Ɛfishians

3 Na dis rizin mek mi, Pɔl, we na prizina fɔ Krays Jizɔs fɔ una we kɔmɔt na ɔda neshɔn dɛn— 2 if, fɔ tru, una dɔn yɛri bɔt di wok we Gɔd gi mi fɔ ɛp una fɔ bɛnifit frɔm in spɛshal gudnɛs,* 3 we i mek a no di oli sikrit, jɔs lɛk aw a bin dɔn rayt to una smɔl bɔt am. 4 So we una rid dis, una go no aw a ɔndastand di oli sikrit bɔt di Krays. 5 Gɔd nɔ bin mek pipul dɛn na ɔda jɛnɛreshɔn dɛn no dis sikrit lɛk aw i dɔn mek in oli apɔsul dɛn ɛn prɔfɛt dɛn no am naw tru di spirit. 6 Di sikrit na dat, pipul dɛn we kɔmɔt na ɔda neshɔn dɛn fɔ gɛt wetin wi go gɛt ɛn bi pat pan di bɔdi, ɛn wi ɔl go gɛt di sem tin we Gɔd prɔmis wi bikɔs dɛn gɛt wanwɔd wit Krays Jizɔs ɛn bikɔs ɔf di gud nyuz. 7 A bi savant fɔ dis oli sikrit bikɔs ɔf Gɔd in spɛshal gudnɛs* we na fri gift we i gi mi tru in pawa.

8 Di wan we nɔ tu impɔtant pan ɔl di oli wan dɛn bɛtɛ pas mi, bɔt stil na mi Gɔd gi dis spɛshal gudnɛs,* so dat a go prich di gud nyuz to di neshɔn dɛn bɔt Krays in blɛsin we pɔsin nɔ go ebul fɔ kɔnt. 9 Ɛn fɔ mek ɔlman si aw Gɔd de supavays di oli sikrit we in we mek ɔltin bin dɔn ayd fɔ lɔng tɛm. 10 Dis apin so dat naw Gɔd go yuz di kɔngrigeshɔn fɔ mek di gɔvmɛnt dɛn ɛn di wan dɛn we gɛt pawa na di ples dɛn na ɛvin no di difrɛn difrɛn we dɛn we Gɔd de yuz in sɛns. 11 Dis na akɔdin to wetin i dɔn disayd fɔ du frɔm trade trade ɛn we i go du sote go ɛn we gɛt sɔntin fɔ du wit di Krays, we na Jizɔs wi Masta, 12 we dɔn mek wi de fil fri fɔ tɔk ɛn wi gɛt kɔnfidɛns fɔ go bifo Gɔd bikɔs wi gɛt fet pan am.* 13 So a de beg una mek una nɔ giv-ɔp bikɔs ɔf di prɔblɛm dɛn we a de gɛt fɔ una sek, bikɔs dɛn go mek una gɛt glori.

14 Na dis mek a nil dɔŋ bifo di Papa, 15 we gi ɔl di famili dɛn na ɛvin ɛn na di wɔl dɛn nem. 16 A de pre mek Gɔd yuz di ɔnɔ we i rili gɛt ɛn di pawa we in spirit de gi fɔ mek di pɔsin we una bi insay strɔng mɔ ɛn mɔ, 17 ɛn lɛ di fet we una gɛt mek Krays ɛn lɔv de na una at, ɛn mek una tinap tranga wan na di fawndeshɔn lɛk big tik we in rut de mek i tinap tranga wan, 18 so dat una ɛn ɔl di oli wan dɛn go rili ɔndastand aw di tin dɛn we gɛt fɔ du wit Gɔd wayd, lɔng, ay, ɛn dip, 19 ɛn fɔ mek una no di lɔv we di Krays gɛt, we impɔtant pas fɔ no sɔntin, so dat una go gɛt ɔl di kwaliti dɛn we Gɔd de gi.

20 Mek Gɔd, we in pawa de wok insay wi, du mɔ pas ɔl di tin dɛn we wi de aks fɔ ɔ tink bɔt fa fawe. 21 Mek i gɛt di glori tru di kɔngrigeshɔn ɛn tru Krays Jizɔs to ɔl jɛnɛreshɔn dɛn sote go. Emɛn.