw bwa kulongweesh baan baabab habitaatal Yehow?

⁵ Nun balel, i mushind kaay unudy mwa kwiidikij Yeez hanuloolongweesh baan biinun? Udy mwa kwambil mwaan iibuh habitaatal bwaal kaahand bwa mu biit bidy Mawej muhang buwudy mwanyish, bu nyam uwudyaakal mukat bikasakan eecy mutond. Hawuloolong nook, iikal mutwiishibw bwa kumvwiij cidy cileejel aacy cyumvwiij habitaatal Yehow. Udy mwa kujooj cikwaabw mwaan iibuh habitaatal nyam udyey mukat bikasakan eecy mutond. Uw mukal mudimw ni ciit kaahand cimusaasangeej cidy Mawej muhang, udy mwa kukat misang yikwaabw bwa kukukuney mat bikasakan menmen hawumwamwambil bwa biikadil bya Yehow.

 6. I biny bitudy mwa kulongel ku cileejel cya maam indiy a Christopher?

⁶ Bikaam balel bahitijok diib divul hakukaam nyam musunguluk eecy mutond musunguluk kuuhal kwa kwiisambilobw ha cidy biit bihang bileej habitaatal Yehow eeny? Kabiish ni buseeb bwa kulong teng nook. Yeez kaakadyoh mumvwiij bikasakan habitaatal mushind udyaady bikolol eecy mushind ukakasakan bilong bya mu madimy. Ning mwaan iibuh yiy mwiikal mukat kulong bwa kumanyik myand yivul habitaatal biit bidy Yehow muhang, ki misang yikwaabw ku mutal bituh ni meej moos eecy kumwiihanguj i bikumban bwa kumwambulwiish bwa kumvwey ciwukaakaam kumwambil. Tal bwaal budy mwiin-kweet Christopher uvuluk bwa ku bwaan bwindiy: “Maam a mim waakady mwa kuleeb myand yikeeh bituh bwa kwiitwambulwiish bwiitut kwangat biit bidy Mawej muhang bidy bitunyungulukil ni buseeb. Cileejel, hatwaakady habwiih ni milund, waakady mwa kuleeb neey: ‘Tal mudy milund eey yiikal yitam ni yilengel menmen! Kabiin bikukemeshok habitaatal Yehow eeny?’ Eecy hatwaakady habwiih ni kabuk-koony, waakady mwa kuleeb neey: ‘Tal bukash budy naam mavuk maloolongek ha mwanz! Kabiish bileejok neey Mawej i mwiin bukash eeny?’” Christopher uleeleeb neey: “Myand yileeb yikeeh ki yiikal yumvwiik i yitusak biin-biin bwa kulangiloh.”

 7. I mushind kaay uwudy mwa kulongweesh baan biibuh bwa kulangil ha biit bidy Mawej muhang?

⁷ Hady baan biibuh bend ni kukuluuh, udy mwa kwiibalongweesh bwa kulangilobw bikasakan ha biit bidy Mawej muhang ni bwa kulongobw myand habitaatal biikadil bya Yehow. Udy mwa kwiisamb naab habitaatal ciit cyumw cidy Yehow muhang ni ihanguj baan biibuh neey: “Ciit eecy cinuloolongweeshok biny habitaatal Yehow?” Bidy mwa kukukemesh bwa kumvw ciikalobw ni bwa kukwambil bwa mulaalangobw.—Mat. 21:16.

 8. I biny byaakady balel biin Izaleel balong “mu njil” ciisang cyaakadyobw balong lwend?

⁸ Baakady bambil balel biin Izaleel bwa kulongweeshobw baan baabab may ma Yehow diib dyaakadyobw bend ni kwend “mu njil.” (Mmu. 11:19) Njil ya mu Izaleel yaakady yital ku madimy. Nyam yishil-shilangan, byoony, ni bilong byaakadyobw mwa kutal. Haakady bisak bya biin Izaleel balong lwend, mu njil aamw, balel baakady ni mushind a kwiisamb ni baan baabab habitaatal biit bidy Mawej muhang. Nun balel, misang yikwaabw nudy mwa kwiisangan mu biisang bya bwiin biin eeby binudy mwa kukal naaby mudimw bwa kulongweesh baan biinun. Kontonon mushind udy bakwaabw balong nook.

 9. I biny bitudy mwa kulongel ku cileejel cya Punitha ni Katya?

⁹ Maam mukwaabw diijin dindiy Punitha, udy mushikat mu tawuny mutam wa mu cibunj cya End, uleeleeb neey: “Hatukuukumbul cisak kaahand cidy cishikacil ku madimy, tutaatal ciisang eecy bu mushind utudy mwa kwambulwiish nend baan biitut bwa kulong myand habitaatal biit bilengel byeeh bidy Yehow muhang. Nady mutal neey baan baam bumvumvw bilengel menmen myand habitaatal biit bidy Mawej muhang hadyobw kabay mu majil mudy baat ba biyool ni mukiish mwiikal kwiihitakan kuvul kwa mashiny.” Nun balel, baan biinun kabiin mwa kwiiy kuvulaminoh bend misang yikwaabw cyaab cilengel cinudy bahitij diib haakaabumw naabw. Katya, mwiin-kweet mwaan-mukaj wa mu Moldova, uleeleeb neey: “Myand yilengel menmen yinacidy muvuluk ya ku bwaan, i biisang binaakady nahitij diib haakaabumw ni balel baam ku byaab bya ku madimy. Niibafwiifwiijok bwa mudyobw baalongweesh kacy ku bwaan bwaam bwa kwiimanok bwa kutal ni kulangilok ha biit bidy Yehow mulong ni bwiitut kutal kwiikalok kwindiy ku dyambulwiish dya biit bidyey muhang.”

10. I biny bidy balel mwa kulong bab batal neey i bikasakan bwa kuyobw kuleeh ni tawuny? (Tal kazubw ka neey: “Dyambulwiish bwa Balel.”)

¹⁰ I biny biwudy mwa kulong uw mwiikal kuy ni mushind a kuy ku byaab kudy baat badim? Amol, udy mushikacil byeen mu cibunj cya End, uleeleeb neey: “Cyaab cinady mushikacil, balel bakaakal mudimw ni baloolong meeb mavul, ni kulong lwend bwa kuy ku bisuk kudy mwa kwangat makut mavul. Ki, ka cyaab kakeeh kadyobw balamin nyam eecy kazubw ka musong kiibakil haash kady mwa kwambulwiish bu kacyaab ka kwiikal kutal ni kulangil ha biit bidyobw bahang ni kuleeb habitaatal biikadil bya Yehow.” Uw utal ni utumok meej, wiiyiiy kumanyik misang yikwaabw habwiih ni kwiibuh myand yivul ya mu biit bidyobw bahang yiwudy mwa kuleej baan biibuh. (Mus. 104:24) Misang yikwaabw wiiyiiy kumanyik byoony, biishiish, mitond, ni biit bikwaabw. Karina, wa mu Allemagne, uleeleeb neey: “Maam a mim i mukat bilong, ki bwabiny hanacyaakady kasangikaj, waakady mwa kuuleej ni mun indiy bilong bilengel hatwaakady twendakan nend haakaabumw.” Balel, nudy mwa kukal mudimw ni video yivul ni mikand yiitut yidy ni myand habitaatal biit bidy Mawej muhang bidy bulongolody bwiitut buhatul bwa kulongweesh naaby baan biinun. Cya biin, ning uw mushikacil ha cyaab kaay, udy mwa kwambulwiish baan biibuh bwa kutalobw ni kulangil ha biit bidy Mawej muhang. Kaabaak tukontononaay byumw biikadil bya Yehow binudy mwa kuleej baan biinun.

11. I mushind kaay udy balel mwa kwambulwiish baan baabab bwa kumanyik neey Yehow udy ni lukat?

¹¹ Bwa kwambulwiish baan biibuh bwa kutalobw lukat ludy naal Yehow, udy mwa kwiibaleej ni lukat mudy nyam yivul yitaabaleel baan bayiy. (Mat. 23:37) Udy mwa kuleebel cikwaabw bikasakan ha biit bishil-shilangan bilengel byeeh bitudy bakat mu biit bidy Mawej muhang. Karina, udyobw baleeb mu bikos bya ku butambwiil, uleeleeb neey: “Hatwaakady tukendakan, maam a mim waakady wiiy kuukashish bwa kwanj kwiimanok ni kutalok mudy cilong cyoos ciikal ni mudy bulengel bwaacicy buleej lukat ludy naal Yehow. Kuunyim kwa mivw, niiyil kwiikal ni ciibidil cya kutungunuk ni kutal ni kulangil ha bilong—ni nady mutal neey bilong byoos kabiish bihang mu mushind aakaabumw, cilong cyoos cidy ni diikal dyaacicy ni i cishilangan ni bikwaabw. Byaakady bitungunuk ni kuvulwiij neey Yehow i mwiitukat bikasakan.”

12. I mushind kaay udy balel mwa kwambulwiish baan baabab bwa kumanyik meej mady naam Mawej? (Misambw 139:14) (Tal cikwaabw cifwaatul.)

¹² Ambulwiish baan biibuh bwa kumanyikobw meej mady naam Yehow. Yehow udy biin-biin ni meej mavul menmen ni kakwiin muut udy mwa kweeleken nend. (Rom 11:33) Cileejel, udy mwa kwiibaleej mudy mwanz ulong mavuby ni mushind udy mavuby mahumun mabuny ma mwanz biheehel ha cyaab ni cikwaabw. (Yoobw 38:36, 37) Udy mwa kuleebel bikasakan ha mushind mulengel weeh ukeekemesh bwa mudy Mawej muhung nyeet yiitut. (Bal Musambw 139:14.) Tutalaay cileejel cya mwaakady Taat Vladimir mulong. Uleeleeb neey: “Diifuk dikwaabw, mwaan iitut mwaan-mulum waakady muhon ni diikal ni kwiitahey. Kuunyim kwa mafuk makeeh, cit cyuumin. Mim ni Mukaj aam tuleebel neey Yehow i muhang nyeet yiitut ni bukash budy mwa kulong bwa yiikal cikwaabw yiyondah kaayaay; cileejel hady muut wiitah ni ciit ciiy cyuum kaayaacy. Twiibambil neey kakwiin bend ciit bu ciin eecy mu biit bidy baat balong. Cileejel, mashiny mam manyanguk kamiish mwa kulongolok kaayamw. Bwaal oobw bwambulwiishil mwaan iitut sangwiilum bwa kumanyik meej mady naam Yehow.”

13. I mushind kaay udy balel mwa kwambulwiishobw baan baabab bwa kujingunun bukash budy naabw Mawej? (Yeshaay 40:26)

¹³ Yehow wiitubiibiikan bwiitut kutadij mees miitut mwiiwul ni bwiitut kulangil ha bukash bwindiy bukeekemesh budy bulam mitoot yoos. (Bal Yeshaay 40:26.) Udy mwa kukashish baan biibuh bwa kutadijobw mees mwiiwul ni bwa kulangilobw ha bidyobw batal. Mwiin-kweet mwaan-mukaj wa mu Taiwan diijin dindiy Tingting uvuuvuluk bwaal kaahand bumulongekel hacyaakadyey mwaan mutofw: “Musang umw, haakady maam uukatwaalok ha cyaab cya kushikacil, ni twaakady mwa kutal bufuk mitoot yivul mwiiwul bwaal katwaakady bend mu tawuny ni midil yikwaabw yoos. Cyaakady ciisang cinaakady mumvw bibiih bwa balund baam baakady baatacish ni nalangil ning naakady mwa kutungunuk ni kukadil Yehow mudimw ni lulamat. Maam waakady muukashish bwa kulangil ha bukash budy Yehow mukal naabw mudimw bwa kuhang mitoot yoos eey ni bwa kuvuluk neey udy biin-biin mwa kukal mudimw ni bukash aabw bwa kwiitwambulwiish bwiitut kutaatameen makab ning ma bicy. Hanamanyin kutal biit bihang hatwaakady tulong lwend, byaakady bisak bwa mim kumanyik Yehow bilengel menmen, ni byaakady biikashish ku micim bwa dihangadik dinaakady naady dya kumukadil mudimw.”

14. I mushind kaay udy balel mwa kukal mudimw ni biit bihang bwa kwambulwiishobw baan baabab bwa kutalobw neey Yehow i Mawej udy ni musangal?

¹⁴ Biit bidy Yehow muhang bileeleej neey udy ni musangal ni mukat bwa twiikal byeet ni musangal. Biin myand ya siyans i batal neey nyam yivul yidyaakal yizab, ni byoony ni misany. (Yoobw 40:20) Baan biibuh baakady basekok hatadilobw nyam wend ni kuzab eeny? Misang yikwaabw i batal kaan ka mpuus kend ni kuzab ni cimot cya bwand eecy twaan twa tutubw twiikal twend ni kulwiishangan. Musang uloolond baan biibuh baseesek hadyobw batal myand yidy nyam ulong yibasekej, udy mwa kwiibavulwiijok neey tukaakadil Mawej udy ni musangal mudimw.—1 Tim. 1:11.

15. I biny bidy mwa kwambulwiish balel bwa kumanyik meej mady naam baan baabab? (Tusumw 20:5) (Tal cikwaabw cifwaatul.)

¹⁵ Ha biisang bikwaabw, bidy mwa kwiikal bikasakan bwa balel kumanyikobw myand yidy baan baabab batwiilangan naay yidyobw mwa kwiibambil. Biby biikal neey i lul lutat lunudy naal, bikaam numanyik mushind unudy mwa kulong bwa kumanyik meej mady naam baan biibuh. (Bal Tusumw 20:5.) Balel bakwaabw i batal neey i biheehel bwa kulong nook haadyobw basangal haakaabumw ni baan baababw akukat biit bidy Mawej muhang. Bwabiny tuleeleeb nook? Kamw kabingil kady neey kudy biit bikeeh menmen bya kuhitij naaby luleng bwa baan ni bwa balel baabab. Taat mukwaabw mu Taiwan diijin dindiy Masahiko uleeleej kabingil kakwaabw: “Hatuhiihitij diib hanj ni baan biitut—kuy kendakan ku milund eecy kuush kwa mwanz—badyaakal bumvw bilengel menmen. Nook i biheehel menmen bwiitut kwiikal naabw habwiih ni bwa kumanyik biilaalangobw.” Katya, utukaady baman kuteel mu bikos bishaal, uleeleeb neey: “Hatwaakady tuhatuk mu kalaas, maam a mim waakady ni ciibidil cya kuy kendakan naany ha cyaab cilengel cidyobw balamin nyam. Ha cyaab cya diitalal eecy, byaakady biheehel menmen bwa kumwambiley myand yaakady yihitakan ku kalaas eecy yaakady yimubungamij.”

16. I mushind kaay udy biin mu bisak mwa kuhitijok luleng ni bwa kuzabok hadyobw banyish biit bidy Yehow?

¹⁶ Hady biin mu bisak banyish biit bidy Yehow muhang, bady mwa kuhitij luleng hakwiibibandil ni bady mwa kuzabok haakaabumw, kulong nook kwiiyiiy kwiibambulwiish bwa kukatanganobw bikasakan. Bibl uleeleeb neey kudy “ciisang cya kusek” ni “ciisang cya kuj maj.” (Mul. 3:1, 4) Yehow i mulong byaab bilengel byeeh ha bulab bidy mwa kwiitwambulwiish bwa kulongeloh myand yitudy bakat. Biin mu bisak bavul i bakat kwiikal haakaabumw ha cyaab cilengel cilam hady biit bidy Mawej muhang bu mitond, ku madimy, ku milund, eecy ha byaab bidy kuush kwa mwanz. Baan bakwaabw i bakat kut lubil ni kuzabil ha cyaab cidyobw balamin nyam, bwa kubandil nyam, eecy bwa kwanzam mu musul, mu diijib ditam, eecy mu kabuk-koony. Tudy ni mishind yilengel yeeh yidy mwa kwiitwaakish musangal hatuhihitij diib ha cyaab ciilekelel hakubandil biit bidy Yehow muhang bidy bitunyungulukil!

17. Bwabiny bikaam balel bambulwiish baan baabab bwa kwanyish myand yilengel ya mu biit bidy Mawej muhang?

¹⁷ Mu bulongolody buhyaabuhy bwa Mawej, biikaakal ni musangal wa kwanyish biit bidy Yehow muhang bishilangan ni mushind udyobw bibital leeloow. Cikwaabw, katwaakwiikaloh bend ni kabingil bwa kuciin nyam; ni yiy byaay kayakwiituciinoh bend ciisang aacy. (Ye. 11:6-9) Twiiyiiy kukat buyiil biit bidy Yehow mulong. (Mus. 22:26) Ki balel, kanutakaminoh bend teng ciisang aacy bwiinun kwambulwiish baan biinun bwa kutwaadijobw kwanyish myand yilengel yidyobw mwa kuhet hadyobw batal biit bidy Mawej muhang. Hawukaakal mudimw ni biit bihang bwa kulongweesh baan biibuh myand habitaatal Yehow, biiyiiy misang yikwaabw kwiitab bu Mukaleng Davih uleebel neey: “A Mawej, kakwiish mawej mukwaabw udy mwa kulong biwudy mulong uw.”—Mus. 86:8.