Filipians

4 So mi brɔda dɛn we a lɛk ɛn we a rili want fɔ si, una we na mi krawn ɛn we de mek a gladi, una we a rili lɛk ɛn we gɛt wanwɔd wit di Masta, na dis we una fɔ tinap tranga wan.

2 A de beg Yuodia ɛn Sintiki fɔ tink di sem we we dɛn de sav di Masta. 3 Mi kɔmpin wokman we fetful, a de beg yu bak fɔ kɔntinyu fɔ ɛp dɛn uman dɛn ya we dɔn wok tranga wan wit mi fɔ di gud nyuz, wit Klɛmɛnt ɛn mi ɔda kɔmpin wokman dɛn we dɛn nem de na di buk we de sho se pɔsin go gɛt layf.

4 Una gladi ɔltɛm bikɔs ɔf di Masta. A de tɔk bak se, Gladi! 5 Lɛ ɔlman no se una nɔ de pin pan sɔntin. Di Masta de nia. 6 Una nɔ wɔri bɔt ɛnitin, bɔt pan ɔltin una tɛl Gɔd fɔ ɛp una bay we una de pre ɛn rili beg am ɛn tɛl am tɛnki, 7 ɛn di pis we Gɔd de gi we mɔtalman nɔ ebul ɔndastand go gayd una at ɛn maynd* tru Krays Jizɔs.

8 So mi brɔda dɛn, una kɔn- tinyu fɔ tink bɔt ɛnitin we na tru, ɛnitin we siriɔs, ɛnitin we rayt, ɛnitin we klin, ɛnitin we go mek pɔsin sho lɔv, ɛnitin we pɔsin go tɔk fayn bɔt, ɛnitin we gud, ɛn ɛnitin we pɔsin go prez. 9 Di tin we una lan ɛn we una gri wit ɛn yɛri ɛn si we gɛt fɔ du wit mi, una go de du dɛn tin dɛn de, ɛn di Gɔd we gɛt pis go de wit una.

10 A gladi pasmak fɔ di Masta in sek bikɔs naw una dɔn bigin bak fɔ sho se una bisin bɔt mi. Pan ɔl we una bin bisin bɔt mi, una nɔ bin gɛt di chans fɔ sho dat. 11 A nɔ de se dis bikɔs a nid sɔntin, bikɔs ilɛk wetin apin to mi, a dɔn lan aw fɔ gɛt satisfay maynd. 12 A no aw fɔ liv wit smɔl tin ɛn aw fɔ liv wit bɔku tin. Pan ɔltin ɛn ilɛk wetin apin to mi, a dɔn lan di sikrit bɔt aw fɔ liv we a bɛlful ɛn we a angri, ɛn we a gɛt bɔku ɛn we a nɔ gɛt. 13 A kin gɛt trɛnk fɔ du ɔltin bikɔs pɔsin de we de gi mi di pawa.

14 Bɔt una du wɛl we una de ɛp mi we a gɛt prɔblɛm. 15 Infakt, una Filipian dɛn no bak se di fɔs tɛm we una no bɔt di gud nyuz, we a kɔmɔt na Masidonia, no kɔngrigeshɔn nɔ ɛp mi ɔ gri mek a ɛp dɛn, pas una nɔmɔ; 16 bikɔs we a bin de na Tɛsalonayka, una sɛn fɔ mi wetin a nid. Una nɔ jɔs du am wan tɛm, bɔt una du am tu tɛm. 17 Nɔto fɔ se a want gift, bɔt a want mek una du gud tin dɛn we go mek una gɛt mɔ prɔfit. 18 A gɛt ɔltin we a nid, ɛn a ivin gɛt mɔ. A dɔn gɛt pas wetin a nid, naw we Ɛpafrodaytɔs dɔn gi mi wetin una sɛn fɔ mi. Wetin una sɛn tan lɛk fayn sɛnt, na sakrifays we Gɔd gri wit ɛn we i lɛk. 19 Ɛn mi Gɔd we gɛt bɔku bɔku wɔndaful tin dɛn go gi una ɔltin we una nid tru Krays Jizɔs. 20 Mek wi Gɔd ɛn Papa gɛt di glori sote go. Emɛn.

21 Una grit fɔ mi ɔl di oli wan dɛn we gɛt wanwɔd wit Krays Jizɔs. Di brɔda dɛn we de wit mi de grit una. 22 Ɔl di oli wan dɛn, mɔ di wan dɛn we de na Siza in os, de grit una.

23 Mek di Masta Jizɔs Krays in spɛshal gudnɛs* de wit una, bikɔs una de sho se una de tink di rayt we.