LƐSIN 34
Aw Wi Go Sho se Wi Lɛk Jiova?
Frɔm di tɛm we yu bigin fɔ stɔdi di Baybul, yu dɔn ɛva fil se yu de nia Gɔd? Yu go lɛk fɔ kɔntinyu fɔ mek yu padi biznɛs tayt wit am mɔ ɛn mɔ? If na so i bi, mɛmba se di mɔ we Jiova si se yu de lɛk am mɔ ɛn mɔ, na di mɔ insɛf go lɛk yu ɛn kia fɔ yu. Aw yu go sho se yu lɛk am?
1. Aw wi go sho Jiova se wi lɛk am?
Wi go sho Jiova se wi lɛk am bay we wi de obe am. (Rid 1 Jɔn 5:3.) I nɔ de fos ɛnibɔdi fɔ obe am. Bifo dat, i de gi wi ɔl di chans fɔ disayd if wi go obe am ɔ wi nɔ go obe am. Wetin mek? Jiova want wi fɔ obe am wit ɔl wi at. (Romans 6:17) Dis min se i want yu fɔ obe am nɔto bikɔs i se yu fɔ obe am bɔt na bikɔs yu lɛk am. Dɛn mek Sɛkshɔn 3 ɛn 4 na dis buk fɔ ɛp yu fɔ sho yu lɔv fɔ Jiova bay we yu de du wetin de mek i gladi ɛn avɔyd fɔ du tin dɛn we go mek i nɔ gladi.
2. Wetin mek i nɔ izi fɔ sho yu lɔv fɔ Jiova?
“Pɔsin we de fala PAPA GƆD kin gɛt bɔku waala.” (Sam 34:19) Bikɔs wi nɔ pafɛkt, wi ɔl gɛt bad abit dɛn we wi de tray fɔ lɛf. Dɔn bak wi kin gɛt mɔni prɔblɛm, dɛn nɔ kin trit wi fia wan, ɛn ɔda bad tin dɛn kin apin to wi. We tin mɔna wi, i nɔ kin izi fɔ wi fɔ du wetin Jiova de tɛl wi fɔ du. Dis na bikɔs i izi fɔ du di rɔng tin. Bɔt we yu du wetin Jiova de tɛl yu fɔ du fetful wan, yu de sho se yu lɛk am pas ɛni ɔda tin. Ɛn yu de sho se yu de biɛn am. In bak go kɔntinyu fɔ de biɛn yu, ɛn i nɔ go ɛva lɛf yu.—Rid Sam 4:3.
LAN MƆ
Lan wetin mek Jiova want yu fɔ obe am ɛn wetin go ɛp yu fɔ kɔntinyu fɔ fetful to am.
3. Sɔntin we gɛt fɔ du wit yu
Akɔdin to di Baybul buk we nem Job, Setan bin tɔk sɔntin agens Job ɛn ɔl di wan dɛn we want fɔ sav Jiova. Rid Job 1:1, 6–2:10, dɔn una tɔk bɔt dɛn kwɛstyɔn dɛn ya:
Akɔdin to Setan, wetin mek Job bin de obe Jiova?—Rid Job 1:9-11.
Wetin Setan tɔk bɔt ɔl mɔtalman ɛn ivin yusɛf?—Rid Job 2:4.
Rid Job 27:5b, dɔn una tɔk bɔt dis kwɛstyɔn:
Aw Job bin sho se i rili lɛk Jiova?
Job bin sho se i lɛk Jiova bay we i kɔntinyu fɔ de biɛn am
Wi go sho se wi lɛk Jiova bay we wi kɔntinyu fɔ de biɛn am
4. Mek Jiova in at gladi
Rid Prɔvabs 27:11, dɔn una tɔk bɔt dɛn kwɛstyɔn dɛn ya:
Aw Jiova de fil we yu sho se yu gɛt sɛns ɛn de obe am? Wetin mek?
5. Yu go kɔntinyu fɔ de biɛn Jiova
Di lɛk we wi lɛk Jiova, de mek wi tɛl ɔda pipul dɛn bɔt am. We wi kɔntinyu fɔ de biɛn am, dat de mek wi tɛl ɔda pipul dɛn bɔt am ilɛksɛf i nɔ izi. Ple di VIDIO, dɔn una tɔk bɔt di kwɛstyɔn dɛn we de dɔŋ.
Yu ɛva fil se i nɔ izi fɔ yu fɔ tɛl ɔda pipul dɛn bɔt Jiova?
Insay di vidio, wetin bin ɛp Gresin fɔ lɛf fɔ fred?
I izi fɔ mek wi kɔntinyu fɔ de biɛn Jiova we wi lɛk wetin i lɛk ɛn et wetin i et. Rid Sam 97:10, dɔn una tɔk bɔt dɛn kwɛstyɔn dɛn ya:
Frɔm wetin yu dɔn lan, wetin na sɔm tin dɛn we Jiova lɛk? Wetin na sɔm tin dɛn we i et?
Aw yu go lan fɔ lɛk wetin gud ɛn et wetin bad?
6. Wi de bɛnifit we wi obe Jiova
Fɔ obe Jiova na di bɛst tin we wi kin du ɔltɛm. Rid Ayzaya 48:17, 18, dɔn una tɔk bɔt dɛn kwɛstyɔn dɛn ya:
Yu tink se wi fɔ biliv se Jiova no wetin gud fɔ wi ɔltɛm? Wetin mek?
Aw yu dɔn bɛnifit frɔm we yu dɔn de stɔdi di Baybul ɛn bɔt di tru Gɔd, Jiova?
SƆM PIPUL DƐN KIN SE: “Di tin dɛn we a de du nɔ impɔtant to Gɔd.”
Us skripchɔ yu go yuz fɔ sho se di tin dɛn we wi de du de afɛkt di we aw Jiova de fil?
WETIN YU DƆN LAN?
Yu kin sho se yu lɛk Jiova bay we yu de obe am ɛn kɔntinyu fɔ de biɛn am pan ɔl we yu de gɛt prɔblɛm dɛn.
Rivyu
Wetin yu lan frɔm Job in ɛgzampul?
Aw yu go sho se yu lɛk Jiova?
Wetin go ɛp yu fɔ kɔntinyu fɔ de biɛn Jiova?
DU MƆ RISACH
Lan aw yu go kɔntinyu fɔ de biɛn Jiova ɛn di kɔngrigeshɔn.
Lan mɔ bɔt di tin dɛn we Setan bin tɔk agens mɔtalman.
“Job Kɔntinyu fɔ Fetful to Gɔd” (Di Baybul—Wetin Na In Mɛsej? Sɛkshɔn 6)
Lan aw yɔŋ wan dɛn bak kin sho se dɛn lɛk Jiova.
Aw yɔŋ pɔsin go kɔntinyu fɔ du wetin Jiova want pan ɔl we in kɔmpin dɛn de tray fɔ mek i du wetin bad?
Nɔ Gri fɔ Du di Bad Tin we Yu Kɔmpin dɛn Want Lɛ Yu Du! (3:59)