Ɛfishians

6 Pikin dɛn, una obe una mama ɛn papa dɛn lɛk aw di Masta want, bikɔs dis na tin we rayt na Gɔd in yay. 2 “Yu fɔ ɔnɔ yu mama ɛn papa” na di fɔs lɔ we gɛt di prɔmis we se: 3 “So dat tin go fayn fɔ yu ɛn yu go liv fɔ lɔng tɛm na di wɔl.” 4 Ɛn papa dɛn, una nɔ fɔ de mek una pikin dɛn vɛks, bɔt una kɔntinyu fɔ de kɔrɛkt dɛn ɛn tren dɛn lɛk aw Jiova* se, we una de mɛn dɛn.

5 Slev dɛn, una fɔ obe una mɔtalman masta dɛn, ɛn una fred ɛn rɛspɛkt dɛn wit ɔl una at jɔs lɛk aw una de obe Krays, 6 bɔt una nɔ fɔ jɔs du am we dɛn de wach una, jɔs fɔ pliz mɔtalman, bɔt una fɔ obe bikɔs una na Krays in slev dɛn we de du wetin Gɔd want wit ɔl una layf.* 7 Una bi slev wit ɔl una at lɛk se na fɔ Jiova* una de du am, ɛn nɔto fɔ mɔtalman, 8 bikɔs una no se ɛni gud we ɛnibɔdi du, na Jiova* go pe am, ilɛksɛf in na slev ɔ nɔto slev. 9 Ɛn una we na masta dɛn, una kɔntinyu fɔ trit dɛn di sem we; una nɔ go de trɛtin dɛn, bikɔs una no se dɛn Masta ɛn una yon Masta de na ɛvin, ɛn i nɔ de tek wan pɔsin bɛtɛ pas ɔda pɔsin.

10 Dɔn una kɔntinyu fɔ gɛt pawa frɔm di Masta bikɔs i rili gɛt trɛnk. 11 Una wɛr ɔltin we Gɔd dɔn gi una fɔ fɛt so dat una go ebul fɔ tinap tranga wan agens di Dɛbul in kɔni kɔni trik* dɛn; 12 bikɔs nɔto agens mɔtalman* wi de fɛt, na agens di gɔvmɛnt dɛn, agens di wan dɛn we gɛt pawa, agens di wan dɛn we de rul dis wɔl we dak, agens di dimɔn dɛn we de na di ples dɛn na ɛvin. 13 Na dis mek una fɔ wɛr ɔltin we Gɔd dɔn gi una fɔ fɛt, so dat una go ebul fɔ fɛt we di bad de kam, ɛn we una go dɔn du ɔltin, una go tinap tranga wan.

14 So una tinap tranga wan ɛn tay di bɛlt we min tru rawnd una wes, una wɛr di tin we de protɛkt una chɛst we min wetin rayt, 15 ɛn una wɛr sɔntin na una fut fɔ rɛdi fɔ prich di gud nyuz bɔt pis. 16 Pantap dat, una tek di big shild we min fet, we go mek una ebul fɔ ɔt ɔl di aro* dɛn we gɛt faya we di wikɛd wan de sɛn. 17 Ɛn una tek di ɛlmɛt we go mek una sev, ɛn di spirit in sɔd we na Gɔd in wɔd, 18 as una de kɔntinyu fɔ yuz difrɛn we dɛn fɔ pre ɛn fɔ rili beg Gɔd wit spirit ɔltɛm. Ɛn fɔ mek una go ebul fɔ du dat, una nɔ slip, una go de rili beg Gɔd ɔltɛm fɔ ɔl di oli wan dɛn. 19 Una pre fɔ mi bak mek a no wetin fɔ tɔk we a opin mi mɔt, so dat a go gɛt maynd fɔ prich di oli sikrit bɔt di gud nyuz, 20 bikɔs mi na ambasedɔ we dɛn chen fɔ di gud nyuz. Ɛn una pre mek a gɛt maynd fɔ tɔk bɔt am, lɛk aw a fɔ tɔk.

21 So naw fɔ mek una go no bɔt mi ɛn aw a de du, Tikikɔs, wi brɔda we wi rili lɛk ɛn we na di Masta in fetful savant, go tɛl una ɔltin. 22 Na dis rizin mek a de sɛn am to una, so dat una go no aw wi de, ɛn i go kɔrej una.

23 Lɛ Gɔd di Papa ɛn di Masta Jizɔs Krays mek di brɔda dɛn gɛt pis ɛn lɔv wit fet. 24 Mek Gɔd in spɛshal gudnɛs* de pan ɔl di wan dɛn we lɛk wi Masta Jizɔs Krays sote go.