Koloshians

3 Bɔt if Gɔd dɔn gi una layf wit di Krays, una kɔntinyu fɔ luk fɔ di tin dɛn we de ɔp, usay di Krays sidɔm na Gɔd in raytan. 2 Una kɔntinyu fɔ put una maynd pan di tin dɛn we de ɔp, una nɔ put am pan di tin dɛn we de na di wɔl. 3 Una dɔn day, ɛn una layf ayd wit Krays we gɛt wanwɔd wit Gɔd. 4 We di Krays, we na wi layf, apia, unasɛf go apia wit am ɛn gɛt pan in glori.

5 Una dɛdin di pat dɛn na una bɔdi na dis wɔl so dat una nɔ go du mami ɛn dadi biznɛs di we aw Gɔd nɔ want,* una nɔ go du ɛni dɔti tin, una go ebul fɔ kɔntrol unasɛf we i kam pan mami ɛn dadi biznɛs, una nɔ go de want fɔ du bad, ɛn una nɔ go want ɔltin fɔ unasɛf, we na aydɔl wɔship. 6 Na dɛn tin ya go mek Gɔd vɛks. 7 Na dɛn tin ya unasɛf bin de du* we una bin de liv una layf trade. 8 Bɔt naw una fɔ lɛf ɔl dɛn tin ya: fɔ vɛks, fɔ mek wamat, fɔ du bad, kɔs, ɛn lɛ dɔti tɔk nɔ kɔmɔt na una mɔt. 9 Una nɔ lay to una kɔmpin dɛn. Una lɛf* di ol abit dɛn ɛn di tin dɛn we una bin de du, 10 ɛn una fɔ gɛt* di nyu abit dɛn, we Gɔd de mek una gɛt we una no di kɔrɛkt tin bɔt am. Dɔn una go de gɛt di nyu abit dɛn ɛn tan lɛk Gɔd mɔ ɛn mɔ. 11 Di nyu abit dɛn de mek difrɛns nɔ de bitwin Grik ɛn Ju, pɔsin we sakɔmsayz ɛn pɔsin we nɔ sakɔmsayz, fɔrina, Sitian,* slev, ɔ pɔsin we fri; Krays na ɔltin ɛn i de pan ɔltin.

12 So una we Gɔd dɔn pik, una we oli ɛn we i lɛk, una go de rili sho* lɔv ɛn sɔri-at, una fɔ de du gud, una fɔ put unasɛf dɔŋ, una fɔ de du tin saful wan, ɛn una fɔ de peshɛnt. 13 Una kɔntinyu fɔ bia una kɔmpin dɛn ɛn fɔgiv dɛn fɔ fri ivin if una gɛt rizin fɔ vɛks pan dɛn. Jɔs lɛk aw Jiova* dɔn fɔgiv una fɔ fri, na di sem tin unasɛf fɔ du. 14 Bɔt apat frɔm dɛn tin ya, una go de sho* lɔv, bikɔs lɔv de mek pipul dɛn rili gɛt wanwɔd.

15 Dɔn lɛ Krays in pis kɔntrol una at,* bikɔs na fɔ dis pis mek Gɔd kɔl una fɔ bi wan bɔdi. Una sho se una gɛt tɛnki. 16 Lɛ Krays in wɔd de insay una gud gud wan, ɛn lɛ i mek una gɛt ɔlkayn sɛns. Una go de tich ɛn ɛnkɔrej una kɔmpin dɛn wit sam dɛn, una go de prez Gɔd, una go de siŋ Gɔd siŋ dɛn di we we de sho se una gɛt tɛnki, ɛn una go de siŋ wit ɔl una at* to Jiova.* 17 Ɛnitin we una de se ɔ du, una du am insay di Masta Jizɔs in nem, ɛn una go de tɛl Gɔd, we na di Papa, tɛnki tru am.

18 Una dɛn wɛf dɛn, una put unasɛf ɔnda una man dɛn, lɛk aw di wan dɛn we de fala di Masta fɔ du. 19 Una dɛn maredman dɛn, una kɔntinyu fɔ lɛk una wɛf dɛn, ɛn una nɔ go de vɛks pan dɛn bad bad wan.* 20 Una dɛn pikin dɛn, una obe una mama ɛn papa dɛn pan ɔltin, bikɔs dis na tin we di Masta lɛk. 21 Una dɛn papa dɛn, una nɔ fɔ de mek una pikin dɛn vɛks, so dat dɛn at nɔ go pwɛl. 22 Una dɛn slev dɛn, una fɔ obe una mɔtalman masta dɛn pan ɔltin, una nɔ fɔ jɔs du am we dɛn de wach una, jɔs fɔ pliz mɔtalman, bɔt una fɔ du am wit ɔl una at, bikɔs una de fred Jiova.* 23 Ɛnitin we una de du, una du am wit ɔl una layf* lɛk se na fɔ Jiova* una de du am, ɛn nɔto fɔ mɔtalman, 24 bikɔs una no se na Jiova* go pe una bay we i gi una wetin i dɔn prɔmis. Una wok lɛk slev fɔ di Masta, Krays. 25 Fɔ tru, di wan we de du bad go gɛt di pe fɔ di bad we i dɔn du, ɛn Gɔd nɔ de tek wan pɔsin bɛtɛ pas ɔda pɔsin.