Di Trut De Briŋ Wɔ Nɔto Pis

1, 2. (a) Uskayn pis wi go gɛt naw? (b) Wetin mek i nɔ pɔsibul naw fɔ mek wi gɛt tru tru pis? (Luk di pikchɔ nia dis atikul in taytul.)

WI ƆL want pis na wi layf, ɛn wi want fɔ avɔyd ɛnitin we de mek wi wɔri. So wi de rili tɛl Jiova tɛnki fɔ we i dɔn gi wi di “pis we Gɔd de gi.” Dis pis na di kolat we de protɛkt wi frɔm tin dɛn we de mek wi fil bad ɔ wɔri. (Lɛta Fɔ Filipay 4:​6, 7, NW) Bikɔs wi dɔn gi wi layf to Jiova, dat dɔn mek wi gɛt pis wit Gɔd. Dis min se wi gɛt tayt padi biznɛs wit am.—Lɛta Fɔ Rom 5:​1.

² Bɔt di tɛm nɔ rich yet fɔ mek Gɔd briŋ kam pis ɔlsay na di wɔl. Wi de na di las dez, so bɔku prɔblɛm dɛn de we go mek wi wɔri. Wi de arawd pipul dɛn we lɛk fɛt-fɛt. (Sɛkɛn Lɛta To Timoti 3:​1-4) Dɔn wi gɛt fɔ fɛt agens Setan ɛn di lay lay tin dɛn we i de tich. (Sɛkɛn Lɛta Fɔ Kɔrint 10:​4, 5) Bɔt wetin go mek wi wɔri pas ɔl na we wi fambul dɛn nɔ kin want wi fɔ wɔship Jiova. Sɔm pan dɛn go provok wi fɔseka wetin wi biliv ɔ dɛn go tɛl wi se wi de skata di famili. Dɛn go ivin se dɛn go pul wi kɔmɔt na di famili if wi nɔ stɔp fɔ wɔship Jiova. So aw wi fɔ si dɛn kayn tin ya we wi fambul dɛn kin du? Aw wi go kɔntinyu fɔ gɛt pis we dɛn kayn tin dɛn ya apin?

3, 4. (a) Aw di tin dɛn we Jizɔs bin de tich go afɛkt pipul dɛn? (b) Ustɛm mɔ i nɔ kin izi fɔ fala Jizɔs?

³ Jizɔs bin no se nɔto ɔlman go gri wit di tin dɛn we i de tich. I bin no bak se in disaypul dɛn go nid fɔ gɛt maynd bikɔs sɔm pipul dɛn nɔ go want dɛn fɔ wɔship Jiova. Dis kayn tin go ambɔg di kolat we de na di famili. Jizɔs se: “Una nɔ mɛmba se a briŋ kol at kam na [di] wɔl, a nɔ briŋ kol at kam, a briŋ [wɔ]. A kam fɔ skata dɛn bɔy pikin ɛn dɛn papa, dɛn gyal pikin ɛn dɛn mama, dɛn dɔtɛnlɔ ɛn dɛn mɔdɛnlɔ; yu yon fambul go bi di wan we et yu pas ɔl.”—Matyu 10:​34-36.

⁴ Wetin Jizɔs bin min we i se “Una nɔ mɛmba se a briŋ kol at”? I want pipul dɛn fɔ no se bad tin dɛn gɛt fɔ apin if dɛn bi in disaypul. Fɔ tru, Jizɔs bin want fɔ tich pipul dɛn di tru tin bɔt Gɔd, nɔto fɔ skata famili. (Jɔn 18:​37) Bɔt in disaypul dɛn bin nid fɔ no se nɔto ɔltɛm i go izi fɔ fala am, mɔ if dɛn tayt padi ɔ fambul dɛn nɔ gri fɔ tek di trut.

 5. Uskayn tin go mit Jizɔs in disaypul dɛn?

⁵ Jizɔs bin se wan pan di tin dɛn we in disaypul dɛn fɔ rɛdi fɔ bia na we dɛn fambul dɛn nɔ go want dɛn fɔ wɔship Jiova. (Matyu 10:​38, NW) Jizɔs in disaypul dɛn dɔn bia we dɛn fambul dɛn dɔn provok dɛn ɔ ivin pul an pan dɛn so dat dɛn go mek Jizɔs gladi. Bɔt dɛn dɔn gɛt pas wetin dɛn bin lɔs.—Rid Mak 10:​29, 30.

 6. Wetin wi fɔ mɛmba if wi fambul dɛn nɔ want wi fɔ wɔship Jiova?

⁶ Wi lɛk wi fambul dɛn pan ɔl we dɛn nɔ want wi fɔ wɔship Jiova. Bɔt wi fɔ mɛmba se di lɔv we wi gɛt fɔ Gɔd ɛn Krays fɔ strɔng pas di lɔv we wi gɛt fɔ ɛni ɔda pɔsin. (Matyu 10:​37) Wi fɔ mɛmba bak se Setan go yuz di lɔv we wi gɛt fɔ wi fambul dɛn fɔ mek wi kɔmɔt biɛn Jiova. Mek wi tɔk bɔt sɔntin dɛn we go mit wi, ɛn mek wi si aw wi go ebul fɔ bia.

 7. If yu man ɔ wɛf nɔ de wɔship Jiova, aw yu fɔ fil bɔt dat?

⁷ Di Baybul wɔn wi se ɛnibɔdi we mared go gɛt “trɔbul” ɔ prɔblɛm dɛn. (Fɔs Lɛta Fɔ Kɔrint 7:​28) If yu mared to pɔsin we nɔ de wɔship Jiova, dis go ad mɔ pwɛl at ɛn prɔblɛm dɛn na yu mared-os. Bɔt i fayn fɔ mek yu si di tin we de mit yu di we aw Jiova de si am. I se wi nɔ fɔ pat wit ɔ dayvɔys wi man ɔ wɛf jɔs bikɔs i nɔ de wɔship Jiova. (Fɔs Lɛta Fɔ Kɔrint 7:​12-16) If yu man nɔ de wɔship Jiova, ɛn i nɔ de ɛp di famili fɔ wɔship Gɔd, yu stil nid fɔ rɛspɛkt am as di wan we de oba di famili. Ɛn if yu wɛf nɔ de wɔship Jiova, yu stil nid fɔ lɛk am ɛn trit am fayn.—Lɛta Fɔ Ɛfisɔs 5:​22, 23, NW, 28, 29.

 8. Us kwɛstyɔn dɛn yu fɔ aks yusɛf if yu man ɔ wɛf de tray fɔ ridyus di tɛm we yu de yuz fɔ wɔship Jiova?

⁸ Wetin yu fɔ du if yu man ɔ wɛf de tray fɔ ridyus di tɛm we yu fɔ yuz fɔ wɔship Jiova? Wan sista in man tɛl am di dez dɛn we i fɔ go fil savis. If da kayn tin de de apin to yu, aks yusɛf dɛn kwɛstyɔn dɛn ya: ‘Mi man ɔ mi wɛf de tɛl mi fɔ stɔp fɔ wɔship Jiova? If nɔto so i bi, a go du wetin mi man ɔ mi wɛf de tɛl mi fɔ du?’ If yu na pɔsin we de du tin wit sɛns, yu nɔ go gɛt bɔku prɔblɛm dɛn insay yu mared-os.—Lɛta Fɔ Filipay 4:​5.

 9. Aw Kristian dɛn go tich dɛn pikin dɛn fɔ rɛspɛkt dɛn mama ɔ papa we nɔ de wɔship Jiova?

⁹ I nɔ kin izi fɔ tren yu pikin dɛn if yu man ɔ wɛf nɔ de wɔship Jiova. Fɔ ɛgzampul, yu nid fɔ tich yu pikin dɛn fɔ obe di lɔ we de na di Baybul we se: “Rɛspɛkt yu papa ɛn mama.” (Lɛta Fɔ Ɛfisɔs 6:​1-3) Bɔt wetin yu go du if yu man ɔ wɛf nɔ de du wetin di Baybul se? Yu kin sɛt fayn ɛgzampul fɔ yu pikin dɛn bay we yu de rɛspɛkt yu man ɔ wɛf. Tink bɔt yu man ɔ wɛf in gud kwaliti dɛn, ɛn tɛl am se yu rili gladi fɔ ɔl di gud tin dɛn we i de du. Nɔ tɔk bad tin dɛn bɔt yu man ɔ wɛf bifo yu pikin dɛn. Bifo dat, ɛksplen to dɛn se ɛnibɔdi gɛt fɔ disayd fɔ insɛf if i go wɔship Jiova ɔ if i nɔ go wɔship am. If yu tren yu pikin dɛn fɔ rɛspɛkt dɛn mama ɔ papa we nɔ de wɔship Jiova, dɛn fayn ɛgzampul go mek yu man ɔ wɛf want fɔ no mɔ bɔt Jiova.

10. Aw mama ɔ papa we na Kristian go tich in pikin dɛn fɔ lɛk Jiova?

¹⁰ Sɔm man ɔ wɛf we nɔ de wɔship Jiova go want mek dɛn pikin dɛn sɛlibret lay lay ɔlide dɛn ɔ fɔ lan lay lay tichin dɛn. Dɔn bak, sɔm man dɛn kin tɛl dɛn wɛf we na Kristian nɔ fɔ tich in pikin dɛn di Baybul. Ilɛksɛf tin lɛk dis apin, di wɛf fɔ du ɔl wetin i ebul fɔ tich in pikin dɛn di trut. (Di Apɔsul Dɛn Wok [Akt] 16:​1; Sɛkɛn Lɛta To Timoti 3:​14, 15) Fɔ ɛgzampul, maredman we nɔ de wɔship Jiova nɔ go want in wɛf fɔ stɔdi di Baybul wit in pikin dɛn ɔ fɔ kɛr dɛn go na mitin. Pan ɔl we i go rɛspɛkt wetin in man dɔn disayd, di uman kin stil tɛl in pikin dɛn wetin i dɔn lan frɔm di Baybul ɛnitɛm we i gɛt chans. Da we de, dɛn go lan bɔt Jiova ɛn dɛn go lan bak wetin rayt ɛn wetin rɔng. (Di Apɔsul Dɛn Wok [Akt] 4:​19, 20) Leta, na di pikin dɛn go disayd if dɛn go wɔship Jiova ɔ if dɛn nɔ go wɔship am.a (Luk di futnot.)—Ditarɔnɔmi 30:​19, 20.

11. Wetin kin mek prɔblɛm de bitwin wi ɛn wi fambul dɛn we nɔ de wɔship Jiova?

¹¹ We wi bin fɔs bigin fɔ stɔdi wit Jiova Witnɛs dɛn, i kin bi se wi nɔ go dɔn tɛl wi fambul dɛn. Bɔt as wi de gɛt mɔ fet, wi go si am se wi nid fɔ tɛl dɛn se wi want fɔ wɔship Jiova. (Mak 8:​38) Bikɔs yu want fɔ de biɛn Gɔd, dat go mek prɔblɛm de bitwin yu ɛn yu fambul dɛn. Mek wi tɔk bɔt sɔm tin dɛn we yu go du fɔ mek pis de bitwin yu ɛn yu fambul dɛn ɛn fɔ mek yu stil fetful to Jiova.

12. Wetin mek wi fambul dɛn nɔ kin want wi fɔ wɔship Jiova? Aw wi go sho se wi bisin bɔt aw dɛn de fil?

¹² Tray fɔ ɔndastand aw yu fambul dɛn we nɔ de wɔship Jiova de fil. Wi rili gladi we wi no di trut we de na di Baybul. Bɔt wi fambul dɛn go de tink se na ful dɛn ful wi, ɔ wi dɔn jɔyn difrɛn rilijɔn we dɛn nɔ ɔndastand. Dɛn go de tink se wi nɔ lɛk dɛn igen bikɔs wi nɔ de sɛlibret ɔlide dɛn wit dɛn. Dɛn kin ivin fred se bad tin go apin to wi afta wi dɔn day. Wi fɔ tray fɔ ɔndastand aw dɛn de fil ɛn tek tɛm lisin to wetin dɛn de tɔk so dat wi go no wetin mek dɛn de wɔri bɔt wi. (Prɔvabs 20:​5) Di apɔsul Pɔl bin tray fɔ ɔndastand “ɔlman” so dat i go tich dɛn di gud nyuz. If wi tray fɔ ɔndastand wi fambul dɛn, dis go ɛp wi fɔ no aw fɔ tich dɛn di trut.—Fɔs Lɛta Fɔ Kɔrint 9:​19-23.

13. Aw wi fɔ tɔk to wi fambul dɛn we nɔ de wɔship Jiova?

¹³ Tɔk fayn to dɛn. Di Baybul se: “Wɛn una de tɔk wit pipul, una fɔ tɛl dɛn tin we go mek dɛn gladi.” (Lɛta Fɔ Kɔlɔse 4:​6) Dat nɔ kin izi. Wi kin aks Jiova fɔ gi wi in oli spirit fɔ mek i ɛp wi du tin fayn ɛn fɔ tɔk fayn to wi fambul dɛn. Wi nɔ fɔ tray fɔ agyu bɔt ɔl di lay lay tin dɛn we dɛn biliv. If wi fil bad bikɔs dɛn tɔk ɔ du sɔntin, wi kin falamakata di apɔsul dɛn. Pɔl se: “Wɛn pipul se mek bad fala wi, wi kin se mek bɛtɛ fala dɛn; wɛn pipul dɛn mek wi sɔfa, wi kin bia; wɛn dɛn tɔk bad bɔt wi, wi kin tɔk gud bɔt dɛn.”—Fɔs Lɛta Fɔ Kɔrint 4:​12, 13.

14. Us bɛnifit wi go gɛt if wi biev fayn?

¹⁴ Kɔntinyu fɔ biev fayn. Wetin mek dis impɔtant? Pan ɔl we wi go gɛt pis wit wi fambul dɛn if wi tɔk to dɛn fayn, na di fayn we aw wi de biev mɔ go ɛp wi. (Rid Pita In Fɔs Lɛta 3:​1, 2, 16.) Mek lɛ yu fambul dɛn si frɔm yu fayn ɛgzampul fɔ se Jiova Witnɛs dɛn gɛt gladi at na dɛn mared os, dɛn de kia fɔ dɛn pikin dɛn, dɛn de du wetin di Baybul se, ɛn dɛn layf gɛt minin. Ilɛksɛf wi fambul dɛn nɔ ɛva kam na di trut, wi go gladi fɔ no se di fayn we aw wi de biev de mek Jiova gladi.

15. Aw wi go plan bifo tɛm so dat wi go avɔyd fɔ agyu wit wi fambul dɛn?

¹⁵ Plan bifo tɛm. Tink bɔt tin dɛn we go mek yu ɛn yu fambul dɛn agyu. Dɔn disayd wetin yu go du. (Prɔvabs 12:​16, 23) Na dat wan sista na Ɔstrelia bin du. In fadɛnlɔ nɔ bin rili want dɛn fɔ lan di trut ɛn sɔntɛnde i kin vɛks. So bifo in ɛn in man kɔl am, dɛn kin pre to Jiova fɔ ɛp dɛn fɔ mek dɛn nɔ ansa am wit wamat. Dɛn kin tink bɔt fayn tɔpik dɛn fɔ tɔk bɔt. Ɛn fɔ avɔyd lɔng tɔk we go mek dɛn agyu bɔt rilijɔn, dɛn kin sɛt ɔmɔs tɛm dɛn go yuz fɔ tɔk to am.

16. Wetin yu go du fɔ mek yu nɔ go de fil bad bikɔs yu nɔ de du wetin yu fambul dɛn want?

¹⁶ Na tru se yu nɔ go avɔyd ɔl di prɔblɛm dɛn we wi kin gɛt wit wi fambul dɛn we nɔ de wɔship Jiova. So we prɔblɛm kin de, yu go fil bad bikɔs yu lɛk yu fambul dɛn ɛn yu want fɔ du wetin go mek dɛn gladi. Bɔt mɛmba se fɔ de biɛn Jiova fɔ impɔtant pas di we aw yu lɛk yu famili. We yu fambul dɛn no dis, dɛn go ɔndastand se i rili impɔtant fɔ wɔship Jiova. Yu nɔ go fos ɛnibɔdi fɔ tek di trut. Yu go mek ɔda pipul dɛn si se na bikɔs yu de fala di tin dɛn we Jiova de tɛl wi na dat dɔn ɛp yu. Ɛn fɔ tru, di sem tin dɛn we Jiova dɔn du fɔ wi na in in want fɔ du fɔ dɛn, dat na fɔ gri fɔ wɔship am.—Ayzaya 48:​17, 18.

17, 18. Wetin go ɛp yu if yu fambul lɛf fɔ wɔship Jiova?

¹⁷ I nɔ kin rili izi we wan pan yu fambul disfɛloship ɔ disayd fɔ lɛf fɔ wɔship Jiova. Dis kin mek yu at rili pwɛl ɛn i go tan lɛk we pɔsin de chuk yu wit lɔng nɛf. Aw yu go bia dis kayn pwɛl at?

¹⁸ Pe atɛnshɔn pan yu savis to Jiova. We yu gɛt dis kayn pwɛl at, yu nid fɔ du sɔntin fɔ mek yu fet strɔng. Rid di Baybul ɔltɛm, pripia fɔ mitin, go di mitin dɛn, kɔntinyu fɔ de prich, ɛn pre to Jiova fɔ gi yu trɛnk fɔ bia. (Jud 20, 21) Wetin fɔ du if yu de du ɔl dɛn tin ya bɔt stil yu at pwɛl? Nɔ giv-ɔp! Kɔntinyu fɔ pe atɛnshɔn pan yu savis to Jiova. As tɛm de go, dis go ɛp yu fɔ kɔntrol di we aw yu de tink ɛn di we aw yu de fil. Na dis bin apin to di man we rayt Sam 73. Tin dɛn bin de mit am na layf we bin de mek i nɔ izi fɔ mek i kɔntrol di we aw i de tink ɛn di we aw i de fil. Bɔt we i de wɔship Jiova, dat bin ɛp am fɔ si tin dɛn di rayt we. (Sam 73:​16, 17) Di sem tin go apin to yu.

19. Aw yu go sho rɛspɛkt fɔ di we aw Jiova de kɔrɛkt in pipul dɛn?

¹⁹ Gri wit di we aw Jiova de kɔrɛkt in pipul dɛn. Gɔd no se di kɔrɛkt we i de kɔrɛkt wi kin bɛnifit ɔlman, ivin di wan sɛf we dɔn disfɛloship. Pan ɔl we i nɔ kin izi we dɛn disfɛloship pɔsin we wi lɛk, dat kin ɛp am fɔ kam bak to Jiova tumara bambay. (Rid Di Ibru Pipul Dɛn 12:​11.) Te dat apin, wi fɔ rɛspɛkt wetin Jiova tɛl wi we i se wi nɔ fɔ “gɛt ɛnitin fɔ du wit” di wan dɛn we disfɛloship. (Fɔs Lɛta Fɔ Kɔrint 5:​11-13) Dis nɔ kin izi. Bɔt wi fɔ avɔyd fɔ kip kɔmpin wit dɛn na fon, fɔ sɛn tɛks mɛsej, lɛta, ɔ imel to dɛn, ɔ fɔ yuz Fesbuk, Watsap, Twita, ɔ ɔda tin dɛn fɔ tɔk wit dɛn.

20. Wetin wi fɔ de abop fɔ?

²⁰ Nɔ ɛva giv-ɔp! Lɔv kin mek wi “abop ɔltɛm,” so wi de kɔntinyu fɔ abop se di wan dɛn we wi lɛk go kam bak to Jiova. (Fɔs Lɛta Fɔ Kɔrint 13:​7) If yu si se yu fambul de tray tranga wan fɔ chenj, yu kin pre fɔ am fɔ mek i gɛt trɛnk frɔm di Baybul ɛn lisin to Jiova we i de se: “Tɔn bak to mi.”—Ayzaya 44:​22.

21. Wetin yu fɔ du if yu fambul dɛn de ambɔg yu bikɔs yu de fala Jizɔs?

²¹ Jizɔs bin se wi fɔ lɛk am pas aw wi lɛk ɛni ɔda mɔtalman. Jizɔs bin shɔ se in disaypul dɛn go gɛt maynd fɔ kɔntinyu fɔ de biɛn am ilɛksɛf dɛn fambul dɛn nɔ want dat. So if yu fambul dɛn de ambɔg yu bikɔs yu de fala Jizɔs, abop pan Jiova. Aks am fɔ ɛp yu fɔ bia te ɔltin dɔn. (Ayzaya 41:​10, 13) Gladi fɔ no se Jiova ɛn Jizɔs rili lɛk wetin yu de du ɛn dɛn go blɛs yu bikɔs yu fetful.