Koloshians
1 Mi, Pɔl, we na Krays Jizɔs in apɔsul bikɔs na dat Gɔd want, a de wit Timoti wi brɔda. 2 A de rayt to di oli wan dɛn ɛn di fetful brɔda dɛn we gɛt wanwɔd wit Krays na Kolose:
Lɛ Gɔd, wi Papa, in spɛshal gudnɛs* ɛn pis de pan una.
3 Wi kin tɛl Gɔd, we na wi Masta Jizɔs Krays in Papa, tɛnki ɔltɛm we wi de pre fɔ una, 4 bikɔs wi dɔn yɛri bɔt di fet we una gɛt pan Krays Jizɔs ɛn di lɛk we una lɛk ɔl di oli wan dɛn. 5 Dis na bikɔs una op fɔ gɛt di tin we Gɔd dɔn kip fɔ una na ɛvin. Una bin dɔn yɛri bɔt dis op frɔm di mɛsej bɔt di gud nyuz we na tru 6 we dɔn rich to una. Jɔs lɛk aw di gud nyuz de go bifo ɛn rich ɔlsay na di wɔl, na so bak i de du to una frɔm di de we una yɛri ɛn rili no di kɔrɛkt ɛn tru tin bɔt Gɔd in spɛshal gudnɛs.* 7 Na dat una bin dɔn lan frɔm Ɛpafras we na wi kɔmpin slev we wi rili lɛk ɛn we na Krays in fetful savant fɔ wi sek. 8 I tɛl wi bak bɔt di lɔv we Gɔd in spirit dɔn mek una gɛt.
9 Na dat mek frɔm di de we wi yɛri bɔt dat, wi nɔ ɛva lɛf fɔ pre fɔ una fɔ mek una go rili no di kɔrɛkt tin we Gɔd want ɛn rili gɛt sɛns ɛn ɔndastand tin dɛn we gɛt fɔ du wit Gɔd biznɛs, 10 so dat una go waka di we aw Jiova* want fɔ lɛ una rili mek i gladi as una de kɔntinyu fɔ du ɔlkayn gud wok ɛn no di kɔrɛkt tin bɔt Gɔd mɔ ɛn mɔ; 11 ɛn mek Gɔd yuz in pawa fɔ mek una tinap tranga wan so dat una go bia ɔltin ɛn gɛt peshɛnt ɛn gladi-at, 12 as una de tɛl di Papa tɛnki, we mek una kwalifay fɔ gɛt wetin di oli wan dɛn we de na di layt go gɛt.
13 I pul wi kɔmɔt na daknɛs* ɛn briŋ wi kam na in Pikin in kiŋdɔm, di Pikin we i rili lɛk. 14 Na tru am i pe di prayz fɔ fri wi, we min se i dɔn fɔgiv wi sin dɛn. 15 Dis Pikin fiba di Gɔd we wi nɔ de si, ɛn na in fɔs Gɔd mek bifo ɛni ɔda tin. 16 Na in Gɔd yuz fɔ mek ɔl di ɔda tin dɛn we de na ɛvin ɛn na di wɔl, di tin dɛn we wi de si ɛn di tin dɛn we wi nɔ de si, ilɛksɛf na tron dɛn, masta dɛn, gɔvmɛnt dɛn, ɔ di wan dɛn we gɛt pawa. Na tru am ɛn na fɔ am Gɔd mek ɔl di ɔda tin dɛn. 17 I bin dɔn bigin liv bifo ɔl ɔda tin dɛn, ɛn na in Gɔd yuz fɔ mek ɔl di ɔda tin dɛn, 18 ɛn na in na di ed na di bɔdi, dat na, di kɔngrigeshɔn. Na in na di biginin, na in na di fɔs wan we gɛt layf bak, so dat i go bi di wan we de fɔs pan ɔltin; 19 bikɔs Gɔd bin gladi fɔ mek ɔltin de insay am kɔmplit wan, 20 ɛn na in i yuz fɔ mek ɔl ɔda tin dɛn kam bak to am ɛn mek pis de bitwin dɛn, ilɛksɛf na di tin dɛn na di wɔl ɔ di tin dɛn na ɛvin. Na in blɔd we kɔmɔt pan in bɔdi na di tik we i sɔfa pan,* na in mek dis pis pɔsibul.
21 Fɔ tru, tɛm bin de we una bin de fa frɔm Gɔd ɛn una na bin Gɔd in ɛnimi dɛn bikɔs una maynd bin de pan tin dɛn we wikɛd. 22 Bɔt naw i dɔn yuz in Pikin in mɔtalman bɔdi fɔ mek pis wit una tru di day we i day, so dat we una de bifo am, una go oli, una nɔ go gɛt wan fɔlt, ɛn nɔbɔdi nɔ go se una dɔn du bad— 23 dat na if una kɔntinyu fɔ liv una layf akɔdin to di fet we una gɛt pan Gɔd, una tinap tranga wan na di fawndeshɔn ɛn nɔ alaw natin fɔ shek una ɔ pul una maynd pan di op we una gɛt frɔm di gud nyuz we una bin yɛri ɛn we dɛn dɔn prich ɔlsay na di wɔl. Mi, Pɔl, dɔn bi savant fɔ dis gud nyuz.
24 A de gladi naw we a de sɔfa fɔ una sek, ɛn a de sɔfa bikɔs ɔf Krays, bɔt a nɔ sɔfa yet di kayn we aw a fɔ sɔfa fɔ in bɔdi, we na di kɔngrigeshɔn. 25 A dɔn bi savant fɔ dis kɔngrigeshɔn bikɔs Gɔd gi mi dis wok fɔ una sek fɔ mek a prich in wɔd gud gud wan, 26 dat na, di oli sikrit we bin ayd ɔl dis tɛm* ɛn we pipul dɛn we bin de trade trade nɔ bin no bɔt. Bɔt naw i dɔn sho am to di oli wan dɛn. 27 Pantap dat, Gɔd gladi fɔ mek di oli wan dɛn no di oli sikrit we wɔndaful ɛn we rili gɛt valyu, we ɔda neshɔn dɛn de no bɔt. Dis oli sikrit na Krays we gɛt wanwɔd wit una, we min di op we una de op fɔ gɛt glori wit am. 28 Na in na di wan we wi de tɔk bɔt, wi de wɔn ɔlman ɛn de yuz ɔlkayn sɛns fɔ tich ɔlman, so dat wi go briŋ ɔlman bifo Gɔd as machɔ pipul dɛn we gɛt wanwɔd wit Krays. 29 Na dis mek a de wok tranga wan, a de rili tray tranga wan bikɔs ɔf di trɛnk ɛn pawa we i de gi mi.