Romans

15 Wi we strɔng fɔ ɛp di wan dɛn we nɔ strɔng fɔ bia wit di tin dɛn we de mɔna dɛn, ɛn wi nɔ fɔ de du wetin wi want nɔmɔ. 2 Lɛ wi ɔl du wetin gud to wi neba, so dat wi go ɛp am fɔ tinap tranga wan. 3 Ivin di Krays nɔ bin de du wetin in want, jɔs lɛk aw dɛn rayt se: “Misɛf dɔn gɛt di badnem we pipul dɛn dɔn gi yu.” 4 Ɔl di tin dɛn we dɛn bin dɔn rayt trade na fɔ tich wi, so dat di bia we wi de bia ɛn di kɔrej we di Skripchɔ dɛn de kɔrej wi go mek wi gɛt op. 5 So naw mek Gɔd we de ɛp una fɔ bia ɛn fɔ gɛt kɔrej, mek una tink di sem we aw Krays Jizɔs bin de tink, 6 so dat una go prez wi Masta Jizɔs Krays in Gɔd ɛn Papa togɛda wit wan vɔys.*

7 So una wɛlkɔm una kɔmpin dɛn, jɔs lɛk aw di Krays dɔn wɛlkɔm una, so dat una go prez Gɔd. 8 A de tɛl una se Krays wok fɔ di wan dɛn we sakɔmsayz fɔ sho se Gɔd de tɔk tru, fɔ pruv se di prɔmis dɛn we Gɔd mek to dɛn gret gret granpa dɛn go ol wata, 9 ɛn fɔ mek di neshɔn dɛn prez Gɔd fɔ in sɔri-at. Jɔs lɛk aw dɛn rayt se: “Na dat mek a go tɔk bɔt yu opin wan na di neshɔn dɛn, ɛn a go siŋ fɔ prez yu nem.” 10 Ɛn i tɔk bak se: “Lɛ di ne- shɔn dɛn gladi wit in pipul dɛn.” 11 Dɔn: “Lɛ ɔl di neshɔn dɛn prez Jiova,* ɛn lɛ ɔl di pipul dɛn prez am.” 12 Ɛn Ayzaya bak tɔk se: “Sɔmbɔdi na Jɛsi in famili go kam ɛn rul neshɔn dɛn, ɛn na in neshɔn dɛn go abop pan.” 13 Lɛ di Gɔd we de gi op mek una rili gɛt gladi-at ɛn pis, bikɔs una abop pan am, so dat di oli spirit in pawa go mek una rili gɛt op.

14 Mi brɔda dɛn, a rili biliv se una de du bɔku gud tin dɛn, una no ɔltin, ɛn una ebul fɔ kɔrɛkt* una kɔmpin dɛn. 15 Bɔt a dɔn rayt una plen wan bɔt sɔm tin dɛn, so dat a go mɛmba una bak, bikɔs ɔf Gɔd in spɛshal gudnɛs* we de pan mi 16 fɔ mek a go bi Krays Jizɔs in pɔblik savant to ɔda neshɔn dɛn. A de du oli wok we na fɔ prich di gud nyuz bɔt Gɔd, so dat oli spirit go mek dɛn neshɔn ya oli, ɛn dɛn go bi sakrifays we Gɔd go tek.

17 So as Krays Jizɔs in disaypul, a gɛt rizin fɔ rili gladi fɔ di tin dɛn we gɛt fɔ du wit Gɔd. 18 A nɔ go tɔk bɔt ɛnitin pas wetin Krays dɔn yuz mi fɔ du so dat ɔda neshɔn dɛn go obe bikɔs ɔf wetin a de se ɛn du, 19 bikɔs ɔf di sayn ɛn wɔndaful tin dɛn, ɛn di pawa we Gɔd in spirit gɛt. Dis dɔn mek a dɔn prich di gud nyuz bɔt Krays gud gud wan frɔm Jerusɛlɛm te go Ilirikɔm. 20 So a tray tranga wan nɔ fɔ prich di gud nyuz na say we dɛn dɔn ɔlrɛdi tɔk bɔt Krays in nem, so dat a nɔ go bil na ɔda pɔsin in fawndeshɔn; 21 bɔt jɔs lɛk aw dɛn rayt: “Di wan dɛn we dɛn nɔ tɛl natin bɔt am go si, ɛn di wan dɛn we nɔ yɛri go ɔndastand.”

22 Na dis mek bɔku tɛm we a want fɔ kam to una a nɔ bin ebul fɔ kam. 23 Bɔt naw no say nɔ de na dɛn eria ya we a nɔ prich yet, ɛn fɔ sɔm ia naw, a rili want fɔ kam to una. 24 So we a de go na Spen, a op se a go si una, ɛn una go go lɛf mi smɔl na rod afta a go dɔn ɛnjɔy fɔ spɛn sɔm tɛm wit una. 25 Bɔt naw a de kam travul go na Jerusɛlɛm fɔ go wok fɔ di oli wan dɛn. 26 Di wan dɛn we de na Masidonia ɛn Akeya bin gladi fɔ sheb dɛn tin dɛn wit di oli wan dɛn na Jerusɛlɛm we po. 27 Dɛn bin gladi fɔ du dat, ɛn infakt dɛn bin o dɛn; bikɔs if di neshɔn dɛn dɔn gɛt pan di tin dɛn we Gɔd gi di oli wan dɛn na Jerusɛlɛm, dɛnsɛf fɔ ɛp dɛn wit dɛn prɔpati dɛn. 28 So afta a dɔn dɔn dis ɛn a dɔn gi dɛn dis kɔntribyushɔn,* a go rich to una we a de go na Spen. 29 Pantap dat, a no se we a kam to una, a go kam wit bɔku blɛsin frɔm Krays.

30 Mi brɔda dɛn, a de beg una tru wi Masta Jizɔs Krays ɛn di lɔv we di spirit de mek wi gɛt, fɔ mek una jɔyn mi fɔ pre wit ɔl una at to Gɔd fɔ mi, 31 so dat Gɔd go sev mi frɔm di pipul dɛn na Judia we nɔ biliv di Masta ɛn fɔ mek di wok we a de go du na Jerusɛlɛm bi sɔntin we di oli wan dɛn go gladi fɔ, 32 ɛn dis go mek, if Gɔd want, a go kam to una wit gladi-at ɛn fil fayn wit una. 33 Mek di Gɔd we de gi pis de wit una ɔl. Emɛn.