Wetin Kristian dɛn We Mared Go Du fɔ Mek Dɛn Mared-Os Go Bifo?

 1. Pan ɔl we mared de bigin wit gladi at, wetin di Baybul se go apin to di wan dɛn we dɔn mared? (Luk di pikchɔ nia dis atikul in taytul.)

WE ƆKƆ kin si in fayn fayn yawo di de we dɛn de mared, dɛn ɔl tu kin rili gladi. We dɛn bin de wach dɛnsɛf fɔ mared, dɛn bin so lɛk dɛnsɛf dat dɛn bin want fɔ mared ɛn so dɛn prɔmis fɔ fetful to dɛnsɛf. Afta dɛn dɔn mared, dɛn go nid fɔ chenj di we aw dɛn bin de liv fɔ mek dɛn kɔntinyu fɔ gɛt wanwɔd. Na Jiova mek mared ɛn i want maredman ɛn mareduman fɔ gɛt gladi at. Fɔ mek dɛn mared-os go bifo, i gi fayn advays na in Wɔd, di Baybul. (Prɔvabs 18:​22) Pan ɔl dat di Baybul tɛl wi se di wan dɛn we de mared go gɛt prɔblɛm ɔ “trɔbul” na dɛn mared-os bikɔs dɛn nɔ pafɛkt. (Fɔs Lɛta Fɔ Kɔrint 7:​28) Wetin go mek maredman ɛn mareduman nɔ gɛt bɛtɛ prɔblɛm dɛn? Aw Kristian dɛn go mek dɛn mared-os go bifo?

 2. Uskayn lɔv maredman ɛn mareduman nid fɔ sho dɛnsɛf?

² Di Baybul tich wi se lɔv na wan impɔtant kwaliti. Bɔt difrɛn kayn lɔv dɛn de we maredman ɛn mareduman nid fɔ sho na dɛn mared-os. Fɔ ɛgzampul, dɛn nid fɔ sho se dɛn rili kia fɔ dɛnsɛf ɛn dɛn fɔ rili lɛk dɛnsɛf. If dɛn gɛt pikin dɛn, lɔv fɔ bi wan impɔtant tin insay di famili. Bɔt na di kayn lɔv we pɔsin go gɛt bikɔs i de fala di advays dɛn we de na di Baybul na in go ɛp fɔ mek di mared-os go bifo. Di apɔsul Pɔl bin tɔk bɔt dis kayn lɔv we i se: “Ɛvri man we mared fɔ lɛk in wɛf lɛkɛ aw i lɛk insɛf, ɛn ɔl mared uman fɔ rɛspɛkt in man.”—Lɛta Fɔ Ɛfisɔs 5:​33.

 3. Wɛtin di lɛk we maredman ɛn mareduman lɛk dɛnsɛf fɔ mek dɛn du?

³ Pɔl bin rayt se: “Una dɛn maredman dɛn, una kɔntinyu fɔ lɛk una wɛf dɛn jɔs lɛk aw Krays lɛk di kɔngrigeshɔn ɛn gi in layf fɔ am.” (Lɛta Fɔ Ɛfisɔs 5:​25, NW) Kristian dɛn tide de falamakata Jizɔs in ɛgzampul bay we dɛn de lɛk dɛnsɛf jɔs lɛk aw Jizɔs bin lɛk in disaypul dɛn. (Rid Jɔn 13:​34, 35; 15:​12, 13.) Maredman ɛn mareduman we na Kristian dɛn fɔ rili lɛk dɛnsɛf di kayn we we go mek dɛn ivin rɛdi fɔ day fɔ dɛnsɛf. Bɔt we siriɔs prɔblɛm de na mared-os, sɔm pipul dɛn kin fil se dɛn nɔ lɛk dɛnsɛf bɛtɛ igen. Wetin go ɛp dɛn? Na di advays we di Baybul gi bɔt lɔv we go mek “una go ebul bia ɔltin we pipul du una; una go biliv gud tin bɔt pipul ɔltɛm; una go de abop ɔltɛm se bɛtɛ go fala dɛn; ɛn una nɔ go tap fɔ lɛk una kɔmpin mɔtalman wɛn tin tranga.” Da kayn lɔv de “go de sote go.” (Fɔs Lɛta Fɔ Kɔrint 13:​7, 8) Maredman ɛn in wɛf fɔ mɛmba se dɛn dɔn mek vaw. Dɛn prɔmis fɔ lɛk dɛnsɛf ɛn fɔ fetful to dɛnsɛf. We dɛn de mɛmba dis, dat go ɛp Kristian dɛn we dɔn mared fɔ luk to Jiova fɔ ɛp dɛn ɛn wok togɛda fɔ sɔlv ɛni prɔblɛm.

4, 5. (a) Wetin di man we de oba in famili fɔ du? (b) Aw di wɛf fɔ luk di man we de oba am? (c) Aw wan man ɛn in wɛf bin chenj di we aw dɛn bin de tink?

⁴ Pɔl bin tɔk bɔt wetin man ɛn uman we mared fɔ du we i se: “Wɛf dɛn fɔ put dɛnsɛf dɔŋ to dɛn man dɛn lɛk aw dɛn go put dɛnsɛf dɔŋ to di Masta, bikɔs na di man de oba in wɛf jɔs lɛk aw Krays de oba di kɔngrigeshɔn.” (Lɛta Fɔ Ɛfisɔs 5:​22, 23, NW) Dis nɔ min se di man bɛtɛ pas in wɛf. Jiova bin tɔk bɔt di impɔtant wok we wɛf dɛn de du we i se: “I nɔ gud fɔ mek di man in wangren de. A go mek sɔmbɔdi we dɛn tu go de, fɔ ɛp am.” (Jɛnɛsis 2:​18) Di wɛf fɔ ɛp in man fɔ bi gud pɔsin we de oba in famili. Ɛn di man nid fɔ falamakata di kayn lɔv we Jizɔs we “de oba di kɔngrigeshɔn” bin gɛt. We di man du dis, in wɛf kin fil sef ɛn i kin izi fɔ lɛ i rɛspɛkt ɛn sɔpɔt am.

⁵ Wan uman we nem Kati we mared to Frɛd tɔk se: “We a nɔ bin dɔn mared yet, a bin de fɔ misɛf ɛn de kia fɔ misɛf. We a mared a bin nid fɔ ajɔst misɛf ɛn lan fɔ abop pan mi man. Na tin we nɔ izi fɔ du ɔltɛm bɔt bikɔs wi de du wetin Jiova want i dɔn ɛp wi fɔ mek wi padi biznɛs wit wisɛf dɔn tayt mɔ ɛn mɔ.”^[1] (Luk di ɛndnot ɔnda di las paregraf.) Frɛd bin se: “Fɔ disayd fɔ du sɔm tin na tin we nɔ bin ɛva izi fɔ mi. We yu mared, i nɔ izi fɔ lɛ yu disayd fɔ tu pipul dɛn. Bɔt we a de pre fɔ mek Jiova ɛp mi ɛn a rili de lisin to wetin mi wɛf de tɔk, i dɔn de izi fɔ mi. A fil se wi ɔl tu na rial tim!”

 6. Aw lɔv “go mek una gɛt wan at ɛn una go bi wan” we prɔblɛm de na di mared-os?

⁶ Fɔ lɛ mared-os go bifo, maredman ɛn mareduman fɔ kɔntinyu “nɔ fɔ vɛks” if pɔsin du dɛn bad, ɛn dɛn “fɔ padin” dɛnsɛf. Bikɔs maredman ɛn in wɛf nɔ pafɛkt, dɛn kin mek mistek dɛn. We dat kin apin, dɛn kin lan frɔm dɛn mistek dɛn, lan fɔ fɔgiv dɛnsɛf, ɛn sho se dɛn lɛk dɛnsɛf bay we dɛn de fala di advays we de na di Baybul. Dat na di kayn lɔv we “go mek una gɛt wan at ɛn una go bi wan.” (Lɛta Fɔ Kɔlɔse 3:​13, 14) Maredman ɛn in wɛf go sho dis lɔv bay we dɛn de peshɛnt ɛn gud to dɛnsɛf ɛn bay we dɛn nɔ de “kip tin na [dɛn] at.” (Fɔs Lɛta Fɔ Kɔrint 13:​4, 5) We cham-mɔt de, maredman ɛn in wɛf fɔ tray fɔ sɛtul am kwik kwik wan bifo di de dɔn. (Lɛta Fɔ Ɛfisɔs 4:​26, 27) Dɛn nid fɔ gɛt kɔrej ɛn put dɛnsɛf dɔŋ fɔ se “A sɔri fɔ we a dɔn du yu bad,” ɛn if dɛn du dis i go ɛp dɛn fɔ sɛtul di prɔblɛm ɛn fɔ lɛ dɛn kɔntinyu fɔ gɛt tayt padi biznɛs.

7, 8. (a) Us advays di Baybul gi bɔt mami ɛn dadi biznɛs insay mared? (b) Wetin mek maredman ɛn in wɛf nid fɔ sho se dɛn kia fɔ dɛnsɛf?

⁷ Di Baybul gi fayn advays we go ɛp maredman ɛn in wɛf fɔ tink di rayt we we i kam to mami ɛn dadi biznɛs. (Rid Fɔs Lɛta Fɔ Kɔrint 7:​3-5.) I impɔtant fɔ lɛ maredman ɛn in wɛf tink bɔt aw di ɔda pɔsin de fil ɛn wetin i nid. If di man nɔ de sho se i kia fɔ in wɛf, i nɔ go izi fɔ mek in wɛf gladi fɔ du mami ɛn dadi biznɛs. Maredman dɛn fɔ “de wit dɛn [wɛf] wit da ɔndastandin de, we rayt.” (Pita In Fɔs Lɛta 3:​7) Mami ɛn dadi biznɛs nɔ fɔ bi bay fos ɔ pawpa bɔt i fɔ kɔmɔt frɔm di at. Bɔku tɛm i kin izi fɔ lɛ man fil fɔ du mami ɛn dadi biznɛs pas aw uman kin fil fɔ du am. Bɔt di man ɛn in wɛf fɔ rɛdi di sem tɛm.

⁸ Di Baybul nɔ gi patikyula lɔ bɔt aw ɛn ustɛm we maredman ɛn in wɛf fɔ sho lɔv to dɛnsɛf. Bɔt i tɔk bɔt sɔm we dɛn we dɛn go sho se dɛn lɛk dɛnsɛf. (Sɔlɔmɔn In Siŋ Dɛm 1:​2; 2:​6) Maredman ɛn in wɛf we na Kristian dɛn fɔ trit dɛnsɛf di kayn we we go sho se dɛn kia fɔ dɛnsɛf.

 9. Wetin mek i nɔ fayn fɔ want fɔ du mami ɛn dadi biznɛs wit pɔsin we nɔto yu man ɔ yu wɛf?

⁹ We wi rili lɛk Gɔd ɛn wi neba dɛn, wi nɔ go alaw ɛnibɔdi ɔ ɛnitin fɔ ambɔg wi mared-os. Sɔm pipul dɛn dɔn ambɔg dɛn mared-os ɔ dɔn ivin pwɛl am bikɔs dɛn gɛt di abit fɔ wach dɛn rud rud pikchɔ dɛn. Wi nid fɔ tinap tranga wan fɔ ɛnitin we go mek wi wach rud rud pikchɔ ɔ ɛni ɔda kayn tin we go mek wi want fɔ du mami ɛn dadi biznɛs wit ɔda pɔsin. Wi fɔ ivin avɔyd fɔ du ɛnitin we go tan lɛk se wi want pɔsin we wi nɔ mared to ɛn we wi nɔ rili lɛk bikɔs dat nɔ de sho lɔv. Wi fɔ mɛmba se Gɔd no ɔl wetin wi de tink ɛn ɔl wetin wi de du. Dis go ɛp wi fɔ want fɔ du tin we go mek Gɔd gladi ɛn fɔ kɔntinyu fɔ fetful to wi man ɔ wi wɛf.—Rid Matyu 5:​27, 28; Di Ibru Pipul Dɛn 4:​13.

10, 11. (a) Wetin de apin to bɔku mared-os dɛn tide? (b) Wetin di Baybul tɔk bɔt we pipul dɛn de pat? (c) Wetin go ɛp maredman ɛn in wɛf nɔ fɔ disayd fɔ pat kwik kwik wan?

¹⁰ We maredman ɛn in wɛf nɔ sɛtul siriɔs prɔblɛm dɛn, dɛn kin disayd fɔ pat ɔ dayvɔs. Na sɔm kɔntri dɛn, bɔku pan di wan dɛn we de mared de dayvɔs. Na tru se dis nɔ kin apin so nɔmɔ na di Kristian kɔngrigeshɔn. Bɔt maredman ɛn dɛn wɛf dɛn we na Kristian kin gɛt siriɔs prɔblɛm dɛn na dɛn mared-os.

¹¹ Di Baybul tɛl wi se: “Mareduman nɔ fɔ lɛf in man; if i du so, i nɔ fɔ mared ɔda man, ɔ i fɔ mek pis wit in maredman; ɛn di man nɔ fɔ kɛr in wɛf go kot fɔ mek dɛn pat.” (Fɔs Lɛta Fɔ Kɔrint 7:​10, 11) Sɔm maredman ɛn dɛn wɛf dɛn fil se dɛn fɔ pat bikɔs dɛn prɔblɛm dɛn rili siriɔs. Bɔt Jizɔs sho se na siriɔs tin fɔ mek maredman ɛn in wɛf pat we i bin ripit wetin Gɔd bin dɔn tɔk bɔt mared ɛn i se: “Mek nɔbɔdi nɔ pat man ɛn uman we Gɔd dɔn jɔyn lɛkɛ wan pɔsin.” (Matyu 19:​3-6; Jɛnɛsis 2:​24) So Jiova want maredman ɛn in wɛf fɔ kɔntinyu fɔ de togɛda. (Fɔs Lɛta Fɔ Kɔrint 7:​39) Wi ɔl fɔ mɛmba se Jiova go jɔj wi fɔ wetin wi de du. Dis kin ɛp wi fɔ sɛtul prɔblɛm kwik kwik wan bifo i rili siriɔs.

12. Wetin kin mek maredman ɛn dɛn wɛf dɛn kin disayd fɔ pat?

¹² Wetin mek sɔm maredman ɛn dɛn wɛf dɛn de gɛt siriɔs prɔblɛm dɛn? Fɔ sɔm pipul dɛn, nɔto dat na di kayn mared-os we dɛn bin want so dɛn kin fil bad ɔ dɛn kin vɛks. Bɔku tɛm, prɔblɛm kin de bikɔs dɛn mɛn pipul dɛn difrɛn we ɔ di we aw sɔm pipul dɛn de si tin kin difrɛn. Sɔntɛnde prɔblɛm dɛn kin de wit in-lɔ dɛn ɔ aw fɔ spɛn mɔni ɔ aw fɔ mɛn di pikin dɛn. Bɔt i fayn fɔ si se bɔku Kristian dɛn we dɔn mared dɔn ebul fɔ sɛtul dɛn prɔblɛm dɛn ya we dɛn alaw Gɔd fɔ gayd dɛn.

13. Wetin na sɔm rizin dɛn we fɔ mek man ɛn in wɛf pat?

¹³ Gud rizin kin de we de mek maredman ɛn in wɛf go disayd fɔ pat. Prɔblɛm dɛn lɛk, we di man lɛf fɔ sɔpɔt in famili bay wilful, we di man ɔ uman de bit in kɔmpin bad bad wan, ɛn we di man ɔ wɛf nɔ want lɛ in kɔmpin sav Jiova. We siriɔs prɔblɛm dɛn de, di man ɛn in wɛf fɔ aks di ɛlda dɛn fɔ ɛp dɛn. Dɛn man dɛn ya sabi bɔku tin dɛn ɛn dɛn go ɛp di wan dɛn we mared fɔ fala Gɔd in advays. Ɛn we man ɛn in wɛf aks Jiova fɔ in oli sprit, dat go ɛp dɛn fɔ fala di advays dɛn we de na di Baybul ɛn fɔ gɛt fayn fayn kwaliti dɛn. (Lɛta Fɔ Galeshya 5:​22, 23)^[2]—Luk di ɛndnot ɔnda di las paregraf.

14. Wetin di Baybul tɛl Kristian dɛn we dɛn man ɔ wɛf nɔ de wɔship Jiova?

¹⁴ Di Baybul gi gud rizin dɛn we mek man ɛn uman we mared fɔ kɔntinyu fɔ de togɛda pan ɔl we wan pan dɛn nɔ de wɔship Jiova. (Rid Fɔs Lɛta Fɔ Kɔrint 7:​12-14.) Gɔd de tek di wan we nɔ de wɔship am sɛf as “in yon” bikɔs i mared to pɔsin we de sav am. Gɔd de tek di pikin dɛn we dɛn bɔn we smɔl “lɛkɛ in yon” so Gɔd de protɛkt dɛn. Pɔl bin ɛnkɔrej maredman ɛn dɛn wɛf dɛn se: “Yu mareduman, we na Kristiɛn, aw yu go no se nɔto yu go mek yu man sev? Semweso, yu maredman we na Kristiɛn, aw yu go no se nɔto yu go mek yu wɛf sev?” (Fɔs Lɛta Fɔ Kɔrint 7:​16) Bɔku ɛgzampul dɛn de we de sho aw man ɔ wɛf we na Kristian dɔn ɛp in kɔmpin we nɔto Kristian fɔ bigin wɔship Jiova.

15, 16. (a) Us advays di Baybul gi wɛf dɛn we na Kristian bɔt dɛn man dɛn we nɔto Kristian? (b) Wetin Kristian fɔ du if in man ɔ wɛf we nɔto Kristian “want fɔ lɛf” am?

¹⁵ Di apɔsul Pita bin advays wɛf dɛn we na Kristian dɛn fɔ put dɛnsɛf ɔnda dɛn man dɛn “so dat if ɛni wan pan dɛn de we nɔ biliv Gɔd in wɔd, una go mek dɛnsɛf kam biliv pan Gɔd bay aw una de du. Una nɔ go gɛt fɔ tɔk to dɛn bɔt Gɔd igen sɛf, bikɔs dɛn go si se una de waka tret ɛn una de fred Gɔd.” Di wɛf go ebul fɔ ɛp in man fɔ bigin wɔship Jiova mɔ we i “tɔk ɔ du tin saful saful” wan pas we i go de tɔk to in man ɔltɛm bɔt wetin in biliv.—Pita In Fɔs Lɛta 3:​1-4.

¹⁶ Wetin fɔ du if di man ɔ wɛf we nɔ de wɔship Jiova disayd fɔ mek dɛn pat? Di Baybul se: “If pɔsin we nɔto Kristiɛn want fɔ lɛf di wan we i mared we na Kristiɛn, mek i lɛf am. If i bi so, di patna we na Kristiɛn fri fɔ go in yon we. Na kol at Gɔd want mek una gɛt.” (Fɔs Lɛta Fɔ Kɔrint 7:​15) Frɔm wetin di Baybul se, if dɛn pat di man ɔ wɛf we na Kristian go gɛt smɔl kolat, bɔt i stil nɔ fri fɔ mared to ɔda pɔsin. Bɔt i nɔ nid fɔ fos in man ɔ wɛf we want lɛ dɛn pat fɔ kɔntinyu fɔ de wit am. As tɛm de go di man ɔ wɛf we nɔto Kristian go disayd fɔ kam bak ɛn i go want fɔ mek dɛn kɔntinyu togɛda. Ɛn sɔntɛm i go ivin bigin fɔ wɔship Jiova tumara bambay.

17. Wetin fɔ impɔtant pas ɔl to Kristian dɛn we mared?

¹⁷ Bikɔs wi de na di las dez, tin kin “traŋa.” (Sɛkɛn Lɛta To Timoti 3:​1-5) Na dat mek wi nid fɔ protɛkt wisɛf bay we wi gɛt tayt padi biznɛs wit Jiova. Pɔl bin rayt se: “Plɛnti tɛm nɔ lɛf igen, ɛn frɔm naw sote go, maredman dɛn fɔ de lɛk se dɛn nɔ mared; . . . dɛn wan we de dil wit dɛn tin we de na dis wɔl, nɔ fɔ put ɔl dɛn at pan dɛn.” (Fɔs Lɛta Fɔ Kɔrint 7:​29-31) Pɔl nɔ bin min se di wan dɛn we mared fɔ fɔgɛt bɔt dɛn man ɔ wɛf dɛn. Bɔt bikɔs wi de na di las dez di tin we fɔ impɔtant to wi pas ɔl na fɔ wɔship Jiova.—Matyu 6:​33.

18. Wetin mek i pɔsibul fɔ mek Kristian dɛn gɛt gladi at ɛn fɔ mek dɛn mared go bifo?

¹⁸ Bikɔs prɔblɛm dɛn de tide, bɔku mared-os dɛn de skata. Yu tink se i pɔsibul fɔ mek gladi at de insay mared-os ɛn fɔ mek dɛn go bifo? Yɛs, i pɔsibul if dɛn kam nia Jiova ɛn in pipul dɛn, fala di advays dɛn we de na di Baybul ɛn alaw Jiova in oli spirit fɔ gayd dɛn. We wi du dis, wi de sho se wi de ɔnɔ wetin “Gɔd dɔn jɔyn lɛkɛ wan.”—Mak 10:​9.