Filipians

3 So, mi brɔda dɛn, una kɔntinyu fɔ gladi bikɔs ɔf di Masta. I nɔ at fɔ mek a rayt di sem tin to una, ɛn na fɔ protɛkt una.

2 Una tek tɛm fɔ di dɔg dɛn; una tek tɛm wit di wan dɛn we de damej; una tek tɛm wit di wan dɛn we de kɔt di bɔdi. 3 Na wi sakɔmsayz di rial we, wi we Gɔd in spirit de mek wi ebul fɔ du oli wok, wi we de bost bɔt Krays Jizɔs, ɛn wi we nɔ gɛt kɔnfidɛns pan tin dɛn we gɛt fɔ du wit mɔtalman, 4 pan ɔl we a gɛt rizin dɛn fɔ gɛt kɔnfidɛns pan tin dɛn we gɛt fɔ du wit mɔtalman, dat na if ɛnibɔdi gɛt rizin fɔ du dat.

If ɛni ɔda pɔsin de tink se i gɛt rizin dɛn fɔ gɛt kɔnfidɛns pan tin dɛn we gɛt fɔ du wit mɔtalman, a gɛt rizin dɛn pas am: 5 a sakɔmsayz di de we mek et, mi na Izrɛlayt, a kɔmɔt na Bɛnjamin in trayb, mi na Ibru ɛn mi mama ɛn papa na Ibru; we i kam pan lɔ, mi na Faresi; 6 we i kam pan zil, a mek di kɔngrigeshɔn sɔfa; we i kam pan wetin rayt akɔdin to lɔ, mi na pɔsin we nɔ bin gɛt wan bɔt. 7 Bɔt di tin dɛn we a bin gɛt as prɔfit, a dɔn tek dɛn as lɔsis* bikɔs ɔf Krays. 8 Pantap dat, a tek ɔltin bak as lɔsis bikɔs fɔ no Krays Jizɔs mi Masta bɛtɛ fa fawe pas ɛnitin. Fɔ in sek, a dɔn tek ɔltin as lɔsis ɛn a si dɛn as bɔku dɔti, so dat a go gɛt Krays 9 ɛn dɛn go si mi as pɔsin we gɛt wanwɔd wit am, nɔto bikɔs a de du wetin rayt akɔdin to di Lɔ, bɔt na bikɔs a de du wetin rayt bikɔs a gɛt fet pan Krays, dat min se Gɔd de si wi as pipul dɛn we de du wetin rayt bikɔs wi gɛt fet. 10 Di men tin we a want na fɔ no am ɛn di pawa we gɛt fɔ du wit di layf we i gɛt bak ɛn fɔ sɔfa lɛk aw i bin sɔfa, ɛn day lɛk aw i day, 11 fɔ si if i pɔsibul fɔ lɛ a de pan di wan dɛn we go gɛt layf bak fɔs.

12 Nɔto fɔ se a dɔn ɔlrɛdi gɛt am ɔ a dɔn ɔlrɛdi pafɛkt, bɔt a de tray tranga wan fɔ si if a go gɛt wetin Krays Jizɔs dɔn pik mi fɔ. 13 Mi brɔda dɛn, nɔto fɔ se a dɔn tek misɛf lɛk se a dɔn gɛt am; bɔt na wan tin a rili no: A de fɔgɛt di tin dɛn we de biɛn, ɛn a de strɛch fɔ gɛt di tin dɛn we de bifo; 14 a de tray tranga wan fɔ gɛt di prayz we de ɔp we Gɔd kɔl mi fɔ tru Krays Jizɔs. 15 So lɛ wi we machɔ go de tink dis kayn we, ɛn if una de tink ɔda kayn we, Gɔd go mek una no aw fɔ tink dis kayn we. 16 Bɔt ilɛk aw wi dɔn go bifo, lɛ wi kɔntinyu fɔ waka di kɔrɛkt we lɛk aw wi dɔn de du.

17 Mi brɔda dɛn, una ɔl go de falamakata mi, ɛn una go de wach di wan dɛn we de liv dɛn layf akɔdin to di ɛgzampul we wi dɔn sɛt fɔ una. 18 Di wan dɛn we dɔn bi ɛnimi to di tik we Krays sɔfa pan,* bɔku. A bin de tɔk bɔt dɛn bɔku tɛm, bɔt naw we a de tɔk bɔt dɛn a de kray. 19 Dɛn go dɔnawe wit dɛn, dɛn gɔd na dɛn bɛlɛ, dɛn de blɔf wit tin dɛn we fɔ mek dɛn shem, ɛn dɛn de tink bɔt tin dɛn we de na di wɔl. 20 Bɔt wi na sitizin dɛn na ɛvin, ɛn wi de rili wet fɔ di pɔsin we go kɔmɔt de fɔ kam sev wi, we na di Masta Jizɔs Krays, 21 we go yuz in pawa fɔ chenj wi ɔmbul bɔdi fɔ bi lɛk in wɔndaful bɔdi, dat na, di pawa we mek i ebul fɔ put ɔltin ɔnda insɛf.