1 Kɔrintians

7 Naw lɛ a tɔk bɔt wetin una bin rayt to mi bɔt, i bɛtɛ lɛ man nɔ tɔch* uman; 2 bɔt bikɔs mami ɛn dadi biznɛs di we aw Gɔd nɔ want dɔn bɔku, lɛ ɛni man gɛt in yon wɛf ɛn ɛni uman gɛt in yon man. 3 Lɛ maredman gi in wɛf wetin i fɔ gi am, ɛn lɛ di wɛf insɛf du di sem tin to in man. 4 Wɛf nɔ gɛt rayt pan in yon bɔdi, na in man gɛt rayt; semweso, maredman nɔ gɛt rayt pan in yon bɔdi, na in wɛf gɛt rayt. 5 Una nɔ gridi unasɛf pas if una ɔl tu gri fɔ stɔp fɔ sɔm tɛm, so dat una go gɛt tɛm fɔ pre ɛn una go kam togɛda bak, fɔ mek Setan nɔ go de tɛmt una bikɔs una nɔ ebul fɔ kɔntrol unasɛf. 6 Dis tin we a de tɔk nɔto lɔ, bɔt a de alaw una fɔ du am. 7 A wish se ɔlman bin tan lɛk mi. Bɔt ɔlman gɛt in yon gift we Gɔd gi am; wan pɔsin kin gɛt wan gift, ɛn ɔda pɔsin kin gɛt ɔda gift.

8 A de tɛl di wan dɛn we nɔ mared ɛn di uman dɛn we dɛn man dɛn dɔn day se i go bɛtɛ fɔ dɛn if dɛn lɛf lɛk aw a de. 9 Bɔt if dɛn nɔ ebul kɔntrol dɛnsɛf, lɛ dɛn mared, bikɔs i bɛtɛ lɛ pɔsin mared pas fɔ mek filin pasmak pan am.

10 Na dis a de tɛl di wan dɛn we dɔn mared, nɔto mi de tɛl dɛn, bɔt na di Masta: Mareduman nɔ fɔ lɛf in man. 11 Bɔt if i lɛf in man, i nɔ fɔ mared ɔ i fɔ mek pis bak wit in man; ɛn maredman nɔ fɔ lɛf in wɛf.

12 Na dis a de tɛl di ɔda wan dɛn, nɔto di Masta de tɛl dɛn, na mi de tɛl dɛn se: If ɛni brɔda gɛt wɛf we nɔ biliv di Masta bɔt di uman gri fɔ de wit am, lɛ di brɔda nɔ lɛf am; 13 ɛn if uman gɛt man we nɔ biliv di Masta bɔt di man gri fɔ de wit am, lɛ i nɔ lɛf in man. 14 Maredman we nɔ biliv di Masta go gɛt bɛnifit bikɔs ɔf in wɛf, ɛn mareduman we nɔ biliv di Masta go gɛt bɛnifit bikɔs ɔf di brɔda; if nɔto dat, una pikin dɛn nɔ go klin, bɔt naw dɛn oli. 15 Bɔt if di wan we nɔ biliv di Masta disayd fɔ go,* lɛ i go; if dat apin, nɔto paopa fɔ lɛ di brɔda ɔ sista kɔntinyu fɔ de wit am, bɔt Gɔd dɔn gi yu kolat. 16 Mareduman, aw yu go no if na yu go sev yu man? Ɔ maredman, aw yu go no if na yu go sev yu wɛf?

17 Bɔt jɔs lɛk aw Jiova* dɔn gi ɔlman in yon pat, lɛ ɔlman waka lɛk aw Gɔd dɔn kɔl am. Ɛn na dis a de tɛl ɔl di kɔngrigeshɔn dɛn. 18 Ɛni man de we bin dɔn ɔlrɛdi sakɔmsayz we Gɔd kɔl am? Lɛ i jɔs lɛf so. Ɛni man de we nɔ bin sakɔmsayz we Gɔd kɔl am? Lɛ i nɔ sakɔmsayz. 19 We pɔsin sakɔmsayz, i nɔ min natin ɛn we pɔsin nɔ sakɔmsayz, insɛf nɔ min natin; wetin min sɔntin na we pɔsin de du wetin Gɔd in lɔ dɛn se. 20 Ilɛk aw pɔsin bin de we Gɔd kɔl am, lɛ i lɛf da we de. 21 Yu na bin slev we Gɔd kɔl yu? Lɛ dat nɔ wɔri yu; bɔt if yu gɛt chans fɔ fri, yuz da chans de. 22 If Gɔd kɔl ɛnibɔdi fɔ du di Masta in wok we in na bin slev, i dɔn fri ɛn in na di Masta in yon; semweso ɛnibɔdi we Gɔd kɔl we in na bin pɔsin we fri na Krays in slev. 23 Gɔd gi sɔntin we gɛt valyu* fɔ bay una; una lɛf fɔ bi mɔtalman dɛn slev. 24 Mi brɔda dɛn, ilɛk aw pɔsin bin de we Gɔd kɔl am, lɛ i lɛf da we de bifo Gɔd.

25 Naw a de tɔk bɔt di vajin dɛn,* bɔt di Masta nɔ gi mi ɛni lɔ, a jɔs de tɔk wetin a tink lɛk pɔsin we di Masta sɔri fɔ so dat a go fetful. 26 So a tink se i go bɛtɛ fɔ mek man kɔntinyu lɛk aw i de bikɔs ɔf di prɔblɛm we de apin naw. 27 Yu gɛt wɛf? Stɔp fɔ fɛn we fɔ lɛf am. Yu nɔ gɛt wɛf? Stɔp fɔ fɛn wɛf. 28 Bɔt ivin if yu mared, nɔto sin. Ɛn if vajin mared, nɔto sin. Bɔt di wan dɛn we mared go gɛt prɔblɛm dɛn.* Bɔt a de tray fɔ mek una nɔ gɛt dɛn prɔblɛm dɛn de.

29 Pantap dat, mi brɔda dɛn, a de tɛl una se di tɛm we lɛf dɔn ridyus. Frɔm naw, lɛ di wan dɛn we gɛt wɛf tan lɛk se dɛn nɔ gɛt, 30 ɛn mek di wan dɛn we de kray tan lɛk di wan dɛn we nɔ de kray, ɛn mek di wan dɛn we gladi tan lɛk di wan dɛn we nɔ gladi, ɛn mek di wan dɛn we de bay tan lɛk di wan dɛn we nɔ gɛt, 31 ɛn mek di wan dɛn we de yuz di wɔl tan lɛk di wan dɛn we nɔ de yuz am bɛtɛ; bikɔs di wɔl we wi de si naw de chenj. 32 Fɔ tru, a nɔ want mek una de wɔri. Man we nɔ mared de wɔri bɔt tin dɛn we gɛt fɔ du wit di Masta, i de wɔri bɔt aw i go mek di Masta gladi fɔ am. 33 Bɔt di man we mared de wɔri bɔt di tin dɛn na di wɔl, i de wɔri bɔt aw i go mek in wɛf gladi fɔ am, 34 ɛn in atɛnshɔn nɔ de wansay. Pantap dat, di uman we nɔ mared ɛn di vajin de wɔri bɔt tin dɛn we gɛt fɔ du wit di Masta, so dat in bɔdi ɛn in spirit go oli. Bɔt di uman we mared de wɔri bɔt di tin dɛn na di wɔl, i de wɔri bɔt aw i go mek in man gladi fɔ am. 35 A de se dis fɔ una yon bɛnifit, nɔto fɔ tayt una, bɔt na fɔ mek una du wetin fayn ɛn fɔ mek una sav di Masta wit ɔl una at ɔltɛm ɛn nɔ alaw ɛnitin fɔ tek una atɛnshɔn.

36 Bɔt if ɛnibɔdi tink se i nɔ de biev fayn we i nɔ mared, ɛn if i nɔ tu yɔŋ, lɛ i du dis: Lɛ i du wetin i want; nɔto sin. Lɛ dɛn mared. 37 Bɔt if ɛnibɔdi dɔn mekɔp in maynd ɛn i si se no nid nɔ de fɔ mared, ɛn i ebul kɔntrol insɛf ɛn i dɔn disayd na in at nɔ fɔ mared,* i go du wɛl. 38 Semweso, ɛnibɔdi we mared go bɛnifit, bɔt ɛnibɔdi we nɔ mared go bɛnifit mɔ.

39 Wɛf fɔ de wit in man wans in man de alayv. Bɔt if in man day, i fri fɔ mared to ɛnibɔdi we i want, bɔt na pɔsin nɔmɔ we biliv di Masta i fɔ mared to. 40 Bɔt a tink se i go gladi mɔ if i lɛf lɛk aw i de; ɛn a rili tink se misɛf gɛt Gɔd in spirit.