Lɛ Wi Ɛnkɔrej Wisɛf “Mɔ”

 1. Wetin mek di apɔsul Pɔl bin tɛl di fɔstɛm Ibru Kristian dɛn fɔ de ɛnkɔrej dɛnsɛf “mɔ”?

INSAY di fɔstɛm Kristian dɛn tɛm, di apɔsul Pɔl bin advays di Ibru Kristian dɛn se: “Una lɛ wi tink aw wi go ɛp wisɛf mek wi go lɛk wi kɔmpin dɛn ɛn du gud to dɛn. Una lɛ wi nɔ tap fɔ de mit, lɛ wi nɔ fala dɛn pipul we nɔ de gri fɔ go mitin. Bɔt una lɛ wi de kɔrej wi kɔmpin dɛn, mɔ igen we wi no se di De we di Masta go kam bak de kam jisnɔ.” (Di Ibru Pipul Dɛn 10:​24, 25) Di brɔda dɛn go dɔn de wɔnda wetin mek Pɔl bin tɛl dɛn fɔ kɔntinyu fɔ ɛnkɔrej dɛnsɛf mɔ. I nɔ rich fayv ia afta dat, dɛn bin kam fɔ no wan pan di rizin dɛn. Da tɛm de, dɛn bin si se Jiova in de fɔ jɔj Jerusɛlɛm nɔ de fa igen. Dɛn bin si se dɛn nid fɔ rɔnawe kɔmɔt na di siti lɛk wetin Jizɔs bin se dɛn fɔ du. (Lyuk 21:​20-22; Di Apɔsul Dɛn Wok [Akt] 2:​19, 20) Jiova in de bin kam insay di ia 70, we di Roman dɛn bin dɔnawe wit Jerusɛlɛm.

 2. Wetin mek wi fɔ tink mɔ bɔt aw wi fɔ ɛnkɔrej wisɛf insay wi yon tɛm?

² Na di sem tin de apin insay wi yon tɛm. Jiova in “big de” nɔ de fa igen. (Joɛl 2:​11) Di wɔd dɛn we prɔfɛt Zɛfinaya insɛf tɔk kin bɛnifit wi insay wi yon tɛm. I bin se: “Di big big de we PAPA GƆD [“Jiova,” NW] de kam dɔn kam nia ɛn i de kam jisnɔ.” (Zɛfinaya 1:​14) Na dis rizin mek wi fɔ “ɛp wisɛf mek wi go lɛk wi kɔmpin dɛn ɛn du gud to dɛn.” (Di Ibru Pipul Dɛn 10:​24) Wi nid fɔ rili bisin bɔt wi brɔda dɛn so dat wi go ɛnkɔrej dɛn we dɛn nid wi fɔ ɛnkɔrej dɛn.

 3. Wetin di apɔsul Pɔl bin se bɔt ɛnkɔrejmɛnt? (Luk di pikchɔ nia dis atikul in taytul.)

³ “Udat de wɔndrin tumɔs nɔ de api, bɔt if dɛn kɔrej am, i go bɔk ɔp.” (Prɔvabs 12:​25) Tɛm kin kam we wi ɔl nid pɔsin fɔ ɛnkɔrej wi. Pɔl bin tɔk klia wan se ivin di wan dɛn we gɛt di wok fɔ ɛnkɔrej ɔda pipul dɛn, dɛnsɛf nid pɔsin fɔ ɛnkɔrej dɛn. I bin rayt to di brɔda dɛn na Rom fɔ se: “A want si una bad bad fɔ mek unasɛf gɛt pan di blɛsin we Gɔd in Spirit de gi, so dat go mek natin nɔ shek di biliv we una biliv pan Jizɔs Krays. Dat min se a go ɛp una fɔ waka klos Gɔd mɔ bay aw a biliv pan Krays ɛn unasɛf go ɛp mi bay we unasɛf biliv pan am.” (Lɛta Fɔ Rom 1:​11, 12) So ivin di apɔsul Pɔl sɛf bin nid pɔsin fɔ ɛnkɔrej am sɔntɛnde.—Rid Lɛta Fɔ Rom 15:​30-32.

4, 5. Udat dɛn wi kin ɛnkɔrej insay wi yon tɛm? Wetin mek wi fɔ ɛnkɔrej dɛn?

⁴ Insay wi yon tɛm, wi kin ɛnkɔrej fetful payɔnia dɛn we de yuz ɔl dɛn tɛm fɔ sav Jiova. Bɔku pan dɛn dɔn lɛf fɔ du di tin dɛn we dɛn lɛk so dat dɛn go ebul fɔ payɔnia. Na di sem tin de apin to mishɔnari dɛn, Bɛtɛlayt dɛn, sakit ovasia dɛn ɛn dɛn wɛf dɛn, ɛn dɛn wan dɛn we de wok na transleshɔn ɔfis dɛn we nɔ de na di branch. Dɛn ɔl dɔn lɛf bɔku tin biɛn fɔ mek dɛn go ebul fɔ yuz mɔ tɛm fɔ sav Jiova. So wi fɔ ɛnkɔrej dɛn. Bɔku pipul dɛn de we de wish se dɛn go stil ebul fɔ yuz ɔl dɛn tɛm fɔ sav Jiova bɔt dɛn nɔ ebul igen. Dɛnsɛf kin gladi we dɛn ɛnkɔrej dɛn.

⁵ Udat dɛn bak nid ɛnkɔrejmɛnt? Wi kin ɛnkɔrej brɔda ɛn sista dɛn we dɔn disayd nɔ fɔ mared bikɔs dɛn want fɔ obe wetin Jiova tɔk fɔ se dɛn fɔ mared to pɔsin we “biliv di Masta.” (Fɔs Lɛta Fɔ Kɔrint 7:​39) Mareduman dɛn kin gladi we dɛn man dɛn kin tɛl dɛn se dɛn lɛk dɛn ɛn dɛn gladi fɔ ɔl wetin dɛn de du. (Prɔvabs 31:​28, 31) Kristian dɛn we sik ɛn di wan dɛn we de bia pan ɔl we dɛn de mek dɛn sɔfa fɔ Jiova, dɛnsɛf nid pɔsin fɔ ɛnkɔrej dɛn. (Sɛkɛn Lɛta Fɔ Tɛsalonayka 1:​3-5) Jiova ɛn Jizɔs de ɛnkɔrej ɔl dɛn wan dɛn ya.—Rid Sɛkɛn Lɛta Fɔ Tɛsalonayka 2:​16, 17.

 6. Wetin wi lan bɔt di wok we di ɛlda dɛn de du frɔm wetin de na Ayzaya 32:​1, 2?

⁶ Rid Ayzaya 32:​1, 2. Wi de na di tɛm we tin tranga so i izi fɔ mek pɔsin fil bad ɔ gɛt pwɛl at. Jizɔs Krays de yuz in anɔyntɛd brɔda dɛn ɛn fetful “bigman dɛn” we de pan di ɔda ship fɔ ɛnkɔrej wi. Dɛn ɛlda dɛn ya na wi kɔngrigeshɔn “nɔ de tɛl wi wetin fɔ biliv,” bɔt dɛn de “ɛp wi” fɔ mek wi go gladi ɛn kɔntinyu fɔ sav Jiova fetful wan.—Sɛkɛn Lɛta Fɔ Kɔrint 1:​24.

7, 8. Aw ɛlda dɛn kin ɛnkɔrej ɔda pipul dɛn bay wetin dɛn de se ɛn du?

⁷ Ɛlda dɛn kin falamakata di apɔsul Pɔl we bin de tray fɔ ɛnkɔrej in brɔda dɛn ɔltɛm. We dɛn bin de mek di Kristian dɛn na Tɛsalonayka sɔfa, i bin rayt to dɛn se: “Bikɔs wi lɛk una bad, wi bin rɛdi fɔ tɛl una di gud nyuz we Gɔd tɛl wi fɔ tɛl una ɛn fɔ day sɛf fɔ una. Wi bin lɛk una bad bad!”—Fɔs Lɛta Fɔ Tɛsalonayka 2:​8.

⁸ Ɛlda dɛn kin ɛnkɔrej ɔda pipul dɛn bay wetin dɛn de tɔk. Bɔt na dat nɔmɔ dɛn fɔ du? Pɔl bin tɛl di ɛlda dɛn na Ɛfisɔs se: “A dɔn sho una se if una wok tranga wan dis we, una go mɔs ebul fɔ ɛp di wan dɛn we wik. Una fɔ mɛmba wetin Masta Jizɔs insɛf se: ‘Di pɔsin we de gi go gladi pas di pɔsin we dɛn gi.’” (Di Apɔsul Dɛn Wok [Akt] 20:​35, NW) Pɔl bin rɛdi fɔ du in bɛst ɛn i bin “gladi fɔ gi ɔl wetin [i] gɛt ɛn [insɛf]” fɔ ɛp in brɔda dɛn. (Sɛkɛn Lɛta Fɔ Kɔrint 12:​15) Semweso, ɛlda dɛn fɔ ɛnkɔrej ɔda pipul dɛn bay wetin dɛn de se ɛn du. Dis sho se dɛn rili bisin bɔt wi.—Fɔs Lɛta Fɔ Kɔrint 14:​3.

 9. Aw ɛlda dɛn go kɔrɛkt pɔsin ɔ gi am advays di we we go ɛnkɔrej am?

⁹ Fɔ ɛp di brɔda dɛn, sɔntɛnde ɛlda dɛn kin nid fɔ kɔrɛkt dɛn ɛn gi dɛn advays. Ɛlda dɛn kin lan frɔm di Baybul aw fɔ du dis di we we go ɛnkɔrej di pɔsin. Jizɔs bin sɛt fayn ɛgzampul bɔt aw fɔ gi advays we i bin sɛn mɛsej to di kɔngrigeshɔn na Eshia Maynɔ afta we i bin dɔn day ɛn gɛt layf bak. I bin nid fɔ kɔrɛkt siriɔs tin na di kɔngrigeshɔn dɛn na Ɛfisɔs, Pagamɔm, ɛn Tayatira. Bɔt bifo i tɛl dɛn wetin i bin want fɔ se, i bin prez dɛn fɔs fɔ ɔl di gud tin dɛn we dɛn bin dɔn de du. (Rɛvɛleshɔn 2:​1-5, 12, 13, 18, 19) Jizɔs bin tɛl di kɔngrigeshɔn na Laodisya se: “Dɛn pipul we a lɛk na dɛn a kin tɛl se dɛn de du rɔŋ tin ɛn a kin pɔnish dɛn mek dɛn go gɛt sɛns fɔ du wetin rayt. So una kechɔp unasɛf, ɛn lɛf fɔ sin.” (Rɛvɛleshɔn 3:​19) Wi ɛlda dɛn kin tray fɔ falamakata Krays we dɛn de kɔrɛkt wi ɔ gi wi advays.

10. Aw wi ɔl go ɛp wisɛf?

¹⁰ Nɔto ɛlda dɛn nɔmɔ fɔ ɛnkɔrej ɔda pipul dɛn. Pɔl bin ɛnkɔrej ɔl Kristian dɛn fɔ tɔk “wɔd dɛn we go ɛp ɔda pipul, so dat wetin una de tɔk go du gud fɔ di pipul dɛn we de yɛri una.” (Lɛta Fɔ Ɛfisɔs 4:​29) Wi ɔl nid fɔ no wetin ɔda pipul dɛn nid so dat wi go ɛp dɛn. Pɔl bin rayt to di Ibru Kristian dɛn ɛn tɛl dɛn se: “Una mek una an we wik ɛn una fut we nɔ gɛt trɛnk, traŋa. Una waka na di tret rod, so dat di wan we in fut nɔ traŋa nɔ go fɔdɔm ɛn ambɔg in fut, bɔt in fut go wɛl ɛn insɛf go ebul waka na di tret rod. (Di Ibru Pipul Dɛn 12:​12, 13) Wi ɔl kin ɛp ɛn ɛnkɔrej wi kɔmpin dɛn bay wetin wi de tɔk ilɛksɛf wi rili yɔŋ.

11. Wetin bin ɛp Mati we in at bin pwɛl?

¹¹ Wan sista we nem Mati in at bin pwɛl fɔ sɔm tɛm.a (Luk di futnot.) I bin rayt se, “Wan de we a bin de pre fɔ pɔsin fɔ ɛnkɔrej mi, a bin mit wan ol sista we bin sho se i lɛk mi ɛn de sɔri fɔ mi ɛn a bin rili nid am da tɛm de. I bin tɛl mi bak bɔt di ɛkspiriɛns we i bin gɛt wit di kayn prɔblɛm we de apin to mi ɛn a nɔ bin fil se na mi wan de igen.” I go bi se di sista nɔ bin ivin no aw di tin dɛn we i bin tɔk ɛp Mati!

12, 13. Aw wi go ebul du wetin Lɛta Fɔ Filipay 2:​1-4 tɔk bɔt?

¹² Pɔl bin rayt to di Kristian dɛn na Filipay se: “Una nɔ biliv se we una gɛt wanwɔd wit Krays, dat fɔ mek una de kɔrej unasɛf? We Krays lɛk una, dat fɔ mek una tap fɔ wɔri? Una nɔ fil se Gɔd in Spirit we de insay una dɔn mek una ɔl bi wan? Una de sɔri fɔ una kɔmpin ɛn una wan du gud fɔ dɛn? If na so i bi, una fɔ mek a gladi pas aw a gladi naw fɔ we una gɛt wanwɔd, we una lɛk una kɔmpin, ɛn we una ɔl gɛt wan at ɛn wan maynd fɔ du di wok. Una nɔ fɔ jɛs de du dɛn tin we una want fɔ du nɔmɔ, una nɔ fɔ du ɛnitin bikɔs una wan mek dɛn prez una; una nɔ fɔ prawd, una fɔ fil se ɔda pipul bɛtɛ pas una. Una nɔ fɔ jɛs de mɛmba unasɛf nɔmɔ, una fɔ de mɛmba ɔda pipul.”—Lɛta Fɔ Filipay 2:​1-4.

¹³ Wi ɔl fɔ luk fɔ we dɛn fɔ ɛp wi kɔmpin dɛn. Wi kin “de kɔrej [wisɛf],” wi ɔl fɔ “bi wan,” ɛn wi fɔ de “sɔri fɔ [wi] kɔmpin ɛn . . . du gud fɔ dɛn” so dat wi go ɛnkɔrej wi brɔda ɛn sista dɛn.

14. Wetin na wan we we wi kin ɛnkɔrej wi kɔmpin dɛn?

¹⁴ Wi kin gladi we wi yɛri se di wan dɛn we wi bin dɔn ɛp trade fɔ bigin sav Jiova, stil de sav am fetful wan. Di apɔsul Jɔn bin rayt se: “Di tin we kin mek a gladi pas ɔl na we a kin yɛri se mi pikin dɛn de waka na di tru rod.” (Jɔn In Tɔd Lɛta 4) Bɔku payɔnia dɛn kin gladi we dɛn yɛri se pɔsin we dɛn bin dɔn ɛp fɔ bigin sav Jiova, stil de sav am fetful wan ɛn sɔntɛm dɛn ivin de payɔnia. So if payɔnia dɛn at pwɛl, wi kin mɛmba dɛn bɔt ɔl di gud tin dɛn we dɛn dɔn du fɔ ɛp ɔda pipul dɛn.

15. Wetin wi go du fɔ ɛnkɔrej di wan dɛn we de sav Jiova fetful wan?

¹⁵ Bɔku sakit ovasia dɛn dɔn tɔk se dɛn ɛn dɛn wɛf dɛn kin gladi we dɛn kin gi dɛn lɛta fɔ tɛl dɛn tɛnki afta we dɛn kɔmɔt waka na wan kɔngrigeshɔn. Na so bak i kin bi fɔ ɛlda dɛn, mishɔnari dɛn, payɔnia dɛn, ɛn Bɛtɛlayt dɛn we de sav Jiova fetful wan. We wi tɛl dɛn tɛnki, wi go de ɛnkɔrej dɛn pas aw wi de tink.

16. Wetin na sɔm simpul tin dɛn we wi go du fɔ ɛnkɔrej pɔsin?

¹⁶ Wetin yu go du if yu si se i nɔ izi fɔ mek yu tɛl ɔda pipul dɛn aw yu de fil bɔt dɛn? Fɔ tru, i nɔ rili at fɔ ɛnkɔrej ɔda pipul dɛn. Tray fɔ smayl to pɔsin. If di pɔsin nɔ smayl bak, i go bi se di pɔsin gɛt prɔblɛm ɛn i nid pɔsin fɔ tɔk to. Yu kin ɛnkɔrej dɛn bay we yu lisin to dɛn.—Jems 1:​19.

17. Wetin bin ɛnkɔrej wan yɔŋ brɔda?

¹⁷ Wan yɔŋ brɔda we nem Ɛnri in at bin rili pwɛl we in tayt fambul dɛn lɛf fɔ sav Jiova. Wan pan dɛn na in papa we na bin ɛlda. Wan sakit ovasia bin notis se Ɛnri nɔ bin gladi so i kɛr am go fɔ go drink kɔfi. I tek tɛm lisin we Ɛnri bin de tɔk aw i de fil. Ɛnri kam fɔ no se di tin nɔmɔ we i go du fɔ ɛp in fambul dɛn fɔ kam bak to Jiova, na we i kɔntinyu fɔ sav am fetful wan. We i bin rid skripchɔ dɛn lɛk Sam 46, Zɛfinaya 3:​17, ɛn Mak 10:​29, 30, dat bak bin ɛnkɔrej am.

18. (a) Wetin Kiŋ Sɔlɔmɔn bin rayt bɔt ɛnkɔrejmɛnt? (b) Wetin di apɔsul Pɔl bin se go fayn fɔ du?

¹⁸ Wetin wi lan frɔm Mati ɛn Ɛnri dɛn ɛkspiriɛns? Wi ɔl kin ɛnkɔrej ɛn ɛp wan brɔda ɔ sista we nid pɔsin fɔ ɛnkɔrej am. Kiŋ Sɔlɔmɔn bin rayt se: “Wɔd we dɛn tɔk di rayt tɛm kin rili fayn! Wɛn pɔsin smayl to yu, yu de gladi, ɛn gud nyuz, de gi wɛlbɔdi.” (Prɔvabs 15:​23, NW, 30) Yu tink bɔt pɔsin we in at pwɛl ɔ we nɔ gladi? Yu go ebul fɔ du smɔl tin fɔ dɛn lɛk fɔ rid frɔm Di Wachtawa ɔ frɔm di wɛbsayt? Pɔl bin tink bak se we una de siŋ di Kiŋdɔm siŋ dɛn togɛda, dat kin mek una fil fayn. I bin rayt se: “Una kɔntinyu fɔ tich ɛn ɛnkɔrej unasɛf wit sam dɛn. Una go de prez Gɔd, ɛn siŋ dɛn Gɔd siŋ dɛn fɔ sho se una gɛt tɛnki, ɛn una go de siŋ to Jiova na una at.”—Lɛta fɔ Kɔlɔse 3:​16, NW; Di Apɔsul Dɛn Wok [Akt] 16:​25.

19. Wetin mek tɛm nɔ de fa igen fɔ mek wi de ɛnkɔrej wisɛf mɔ? Wetin wi fɔ du?

¹⁹ As tɛm de rich fɔ mek Jiova in de kam, i go impɔtant mɔ fɔ mek wi ɛnkɔrej wisɛf mɔ. (Di Ibru Pipul Dɛn 10:​25) Wi go gladi if wi du wetin Pɔl bin advays we i se: “Una fɔ stil de kɔrej ɛn ɛp una kɔmpin Kristiɛn dɛn, lɛkɛ aw una de du naw.”—Fɔs Lɛta Fɔ Tɛsalonayka 5:​11.