Ibruz

1 Trade trade, Gɔd yuz di prɔfɛt dɛn fɔ tɔk to wi gret gret granpa dɛn bɔku tɛm ɛn difrɛn we dɛn. 2 We dɛn dez ya de kam dɔn, i dɔn tɔk to wi tru in Pikin, we i dɔn pik fɔ gɛt ɔltin, ɛn we i yuz fɔ mek di difrɛn tɛm dɛn.* 3 Na in rili de sho Gɔd in glori ɛn na in rili tan lɛk Am, ɛn i de yuz in wɔd we gɛt pawa fɔ mek ɔltin kɔntinyu fɔ de. Afta i dɔn klin wi frɔm wi sin dɛn, i sidɔm na di Gret Gɔd in raytan na ɛvin. 4 I dɔn so pas di enjɛl dɛn dat, i dɔn gɛt nem we wɔndaful pas dɛn yon fa fawe.

5 Fɔ ɛgzampul, uswan pan di enjɛl dɛn Gɔd dɔn ɛva tɛl se: “Yu na mi pikin; tide a dɔn bi yu papa”? Ɛn: “A go bi in papa, ɛn i go bi mi pikin”? 6 Bɔt we i briŋ in fɔs Pikin bak na di wɔl, i se: “Ɛn mek Gɔd in enjɛl dɛn ɔl sho am rɛspɛkt.”*

7 Dɔn i tɔk bɔt di enjɛl dɛn se: “I mek in enjɛl dɛn as spirit, ɛn i mek in savant* dɛn as faya we de kech.” 8 Bɔt i tɔk bɔt di Pikin se: “Gɔd na yu tron sote go, ɛn di staf fɔ yu Kiŋdɔm na di staf we de du tin tret. 9 Yu lɛk fɔ du wetin rayt, ɛn yu et fɔ brok lɔ. Na dat mek Gɔd, we na yu Gɔd, anɔynt yu wit ɔyl ɛn gi yu gladi-at pas yu kɔmpin dɛn.” 10 Ɛn: “Frɔm di biginin, O Masta, na yu le di wɔl in fawndeshɔn dɛn, ɛn na yu an dɛn mek ɛvin. 11 Dɛn go pwɛl, bɔt yu go kɔntinyu fɔ de; ɛn dɛn ɔl go ol jɔs lɛk klos, 12 ɛn yu go rap dɛn jɔs lɛk lɔng klos, ɛn yu go chenj dɛn. Bɔt yu na di sem, ɛn yu go de sote go.”

13 Bɔt uswan pan di enjɛl dɛn i dɔn ɛva tɛl se: “Sidɔm na mi raytan te a put yu ɛnimi dɛn ɔnda yu fut lɛk smɔl bɛnch”? 14 Dɛn ɔl nɔto spirit dɛn we de du oli wok,* we Gɔd kin sɛn fɔ ɛp di wan dɛn we go sev?