Kam Nia Jiova ɛn Yu Brɔda ɛn Sista Dɛn

 1. Wetin wi go kɔl Jiova?

DI WAN dɛn we de na Jiova in famili we de wɔship am na Jizɔs, we “na in fɔs Gɔd mek bifo ɛni ɔda tin,” ɛn di bɔku bɔku enjɛl dɛn. (Kol. 1:​15; Sam 103:​20) We Jizɔs bin de na dis wɔl, i bin ɛp pipul dɛn fɔ ɔndastand se dɛn kin kɔl Jiova dɛn Papa. We Jizɔs bin de tɔk to in disaypul dɛn, i bin kɔl Jiova “mi Papa ɛn una Papa.” (Jɔn 20:​17) We wi gi wi layf to Jiova ɛn baptayz, wi dɔn bi pat ɔf wan famili we gɛt lɔv.—Mak 10:​29, 30.

 2. Wetin wi go tɔk bɔt insay dis atikul?

² Sɔm pipul dɛn de si am se i nɔ izi fɔ mek dɛn si Jiova as Papa we lɛk dɛn. Ɔda pipul dɛn nɔ no aw fɔ sho lɔv to dɛn brɔda ɛn sista dɛn. Insay dis atikul, wi go tɔk bɔt aw Jizɔs de ɛp wi fɔ mek wi si Jiova as Papa we lɛk wi, ɛn we want mek wi kam nia am. Wi go lan bak bɔt we dɛn aw wi go falamakata Jiova bay di we aw wi de trit wi brɔda ɛn sista dɛn.

 3. Aw di ɛgzampul fɔ pre de mek wi kam nia Jiova?

³ Jiova na Papa we gɛt lɔv. Jizɔs want wi fɔ si Jiova di sem we aw insɛf de si am, dat na as papa we gud ɛn we lɛk wi, we wi kin tɔk to ɛnitɛm, nɔto pɔsin we bad ɛn we jɔs de tɛl wi wetin fɔ du. Wi no dis bikɔs ɔf wetin Jizɔs bin tich in disaypul dɛn fɔ tɔk we dɛn de pre. We i bin de sho ɛgzampul bɔt aw fɔ pre, i bin bigin wit di wɔd dɛn we se: “Wi Papa.” (Mat. 6:​9) Jizɔs bin fɔ dɔn tɛl wi fɔ kɔl Jiova “di Ɔlmayti,” ‘di Wan we Mek Ɔltin,’ ɔ “di Kiŋ we bin dɔn de ɛn we go de sote go.” Ɔl dɛn taytul dɛn ya nɔ bad, bikɔs di Baybul yuz dɛn fɔ sho udat Jiova bi. (Jɛn. 49:​25; Ayz. 40:​28; 1 Tim. 1:​17) Bɔt Jizɔs tɛl wi fɔ kɔl Jiova “Papa.”

 4. Aw wi no se Jiova want fɔ mek wi kam nia am?

⁴ I nɔ izi fɔ mek yu si Jiova as Papa we gɛt lɔv? I nɔ izi fɔ sɔm pan wi. If wi papa we bɔn wi nɔto bin gud man, sɔntɛm i nɔ go izi fɔ lɛ wi imajin aw i go tan lɛk fɔ gɛt papa we lɛk wi. Bɔt we wi mɛmba se Jiova rili ɔndastand aw wi de fil, dat de ɛnkɔrej wi. I want fɔ mek wi kam nia am. Na dat mek di Baybul de ɛnkɔrej wi se: “Una kam nia Gɔd, ɛn insɛf go kam nia una.” (Jems 4:​8) Jiova lɛk wi, ɛn i de tɛl wi se i go bi di bɛst Papa we wi go ɛva gɛt.

 5. Akɔdin to Lyuk 10:​22, aw Jizɔs go ɛp wi fɔ kam nia Jiova?

⁵ Jizɔs go ebul ɛp wi fɔ kam nia Jiova mɔ ɛn mɔ. Jizɔs sabi Jiova gud gud wan, ɛn i de falamakata In kwaliti dɛn pafɛkt wan. Na dat mek i bin ebul fɔ se: “Ɛnibɔdi we dɔn si mi dɔn si di Papa.” (Jɔn 14:​9) Jizɔs tan lɛk wi big brɔda we de tich wi aw fɔ rɛspɛkt ɛn obe wi Papa, aw fɔ avɔyd tin dɛn we go mek I nɔ gladi, ɛn aw fɔ du di tin dɛn we go mek I gladi fɔ wi. Bɔt di men tin we Jizɔs ɛp wi fɔ ɔndastand na dat Jiova rili gud ɛn i gɛt lɔv. (Rid Lyuk 10:​22.) Lɛ wi tɔk bɔt sɔm ɛgzampul dɛn.

 6. Gi ɛgzampul dɛn bɔt aw Jiova bin lisin to Jizɔs.

⁶ Jiova de lisin to in pikin dɛn. Tink bɔt aw Jiova bin lisin to in fɔs Bɔypikin. Wan dawt nɔ de se Jiova bin lisin to di bɔku prea dɛn we in Pikin bin mek we i bin de na di wɔl. (Lyuk 5:​16) I bin yɛri we Jizɔs bin de pre bɔt impɔtant tin dɛn we i fɔ disayd, lɛk fɔ pik in 12 apɔsul dɛn. (Lyuk 6:​12, 13) Jiova bin yɛri bak Jizɔs in prea di tɛm we i bin rili wɔri. Jɔs bifo Judas ɛp pipul dɛn fɔ arɛst am, Jizɔs bin pre wit ɔl in at to in Papa bɔt wetin gɛt fɔ apin to am. Jiova nɔ bin jɔs yɛri Jizɔs in prea, bɔt I bin sɛn wan ɛnjel fɔ ɛnkɔrej In Pikin we I lɛk.—Lyuk 22:​41-44.

 7. We wi no se Jiova de ansa in savant dɛn prea, aw dat de mek wi fil?

⁷ Tide, Jiova de kɔntinyu fɔ lisin to in savant dɛn prea, ɛn i de ansa dɛn di rayt tɛm ɛn di bɛst we. (Sam 116:​1, 2) Tink bɔt aw wan sista we de na India bin si aw Jiova ansa in prea dɛn. I bin de wɔri pasmak, ɛn i pre to Jiova wit ɔl in at bɔt dat. I rayt se: “Di Me 2019 JW Brɔdkastin program bɔt wetin fɔ du we wi de wɔri, na bin di rayt tin fɔ mi. Da program de na bin ansa to mi prea dɛn.”

 8. Us we dɛn Jiova sho se i lɛk Jizɔs?

⁸ Jiova lɛk wi ɛn i kia fɔ wi, jɔs lɛk aw i bin lɛk Jizɔs ɛn kia fɔ am di tɛm we i bin de na di wɔl. (Jɔn 5:​20) I bin ɛp Jizɔs fɔ kɔntinyu fɔ gɛt strɔng fet, i bin ɛnkɔrej am we i bin de wɔri, ɛn i bin mek shɔ se Jizɔs bin gɛt di tin dɛn we i nid fɔ kɔntinyu fɔ liv. Ɛn Jiova bin tɛl in Bɔypikin se i lɛk am ɛn I bin gladi fɔ am. (Mat. 3:​16, 17) Jizɔs bin no se in Papa we de na ɛvin, we lɛk am, go de wit am ɔltɛm ɛn i go ɛp am, so i nɔ bin ɛva fil se na in wangren de.—Jɔn 8:​16.

 9. Aw wi no se Jiova lɛk wi?

⁹ Jɔs lɛk Jizɔs, wi ɔl dɔn si bɔku we dɛn we Jiova de sho se i lɛk wi. Jɔs tink bɔt dis: Jiova dɔn alaw wi fɔ bi in padi, ɛn i dɔn gi wi bɔku brɔda ɛn sista dɛn we lɛk wi, we de mek wi gladi ɛn ɛnkɔrej wi we wi gɛt sɔntin we de mek wi wɔri. (Jɔn 6:​44) Jiova de gi wi bak ɔltin we wi nid we go ɛp wi fɔ kɔntinyu fɔ gɛt strɔng fet. Ɛn i ivin de ɛp wi fɔ gɛt di tin dɛn we wi nid fɔ kɔntinyu fɔ liv. (Mat. 6:​31, 32) We wi tink bɔt aw Jiova lɛk wi, wisɛf de lɛk am mɔ ɛn mɔ.

10. Aw wi go falamakata Jiova fɔ sho lɔv to wi brɔda ɛn sista dɛn?

¹⁰ Jiova lɛk wi brɔda ɛn sista dɛn. Bɔt i nɔ kin izi ɔltɛm fɔ mek wi lɛk dɛn ɛn sho dɛn se wi lɛk dɛn. Dis nɔ kin izi bikɔs wi gɛt difrɛn kɔlchɔ ɛn kɔmɔt difrɛn say dɛn. Ɛn wi ɔl kin mek mistek dɛn we kin mek ɔda pipul dɛn vɛks ɔ we kin mek dɛn nɔ gladi. Bɔt wi ɔl go ebul fɔ tray tranga wan fɔ mek lɔv kɔntinyu fɔ de na di kɔngrigeshɔn. Aw? Na bay we wi de falamakata wi Papa fɔ sho lɔv to wi brɔda ɛn sista dɛn. (Ɛfi. 5:​1, 2; 1 Jɔn 4:​19) Lɛ wi si wetin wi go lan frɔm Jiova in ɛgzampul.

11. Aw Jizɔs bin falamakata di we aw Jiova de sho se i “rili gɛt sɔri-at”?

¹¹ Jiova de sho se i “rili gɛt sɔri-at.” (Lyuk 1:​78) Pɔsin we gɛt sɔri-at nɔ kin fil fayn we i si ɔda pipul dɛn de sɔfa, ɛn i kin luk fɔ we dɛn we i go ɛp ɛn ɛnkɔrej dɛn. Jizɔs bin falamakata di we aw Jiova de sho sɔri-at fɔ pipul dɛn bay di we aw i bin de trit dɛn. (Jɔn 5:​19) We Jizɔs bin de si bɔku bɔku pipul dɛn, i bin de “sɔri fɔ dɛn bikɔs pipul dɛn bin de trit dɛn bad ɛn dɛn nɔ bin bisin bɔt dɛn lɛk ship dɛn we nɔ gɛt shɛpad.” (Mat. 9:​36) Jizɔs nɔ bin jɔs sɔri fɔ dɛn, bɔt i bin du sɔntin fɔ ɛp dɛn. I bin de mɛn di wan dɛn we sik ɛn ɛp di wan dɛn we dɔn “taya ɛn we gɛt ebi lod.”—Mat. 11:​28-30; 14:​14.

12. Gi wan ɛgzampul bɔt aw wi go sho se wi gɛt sɔri-at.

¹² We wi tink bɔt di prɔblɛm dɛn we wi brɔda ɛn sista dɛn gɛt, dat go ɛp wi fɔ sho sɔri-at to dɛn. Fɔ ɛgzampul, i go bi se wan sista gɛt siriɔs wɛlbɔdi prɔblɛm, ɛn i nɔ wande tɔk bɔt am. Bɔt i go rili gladi if pɔsin ɛp am. Sɔntɛm i go bi se i nɔ ebul fɔ gi in famili di tin dɛn we dɛn nid. Wi go ebul ɛp am bay we wi go kuk fɔ am ɔ ɛp am fɔ klin in os? Ɔ i go bi se wan brɔda lɔs in wok. Wi kin gi am smɔl mɔni as gift fɔ ɛp am te i gɛt ɔda wok, ɛn sɔntɛm wi nɔ go ivin tɛl am se na frɔm wi.

13-14. Aw wi go falamakata Jiova fɔ gɛt fri-an?

¹³ Jiova gɛt fri-an. (Mat. 5:​45) Wi nɔ fɔ wet te wi brɔda ɛn sista dɛn aks wi fɔ ɛp bifo wi sho sɔri-at. Lɛk Jiova, wi kin du tin dɛn fɔ dɛn bifo dɛn aks wi. I de mek di san de kɔmɔt ɛvride, ɛn wi nɔ de aks am fɔ am. Ɛn ɔlman de bɛnifit frɔm di san, nɔto di wan dɛn nɔmɔ we gɛt tɛnki. We Jiova de gi wi di tin dɛn we wi nid, i de sho se i lɛk wi. Wi rili lɛk Jiova bikɔs in na Gɔd we gud ɛn we gɛt fri-an.

¹⁴ Wi brɔda ɛn sista dɛn de falamakata Jiova, ɛn dɛn de sho se dɛn gɛt fri-an. Fɔ ɛgzampul, insay 2013, big big briz ɛn wata bin pwɛl bɔku tin dɛn na Filipins. Bɔku brɔda ɛn sista dɛn bin lɔs dɛn os ɛn prɔpati dɛn. Bɔt dɛn spirichwal famili we de ɔlsay na di wɔl bin ɛp dɛn kwik kwik wan. Bɔku brɔda ɛn sista dɛn bin gi mɔni ɔ ɛp fɔ mek ɔ bil bak lɛk 750 os dɛn, ɛn i nɔ rich wan ia we dɛn dɔn fɔ du am. Insay di COVID-19 pandɛmik, Jiova Witnɛs dɛn bin wok tranga wan fɔ ɛp dɛn brɔda ɛn sista dɛn. We wi nɔ westɛm fɔ sɔpɔt wi spirichwal famili, wi de sho se wi lɛk dɛn.

15-16. Akɔdin to Di Sam Dɛm 86:​5, wetin na wan impɔtant we aw wi go falamakata wi Papa we de na ɛvin?

¹⁵ Jiova de fɔgiv. (Rid Di Sam Dɛm 86:​5.) Wi Papa we de na ɛvin de fɔgiv wi ɛvride we wi de sin agens am. (Sam 103:​10-14) Jizɔs in disaypul dɛn nɔ bin pafɛkt; bɔt i bin de fɔgiv dɛn. I bin ivin rɛdi fɔ sakrifays in layf so dat Jiova go fɔgiv wi sin dɛn. (1 Jɔn 2:​1, 2) We Jiova ɛn Jizɔs de fɔgiv wi, dat de mek wi kam nia dɛn.

¹⁶ Wi go kɔntinyu fɔ gɛt lɔv fɔ wi brɔda ɛn sista dɛn we wi “fɔgiv . . . dɛn fɔ fri.” (Ɛfi. 4:​32) Fɔ tru, sɔntɛnde i nɔ kin izi fɔ fɔgiv ɔda pipul dɛn, so wi nid fɔ wok tranga wan fɔ du dat. Wan sista bin si se di Wachtawa atikul we gɛt di taytul “Forgive One Another Freely” bin ɛp am fɔ fɔgiv ɔda pipul dɛn.b I rayt se: “Dis atikul bin ɛp mi fɔ ɔndastand se we a fɔgiv ɔda pipul dɛn, dat de ɛp mi. Di atikul bin ɛksplen se we yu fɔgiv ɔda pipul dɛn, i nɔ min se yu tink se di bad tin we dɛn du bin rayt, ɔ wetin dɛn du nɔ mek yu fil bad. Bɔt we wi fɔgiv dɛn, i min se wi nɔ vɛks pan dɛn igen, ɛn wi go kɔntinyu fɔ gɛt pis.” We wi fɔgiv wi brɔda ɛn sista dɛn fɔ fri, wi de sho se wi lɛk dɛn, ɛn wi de falamakata wi Papa, Jiova.

17. Akɔdin to Matyu 5:​16, aw wi go ɔnɔ wi Papa we de na ɛvin?

¹⁷ Na big big ɔnɔ wi gɛt fɔ gɛt brɔda ɛn sista dɛn we de ɔlsay na di wɔl, we lɛk dɛnsɛf. Wi want bɔku bɔku pipul dɛn fɔ jɔyn wi fɔ wɔship wi Gɔd. So wi nɔ fɔ ɛva du ɛnitin we go mek pipul dɛn tink bad bɔt Jiova ɔ in pipul dɛn. Wi de tray ɔltɛm fɔ biev fayn so dat pipul dɛn go want fɔ lan bɔt Jiova ɛn sav am.—Rid Matyu 5:​16.

18. Wetin go ɛp wi fɔ gɛt maynd fɔ prich?

¹⁸ Sɔntɛnde, sɔm pipul dɛn kin provok wi ɔ ivin mek wi sɔfa fɔ we wi de obe wi Papa we de na ɛvin. Wetin wi go du if wi de fred we wi de tɔk to ɔda pipul dɛn bɔt wetin wi biliv? Wi shɔ se Jiova ɛn in Pikin go ɛp wi. Jizɔs bin tɛl in disaypul dɛn se dɛn nɔ fɔ wɔri bɔt aw fɔ tɔk ɔ wetin fɔ se. Wetin mek? Jizɔs bin ɛksplen se, “Gɔd go tɛl una wetin fɔ tɔk da tɛm de. Nɔto una nɔmɔ go tɔk, bɔt na una Papa in spirit go ɛp una fɔ tɔk.”—Mat. 10:​19, 20.

19. Gi wan ɛgzampul bɔt pɔsin we bin gɛt maynd fɔ prich.

¹⁹ Lɛ wi tɔk bɔt Rɔbɔt in ɛgzampul. Trade we in na bin nyu Baybul studɛnt ɛn we i nɔ bin dɔn no bɔku tin bɔt di Baybul yet, i bin gɛt fɔ go na kɔt ɛn ɛksplen to di jɔj wetin mek i nɔ go jɔyn di ami na Sawt Afrika. I bin gɛt maynd fɔ ɛksplen se i nɔ want fɔ put an pan wɔ bikɔs i lɛk in Kristian brɔda dɛn. I rili gladi fɔ de na Jiova in famili. Wantɛm wantɛm wan jɔj aks am se: “Udat na yu brɔda dɛn?” Rɔbɔt nɔ bin de ɛkspɛkt da kwɛstyɔn de, bɔt i mɛmba di deli tɛks fɔ da de de. Na bin Matyu 12:​50, we se: “Ɛnibɔdi we de du wetin mi Papa we de na ɛvin want, na in na mi brɔda, mi sista, ɛn mi mama.” Pan ɔl we Rɔbɔt na bin nyu Baybul studɛnt, Jiova in spirit bin ɛp am fɔ ansa da kwɛstyɔn de ɛn bɔku ɔda wan dɛn we i nɔ bin de ɛkspɛkt. Jiova go dɔn rili gladi fɔ wetin Rɔbɔt du. Ɛn Jiova gladi bak fɔ si se wi de abop pan am fɔ gi wi maynd fɔ tɔk bɔt am di tɛm we tin nɔ izi.

20. Wetin wi fɔ mekɔp wi maynd fɔ du? (Jɔn 17:​11, 15)

²⁰ Wi rili gladi fɔ de na dis famili we gɛt lɔv. Wi gɛt di bɛst Papa we wi go ɛva gɛt, ɛn bɔku brɔda ɛn sista dɛn we lɛk wi. Wi fɔ sho tɛnki fɔ dat ɔltɛm. Setan ɛn di wikɛd wan dɛn we de biɛn am de tray fɔ mek wi dawt if wi Papa we de na ɛvin lɛk wi, ɛn dɛn de tray fɔ mek wi nɔ kɔntinyu fɔ gɛt wanwɔd. Bɔt Jizɔs bin pre fɔ wi ɛn aks in Papa fɔ protɛkt wi so dat wi famili go kɔntinyu fɔ gɛt wanwɔd. (Rid Jɔn 17:​11, 15.) Jiova de ansa da prea de. Lɛk Jizɔs, lɛ wi nɔ ɛva dawt if wi Papa we de na ɛvin lɛk wi ɛn go ɛp wi. Lɛ wi mekɔp wi maynd se wi go kɔntinyu fɔ kam nia Jiova ɛn wi brɔda ɛn sista dɛn.