Ibruz

10 Bikɔs di Lɔ na shado fɔ di gud tin dɛn we gɛt fɔ kam, nɔto di rial tin dɛn, i* nɔ go ɛva ebul fɔ mek di wan dɛn we de go bifo Gɔd pafɛkt tru di sem sakrifays dɛn we dɛn de kɔntinyu fɔ mek ɛni ia. 2 If i bin ebul, dɛn fɔ dɔn lɛf fɔ mek sakrifays dɛn, bikɔs we di wan dɛn we de du oli wok dɔn klin, dɛn nɔ de no se dɛn gɛt sin dɛn igen, nɔto so? 3 Bɔt dɛn sakrifays dɛn de na fɔ mɛmba dɛn ɛni ia se dɛn de sin, 4 bikɔs i nɔ pɔsibul fɔ mek man kaw ɛn got dɛn blɔd pul sin kɔmɔt.

5 So we i kam na di wɔl, i se: “‘Yu nɔ bin want animal sakrifays ɛn ɛni ɔda sakrifays, bɔt yu rɛdi bɔdi fɔ mi. 6 Yu nɔ bin gladi fɔ animal dɛn we dɛn de bɔn wan ol wan as sakrifays ɛn sakrifays dɛn fɔ sin.’ 7 Dɔn a se: ‘O Gɔd, a dɔn kam (dɛn rayt bɔt mi na di skrol) fɔ du wetin yu want.’” 8 Afta i se: “Yu nɔ bin want ɛn yu nɔ bin gladi fɔ sakrifays dɛn ɛn animal dɛn we dɛn de bɔn wan ol wan as sakrifays ɛn sakrifays dɛn fɔ sin”—sakrifays dɛn we dɛn de mek lɛk aw di Lɔ se— 9 dɔn i se: “A dɔn kam fɔ du wetin yu want.” I pul di fɔs wan so dat i go mek di sɛkɔn wan bigin. 10 Dis tin we Gɔd “want” dɔn mek wi oli we Jizɔs Krays gi in bɔdi as sakrifays wan tɛm nɔmɔ. Ɛn da sakrifays de, de ɛp pipul dɛn sote go.

11 Ɛn ɔl di prist dɛn kin go tinap na dɛn ples ɛvride fɔ du oli wok* ɛn fɔ mek di sem sakrifays dɛn ɔltɛm, sakrifays dɛn we nɔ go ɛva ebul fɔ rili pul sin kɔmɔt. 12 Bɔt dis man mek wan sakrifays fɔ sin dɛn sote go ɛn sidɔm na Gɔd in raytan, 13 frɔm da tɛm de i de wet te dɛn put in ɛnimi dɛn ɔnda in fut lɛk smɔl bɛnch. 14 Na wan sakrifays i mek fɔ lɛ di wan dɛn we dɛn de mek oli pafɛkt sote go. 15 Pantap dat, di oli spirit insɛf tɛl wi se na so i bi, we i se: 16 “Jiova* se: ‘Na di agrimɛnt dis we a go mek wit dɛn afta dɛn dez dɛn de. A go put mi lɔ dɛn na dɛn at ɛn rayt am na dɛn maynd.’” 17 Dɔn i se: “Ɛn a nɔ go mɛmba igen dɛn sin dɛn ɛn di bad tin dɛn we dɛn de du.” 18 We Gɔd fɔgiv pɔsin fɔ dɛn tin ya, nid nɔ de igen fɔ mek sakrifays fɔ sin.

19 So, mi brɔda dɛn, Jizɔs in blɔd dɔn mek wi gɛt maynd* fɔ pas na di say fɔ ɛnta insay di oli ples. 20 Ɛn dis rod we i opin fɔ wi na nyu rod we go mek wi gɛt layf. Ɛn i du dis bay we i pas di kɔtin, we na in bɔdi. 21 Ɛn bikɔs wi gɛt wan wɔndaful prist we de oba Gɔd in os, 22 lɛ wi go bifo Gɔd wit klinat ɛn strɔng fet, we dɛn dɔn klin wi at we dɔn mek wi nɔ gɛt bad kɔnshɛns igen, ɛn dɛn dɔn was wi bɔdi wit klin wata. 23 Lɛ wi kɔntinyu fɔ tɔk na pɔblik bɔt wi op ɛn nɔ stɔp, bikɔs di wan we mek di prɔmis fetful. 24 Ɛn lɛ wi de tink bɔt* wi kɔmpin dɛn so dat wi go ɛp dɛn fɔ sho lɔv ɛn du fayn tin dɛn, 25 ɛn mek wi nɔ lɛf fɔ de mit togɛda lɛk aw sɔm dɔn yus fɔ du, bɔt mek wi de ɛnkɔrej wi kɔmpin dɛn, mɔ we una de si se di de de kam nia.

26 If wi mek am abit fɔ de sin bay wilful wan afta wi dɔn no di kɔrɛkt tin bɔt di trut, no sakrifays nɔ lɛf igen fɔ sin, 27 bɔt di tin nɔmɔ we lɛf na fiaful jɔjmɛnt ɛn di vɛksteshɔn we tan lɛk faya we go kil di wan dɛn we de agens Gɔd. 28 Ɛnibɔdi we nɔ rɛspɛkt Mozis in Lɔ ɛn tu ɔ tri witnɛs dɛn tɔk se na so i bi, dɛn de kil am; dɛn nɔ de sɔri fɔ am. 29 Uskayn pɔnishmɛnt una tink se pɔsin go fit fɔ gɛt if i dɔn mas Gɔd in Pikin ɛn if i dɔn tek di agrimɛnt in blɔd we dɛn mek am oli wit as sɔntin we nɔ gɛt bɛtɛ valyu, ɛn we nɔ sho wan rɛspɛkt fɔ Gɔd in spirit we i de yuz fɔ sho in spɛshal gudnɛs?* 30 Wi no di Wan we se: “Na mi fɔ tɔn-am-gi; a go tɔn-dɛt.” Ɛn i tɔk bak se: “Jiova* go jɔj in pipul dɛn.” 31 Na fiaful tin fɔ mek Gɔd we de alayv pɔnish pɔsin.

32 Bɔt una go de mɛmba trade, afta Gɔd dɔn sho una di layt, una bin bia we una bin de fɛt tranga wan ɛn sɔfa bɔku we dɛn. 33 Sɔntɛnde dɛn bin de kɛr una na pɔblik ɛn trit una bad ɛn mek una shem, ɛn sɔntɛnde una bin de sɔfa* wit di wan dɛn we dɛn tin ya bin de apin to. 34 Una bin de sɔri fɔ di wan dɛn we de na prizin ɛn una bin gri ɛn gladi we dɛn tek una prɔpati dɛn bay fos, bikɔs una no se una gɛt prɔpati we bɛtɛ ɛn we go las.

35 So una nɔ lɛf fɔ gɛt maynd,* bikɔs una go gɛt gud pe fɔ dat. 36 Una nid fɔ bia so dat afta una dɔn du wetin Gɔd want, una go gɛt wetin Gɔd prɔmis. 37 “I nɔ go rili te igen,” ɛn “di wan we de kam go rich ɛn i nɔ go dile.” 38 “Bɔt mi savant we de du wetin rayt go liv bikɔs i gɛt fet,” ɛn “if i tɔn bak, a* nɔ go lɛk am.” 39 Wi nɔto di kayn pipul dɛn we de tɔn bak fɔ mek dɛn dɔnawe wit wi, wi na di kayn pipul dɛn we gɛt fet we go mek wi sev wi layf.*