2 Pita

1 Mi, Saymɔn Pita, we na Jizɔs Krays in slev ɛn apɔsul, de rayt to di wan dɛn we dɔn gɛt fet we valyu lɛk wi yon bikɔs wi Gɔd ɛn di Seviɔ Jizɔs Krays de du wetin rayt:

2 Lɛ una gɛt Gɔd in spɛshal gudnɛs* ɛn pis mɔ ɛn mɔ bay we una de no di kɔrɛkt tin bɔt Gɔd ɛn Jizɔs wi Masta. 3 Gɔd in pawa dɔn gi wi* ɔl di tin dɛn we de ɛp wi fɔ liv ɛn fɔ fetful to am bay we wi no di kɔrɛkt tin bɔt di Wan we kɔl wi bikɔs ɔf in glori ɛn gudnɛs. 4 Dɛn tin ya dɔn mek i gi wi* prɔmis dɛn we valyu ɛn we rili wɔndaful, so dat dɛn go mek una tan lɛk Gɔd, bikɔs una nɔ miks igen pan di kɔrɔpshɔn na di wɔl we pipul dɛn kin put an pan bikɔs ɔf di bad tin we de na dɛn at.

5 Bikɔs ɔf dis, una tray tranga wan fɔ gɛt fet, pantap dat, una go de du gud; pantap dat, una tray fɔ no mɔ; 6 pantap dat, una kɔntrol unasɛf; pantap dat, una go de bia; pantap dat, una fɔ fetful to Gɔd; 7 pantap dat, una lɛk unasɛf lɛk aw brɔda dɛn kin lɛk dɛnsɛf; ɛn pantap dat, una sho lɔv. 8 If una gɛt dɛn kwaliti ya ɛn kɔntinyu fɔ gɛt dɛn mɔ ɛn mɔ, i go mek una nɔ sidɔm aydul wan ɔ tan lɛk tik we nɔ de bia frut we i kam pan di kɔrɛkt tin bɔt wi Masta Jizɔs Krays.

9 Ɛnibɔdi we nɔ gɛt dɛn kwaliti ya blayn, i de lɔk in yay fɔ mek i nɔ si di layt,* ɛn i dɔn fɔgɛt di klin we dɛn dɔn klin am fɔ pul in sin dɛn we i bin dɔn du trade. 10 So, mi brɔda dɛn, una tray tranga wan fɔ mek shɔ se una kɔntinyu fɔ de pan di wan dɛn we Gɔd dɔn kɔl ɛn pik, bikɔs if una kɔntinyu fɔ gɛt dɛn kwaliti ya, natin nɔ go ɛva mek una fɔdɔm. 11 Infakt, we una de du dis, una go ɛnta wit glori insay wi Masta ɛn Seviɔ Jizɔs Krays in Kiŋdɔm we go de sote go.

12 Na dis mek a want fɔ de mɛmba una ɔltɛm bɔt dɛn tin ya, pan ɔl we una no dɛn, ɛn una tinap tranga wan na di trut we una dɔn lan. 13 Bɔt a si am se i fayn fɔ mek a de mɛmba una, wans a de insay dis tabanakul.* 14 A no se dɛn go pul mi tabanakul jisnɔ, jɔs lɛk aw wi Masta Jizɔs Krays insɛf bin dɔn mek a no klia wan. 15 A go tray tranga wan ɔltɛm so dat afta a dɔn go, una go ebul fɔ mɛmba* dɛn tin ya fɔ unasɛf.

16 Nɔto lay lay stori dɛn we mɔtalman mek wi yuz fɔ mek una no bɔt wi Masta Jizɔs Krays in pawa ɛn bɔt di tɛm we i go de wit wi, bɔt wi bin si in glori wit wi yon yay. 17 Gɔd di Papa bin gi am ɔnɔ ɛn glori. Dis apin we Gɔd we gɛt glori tɛl am se: “Na mi pikin dis, di wan we a rili lɛk, ɛn a gladi fɔ am.” 18 Fɔ tru, wi yɛri dɛn wɔd ya we kɔmɔt na ɛvin we wi bin de wit am na di oli mawntin.

19 So wi dɔn rili biliv se di prɔfɛsi dɛn go apin. Ɛn na fayn tin una de du we una de pe atɛnshɔn to dɛn lɛk we una de pe atɛnshɔn to lamp we de shayn na dak ples (te doklin ɛn mɔnin sta shayn) na una at. 20 Fɔst-ɔf-ɔl, una no se no prɔfɛsi nɔ de na di Skripchɔ we kɔmɔt frɔm mɔtalman sɛns. 21 Prɔfɛsi nɔ ɛva kam bikɔs na dat mɔtalman want, bɔt di oli spirit gayd sɔm man dɛn so dat dɛn go tɔk wetin Gɔd tɛl dɛn.