LƐSIN 40
Aw Wi Go Bi Pɔsin We Klin na Gɔd in Yay?
Imajin wan mama we de rɛdi in smɔl bɔypikin fɔ go skul. I de mek shɔ se di bɔbɔ was ɛn in klos dɛn nit ɛn klin. Dis de mek di bɔbɔ gɛt wɛlbɔdi ɛn i de sho ɔda pipul dɛn se in mama ɛn papa de rili kia fɔ am. Semweso, wi Papa Jiova want wi fɔ klin wi bɔdi ɛn di tin dɛn we wi gɛt. I want wi fɔ klin bak pan di we aw wi de tink, di we aw wi de tɔk, ɛn di we aw wi de du tin. We wi klin, wi de bɛnifit wisɛf ɛn wi de briŋ prez to am.
1. Wetin i min fɔ kip wisɛf klin?
Jiova tɛl wi se: “Una fɔ oli.” (1 Pita 1:16) Fɔ oli min se wi fɔ klin wi bɔdi ɛn di tin dɛn we wi gɛt. I min bak se wi fɔ klin pan di we aw wi de tink, di we aw wi de tɔk, ɛn di we aw wi de du tin. Wi go kip wi bɔdi klin bay we wi de was ɛvride, ɛn bay we wi de kip wi klos dɛn, wi os, ɛn wi motoka nit ɛn klin. Wi go ɛp bak fɔ klin wi Kiŋdɔm Ɔl. We wi kip wi bɔdi ɛn di tin dɛn we wi gɛt klin, wi go briŋ prez to Jiova.—2 Kɔrintians 6:3, 4.
2. Fɔ bi pɔsin we klin, us abit dɛn wi fɔ avɔyd?
Di Baybul ɛnkɔrej wi fɔ “klin wisɛf lɛ no dɔti nɔ de pan wi bɔdi ɛn spirit.” (2 Kɔrintians 7:1) So wi fɔ tray tranga wan fɔ avɔyd ɛnitin we go damej wi bɔdi ɔ wi maynd. Di tin dɛn we wi de tink bɔt fɔ mek Jiova gladi, so wi fɔ du wi bɛst nɔ fɔ tink bɔt bad tin dɛn. (Sam 104:34) Wi fɔ tray bak fɔ avɔyd tɔk dɛn we nɔ klin.—Rid Koloshians 3:8.
Us ɔda tin dɛn bak go mek wi bɔdi, di tin dɛn we wi gɛt, di tin dɛn we wi de tɔk, di tin dɛn we wi de tink, ɛn di tin dɛn we wi de du nɔ klin? Sɔm tin dɛn kin mek wi bɔdi nɔ klin. So wi fɔ avɔyd tin dɛn lɛk fɔ smok sigrɛt ɔ tabaka, it snɔf, ɛn fɔ tek drɔgs fɔ ɛnjɔy wisɛf. We wi avɔyd dɛn tin dɛn ya, wi de gɛt wɛlbɔdi, ɛn wi de sho rɛspɛkt fɔ wi layf we na gift frɔm Gɔd. Wi fɔ tray fɔ klin di we aw wi de tink, tɔk, ɛn du tin bay we wi de avɔyd tin dɛn lɛk we pɔsin de ple wit in prayvet pat ɛn fɔ wach rud rud pikchɔ ɔ fim dɛn. (Sam 119:37; Ɛfishians 5:5) I nɔ kin izi fɔ lɛf dɛn abit dɛn ya, bɔt Jiova go ɛp wi fɔ du dat.—Rid Ayzaya 41:13.
LAN MƆ
Lan aw we wi klin wi bɔdi ɛn di tin dɛn we wi gɛt, de briŋ prez to Jiova, ɛn lan aw wi go lɛf dɔti abit dɛn.
3. We wi klin wi bɔdi ɛn di tin dɛn we wi gɛt, wi de briŋ prez to Jiova
We wi rid di lɔ dɛn we Jiova bin gi di Izrɛlayt dɛn, wi go lan wetin mek i impɔtant to am fɔ lɛ in pipul dɛn klin. Rid Ɛksodɔs 19:10 ɛn 30:17-19, dɔn una tɔk bɔt dɛn kwɛstyɔn dɛn ya:
Wetin dɛn vas dɛn ya de sho bɔt di we aw Jiova de tink bɔt fɔ klin wi bɔdi ɛn di tin dɛn we wi gɛt?
Us gud abit dɛn go ɛp wi fɔ kɔntinyu fɔ kip wi bɔdi ɛn di tin dɛn we wi gɛt klin?
Fɔ klin wi bɔdi ɛn di tin dɛn we wi gɛt kin tek tɛm ɛn ɛfɔt. Bɔt wi go ebul fɔ du so ilɛk usay wi de ɔ ilɛk wi jɛntri ɔ po. Ple di VIDIO, dɔn una tɔk bɔt di kwɛstyɔn we de dɔŋ.
Wetin mek di pipul dɛn we wi de prich to go rɛspɛkt Jiova mɔ we dɛn si se di tin dɛn we wi gɛt klin ɛn nit?
4. Lɛf bad abit dɛn
Jiova go ɛp wi fɔ lɛf ɛni bad abit we wi gɛt
If yu de smok ɔ yuz drɔgs fɔ ɛnjɔy yusɛf, yu go si se i nɔ izi fɔ lɛf da abit de. Wetin go ɛp yu? Lan aw da abit de de afɛkt yu. Rid Matyu 22:37-39, dɔn una tɔk bɔt aw sigrɛt, tabaka, ɔ drɔgs de afɛkt . . .
pɔsin in padi biznɛs wit Jiova.
pɔsin in famili ɛn di wan dɛn we de arawnd am.
Mek plan fɔ lɛf bad abit.a Ple di VIDIO.
Rid Filipians 4:13, dɔn una tɔk bɔt dis kwɛstyɔn:
We pɔsin de pre, stɔdi di Baybul, ɛn atɛnd mitin dɛn ɔltɛm, aw dat go ɛp am fɔ lɛf bad abit dɛn?
5. Fɛt agens tinkin ɛn abit dɛn we nɔ klin
Rid Koloshians 3:5, dɔn una tɔk bɔt dɛn kwɛstyɔn dɛn ya:
Aw wi no se fɔ wach rud rud pikchɔ ɔ fim, fɔ sɛn rud rud pikchɔ ɔ fim as mɛsej, ɛn we pɔsin de ple wit in prayvet pat na abit dɛn we nɔ klin na Jiova in yay?
Yu tink se i mek sɛns fɔ lɛ Jiova ɛkspɛkt wi fɔ klin we i kam pan wetin wi de tɔk, tink, ɛn du? Wetin mek?
Lan mɔ bɔt aw fɔ fɛt agens tinkin dɛn we nɔ klin. Ple di VIDIO.
Jizɔs bin yuz wan ɛgzampul fɔ sho se wi fɔ mekɔp wi maynd fɔ du sɔntin so dat wi go kɔntinyu fɔ klin pan wetin wi de tink, tɔk, ɛn du. Rid Matyu 5:29, 30, dɔn una tɔk bɔt dis kwɛstyɔn:
Jizɔs nɔ bin de tɔk se wi fɔ du bad to wisɛf. Bɔt i bin min se wi nid fɔ du sɔntin. Uskayn tin pɔsin nid fɔ du fɔ avɔyd tinkin dɛn we nɔ klin?b
If yu de fɛt fɔ lɛf fɔ tink bɔt tin dɛn we nɔ klin, mɛmba se Jiova gladi fɔ di ɛfɔt we yu de mek. Rid Sam 103:13, 14, dɔn una tɔk bɔt dis kwɛstyɔn:
If yu de tray fɔ lɛf abit we nɔ klin, aw dis skripchɔ de ɛnkɔrej yu fɔ kɔntinyu fɔ tray fɔ lɛf am?
Nɔ Giv-ɔp
I kin izi fɔ tink se, ‘A dɔn fel, so lɛ a lɛf fɔ tray.’ Bɔt tink bɔt dis: Jɔs bikɔs rɔnman bɔk in fut ɛn fɔdɔm, dat nɔ min se i dɔn lɔs di res ɛn i nɔ min se i fɔ stat igen. Semweso, jɔs bikɔs yu dɔn bigin fɔ put an pan yu bad abit dɛn bak, nɔ min se yu nɔ go ebul fɔ lɛf. Ɛn i nɔ min bak se ɔl di tin dɛn we yu dɔn du fɔ lɛf yu bad abit dɛn dɔn go fɔ natin. I nɔmal fɔ lɛ sɔntɛnde pɔsin we de fɛt fɔ lɛf bad abit dɛn du di tin dɛn we i de fɛt fɔ lɛf. Bɔt nɔ giv-ɔp! Jiova go ɛp yu fɔ lɛf yu bad abit.
SƆM PIPUL DƐN KIN SE: “A dɔn yus to di abit. A nɔ go ebul lɛf.”
Us skripchɔ yu go yuz fɔ sho di pɔsin se Jiova go ɛp am fɔ lɛf in bad abit?
WETIN YU DƆN LAN?
Wi go mek Jiova gladi bay we wi kip wi bɔdi, wi maynd, ɛn di tin dɛn we wi de du klin.
Rivyu
Wetin mek i rili impɔtant fɔ bi pɔsin we klin?
Wetin i min fɔ kip yusɛf klin?
Aw yu go kip yu tinkin ɛn di tin dɛn we yu de du klin?
DU MƆ RISACH
Us simpul tin dɛn yu go du fɔ kip yu bɔdi ɛn di tin dɛn we yu gɛt klin ilɛksɛf yu nɔ gɛt bɛtɛ mɔni?
Lan bɔt tin dɛn we go ɛp yu fɔ lɛf fɔ smok.
Lan bɔt aw rud rud fim dɛn ɛn pikchɔ dɛn kin afɛkt pɔsin.
“Fɔ Wach Rud Rud Pikchɔ ɔ Fim dɛn Na Tin we Fayn ɔ I Rili Bad?” (Di Wachtawa, Ɔgɔst 1, 2013)
Lan aw wan man bin ebul fɔ lɛf fɔ wach rud rud pikchɔ ɛn fim dɛn.
“A Fel Bɔku Tɛm Bifo A Ebul fɔ Lɛf Mi Bad Abit” (Di Wachtawa No. 4 2016)
a Wan atikul we gɛt di taytul “Aw fɔ Lɛf fɔ Smok?” we de na di say we se Du Mɔ Risach na dis lɛsin, gi sɔm fayn advays dɛn bɔt wetin fɔ du fɔ lɛf bad abit dɛn we yu dɔn yus to.
b Fɔ lɛ pɔsin lɛf di abit fɔ de ple wit in prayvet pat, rid “Aw A Go Lɛf di Abit fɔ De Ple wit Mi Prayvet Pat?” we de insay di buk we nem Kwɛstyɔn dɛn we Yɔŋ Pipul dɛn Kin Aks—Ansa dɛn we Kin Ɛp, Vɔlyum 1, chapta 25.