Wetin Mek Wi Fɔ “Kɔntinyu fɔ Bia Bɔku Frut”

1, 2. (a) Wetin Jizɔs bin tɛl in disaypul dɛn di nɛt bifo i day? (Luk di pikchɔ nia dis atikul in taytul.) (b) Wetin mek i impɔtant fɔ lɛ wi de mɛmba di rizin we mek wi de prich? (c) Wetin wi go tɔk bɔt?

DI NƐT bifo Jizɔs day, i bin tɔk wit in apɔsul dɛn fɔ lɔng tɛm. I bin mek dɛn no se i lɛk dɛn pasmak. I bin tɛl dɛn bak di stori bɔt di vayn we wi bin tɔk bɔt insay di fɔs atikul. Jizɔs bin want fɔ ɛnkɔrej in disaypul dɛn fɔ “kɔntinyu fɔ bia bɔku frut,” we min se, dɛn fɔ bia we dɛn de prich di mɛsej bɔt di Kiŋdɔm.—Jɔn 15:​8, NW.

² Bɔt Jizɔs nɔ bin jɔs tɛl in disaypul dɛn wetin dɛn fɔ du, i bin tɛl dɛn bak di rizin we mek dɛn nid fɔ du am. I bin gi dɛn rizin we mek dɛn nid fɔ kɔntinyu fɔ prich. I impɔtant fɔ mek wi de mɛmba wetin mek wi bak nid fɔ kɔntinyu fɔ prich. We wi tink bɔt dis i go mek wi bia we wi de “tɛl ɔlman na [di] wɔl di gud nyuz.” (Matyu 24:​13, 14) Insay dis atikul, wi go tɔk bɔt 4 rizin dɛn insay di Baybul we mek wi fɔ prich. Dɔn bak, wi go tɔk bɔt 4 gift dɛn we Jiova dɔn gi wi fɔ ɛp wi fɔ kɔntinyu fɔ bia frut.

 3. (a) Frɔm wetin de na Jɔn 15:​8, wetin na di rizin we impɔtant pas ɔl we mek wi de prich? (b) Insay Jizɔs in stori, wetin di greps tinap fɔ? Wetin mek dis stori fayn?

³ Di rizin we impɔtant pas ɔl we mek wi de prich na bikɔs wi want fɔ prez Jiova ɛn fɔ mek in nem oli. (Rid Jɔn 15:​1, NW, 8.) We Jizɔs bin pul di stori bɔt di vayn, i bin kɔmpia Jiova to fama we de plant wan frut we dɛn kɔl greps. Jizɔs bin tɔk se in na di vayn ɛn in disaypul dɛn na di branch dɛn. (Jɔn 15:​5, NW) So insay di stori, di greps dɛn tinap fɔ di frut we Jizɔs in disaypul dɛn de bia, ɔ di prichin wok we dɛn de du. Jizɔs bin tɛl in apɔsul dɛn se: “Mi Papa de gɛt di prez, if una kɔntinyu fɔ bia bɔku frut ɛn sho se una na mi disaypul dɛn.” We vayn de bia gud greps, i de briŋ prez to di fama. Semweso, we wi de du wi bɛst fɔ prich di mɛsej bɔt di Kiŋdɔm, wi de briŋ ɔnɔ, ɔ prez to Jiova.—Matyu 25:​20-23.

 4. (a) Aw wi de mek Gɔd in nem oli? (b) Aw yu fil bɔt di chans we yu gɛt fɔ mek Gɔd in nem oli?

⁴ Gɔd in nem oli. Natin nɔ de we wi go du we go mek in nem oli mɔ ɛn mɔ. So aw wi go mek Gɔd in nem oli we wi de prich? Notis wetin di prɔfɛt Ayzaya bin tɔk we i se: “Na PAPA GƆD [“Jiova,” NW] Ɔlmayti una fɔ si se oli.” (Ayzaya 8:​13) Wi de mek Gɔd in nem, Jiova, oli we wi si am as di nem we impɔtant pas ɔl ɛn we wi ɛp ɔda pipul dɛn fɔ ɔndastand se di nem oli. (Matyu 6:​9, NW) Fɔ ɛgzampul, we wi de tich pipul dɛn di trut bɔt Jiova in fayn fayn kwaliti dɛn ɛn we i want mɔtalman fɔ de sote go na Paradays, wi de ɛp dɛn fɔ si se ɔl di bad tin dɛn we Setan dɔn tɔk bɔt Jiova na lay. (Jɛnɛsis 3:​1-5) Dɔn bak, wi de mek Gɔd in nem oli we wi ɛp pipul dɛn fɔ no se Jiova fit “fɔ gɛt di prez, di ɔnɔ ɛn di pawa.” (Rɛvɛleshɔn 4:​11, NW) Run, we dɔn de payɔnia fɔ 16 ia, bin tɔk se: “A gladi we a gɛt di chans fɔ prich bɔt di pɔsin we Mek di wan ol wɔl. I de mek a want fɔ kɔntinyu fɔ prich mɔ ɛn mɔ.”

 5. (a) Us rizin wi gɛt fɔ prich we de na Jɔn 15:​9, 10? (b) Aw Jizɔs bin ɛp in disaypul dɛn fɔ ɔndastand se dɛn go nid fɔ bia?

⁵ Rid Jɔn 15:​9, 10. Di sɛkɔn rizin we mek wi fɔ prich di mɛsej bɔt di Kiŋdɔm na bikɔs wi lɛk Jiova ɛn Jizɔs. (Mak 12:​30, NW; Jɔn 14:​15) Jizɔs bin tɛl in disaypul dɛn se dɛn fɔ kɔntinyu fɔ lɛk am ɔltɛm. Wetin mek Jizɔs bin tɔk dis? Na bikɔs i bin no se fɔ mek in disaypul dɛn liv lɛk tru Kristian, dɛn go nid fɔ bia. Infakt, insay Jɔn 15:​4-10, wi si se Jizɔs bin yuz di wɔd “ɔltɛm” bɔku tɛm fɔ ɛp in disaypul dɛn fɔ ɔndastand se dɛn nid fɔ bia.

 6. Aw wi go sho se wi want lɛ Krays kɔntinyu fɔ lɛk wi?

⁶ Aw wi go sho se wi want fɔ mek Krays kɔntinyu fɔ lɛk wi ɛn gladi fɔ wi? Na bay we wi de obe am. Jizɔs bin jɔs de tɛl wi fɔ du wetin insɛf bin du. I bin tɔk se: “Misɛf du wetin mi Papa tɛl mi fɔ du so a stil de ɛnjɔy di gud we i de du fɔ mi bikɔs i lɛk mi.” Jizɔs bin sɛt di ɛgzampul fɔ wi.—Jɔn 13:​15.

 7. Aw fɔ obe gɛt sɔntin fɔ du wit lɔv?

⁷ Jizɔs bin mek wi no klia wan se fɔ obe gɛt sɔntin fɔ du wit di lɛk we wi lɛk am we i se: “Ɛnibɔdi we du wetin a tɛl am fɔ du, na pɔsin we lɛk mi bad.” (Jɔn 14:​21) Di tin dɛn we Jizɔs tɛl wi fɔ du kɔmɔt frɔm in Papa, so we wi obe Jizɔs in lɔ we i bin gi wi fɔ prich, wi de sho bak se wi lɛk Jiova. (Matyu 17:​5; Jɔn 8:​28) Ɛn we wi sho Jiova ɛn Jizɔs se wi lɛk dɛn, dat de mek dɛn kɔntinyu fɔ lɛk wi.

8, 9. (a) Wetin na wan ɔda rizin we mek wi de prich? (b) Aw wetin Jiova tɔk na Izikɛl 3:​18, 19 ɛn 18:​23 go ɛp wi fɔ kɔntinyu fɔ prich?

⁸ Di tɔd rizin we mek wi de prich na bikɔs wi want fɔ wɔn pipul dɛn bɔt Jiova in de we gɛt fɔ kam. Di Baybul tɔk se Noa “bin de tɛl pipul fɔ du wetin rayt.” (Rid Pita In Sɛkɛn Lɛta 2:​5.) Bifo di Ebi Ebi Ren bin kam, i go mɔs bi se di mɛsej we Noa bin de tɛl di pipul dɛn bin gɛt sɔntin fɔ du wit di wɔl in dɔn wan. Wetin mek wi se so? Na bikɔs Jizɔs bin tɔk se: “Bifo wata bin kɔba di wɔl, ɔlman bin de it ɛn drink; pipul bin de mared. Na dat dɛn bin de pan sote di tɛm we Noa go insay di big bot we i bil, ɛn dɛn nɔ bin no se ren go kam we go mek wata kɔba ɔl di wɔl, pas we di ren kam ɛn wata kam kɔba ɛn kil dɛn ɔl. Na so i go bi we Mɔtalman Pikin go kam.” (Matyu 24:​38, 39) Pan ɔl we bɔku pipul dɛn nɔ bin de lisin to Noa, i bin kɔntinyu fɔ prich di wɔnin mɛsej we Jiova bin gi am fetful wan.

⁹ Tide, wi de prich di mɛsej bɔt di Kiŋdɔm fɔ gi pipul dɛn di chans fɔ lan bɔt wetin Gɔd go du fɔ mɔtalman dɛn tumara bambay. Jɔs lɛk Jiova, wi rili want lɛ pipul dɛn pe atɛnshɔn to di mɛsej ɛn kɔntinyu fɔ de sote go. (Izikɛl 18:​23) We wi de prich frɔm os to os ɛn na say usay pipul dɛn bɔku, wi de wɔn bɔku pipul dɛn fɔ se Gɔd in Kiŋdɔm de kam ɛn i go dɔnawe wit dis wikɛd wɔl.—Izikɛl 3:​18, 19; Daniɛl 2:​44; Rɛvɛleshɔn 14:​6, 7.

10. (a) Us rizin wi gɛt fɔ prich we Matyu 22:​39 tɔk bɔt? (b) Aw Pɔl ɛn Saylas bin ɛp wan man we bin de gayd di jelman dɛn na Filipay?

¹⁰ Di nɔmba 4 rizin we mek wi de kɔntinyu fɔ prich na bikɔs wi lɛk pipul dɛn. (Matyu 22:​39) Dis lɛk we wi lɛk pipul dɛn de ɛp wi fɔ kɔntinyu fɔ prich bikɔs wi no se dɛn pipul dɛn ya go chenj di we aw dɛn de biev we sɔntin apin to dɛn. Fɔ ɛgzampul, di wan dɛn we nɔ lɛk di prichin wok bin put Pɔl ɛn Saylas na jel insay di siti we nem Filipay. Bɔt midulnɛt, atkwek bin apin we shek di jel ɛn mek di domɔt dɛn bin opin. Di man we bin de gayd di jelman dɛn bin fred bad bad wan bikɔs i bin tink se di jelman dɛn dɔn rɔnawe, so i bin want fɔ kil insɛf. Bɔt Pɔl bin stɔp am ɛn ala se: “Nɔ kil yusɛf.” Di man we bin de gayd di jelman dɛn bin aks se: “Wetin a fɔ du fɔ mek a go sev?” Pɔl ɛn Saylas bin tɛl am se: “Biliv pan di Masta, Jizɔs, ɛn yu ɛn ɔl di pipul dɛn na yu os go sev.”—Di Apɔsul Dɛn Wok [Akt] 16:​25-34.

11, 12. (a) Us lɛsin wi lan bɔt wi prichin wok frɔm di tin we apin to di man we bin de gayd di jelman dɛn? (b) Wetin mek wi want fɔ kɔntinyu fɔ prich?

¹¹ Wetin wi lan bɔt di prichin wok frɔm di tin we bin apin to di man we bin de gayd di jelman dɛn? Wi notis se na afta we di atkwek apin na in dis man chenj ɛn aks fɔ mek dɛn ɛp am. Semweso, sɔm pipul dɛn we nɔ want fɔ lisin to di mɛsej we de insay di Baybul kin chenj di we aw dɛn de biev ɛn luk fɔ ɛp we bad bad tin apin to dɛn. Fɔ ɛgzampul, sɔm kin rili shɔk bikɔs dɛn lɔs dɛn wok ɔ dɛn dɔn dayvɔs. Ɔda wan dɛn at kin pwɛl bikɔs dɛn kam fɔ no se dɛn dɔn gɛt bad bad sik ɔ bikɔs pɔsin we dɛn lɛk dɔn day. We dɛn kayn tin dɛn ya kin apin, pipul dɛn kin bigin fɔ aks kwɛstyɔn dɛn bɔt layf, kwɛstyɔn dɛn we dɛn nɔ bin ɛva tink bɔt trade. Dɛn kin ivin wɔnda, ‘Wetin a fɔ du fɔ mek a go sev?’ Dɛn kin want fɔ lisin to wi mɛsej we de gi dɛn op fɔ di fɔstɛm na dɛn layf.

¹² So if wi kɔntinyu fɔ prich fetful wan, wi go de ɔltɛm fɔ ɛp pipul dɛn di tɛm we dɛn go rɛdi fɔ lisin to di mɛsej we wi de prich we go gi dɛn kɔrej. (Ayzaya 61:​1) Shalɔt, we dɔn de payɔnia fɔ 38 ia bin tɔk se: “Pipul dɛn tide nɔ no wetin fɔ du. Dɛn nid fɔ gɛt di chans fɔ yɛri di gud nyuz.” Ɛjvɔ, we insɛf dɔn de payɔnia fɔ 34 ia bin tɔk se: “Tide, bɔku pipul dɛn at pwɛl pas aw dɛn bin de. So a rili want fɔ ɛp dɛn. Na dat de mek a de prich.” Fɔ tru, di lɛk we wi lɛk pipul dɛn na wan men rizin we mek wi de kɔntinyu fɔ prich!

13, 14. (a) Us gift Jɔn 15:​11 tɔk bɔt? (b) Aw wi go gɛt di gladi at we Jizɔs bin gɛt? (c) Aw gladi at de ɛp wi pan wi prichin wok?

¹³ Di nɛt bifo Jizɔs day, i bin tɔk bɔt gift dɛn we go ɛp in apɔsul dɛn fɔ kɔntinyu fɔ bia frut. Wetin na dɛn gift dɛn de ɛn aw dɛn go ɛp wi tide?

¹⁴ Wi de gɛt gladi at. Yu tink se fɔ prich na big big wok? Nɔ, nɔto so i bi. Afta we Jizɔs bin pul di stori bɔt di vayn, i bin tɔk se wi go gɛt di kayn gladi at we in gɛt we wi de prich. (Rid Jɔn 15:​11.) Aw dat pɔsibul? Mɛmba se, insay Jizɔs in stori we i bin pul, i kɔmpia insɛf to vayn ɛn i kɔmpia in disaypul dɛn to branch dɛn. Di branch dɛn go gɛt wata ɛn tin dɛn we dɛn nid fɔ gro if dɛn kɔntinyu fɔ de pan di vayn. Semweso, wisɛf go gɛt gladi at lɛk Jizɔs if wi gɛt wanwɔd wit am ɛn falamakata wetin i bin de du. Da tɛm de wi go gɛt di gladi at we i gɛt, dat na di gladi at we pɔsin kin gɛt we i du wetin Gɔd want. (Jɔn 4:​34; 17:​13; Pita In Fɔs Lɛta 2:​21) An, we dɔn payɔnia naw pas 40 ia bin tɔk se, “Di kayn gladi at we a kin gɛt we a kɔmɔt fil savis kin ɛp mi fɔ kɔntinyu fɔ du Jiova in wok.” Gladi at kin gi wi di trɛnk we wi nid fɔ kɔntinyu fɔ prich ilɛksɛf bɔku pipul dɛn nɔ de lisin.—Matyu 5:​10-12.

15. (a) Us gift Jɔn 14:​27 tɔk bɔt? (b) Aw kol at de ɛp wi fɔ kɔntinyu fɔ bia frut?

¹⁵ Wi de gɛt kol at. (Rid Jɔn 14:​27.) Di ivintɛm bifo Jizɔs day, i bin tɛl in apɔsul dɛn se: “A de gi una mi yon kol at.” Aw di kol at we Jizɔs gɛt go ɛp wi fɔ kɔntinyu fɔ prich? We wi kɔntinyu fɔ prich, wi de gɛt kol at bikɔs wi no se di wok we wi de du de mek Jiova ɛn Jizɔs gladi. (Sam 149:​4; Lɛta Fɔ Rom 5:​3, 4; Lɛta Fɔ Kɔlɔse 3:​15) Yuɛlɛf, we dɔn de payɔnia fɔ 45 ia naw bin tɔk se, “Di prichin wok kin mek a taya, bɔt i de mek a satisfay ɛn mi layf dɔn gɛt rial minin.” Wi rili gladi we wi dɔn gɛt kol at!

16. (a) Us gift Jɔn 15:​15 tɔk bɔt? (b) Wetin go ɛp di apɔsul dɛn fɔ kɔntinyu fɔ bi Jizɔs in padi?

¹⁶ Wi de gɛt padi dɛn. Afta we Jizɔs bin tɛl in apɔsul dɛn se i want dɛn fɔ gɛt gladi at, i bin ɛksplen to dɛn wetin mek i impɔtant fɔ mek dɛn lɛk ɔda pipul dɛn ɛn nɔ jɔs bisin bɔt dɛnsɛf. (Jɔn 15:​11-13) Dɔn i tɔk bak se: “A de kɔl una mi padi dɛn.” Fɔ bi Jizɔs in padi na wɔndaful gift! Bɔt aw di apɔsul dɛn go kɔntinyu fɔ bi Jizɔs in padi dɛn? Jizɔs bin ɛksplen se: “Go ɛn kɔntinyu fɔ bia frut.” (Rid Jɔn 15:​14, 15; 16, NW.) Dat min se, wi fɔ kɔntinyu fɔ prich. Lɛk tu ia bifo dat, Jizɔs bin tɛl in apɔsul dɛn se: “Una go tɛl pipul se, di tɛm we Gɔd go rul dɔn kam klos.” (Matyu 10:​7) Na dat mek di nɛt bifo Jizɔs day, i bin ɛnkɔrej in disaypul dɛn fɔ bia we dɛn de du di prichin wok. (Matyu 24:​13; Mak 3:​14) Jizɔs bin no se fɔ obe dis lɔ nɔ gɛt fɔ izi. Bɔt dɛn go ebul fɔ du am ɛn kɔntinyu fɔ bi in padi. Aw? Wan ɔda gift de we go ɛp dɛn.

17, 18. (a) Us gift Jɔn 15:​7 tɔk bɔt? (b) Aw da gift de bin ɛp Jizɔs in disaypul dɛn? (c) Us gift dɛn de ɛp wi tide?

¹⁷ Gɔd de ansa wi prea dɛn. Jizɔs bin tɔk se: “Una kin aks mi Papa fɔ ɛnitin we una want, ɛn i go gi una.” (Jɔn 15:​7, 16) Dis prɔmis we Jizɔs bin mek go mɔs dɔn ɛp in apɔsul dɛn!a (Luk di futnot.) Di apɔsul dɛn nɔ bin rili ɔndastand se i nɔ go te igen Jizɔs go day. Bɔt i nɔ min se bikɔs i gɛt fɔ day dɛn nɔ go gɛt sɔntin fɔ ɛp dɛn. Jiova bin rɛdi fɔ ansa dɛn prea ɛn ɛp dɛn fɔ du di prichin wok. Ɛn na dat i bin du. Jɔs afta Jizɔs day, di apɔsul dɛn bin beg Jiova fɔ mek i gi dɛn maynd, ɛn Jiova bin ansa dɛn prea dɛn.—Di Apɔsul Dɛn Wok [Akt] 4:​29, 31.

¹⁸ Na di sem tin de apin bak tide. We wi de bia fɔ du di prichin wok, wi go kɔntinyu fɔ bi Jizɔs in padi dɛn. Wi go biliv tranga wan se Jiova go rɛdi fɔ ansa wi prea dɛn fɔ ɛp wi we i nɔ izi fɔ wi fɔ prich. (Lɛta Fɔ Filipay 4:​13) Wi gladi we Jiova de ansa wi prea dɛn ɛn we Jizɔs na wi padi. Dɛn gift dɛn ya frɔm Jiova de ɛp wi fɔ kɔntinyu fɔ bia frut.—Jems 1:​17.

19. (a) Wetin mek wi de kɔntinyu fɔ prich? (b) Wetin go ɛp wi fɔ dɔn di wok we Gɔd dɔn gi wi?

¹⁹ Insay dis atikul, wi dɔn lan bɔt 4 rizin dɛn we mek wi de kɔntinyu fɔ prich. Di 4 rizin dɛn na: Fɔ prez Jiova ɛn mek in nem oli, fɔ sho se wi lɛk Jiova ɛn Jizɔs, fɔ wɔn pipul dɛn, ɛn fɔ sho se wi lɛk pipul dɛn. Wi dɔn lan bak bɔt 4 gift dɛn. Dɛn 4 gift dɛn ya na: gladi at, kol at, padi dɛn, ɛn di ansa to wi prea dɛn. Dɛn gift dɛn ya de ɛp wi fɔ dɔn di wok we Gɔd dɔn gi wi fɔ du. Jiova rili gladi we i de si wi de wok tranga wan fɔ “kɔntinyu fɔ bia bɔku frut”!