Jɔn

15 “Mi na di tru tru vayn, ɛn mi Papa na di fama. 2 I de pul ɛni branch pan mi we nɔ de bia frut, ɛn i de klin ɔl di branch dɛn we de bia frut, so dat dɛn go bia mɔ frut. 3 Una dɔn ɔlrɛdi klin bikɔs ɔf di wɔd we a dɔn tɛl una. 4 Una kɔntinyu fɔ gɛt wanwɔd wit mi, ɛn a go kɔntinyu fɔ gɛt wanwɔd wit una. Jɔs lɛk aw di branch nɔ go bia frut bay insɛf pas i kɔntinyu fɔ de na di vayn, na so unasɛf nɔ go bia frut pas una kɔntinyu fɔ gɛt wanwɔd wit mi. 5 Mi na di vayn; na una na di branch dɛn. Ɛnibɔdi we kɔntinyu fɔ gɛt wanwɔd wit mi ɛn misɛf kɔntinyu fɔ gɛt wanwɔd wit am go bia bɔku frut. If a nɔ sɔpɔt una, una nɔ go ebul fɔ du natin. 6 If ɛnibɔdi nɔ kɔntinyu fɔ gɛt wanwɔd wit mi, i go tan lɛk branch we dɛn kɔt, ɛn i go dray. Pipul dɛn go gɛda dɛn branch dɛn de, put dɛn na faya, ɛn bɔn dɛn. 7 If una kɔntinyu fɔ gɛt wanwɔd wit mi ɛn di tin dɛn we a de tɔk lɛf na una at, una go gɛt ɛnitin we una aks fɔ. 8 Mi Papa kin gɛt glori we una kɔntinyu fɔ bia bɔku frut ɛn sho se una na mi disaypul dɛn. 9 A dɔn lɛk una jɔs lɛk aw mi Papa lɛk mi; una kɔntinyu fɔ du wetin go mek a lɛk una. 10 If una obe mi lɔ dɛn, a go kɔntinyu fɔ lɛk una, jɔs lɛk aw a dɔn obe di Papa in lɔ dɛn, ɛn i dɔn kɔntinyu fɔ lɛk mi.

11 “A dɔn tɛl una dɛn tin ya, so dat una go gɛt di gladi-at we a gɛt. 12 Dis na di lɔ we a de gi una: Una fɔ lɛk una kɔmpin dɛn jɔs lɛk aw a lɛk una. 13 Nɔbɔdi nɔ gɛt lɔv pas di pɔsin we gi in layf fɔ in padi dɛn. 14 If una du wetin a tɛl una fɔ du, una na mi padi dɛn. 15 A nɔ de kɔl una slev igen, bikɔs slev nɔ no wetin in masta de du. Bɔt a de kɔl una mi padi dɛn, bikɔs a dɔn mek una no ɔl di tin dɛn we a yɛri mi Papa tɔk. 16 Nɔto una chuz mi, na mi chuz una, ɛn a pik una fɔ go ɛn kɔntinyu fɔ bia frut we go las, so dat if una yuz mi nem fɔ aks di Papa fɔ ɛnitin, i go gi una.

17 “A de tɛl una fɔ du dɛn tin ya, so dat una go lɛk una kɔmpin dɛn. 18 If di wɔl et una, una no se i bin dɔn et mi bifo i et una. 19 If una bin tan lɛk di pipul dɛn na di wɔl, dɛn bin fɔ dɔn lɛk una. Bɔt bikɔs una nɔ tan lɛk di pipul dɛn na di wɔl, ɛn a dɔn pik una, na in mek dɛn et una. 20 Una go de mɛmba wetin a bin tɛl una, we a se: Slev nɔ pas in masta. If dɛn bin dɔn mek a sɔfa, dɛn go mek unasɛf sɔfa; if dɛn bin du wetin a tɛl dɛn, dɛn go du wetin unasɛf tɛl dɛn. 21 Bɔt dɛn go du ɔl dɛn tin ya to una bikɔs ɔf mi nem, bikɔs dɛn nɔ no di Wan we sɛn mi. 22 If a nɔ bin kam ɛn tɔk to dɛn, dɛn nɔ bin fɔ gɛt sin. Bɔt naw dɛn nɔ gɛt ɛkskyuz fɔ dɛn sin. 23 Ɛnibɔdi we et mi et mi Papa bak. 24 We a bin de wit dɛn, if a nɔ bin du tin dɛn we nɔbɔdi nɔ du yet, dɛn nɔ bin fɔ gɛt sin; bɔt naw dɛn dɔn si mi ɛn et mi ɛn mi Papa. 25 Bɔt dis apin so dat wetin dɛn bin dɔn rayt na dɛn Lɔ go bi. Dɛn rayt se: ‘Dɛn et mi fɔ natin.’ 26 We di oli spirit we a go sɛn fɔ ɛp una kam, i go tɔk bɔt mi; dat na di spirit we de sho di trut ɛn we de kɔmɔt to di Papa. 27 Ɛn unasɛf fɔ tɔk bɔt mi, bikɔs una dɔn de wit mi frɔm di biginin.