Sam

37 Nɔ vɛks bikɔs ɔf di wikɛd wan dɛn

Ɔ nɔ milɛ di wan dɛn we de du bad.

 2 Dɛn go wida kwik kwik wan lɛk gras,

Ɛn dɛn go dray lɛk grin nyu gras.

 3 Abop pan Jiova ɛn du wetin gud;

De na di wɔl* ɛn du tin fetful wan.

 4 Na Jiova de mek yu rili gladi,

Ɛn i go gi yu di tin dɛn we yu rili want.

 5 Lɛf ɔltin na Jiova in an;

Abop pan am, ɛn i go du sɔntin fɔ ɛp yu.

 6 I go mek di du we yu de du wetin rayt shayn lɛk mɔnin layt,

Ɛn yu jɔstis go tan lɛk san we de shayn santɛm.

 7 Sɛt yu mɔt we yu de bifo Jiova

Ɛn peshɛnt wet fɔ am.

Nɔ vɛks bikɔs ɔf di pɔsin

We ebul fɔ du ɔl wetin i dɔn plan.

 8 Lɛf fɔ vɛks ɛn avɔyd wamat;

Nɔ vɛks ɛn bigin fɔ du bad.*

 9 Gɔd go dɔnawe wit di wikɛd wan dɛn,

Bɔt di wan dɛn we abop pan Jiova go de na di wɔl.

10 Na smɔl tɛm nɔmɔ dɔn lɛf, ɛn di wikɛd wan dɛn nɔ go de igen;

Yu go luk fɔ dɛn usay dɛn bin de,

Bɔt dɛn nɔ go de de.

11 Bɔt di wan dɛn we ɔmbul go de na di wɔl,

Ɛn dɛn go gladi bikɔs dɛn gɛt bɔku bɔku pis.

12 Pɔsin we wikɛd de mek plan fɔ pɔsin we de du wetin rayt;

I de gren in tit pan am.

13 Bɔt Jiova go laf am,

Bikɔs i no se in de go kam.

14 Di wikɛd wan dɛn de pul dɛn sɔd dɛn ɛn bɛn dɛn bo dɛn

Fɔ mek di wan dɛn we dɛn de sɔprɛs ɛn di po wan dɛn fɔdɔm,

Fɔ kil di wan dɛn we de du wetin rayt.

15 Bɔt dɛn sɔd go chuk dɛn yon at;

Dɛn bo dɛn go brok.

16 Di smɔl tin we di wan we de du wetin rayt gɛt

Bɛtɛ pas di bɔku bɔku tin dɛn we di wikɛd wan dɛn gɛt.

17 Di wikɛd wan dɛn an go brok,

Bɔt Jiova go sɔpɔt di wan we de du wetin rayt.

18 Jiova no wetin de apin to di wan dɛn we nɔ gɛt wan blem,

Ɛn dɛn prɔpati go de sote go.

19 Dɛn nɔ go shem di tɛm we trɔbul de;

Di tɛm we angri de, dɛn go gɛt bɔku tin fɔ it.

20 Bɔt di wikɛd wan dɛn go day;

Jiova in ɛnimi dɛn go lɔs

Lɛk land we gɛt fayn fayn gras dɛn we izi fɔ wida;

21 Wikɛd pɔsin de lɛnt, ɛn i nɔ de pe bak;

Di wan we de du wetin rayt gɛt fri-an,* ɛn i de gi.

22 Di wan dɛn we Gɔd blɛs go de na di wɔl,

Bɔt Gɔd go dɔnawe wit di wan dɛn we i swɛ.

23 Jiova de gayd wetin pɔsin de du

We i gladi fɔ wetin di pɔsin de du.

24 Pan ɔl we i go bɔk in fut, i nɔ go fɔdɔm wit in fes na grɔn,

Bikɔs Jiova de ol in an fɔ sɔpɔt am.*

25 A bin yɔŋ bɔt naw a dɔn ol,

Bɔt a nɔ wande si Gɔd lɛf di wan we de du wetin rayt,

Ɛn a nɔ wande si in pikin dɛn de luk fɔ tin fɔ it.

26 I de lɛnt wit sɔri-at ɔltɛm,

Ɛn in pikin dɛn go gɛt blɛsin.

27 Avɔyd wetin bad ɛn du wetin gud,

Ɛn yu go liv sote go.

28 Jiova lɛk fɔ du tin fia wan,

I nɔ de lɛf di wan dɛn we de kɔntinyu fɔ de biɛn am.

I de protɛkt dɛn ɔltɛm;

Bɔt i go dɔnawe wit di wikɛd wan dɛn pikin dɛn.

29 Di wan dɛn we de du wetin rayt go de na di wɔl,

Ɛn dɛn go liv de sote go.

30 Di wan we de du wetin rayt de tɔk tin we de gi sɛns,

Ɛn i de tɔk bɔt jɔstis.

31 Gɔd in lɔ de na in at;

I go fala am ɔltɛm.

32 Di wikɛd pɔsin de wach di wan we de du wetin rayt,

I de tray fɔ kil am.

33 Bɔt Jiova nɔ go lɛf am na di wikɛd wan in an

Ɔ se i gilti we I de jɔj am.

34 Abop pan Jiova ɛn fala am pan ɛnitin we yu de du,

Dɔn i go ɔnɔ yu ɛn mek yu de na di wɔl.

35 A dɔn si wikɛd pɔsin we nɔ gɛt sɔri-at

De go bifo lɛk frɛsh stik we de na fayn dɔti.

36 Bɔt i jɔs day nɔmɔ lɛk dat, ɛn i nɔ de igen;

A kɔntinyu fɔ luk fɔ am, ɛn a nɔ ebul si am.

37 Tek notis ɔf di wan we nɔ gɛt wan blem,*

Ɛn kɔntinyu fɔ wach di wan we de du wetin rayt,

Bikɔs in tumara bambay go pisful.

38 Bɔt dɛn go dɔnawe wit ɔl di wan dɛn we de sin;

Dɛn go kil di wikɛd pipul dɛn.

39 Na Jiova de sev di wan dɛn we de du wetin rayt;

Na in na dɛn sef ples di tɛm we dɛn gɛt trɔbul.

I go pul dɛn na di wikɛd wan in an ɛn sev dɛn.

Bikɔs na to am dɛn de go fɔ ayd.