2 Kɔrintians

7 So, mi brɔda dɛn we a rili lɛk, bikɔs Gɔd dɔn prɔmis wi dɛn tin ya, lɛ wi klin wisɛf lɛ no dɔti nɔ de pan wi bɔdi ɛn spirit, so dat wi go oli mɔ ɛn mɔ as wi de fred Gɔd.

2 Wi want mek una opin una at to wi. Wi nɔ du bad to ɛnibɔdi, wi nɔ kɔrɔpt ɛnibɔdi, wi nɔ siz advantej pan ɛnibɔdi. 3 A nɔ de tɔk dis fɔ kɔndɛm una. A bin dɔn tɔk se una de na wi at fɔ mek wi day togɛda ɛn liv togɛda. 4 A de rili fil fri fɔ tɔk to una. A de rili bost bɔt una. A rili gɛt kɔrej; a gladi pasmak pan ɔl we wi de sɔfa.

5 Infakt, we wi rich na Masidonia, wi bɔdi dɛn nɔ gɛt wan blo blo, bɔt wi kɔntinyu fɔ sɔfa ɔlkayn we—fɛt-fɛt bin de na do ɛn wi bin de fred insay. 6 Bɔt Gɔd, we de kɔrej di wan dɛn we gɛt pwɛlat, bin kɔrej wi we i mek Taytɔs de wit wi; 7 bɔt nɔto we i de wit wi nɔmɔ, bɔt di kɔrej we una kɔrej am kɔrej wisɛf, we i tɛl wi aw una rili want fɔ si mi, aw una at rili pwɛl, ɛn aw una rili bisin* bɔt mi; so a gladi mɔ.

8 Ivin if mi lɛta mek una at pwɛl, a nɔ rigrɛt am. Ivin if a bin rigrɛt am fɔs (we a si se mi lɛta mek una at pwɛl, pan ɔl we na fɔ shɔt tɛm), 9 naw a gladi, nɔto jɔs bikɔs una at bin pwɛl, bɔt bikɔs di pwɛlat mek una ripɛnt. Una at bin pwɛl di we aw Gɔd want, we mek no bad tin nɔ apin to una bikɔs ɔf wi. 10 We pɔsin in at pwɛl di we aw Gɔd want, i kin mek i ripɛnt ɛn ɛnd-ɔp fɔ sev ɛn i nɔ kin rigrɛt am; bɔt we pɔsin in at pwɛl lɛk di pipul dɛn na di wɔl, dat kin mek i ɛnd-ɔp fɔ day. 11 Luk wetin apin we una rili tray fɔ mek una at pwɛl di we aw Gɔd want, una pul di badnem we una bin gɛt, una rili fil bad, una fred, una bin want fɔ ripɛnt, una gɛt zil, una kɔrɛkt una mistek! Una dɔn du ɔltin di rayt we fɔ sɔlv dis prɔblɛm. 12 A nɔ rayt una fɔ di wan we dɔn du bad, ɔ fɔ di wan we dɛn bin du bad to, bɔt a rayt una so dat una go sho to unasɛf ɛn bifo Gɔd se una rili want fɔ lisin to wi. 13 Na dat mek wi dɔn gɛt kɔrej.

Bɔt apat frɔm di kɔrej we wi gɛt, wi gladi mɔ we Taytɔs gladi, bikɔs una ɔl dɔn mek i fil fayn. 14 If a bin dɔn bost bɔt una to am, una nɔ mek a shem; bɔt jɔs lɛk aw ɔl di tin dɛn we wi bin tɛl una na tru, na so bak di bost we wi bost to Taytɔs dɔn bi tru. 15 Ɛn i de rili lɛk una mɔ ɛn mɔ we i de mɛmba aw una ɔl de obe, ɛn aw una bin de fred ɛn trimbul we una de wɛlkɔm am. 16 A gladi se a gɛt kɔnfidɛns pan una pan ɔltin.