Akt

28 We wi rich na di ayland sef wan, wi kam no se dɛn de kɔl di ayland Mɔlta. 2 Di pipul dɛn we bin de de bin de tɔk ɔda langwej, bɔt dɛn rili trit wi fayn. Dɛn wɛlkɔm wi fayn fayn wan, ɛn dɛn layt faya bikɔs ren bin de kam ɛn di ples bin kol. 3 Bɔt we Pɔl gɛda sɔm tik dɛn ɛn put dɛn na di faya, di we aw di faya wam mek wan vaypa* kɔmɔt ɛn fasin na in an. 4 We di pipul dɛn we de tɔk ɔda langwej si di bad bad snek we ɛng na Pɔl in an, dɛn bigin fɔ tɛl dɛn kɔmpin dɛn se: “Fɔ tru, dis man bin dɔn kil pɔsin, pan ɔl we i ebul fɔ kam sef wan na land, Akɛ* nɔ alaw am fɔ kɔntinyu fɔ liv.” 5 Bɔt i shek in an oba di faya ɛn di snek fɔdɔm insay de, bɔt natin nɔ apin to Pɔl. 6 Dɛn bin de tink se i go swɛl ɔ i go jɔs fɔdɔm ɛn day. Bɔt we dɛn wet fɔ lɔng tɛm ɛn si se no bad tin nɔ apin to am, dɛn chenj dɛn maynd ɛn bigin fɔ se in na wan gɔd.

7 Wan man bin de de we bin gɛt sɔm pan di land dɛn na da eria de. In nem na Pɔbliɔs ɛn na in na di impɔtant man na di ayland. Dis man wɛlkɔm wi ɛn tek kia ɔf wi fayn fayn wan fɔ tri dez. 8 I kam apin se Pɔbliɔs in papa bin sik. I bin gɛt fiva ɛn disɛntri. So Pɔl go mit am ɛn pre fɔ am, dɔn i le in an pan am ɛn mɛn am. 9 We dis apin, ɔl di pipul dɛn na di ayland we bin sik bigin fɔ kam to Pɔl ɛn i mɛn dɛn. 10 Dɛn sho wi ɔnɔ bak bay we dɛn gi wi bɔku gift dɛn, ɛn we wi bin de tek ship fɔ go, dɛn put ɔl di tin dɛn we wi go nid na di ship.

11 Afta tri mɔnt, wi go insay wan ship we gɛt “Zus in Bɔypikin Dɛn” imej bifo am. Di ship kɔmɔt na Alɛgzandria, ɛn i bin dɔn de na di ayland insay di kol sizin. 12 We wi rich na di pɔt na Sira-kyus, wi de de fɔ tri dez. 13 Wi kɔmɔt de ɛn go na Rigiɔm. Di ɔda de, wan briz we kɔmɔt na di sawt blo, ɛn wi bin ebul fɔ rich na Pyutiolay di nɛks de. 14 Wi si brɔda dɛn de, ɛn dɛn beg wi fɔ de wit dɛn fɔ sɛvin dez. Afta dat wi kɔntinyu fɔ go na Rom. 15 We di brɔda dɛn we de de yɛri bɔt wi, dɛn kam te rich na di Makit na Apiɔs ɛn wan ples we dɛn de kɔl Tri Strenja Os fɔ kam mit wi. We Pɔl si dɛn, i tɛl Gɔd tɛnki ɛn tek kɔrej. 16 We wi rich na Rom, dɛn alaw Pɔl fɔ de bay insɛf wit di sojaman we de gayd am.

17 Bɔt afta tri dez, i kɔl di impɔtant man dɛn pan di Ju dɛn. We dɛn dɔn gɛda, i tɛl dɛn se: “Man dɛn, mi brɔda dɛn, pan ɔl we a nɔ du ɛnitin bad to di pipul dɛn ɔ du sɔntin we de agens wi gret gret granpa dɛn kɔstɔm, dɛn an mi ova as prizina to di Roman dɛn na Jerusɛlɛm. 18 Ɛn afta dɛn dɔn aks mi kwɛstyɔn dɛn, dɛn bin want fɔ fri mi, bikɔs dɛn nɔ si ɛni rizin we fɔ mek a day. 19 Bɔt we di Ju dɛn nɔ gri, misɛf tɔk se a want mek Siza luk insay mi kes, bɔt a nɔ du dat bikɔs a bin want fɔ sho se mi neshɔn dɔn du bad. 20 So na dis mek a se a want fɔ si una ɛn tɔk to una. Na bikɔs ɔf wetin Izrɛl dɔn de op fɔ, na in mek a gɛt dɛn chen ya pan mi.” 21 Dɛn tɛl am se: “Wi nɔ gɛt ɛni lɛta we kɔmɔt Judia we de tɔk bɔt yu, ɛn ɔl di brɔda dɛn we dɔn kɔmɔt de ɛn kam ya nɔ tɔk ɛnitin bad bɔt yu. 22 Bɔt wi si am se i go fayn fɔ mek wi yɛri wetin yu gɛt fɔ se, bikɔs wi rili no se pipul dɛn ɔlsay de tɔk agens dis grup.”

23 Na de dɛn pik wan de we dɛn go kam mit am, ɛn di wan dɛn we kam to am na di ples we i lɔj bin bɔku pas di wan dɛn we bin kam fɔs. Frɔm mɔnin te ivintɛm, i bin de ɛksplen to dɛn bay we i bin de prich to dɛn gud gud wan bɔt Gɔd in Kiŋdɔm fɔ mek dɛn biliv pan Jizɔs. I yuz Mozis in Lɔ ɛn di Prɔfɛt dɛn fɔ du dat. 24 Sɔm pan dɛn bigin fɔ biliv di tin dɛn we i de tɔk, bɔt ɔda wan dɛn nɔ biliv. 25 So bikɔs dɛn nɔ gɛt wanwɔd, dɛn bigin fɔ go. Dɔn Pɔl tɔk dis wan tin:

“Di oli spirit bin tɔk tru we i tɛl prɔfɛt Ayzaya fɔ tɛl una gret gret granpa dɛn 26 se, ‘Go to dɛn pipul ya ɛn tɔk se: “Una go rili yɛri, bɔt una nɔ go ɔndastand; ɛn una go rili luk, bɔt una nɔ go si. 27 Dɛn pipul ya dɛn at dɔn strɔng, dɛn de yɛri bɔt dɛn nɔ de du wetin dɛn yɛri, ɛn dɛn dɔn lɔk dɛn yay, so dat dɛn nɔ go ɛva si wit dɛn yay ɔ yɛri wit dɛn yes ɛn ɔndastand di minin ɛn alaw am fɔ tɔch dɛn at ɛn tɔn bak to mi fɔ lɛ a mɛn dɛn.”’ 28 So a want mek una no se dɛn dɔn prich dis mɛsej bɔt aw Gɔd go sev pipul dɛn, to pipul dɛn we de na ɔda neshɔn dɛn, ɛn dɛn go mɔs lisin.” 29 *——

30 I kɔntinyu fɔ de de fɔ tu ia na di os we i rɛnt, ɛn i bin de wɛlkɔm ɔl di wan dɛn we bin de kam to am. 31 I bin de prich to dɛn bɔt Gɔd in Kiŋdɔm, ɛn i bin de tich dɛn bɔt Masta Jizɔs Krays. Ɛn i bin de rili fil fri fɔ tɔk to dɛn ɛn natin nɔ bin de stɔp am.