Lyuk

20 Wan de we i de tich di pipul dɛn na di tɛmpul ɛn tɛl dɛn bɔt di gud nuyz, di edman dɛn fɔ di prist dɛn, di Lɔ ticha dɛn, ɛn di lida dɛn kam 2 aks am se: “Us rayt yu gɛt fɔ du dɛn tin ya? Udat gi yu di rayt fɔ du dɛn?” 3 I ansa dɛn se: “Misɛf go aks una wan kwɛstyɔn ɛn una ansa mi: 4 Udat bin sɛn Jɔn fɔ baptayz pipul dɛn, na Gɔd we de na ɛvin ɔ na mɔtalman?” 5 Dɛn tɔk to dɛnsɛf se: “If wi se, ‘Na Gɔd we de na ɛvin,’ i go se, ‘Wetin mek una nɔ bin biliv am?’ 6 Bɔt if wi se, ‘Na mɔtalman sɛn am,’ ɔl di pipul dɛn go ston wi, bikɔs dɛn biliv se Jɔn na bin prɔfɛt.” 7 So dɛn tɛl am se dɛn nɔ no udat sɛn am. 8 Jizɔs tɛl dɛn se: “Misɛf nɔ go tɛl una wetin mek a gɛt rayt fɔ du dɛn tin ya.”

9 Dɔn i gi di pipul dɛn dis ɛgzampul: “Wan man plant vayn gadin ɛn lis am to fama dɛn, i travul go na ɔda kɔntri ɛn go de de fɔ lɔng tɛm. 10 We di tɛm fɔ avɛst rich, i sɛn wan slev to di fama dɛn fɔ lɛ dɛn gi am sɔm frut dɛn na di vayn gadin. Bɔt di fama dɛn bit di slev ɛn mek i go ɛmti-an. 11 I sɛn wan ɔda slev bak. Di fama dɛn bit am, disgres* am, ɛn mek i go ɛmti-an. 12 Dɔn i sɛn di tɔd slev; dɛn wund am ɛn drɛb am kɔmɔt na di gadin. 13 Na de di man we gɛt di vayn gadin se, ‘Wetin a fɔ du? A go sɛn mi bɔypikin, di wan we a rili lɛk, sɔntɛm dɛn go rɛspɛkt am.’ 14 We di fama dɛn si am, dɛn ɛng ed ɛn tɔk se: ‘Na dis gɛt fɔ gɛt di vayn gadin. Lɛ wi kil am so dat di prɔpati go bi wi yon.’ 15 So dɛn pul am na di vayn gadin ɛn kil am. Wetin di man we gɛt di vayn gadin go du to dɛn? 16 I go kam kil dɛn fama ya ɛn gi di vayn gadin to ɔda pipul dɛn.”

We dɛn yɛri wetin i tɔk, dɛn se: “Lɛ dat nɔ ɛva apin!” 17 I luk dɛn piŋ na dɛn yay ɛn se: “Wetin dis tin we dɛn rayt min: ‘Di ston we di wan dɛn we de bil nɔ gri fɔ yuz, na in dɔn bi di men ston na di kɔna’? 18 Ɛnibɔdi we fɔdɔm pan da ston de go damej bad bad wan. Ɛn ɛnibɔdi we di ston fɔdɔm pan go nyamanyama.”

19 We di Lɔ ticha dɛn ɛn di edman dɛn fɔ di prist dɛn yɛri di ɛgzampul we i gi, dɛn bin want fɔ ol am wantɛm wantɛm, bikɔs dɛn no se na dɛn i bin de tɔk bɔt we i pul da ɛgzampul de. Bɔt dɛn bin de fred di pipul dɛn. 20 So dɛn bigin fɔ wach am gud gud wan. Afta dat, dɛn pe sɔm man dɛn sikrit wan ɛn sɛn dɛn fɔ go mek lɛk se dɛn de du wetin rayt, so dat dɛn go kech am pan wetin i de tɔk ɛn an ova am to di gɔvmɛnt ɛn di gɔvnɔ. 21 Dɛn aks am se: “Ticha, wi no se yu de tɔk ɛn tich di kɔrɛkt tin, yu nɔ de tek ɛnibɔdi bɛtɛ pas in kɔmpin, ɛn yu de tich di tru tin bɔt Gɔd: 22 I rayt fɔ pe taks* dɛn to Siza ɔ i nɔ rayt?” 23 Bɔt we i si se na kɔni biznɛs dɛn de pan, i tɛl dɛn se: 24 “Una sho mi wan dinariɔs.* Udat in fes ɛn taytul de pan am?” Dɛn tɛl am se: “Na Siza.” 25 So i tɛl dɛn se: “Una fɔ gi Siza wetin na Siza in yon ɛn gi Gɔd wetin na Gɔd in yon.” 26 Dɛn nɔ bin ebul kech am pan wetin i de tɔk bifo di pipul dɛn, bifo dat, dɛn bin kɔle we dɛn yɛri di ansa we i gi dɛn, ɛn dɛn nɔ tɔk natin.

27 Bɔt sɔm Sadyusi dɛn, dat na, di wan dɛn we nɔ biliv se we pɔsin day i go gɛt layf bak, kam aks am se: 28 “Ticha, Mozis rayt se, ‘If pɔsin in brɔda day lɛf in wɛf, ɛn dɛn nɔ bɔn pikin, in brɔda fɔ tek di uman ɛn bɔn pikin fɔ in brɔda.’ 29 Na sɛvin brɔda dɛn bin de. Di fɔs wan mared wan uman, bɔt i nɔ bɔn pikin bifo i day. 30 Di sem tin apin to di sɛkɔn wan 31 ɛn di tɔd wan insɛf mared am. Dɛn ɔl sɛvin mared am, bɔt dɛn nɔn nɔ bɔn pikin bifo dɛn day. 32 Leta di uman insɛf day. 33 So di tɛm we di wan dɛn we dɔn day go gɛt layf bak, uswan pan dɛn go gɛt am as wɛf? Bikɔs dɛn ɔl sɛvin bin mared am.”

34 Jizɔs tɛl dɛn se: “Di pikin dɛn we de naw* de mared ɛn dɛn de gi dɛn fɔ mared, 35 bɔt di wan dɛn we fit fɔ de da tɛm de ɛn we go gɛt layf bak nɔ de mared ɛn dɛn nɔ de gi dɛn fɔ mared. 36 Infakt, dɛn nɔ go day igen, bikɔs dɛn go tan lɛk di enjɛl dɛn. Dɛn go bi Gɔd in pikin dɛn we dɛn gɛt layf bak. 37 Insay di stori bɔt di chukchuk tik, Mozis insɛf tɔk bɔt di layf we pipul dɛn go gɛt bak we i kɔl Jiova* ‘Ebraam in Gɔd, Ayzak in Gɔd, ɛn Jekɔp in Gɔd.’ 38 In nɔto Gɔd fɔ dayman dɛn, bɔt in na Gɔd fɔ di wan dɛn we gɛt layf, bikɔs to am dɛn ɔl de alayv.” 39 So sɔm Lɔ ticha dɛn tɔk se: “Ticha, wetin yu tɔk kɔrɛkt.” 40 Dɛn nɔ bin gɛt maynd fɔ aks am ɛni kwɛstyɔn igen.

41 So i aks dɛn se: “Wetin mek dɛn se Krays na Devid in pikin? 42 Devid insɛf sɛf tɔk na di Sam buk se, ‘Jiova* tɛl mi Masta se: “Sidɔm na mi raytan 43 te a put yu ɛnimi dɛn ɔnda yu fut lɛk smɔl bɛnch.”’ 44 Devid kɔl am Masta; so aw i kam bi Devid in pikin?”

45 Dɔn we ɔl di pipul dɛn de lisin, i tɛl in disaypul dɛn se: 46 “Una tek tɛm wit di Lɔ ticha dɛn we lɛk fɔ wɛr lɔng klos de waka, we lɛk fɔ mek pipul dɛn de grit dɛn na makit, we lɛk di frɔnt* sit dɛn na di sinagɔg* dɛn, we lɛk di bɛst ples dɛn we dɛn kin go it ivintɛm it, 47 we de siz advantej pan di uman dɛn we dɛn man dɛn dɔn day ɛn tek dɛn prɔpati, ɛn we de pre lɔng lɔng wan fɔ mek pipul dɛn si dɛn.* Dɛn yon jɔjmɛnt go pas ɔda pipul dɛn yon fa fawe.”