Matyu

10 So i kɔl in 12 disaypul dɛn ɛn gi dɛn pawa fɔ pul dimɔn dɛn ɛn fɔ mɛn ɔlkayn sik.

2 Dis na di 12 apɔsul dɛn nem dɛn: Di fɔs wan na Saymɔn, we dɛn kin kɔl Pita ɛn in brɔda Andru; Jems we na Zɛbidi in pikin ɛn in brɔda Jɔn; 3 Filip ɛn Batalomi; Tɔmɔs ɛn Matyu we de gɛda taks; Jems, we na Alfiɔs in pikin; ɛn Tadiɔs; 4 Saymɔn di Kenanian;* ɛn Judas Iskariɔt we leta ɛp pipul dɛn fɔ arɛst am.

5 Na dɛn 12 apɔsul ya Jizɔs sɛn fɔ go prich, ɛn i tɛl dɛn se: “Una nɔ go to pipul dɛn we de na ɔda neshɔn dɛn, ɛn una nɔ go na ɛni Samɛritan siti, 6 bifo dat, una kɔntinyu fɔ go to di Izrɛlayt dɛn we fiba ship we dɔn lɔs. 7 As una de go, una prich se: ‘Di Kiŋdɔm we de na ɛvin dɔn nia.’ 8 Una mɛn di wan dɛn we sik, gi layf bak to di wan dɛn we dɔn day, mɛn di wan dɛn we gɛt lɛprɔsi, pul dimɔn dɛn. Una gɛt am fri, so una gi fri. 9 Una nɔ tray fɔ gɛt gold ɔ silva ɔ kɔpa fɔ put na di pɔkit we de na una bɛlt, 10 ɔ bag fɔ put it we una de travul, ɔ tu klos,* ɔ sandal, ɔ wɔkinstik, bikɔs di wokman fit fɔ gɛt in it.

11 “We una go na ɛni siti ɔ vilej, una luk fɔ pɔsin we go wɛlkɔm una fayn, ɛn una de de te una kɔmɔt de. 12 We una go insay di os, una grit* di wan dɛn we de na di os. 13 If di wan dɛn we de na di os wɛlkɔm una fayn, lɛ di kolat we una wish dɛn kam pan dɛn, bɔt if dɛn nɔ wɛlkɔm una fayn, lɛ di kolat kam bak to una. 14 If nɔbɔdi nɔ wɛlkɔm una fayn ɔ lisin to una na ɛni os ɔ siti, we una de kɔmɔt de, una nak nak una fut fɔ pul di dɔst. 15 Fɔ tru, a de tɛl una se we Jɔjmɛnt De kam, i go bɛtɛ fɔ Sɔdɔm ɛn Gomɔra pas fɔ da siti de.

16 “A de sɛn una lɛk ship midul wulf dɛn; so una fɔ gɛt sɛns lɛk snek ɛn tan lɛk dɔv we nɔ de du bad. 17 Una tek tɛm wit mɔtalman bikɔs dɛn go kɛr una go na kɔt dɛn ɛn bit* una na dɛn sinagɔg* dɛn. 18 Ɛn dɛn go kɛr una go bifo gɔvnɔ ɛn kiŋ dɛn fɔ mi sek. Dɔn una go prich to dɛn ɛn ɔda neshɔn dɛn. 19 Bɔt we dɛn arɛst una, una nɔ wɔri bɔt aw fɔ tɔk ɔ wetin fɔ tɔk, bikɔs Gɔd go tɛl una wetin fɔ tɔk da tɛm de. 20 Nɔto una nɔmɔ go tɔk, bɔt na una Papa in spirit go ɛp una fɔ tɔk. 21 Dɔn brɔda go mek dɛn kil in brɔda, papa go mek dɛn kil in pikin, ɛn pikin dɛn go tɔn agens dɛn mama ɛn papa ɛn dɛn go mek dɛn kil dɛn. 22 Ɛn ɔlman go et una bikɔs ɔf mi nem, bɔt di wan we dɔn bia* te di ɛnd na in go sev. 23 We dɛn mek una sɔfa na wan siti, una rɔn go na ɔda siti. Fɔ tru, a de tɛl una se bifo una dɔn fɔ travul na di siti dɛn na Izrɛl, mɔtalman Pikin go dɔn kam.

24 “Studɛnt nɔ pas in ticha ɛn slev nɔ pas in masta. 25 Di studɛnt fɔ satisfay we i tan lɛk in ticha ɛn di slev fɔ satisfay we i tan lɛk in masta. If pipul dɛn dɔn kɔl di masta na di os Biɛlzibɔb,* dɛn go mɔs kɔl di wan dɛn we de na in os di sem we! 26 So una nɔ fred dɛn, bikɔs natin nɔ de we kɔba we nɔ go opin, ɛn no sikrit nɔ de we pipul dɛn nɔ go no bɔt. 27 Wetin a tɛl una na dak, una tɔk am usay layt de, ɛn wetin a tɔk saful, una go pantap os ɛn tɔk am. 28 Ɛn una nɔ fred di wan dɛn we de kil di bɔdi bɔt nɔ ebul fɔ kil di sol;* bɔt una fred di wan we ebul fɔ dɔnawe wit di sol ɛn di bɔdi na Gɛɛna.* 29 Dɛn de sɛl tu smɔl bɔd* fɔ wan kɔyn we nɔ gɛt bɛtɛ valyu,* nɔto so? Bɔt una Papa de no we ɛniwan pan dɛn fɔdɔm na grɔn. 30 Ɛn i ivin no ɔmɔs ia de na una ed. 31 So una nɔ fred, una valyu pas bɔku sparo* dɛn.

32 “Ɛnibɔdi we se i no mi bifo mɔtalman, misɛf go se a no am bifo mi Papa we de na ɛvin. 33 Bɔt ɛnibɔdi we dinay mi bifo mɔtalman, misɛf go dinay am bifo mi Papa we de na ɛvin. 34 Una nɔ tink se a kam fɔ mek pis na di wɔl; a nɔ kam fɔ mek pis, na sɔd a kam wit. 35 A kam fɔ mek wanwɔd nɔ de, bɔypikin go de agens in papa, galpikin go de agens in mama, ɛn dɔtɛnlɔ go de agens in mɔdɛnlɔ. 36 Fɔ tru, pɔsin in ɛnimi go bi di wan dɛn we de na in yon os. 37 Ɛnibɔdi we lɛk in mama ɔ papa pas mi nɔ fit fɔ bi mi disaypul; ɛn ɛnibɔdi we lɛk in bɔypikin ɔ galpikin pas mi nɔ fit fɔ bi mi disaypul. 38 Ɛn ɛnibɔdi we nɔ want fɔ tot in tik we i go sɔfa pan* ɛn fala mi nɔ fit fɔ bi mi disaypul. 39 Ɛnibɔdi we tray fɔ sev in layf* go lɔs am, bɔt ɛnibɔdi we lɔs in layf* fɔ mi sek go gɛt am bak.

40 “Ɛnibɔdi we wɛlkɔm una dɔn wɛlkɔm mi, ɛn ɛnibɔdi we wɛlkɔm mi dɔn wɛlkɔm di Wan we sɛn mi. 41 Ɛnibɔdi we wɛlkɔm prɔfɛt bikɔs in na prɔfɛt go gɛt prɔfɛt in blɛsin ɛn ɛnibɔdi we wɛlkɔm pɔsin we de du wetin rayt bikɔs in na pɔsin we de du wetin rayt go gɛt dis kayn pɔsin in blɛsin. 42 Ɛn ɛnibɔdi we gi wan pan dɛn smɔl wan ya jɔs wan kɔp kol wata fɔ drink bikɔs in na disaypul, a de tɛl una fɔ tru se, natin nɔ go mek i nɔ gɛt in blɛsin.”