Daniɛl

12 “Insay da tɛm de, Maykɛl* we na di gret prins we de tinap fɔ yu pipul dɛn* go tinap.* Ɛn tɛm go kam we trɔbul go de, di kayn we nɔ wande bi yet frɔm we neshɔn bigin fɔ de, te da tɛm de. Ɛn insay da tɛm de yu pipul dɛn go ɛskep, ɔl di wan dɛn we dɛn nem rayt na di buk. 2 Ɛn bɔku pipul dɛn we dɔn day* go wek, sɔm go gɛt layf we go de te go ɛn ɔda wan dɛn go shem ɛn dɛn go et dɛn sote go.

3 “Ɛn di wan dɛn we de tink gud wan fɔ ɔndastand go shayn lɛk di skay, ɛn di wan dɛn we de ɛp bɔku pipul dɛn fɔ du wetin rayt go tan lɛk di sta dɛn sote go.

4 “As fɔ yu Daniɛl, kip di wɔd dɛn sikrit, ɛn sil di buk te di tɛm we di ɛnd go kam. Bɔku pipul dɛn go go ɔp ɛn dɔŋ* ɛn di tru go bɔku.”

5 Na de mi, Daniɛl, luk ɛn a si tu ɔda wan dɛn tinap de, wan bin de na dis pat na di watasay ɛn di ɔda wan bin de na di ɔda pat na di watasay. 6 Dɔn wan pan dɛn aks di man we wɛr linin klos, we de pantap di wata na di watasay se: “Aw lɔng i go tek fɔ lɛ dɛn wɔndaful tin dɛn ya dɔn fɔ apin?” 7 Dɔn a yɛri di man we wɛr linin klos, we de pantap di wata na di watasay, as i es in raytan ɛn in lɛftan to ɛvin ɛn swɛ to di Wan we de alayv sote go se: “I go bi fɔ wan tɛm, tu tɛm, ɛn af tɛm* we dɛn dɔn disayd. As dɛn mek di oli pipul dɛn pawa dɔn so, ɔl dɛn tin ya go dɔn fɔ apin.”

8 As fɔ mi, a yɛri, bɔt a nɔ ebul fɔ ɔndastand; so a se: “E mi masta, aw ɔl dɛn tin ya go ɛnd?”

9 Dɔn i se: “Daniɛl, go, bikɔs di wɔd dɛn fɔ bi sikrit ɛn di buk fɔ sil te di ɛnd kam. 10 Bɔku pipul dɛn go klin dɛnsɛf ɛn mek dɛnsɛf wayt ɛn dɛn go tɛst dɛn. Di wikɛd wan dɛn go du wikɛd tin dɛn, ɛn nɔn pan di wikɛd wan dɛn nɔ go ɔndastand; bɔt di wan dɛn we de tink gud wan go ɔndastand.

11 “Frɔm di tɛm we dɛn go pul di tin we dɛn de du ɔltɛm* ɛn put di dɔti tin we de pwɛl tin dɛn, i go bi 1,290 dez.

12 “Di wan we kɔntinyu fɔ wet te di 1,335 dez dɔn gɛt gladi-at!

13 “Bɔt as fɔ yu, go te di ɛnd. Yu go rɛst, bɔt yu go tinap fɔ yu yon pɔshɔn* we di tɛm dɔn.”