“Na Yu Nɔmɔ Nɔ De Kɔmɔt Biɛn Pɔsin”

1, 2. Wetin mek wi go se Kiŋ Devid bin no wetin i min fɔ lɛ pipul dɛn kɔmɔt biɛn pɔsin?

KIŊ DEVID bin no wetin i min fɔ lɛ pipul dɛn kɔmɔt biɛn pɔsin. Di prɔblɛm dɛn we i bin gɛt di tɛm we i de rul, bin mek wan tɛm in yon kɔntri pipul dɛn bin plan bad fɔ am. Dɔn bak, sɔm pan di pipul dɛn we wi go tink se na bin in tayt padi dɛn bin kɔmɔt biɛn am. Lɛ wi tɔk bɔt Devid in fɔs wɛf we na Maykal. Fɔs, we i bin “fɔl fɔ Devid,” i bin de sɔpɔt am fɔ du in wok as kiŋ. Bɔt leta, i bin “lɔs rɛspɛkt fɔ am,” ɛn i bin ivin de tink se Devid bin de “biev lɛk aw ɛni rifraf go biev.”—Fɔs Samiɛl 18:​20; Fɔs Kronikul 15:​29; Sɛkɛn Samiɛl 6:​20.

² Aitofɛl we bin de advays Devid, na bin ɔda pɔsin we kɔmɔt biɛn am. Dɛn bin rili valyu di advays dɛn we i bin de gi lɛk se na frɔm Jiova i kɔmɔt. (Sɛkɛn Samiɛl 16:​23) Bɔt leta, dis man we Devid bin rili trɔst bin kɔmɔt biɛn am ɛn jɔyn sɔm pipul dɛn we bin tɔn dɛn bak pan Devid. Udat bin de bifo pan dis kayn tin? Na Absalɔm we na Devid in yon pikin! Absalɔm bin de yuz kɔni kɔni we dɛn pan di pipul dɛn fɔ “win dɛn at” so dat insɛf go bi kiŋ. Dis tin bin so siriɔs dat Kiŋ Devid bin nid fɔ rɔn fɔ in layf.—Sɛkɛn Samiɛl 15:​1-6, 12-17.

 3. Us kɔnfidɛns Devid bin gɛt?

³ Fɔ se nɔbɔdi nɔ bin de we bin kɔntinyu fɔ de biɛn Devid? Pan ɔl di prɔblɛm dɛn we Devid bin gɛt, i bin no se pɔsin de we nɔ kɔmɔt biɛn am. Udat na da pɔsin de? Nɔto no ɔda pɔsin pas Jiova Gɔd. Devid bin tɔk bɔt Jiova se: “Yu nɔ de lɛf udat de fala yu ɔltɛm.” (Sɛkɛn Samiɛl 22:​26) Wetin i min fɔ de biɛn pɔsin ɔltɛm? Aw Jiova sɛt di bɛst ɛgzampul bɔt aw fɔ du dat?

4, 5. (a) Wetin i min fɔ de biɛn pɔsin ɔltɛm? (b) Aw tin dɛn we gɛt layf difrɛn frɔm tin dɛn we nɔ gɛt layf we i kam pan fɔ de biɛn pɔsin?

⁴ Insay di Ibru Skripchɔ dɛn, fɔ “de biɛn pɔsin ɔltɛm” min fɔ rili lɛk sɔntin pas te yu gɛt wetin yu want frɔm da tin de. We wi de biɛn pɔsin ɔltɛm dat min se wi lɛk di pɔsin ɛn wi nɔ jɔs de biɛn am bikɔs na dat wi fɔ du. Dɔn bak, fɔ de biɛn pɔsin difrɛn frɔm we wi bi pɔsin we dɛn de abop pan ɔltɛm. Wan pan di man dɛn we rayt di sam buk bin se “di mun de kɔmɔt na di skay ɔltɛm.” (Sam 89:​37) Bɔt wi nɔ go se di mun kin de biɛn pɔsin ɔltɛm. Wetin mek? Na bikɔs fɔ de biɛn pɔsin gɛt sɔntin fɔ du wit lɔv, ɛn tin dɛn we nɔ gɛt layf nɔ ebul fɔ sho lɔv to pɔsin ɔ sɔntin.

⁵ Insay di Baybul, fɔ de biɛn pɔsin na kwaliti we de sho se padi biznɛs de bitwin di pɔsin we de du am ɛn di pɔsin we i de du am to. Fɔ de biɛn pɔsin da kayn we de na tin we nɔ de chenj. I nɔ tan lɛk swɛlin na di si we de chenj bay aw di briz de blo. Bɔt fɔ de biɛn pɔsin ɔ fɔ gɛt lɔv we nɔ de chenj, na kwaliti we kin mek pɔsin ebul fɔ bia ɛnikayn prɔblɛm we go mit am ɛn stil kɔntinyu fɔ de biɛn da pɔsin de.

 6. (a) Wetin mek wi go se i at fɔ lɛ pipul dɛn kɔntinyu fɔ de biɛn dɛn kɔmpin? Aw di Baybul sho dis? (b) Wetin na di bɛst we fɔ lan wetin i min fɔ de biɛn pɔsin? Wetin mek?

⁶ Fɔ tru, i at fɔ si pipul dɛn we de de biɛn dɛn kɔmpin dɛn da kayn we de. Di Baybul se: “Padi dɛn de we rɛdi fɔ du bad to dɛn kɔmpin.” Bɔku tɛm, wi kin yɛri bɔt maredman dɛn ɔ mareduman dɛn we kin lɛf dɛn man ɔ wɛf dɛn. (Prɔvabs 18:​24, NWT; Malakay 2:​14-16) Wikɛd tin dɛn dɔn so bɔku na di wɔl dat wi kin tɔk wetin di prɔfɛt Mayka tɔk we i se: “Nɔbɔdi nɔ de na di wɔl we gud [ɔ “de de biɛn pɔsin,” NWT].” (Mayka 7:​2) Bɔku tɛm, mɔtalman nɔ kin sho lɔv we nɔ de chenj, bɔt wan men kwaliti we Jiova gɛt na fɔ kɔntinyu fɔ de biɛn in pipul dɛn. Infakt, di bɛst we aw wi go lan bɔt wetin i min fɔ de biɛn pɔsin na fɔ stɔdi aw Jiova dɔn sho dis kwaliti we na wan men we aw i kin sho lɔv.

7, 8. Wetin mek di Baybul se na Jiova nɔmɔ nɔ de kɔmɔt biɛn pɔsin?

⁷ Di Baybul se na Jiova “nɔmɔ nɔ de kɔmɔt biɛn pɔsin.” (Rɛvɛleshɔn 15:​4) Wetin mek di Baybul se so? Fɔ se mɔtalman ɛn enjɛl dɛn nɔ dɔn sho se dɛn nɔ de kɔmɔt biɛn pɔsin? (Job 1:​1; Rɛvɛleshɔn 4:​8) Ivin Jizɔs Krays sɛf dɔn sho se i nɔ de kɔmɔt biɛn pɔsin. Wi dɔn lan se in na ‘di wan we nɔ de kɔmɔt biɛn Gɔd.’ (Akt 13:​35) So wetin mek di Baybul se na Jiova nɔmɔ nɔ de kɔmɔt biɛn pɔsin?

⁸ Fɔs, lɛ wi mɛmba se wan we aw wi de sho se wi lɛk pɔsin na we wi nɔ de kɔmɔt biɛn am. Bikɔs “Gɔd na lɔv,” na in dɔn sɛt di bɛst ɛgzampul we i kam pan lɔv. Yu tink se ɛni ɔda pɔsin de we no aw fɔ de biɛn pɔsin lɛk Jiova? (1 Jɔn 4:​8) Na tru se mɔtalman ɛn enjɛl dɛn kin sho se dɛn gɛt sɔm pan Gɔd in kwaliti, bɔt na Jiova in wangren sabi aw fɔ de biɛn pɔsin tayt tayt wan. Dɔn bak, bikɔs in na “di wan we bin dɔn de lɔlɔntɛm,” i dɔn de sho se i gɛt lɔv we nɔ de chenj pas ɛni mɔtalman ɔ enjɛl. (Daniɛl 7:​9) So na Jiova in wangren sabi aw fɔ rili de biɛn pɔsin. No ɔda pɔsin nɔ sabi aw fɔ sho dis fayn kwaliti lɛk am. Lɛ wi tɔk bɔt sɔm ɛgzampul dɛn.

 9. Aw Jiova de sho se i de biɛn pɔsin ɔltɛm?

⁹ Jiova “gud [“kin de biɛn pɔsin ɔltɛm,” NWT] pan ɔl wetin i de du.” (Sam 145:​17) Aw i de du dat? Sam 136 sho wi di ansa. Da sam de tɔk bɔt difrɛn we dɛn we Jiova bin sev in pipul dɛn. Wan pan di tin dɛn we i tɔk bɔt na di wɔndaful we aw Jiova bin sev di Izrɛlayt dɛn bay we i mek dɛn waka midul di Rɛd Si. Wan tin we rili fayn na we ɛni vas na dis sam tɔk se: “In lɔv de de sote go.” Dis sam na wan pan di Kwɛstyɔn dɛn fɔ Tink Bɔt we de na pej 289. As yu de rid dɛn vas dɛn ya, yu go mɔs kɔle di difrɛn we dɛn we Jiova bin sho se i gɛt lɔv we nɔ de chenj fɔ in pipul dɛn. Fɔ tru, Jiova de sho se i nɔ de kɔmɔt biɛn in fetful savant dɛn bay we i de lisin to dɛn prea ɛn du sɔntin fɔ ɛp dɛn di rayt tɛm. (Sam 34:​6) Jiova in lɔv fɔ in savant dɛn nɔ de ɛva chenj wans dɛnsɛf nɔ kɔmɔt biɛn am.

10. Aw Jiova de sho se i nɔ de chenj chenj in lɔ dɛn?

¹⁰ Jiova de sho bak se i nɔ de kɔmɔt biɛn in savant dɛn bay we i nɔ de chenj chenj in lɔ dɛn. I nɔ tan lɛk sɔm mɔtalman dɛn we kin jɔs chenj wetin dɛn fil se rayt ɛn rɔŋ. I nɔ ɛva chenj di we aw i de si juju biznɛs, aydɔl wɔship, ɛn fɔ de kil pɔsin. I bin yuz prɔfɛt Ayzaya fɔ tɔk se: “Te we una dɔn ol so, na mi na Im [“di sem pɔsin,” NWT].” (Ayzaya 46:​4) So wi fɔ gɛt kɔnfidɛns se wi go bɛnifit we wi fala di fayn advays dɛn we de na Gɔd in Wɔd.—Ayzaya 48:​17-19.

11. Gi ɛgzampul dɛn we de sho se Jiova kin du wetin i dɔn prɔmis ɔltɛm.

¹¹ Wan ɔda we aw Jiova de sho se i de biɛn in savant dɛn na we i de du wetin i prɔmis. Ɛn ɛnitin we i tɔk de kam tru. Na dat mek Jiova se: “Mi wɔd we de kɔmɔt na mi mɔt . . . nɔ go tɔn bak kam to mi i nɔ du natin, bɔt i go du wetin a sɛn am fɔ du, ɛn i go du wɛl pan di tin we a sɛn am fɔ go du.” (Ayzaya 55:​11) So we Jiova de du wetin i prɔmis, i de sho se i nɔ de kɔmɔt biɛn in savant dɛn. I nɔ kin mek dɛn de wet fɔ sɔntin we i nɔ gɛt fɔ du. Bikɔs Jiova kin du wetin i dɔn prɔmis ɔltɛm, in savant we nem Jɔshwa bin se: “PAPA GƆD [“Jiova,” NWT] bin mek plɛnti prɔmis dɛn to Izrɛl ɛn i nɔ pwɛl nɔn.” (Jɔshwa 21:​45) So wi shɔ se Jiova nɔ go ɛva disapɔynt wi bay we i nɔ du wetin i prɔmis.—Ayzaya 49:​23; Romans 5:​5.

12, 13. Us difrɛn we dɛn we Jiova in lɔv we nɔ de chenj “de de sote go”?

¹² Frɔm wetin wi bin dɔn tɔk, di Baybul tɛl wi se Jiova in lɔv we nɔ de chenj “de de sote go.” (Sam 136:​1) Wetin mek wi se so? Wan rizin na bikɔs we Jiova fɔgiv pɔsin, i nɔ de pɔnish am bak fɔ da sem tin de. Frɔm wetin wi bin lan na Chapta 26, Jiova nɔ de mɛmba pɔsin in sin dɛn igen so dat i go de pɔnish am. “Ɔlman dɔn sin, ɛn [wi] nɔ ebul gɛt Gɔd in glori,” so wi ɔl fɔ gladi fɔ we Jiova in lɔv we nɔ de chenj de de sote go.—Romans 3:​23.

¹³ Bɔt wan ɔda we de we Jiova de sho se in lɔv we nɔ de chenj de de sote go. Di Baybul tɛl wi se di wan we de du wetin rayt “tan lɛkɛ we yu plant tik nia watasay, we de bia frut in rayt tɛm ɛn in lif dɛn nɔ de wida. I go bɛtɛ pan ɔl wetin i de du.” (Sam 1:​3) Jɔs tink bɔt aw tik we gɛt lif dɛn we nɔ de ɛva wida kin fayn fɔ luk. Semweso, if wisɛf kin gladi fɔ du wetin Gɔd in Wɔd se, wi go gɛt lɔng layf, pis, ɛn bɛtɛ go de fala wi. Di blɛsin dɛn we Jiova kin gi in fetful savant dɛn kin de sote go. Di wan dɛn we de obe Jiova go fil in lɔv sote go insay di nyu wɔl we de kam.—Rɛvɛleshɔn 21:​3, 4.

14. Aw Jiova de sho se i gladi fɔ we in savant dɛn nɔ de kɔmɔt biɛn am?

¹⁴ Bɔku tɛm, Jiova dɔn sho se i nɔ de kɔmɔt biɛn in fetful savant dɛn. Bikɔs Jiova nɔ de chenj di tin dɛn we i de du, i nɔ de ɛva chenj di we aw i de biɛn in fetful savant dɛn. Wan pan di man dɛn we rayt di sam buk bin se: “A bin yɔŋ bɔt naw a dɔn ol bɔt a nɔ wande si PAPA GƆD lɛf gud pipul to dɛnsɛf . . . ɔ in pikin dɛn de beg tin fɔ it. PAPA GƆD [“Jiova,” NWT] lɛk udat de du wetin rayt; ɛn [i] nɔ go lɛf udat biliv pan am [“nɔ de kɔmɔt biɛn am,” NWT].” (Sam 37:​25, 28) Fɔ tru, bikɔs na Jiova mek ɔltin, i fit fɔ mek wi wɔship am. (Rɛvɛleshɔn 4:​11) Bɔt bikɔs i nɔ de kɔmɔt biɛn in fetful savant dɛn, i kin valyu di tin dɛn we wi de du fɔ sav am.—Malakay 3:​16, 17.

15. Ɛksplen aw Jiova bin trit di Izrɛlayt dɛn we sho se in lɔv fɔ dɛn nɔ de chenj.

¹⁵ Bikɔs Jiova gɛt lɔv we nɔ de chenj, i kin ɛp in fetful savant dɛn ɛnitɛm we dɛn gɛt prɔblɛm. Wan pan di man dɛn we rayt di sam buk bin rayt se: “I de sev udat lɛk am [“nɔ de kɔmɔt biɛn am,” NWT] ɛn pul am nain ɛnimi dɛn an.” (Sam 97:​10) Tink bɔt di we aw i bin trit di Izrɛlayt dɛn. Afta we Jiova bin pafɔm mirekul ɛn mek di Izrɛlayt dɛn waka midul di Rɛd Si, dɛn bin siŋ to Jiova ɛn se: “Bikɔs yu lɔv nɔ de chenj, yu kip to yu prɔmis.” (Ɛksodɔs 15:​13) Jiova bin rili sho se in lɔv nɔ chenj fɔ in pipul dɛn bay we i sev dɛn na di Rɛd Si. So Mozis bin tɛl di Izrɛlayt dɛn se “nɔto bikɔs dɛn plɛnti pas di ɔda pipul dɛn mek PAPA GƆD [“Jiova,” NWT] bin pik dɛn. I se we yu luk sɛf, na dɛn bin smɔl pas ɔl di ɔda neshɔn dɛn na di wanol wɔl. Bɔt PAPA GƆD [“Jiova,” NWT] lɛk dɛn ɛn de kip in prɔmis we i bin dɔn prɔmis dɛn fɔstɛm-papa dɛn se i go pul dɛn kɔmɔt [pan] slevri na Ijipt dɛn kiŋ in an, ɛn dɛn go bi in yon pipul dɛn sote go.”—Ditarɔnɔmi 7:​7, 8.

16, 17. (a) Aw di Izrɛlayt dɛn bin sho se dɛn nɔ gɛt tɛnki, bɔt aw Jiova bin sho sɔri-at fɔ dɛn? (b) Aw di Izrɛlayt dɛn bin sho se bɛtɛ nɔ de fɔ dɛn igen? Wetin wi lan frɔm dis?

¹⁶ Bɔt wi no se di Izrɛlayt dɛn nɔ bin gladi fɔ Jiova in lɔv we nɔ de chenj. Dɛn bin “kɔntinyu fɔ sin to [Jiova], dɛn tɔn rebɛl pan PAPA GƆD we pas ɔl ɔda gɔd.” (Sam 78:​17) Fɔ lɔng tɛm, dɛn bin de kɔntinyu fɔ sin agens Jiova bay we dɛn bin de lɛf am fɔ sav lay lay gɔd dɛn ɛn fɔ put an pan pegan wɔship we bin de mek dɛn dɔti. Bɔt Jiova nɔ bin stil pwɛl in agrimɛnt we i bin mek wit dɛn. Bifo dat, i bin yuz prɔfɛt Jɛrimaya fɔ tɛl dɛn se: “Tɔn bak kam to mi, yu Izrɛl we nɔ gɛt feth. . . . A nɔ go vɛks pan una igen bikɔs Mi na Gɔd we de sɔri fɔ pipul [“de biɛn pɔsin ɔltɛm,” NWT].” (Jɛrimaya 3:​12) Frɔm wetin wi bin dɔn lan na Chapta 25, bɔku pan di Izrɛlayt dɛn nɔ bin chenj. Dɛn bin “moko pan PAPA GƆD in mɛsenja dɛm, luk dawn pan in wɔd dɛm, ɛn shumɔ pan in prɔfɛt dɛm.” Wetin bin apin we dɛn du ɔl dat? Dɛn bin mek PAPA GƆD [“Jiova,” NWT] in at wam . . . we tɔnin bak nɔ de igen.”—Sɛkɛn Kronikul 36:​15, 16.

¹⁷ Wetin wi lan frɔm dis? Wi lan se we Jiova de biɛn pɔsin, i nɔ kin jɔs sidɔm de wach am we i de du bad ɛn nɔ du natin bɔt dat. Na tru se Jiova in “lɔv nɔ de fel,” ɛn i kin lɛk fɔ sɔri fɔ pɔsin we gud rizin de fɔ mek i du dat. Bɔt wetin Jiova go du if pɔsin de du bad bay wilful ɛn i nɔ de gri fɔ chenj? We da kayn tin de apin, Jiova de du wetin rayt, ɛn i kin pɔnish di pɔsin. Jiova bin tɛl Mozis se: “A nɔ de fɔgɛt fɔ pɔnish dɛn wan we de du bad.”—Ɛksodɔs 34:​6, 7.

18, 19. (a) We Jiova go pɔnish di wikɛd wan dɛn, aw dat go sho se i nɔ de kɔmɔt biɛn in savant dɛn? (b) Aw Jiova go sho se i nɔ de kɔmɔt biɛn in savant dɛn we wikɛd pipul dɛn bin dɔn mek dɛn sɔfa te dɛn day?

¹⁸ Wan ɔda we aw Gɔd de sho se i nɔ de kɔmɔt biɛn in fetful savant dɛn na we i de pɔnish di wikɛd wan dɛn. Wetin mek wi se so? Wan rizin na bikɔs ɔf wetin Jiova bin tɛl sɛvin enjɛl dɛn na Rɛvɛleshɔn. I bin se: “Una go, dɔn una tɔn di sɛvin bol dɛn we gɛt Gɔd in wamat na di wɔl.” We di tɔd enjɛl bin tɔn in bol “na di riva dɛn ɛn di spriŋ wata dɛn,” dɛn tɔn to blɔd. Dɔn di enjɛl tɛl Jiova se: “Gɔd, di wan we de naw ɛn we bin de, di wan we nɔ de kɔmɔt biɛn pɔsin, yu de du wetin rayt, na dat mek yu dɔn pas dɛn jɔjmɛnt ya, bikɔs dɛn kil di oli wan dɛn ɛn di prɔfɛt dɛn, ɛn yu dɔn gi dɛn blɔd fɔ drink; dɛn fit fɔ gɛt am.”—Rɛvɛleshɔn 16:​1-6.

¹⁹ Notis se we di enjɛl bin de gi di jɔjmɛnt mɛsej, i bin se Jiova na “di wan we nɔ de kɔmɔt biɛn pɔsin.” Wetin mek? Wikɛd pipul dɛn dɔn mek bɔku pan Jiova in savant dɛn dɔn sɔfa te dɛn day. So we Jiova go dɔnawe wit di wikɛd wan dɛn, i de sho se i nɔ de kɔmɔt biɛn in savant dɛn. Pan ɔl we dɛn dɔn day, Jiova nɔ de ɛva fɔgɛt dɛn. I rili want fɔ si in fetful savant dɛn we dɔn day, ɛn di Baybul sho se i want fɔ gi dɛn layf bak. (Job 14:​14, 15, NWT) Jiova nɔ de fɔgɛt in fetful savant dɛn jɔs bikɔs dɛn dɔn day. “Dɛn ɔl de alayv” to am. (Lyuk 20:​37, 38) So Jiova go sho se i nɔ de kɔmɔt biɛn in fetful savant dɛn bay we i go gi dɛn layf bak.

20. Udat na “di wan dɛn we [Jiova] gɛt fɔ sɔri fɔ,” ɛn aw i de sho se i nɔ de kɔmɔt biɛn dɛn?

²⁰ Frɔm trade trade, Jiova dɔn de sho se i nɔ de kɔmɔt biɛn in fetful savant dɛn. Infakt, i dɔn te we Jiova dɔn de “peshɛnt wit pipul dɛn we i fɔ pul in vɛksteshɔn pan ɛn we fit fɔ dɔnawe wit.” Wetin mek? I du dis “fɔ sho di wan dɛn we i gɛt fɔ sɔri fɔ aw i rili gɛt glori, dat na di wan dɛn we i dɔn pripia bifo tɛm fɔ gɛt glori.” (Romans 9:​22, 23) Dɛn wan dɛn ya “we i gɛt fɔ sɔri fɔ” na di wan dɛn we di oli spirit dɔn anɔynt fɔ rul wit Krays na in Kiŋdɔm. (Matyu 19:​28) We Jiova dɔn mek we fɔ lɛ di wan dɛn we i gɛt fɔ sɔri fɔ go sev, i de sho se i nɔ de kɔmɔt biɛn Ebraam we i bin dɔn mek dis agrimɛnt wit, bay we i bin se: “Ɔl dɛn ɔda neshɔn dɛn go gɛt blɛsin tru yu jɛnareshɔn bikɔs yu obe [mi].”—Jɛnɛsis 22:​18.

21. (a) Aw Jiova de sho se i nɔ de kɔmɔt biɛn di “bɔku bɔku pipul dɛn” we go sev afta di “big big trɔbul”? (b) We Jiova nɔ de kɔmɔt biɛn in savant dɛn, wetin dat fɔ mek yu du?

²¹ Jiova go sho bak se i nɔ de kɔmɔt biɛn di “bɔku bɔku pipul dɛn” we go sev afta di “big big trɔbul” ɛn we go de sote go na Paradays na dis wɔl. (Rɛvɛleshɔn 7:​9, 10, 14) Pan ɔl we Jiova in savant dɛn nɔ pafɛkt, i dɔn gi dɛn chans fɔ de na Paradays sote go. Aw i dɔn du dat? Na we i gi in Pikin fɔ kam day fɔ wi, ɛn dis na di bɛst we aw i dɔn sho se i nɔ de kɔmɔt biɛn wi. (Jɔn 3:​16; Romans 5:​8) Dis fayn kwaliti we Jiova gɛt de mek di wan dɛn we rili want fɔ lɛ wetin rayt apin, kam nia am. (Jɛrimaya 31:​3) We yu de tink bɔt di we aw Jiova nɔ de kɔmɔt biɛn in savant dɛn naw ɛn aw i nɔ go kɔmɔt biɛn dɛn tumara bambay, dat de mek yu kam nia am, nɔto so? Bikɔs wi want fɔ kam nia Gɔd mɔ ɛn mɔ, lɛ wi mekɔp wi maynd fɔ sho se wi lɛk am bay we wi de sav am fetful wan ɛn nɔ ɛva kɔmɔt biɛn am.