Wetin Mek Mozis Rɔnawe

LUK we Mozis de rɔn fɔ kɔmɔt na Ijipt. Yu de si di man dɛn we de rɔnata am? Yu no wetin mek dɛn want kil Mozis? Lɛ wi si.

Na Fɛro in os dɛn mɛn Mozis. Mozis bin gɛt sɛns bad ɛn i bin bi wan impɔtant man. Mozis bin no se in nɔto Ijipshian, ɛn i bin no se in tru tru papa ɛn mama na Izrɛlayt slev dɛn.

Wan de, we Mozis ol fɔti ia, i go luk aw in pipul dɛn de du. Di Ijipshian dɛn bin de trit dɛn bad. Mozis si wan Ijipshian de bit wan Izrɛlayt slev. We Mozis luk rawnd ɛn nɔ si pɔsin de wach am, i wap di Ijipshian ɛn di Ijipshian day. Dɔn Mozis ayd di man in bɔdi na di sansan.

Di ɔda de, Mozis go bak fɔ go luk aw in pipul dɛn de du. I bin tink se i go ebul ɛp dɛn fɔ lɛ dɛn nɔ bi slev igen. Bɔt we i go, i si tu Izrɛlayt man dɛn de fɛt, so i tɛl di wan we nɔ gɛt rayt se: ‘Wetin mek yu de bit yu brɔda?’

Di man tɛl Mozis se: ‘Na udat mek yu kiŋ ɔ jɔj oba wi? Yu want kil mi lɛk aw yu kil da Ijipshian?

Dis mek Mozis fred. I no wantɛm se pipul dɛn dɔn no wetin i du da Ijipshian. Fɛro sɛf bin dɔn yɛri, so i sɛn pipul dɛn fɔ go kil Mozis. Na dis mek Mozis rɔnawe kɔmɔt na Ijipt.

We Mozis kɔmɔt na Ijipt, i go de fawe na wan tɔŋ we dɛn de kɔl Midian. Na dis tɔŋ ya i mit wan man we nem Jɛtro ɛn in famili. Dɔn i mared wan pan Jɛtro in gyal pikin dɛn we nem Zipora. Mozis bigin mɛn ship dɛn, ɛn na Jɛtro in ship dɛn i bin de mɛn. I de na Midian fɔ 40 ia, ɛn naw i dɔn ol 80 ia. Wan de, we Mozis bin de mɛn Jɛtro in ship dɛn, wan wɔndaful tin apin we mek Mozis in layf chenj. Tɔn na di ɔda pej lɛ wi si wetin na dis wɔndaful tin.