1 Pita

3 Semweso, una dɛn mareduman dɛn, una put unasɛf ɔnda una man dɛn, so dat if nɔn pan dɛn nɔ de obe Gɔd in wɔd, dɛn go obe bikɔs ɔf di we aw dɛn wɛf dɛn de biev pan ɔl we dɛn wɛf dɛn nɔ tɔk natin, 2 bikɔs dɛn dɔn de si di fayn* we aw una de biev ɛn di dip rɛspɛkt we una de sho. 3 Lɛ di tin dɛn we de mek una fayn nɔ bi tin dɛn we pipul dɛn de si—di ia stayl we una de mek ɛn di tin dɛn we una de wɛr we dɛn mek wit gold ɛn di fayn klos we una de wɛr— 4 bɔt lɛ i bi di we aw una tan insay una at. So una mek unasɛf fayn bay we una de du tin kwayɛt ɛn saful wan, dis na tin we rili gɛt valyu na Gɔd in yay, ɛn dis kayn fayn nɔ de pwɛl. 5 Na dis we di oli uman dɛn we bin de trade ɛn we bin abop pan Gɔd bin de mek dɛnsɛf fayn, dɛn bin de put dɛnsɛf ɔnda dɛn man dɛn, 6 jɔs lɛk aw Sera bin obe Ebraam, i bin de kɔl am masta. Ɛn una dɔn bi in pikin dɛn, dat na if una kɔntinyu fɔ du gud ɛn nɔ fred.

7 Semweso, una dɛn maredman dɛn, una kɔntinyu fɔ ɔndastand una wɛf dɛn we una de wit dɛn. Una ɔnɔ dɛn lɛk aw una de tek kia ɔf kɔntena we rili izi fɔ brok, bikɔs na una ɔl go gɛt di layf we Gɔd dɔn prɔmis bikɔs ɔf in spɛshal gudnɛs,* so dat natin nɔ go ambɔg una prea.

8 Wan ɔda tin bak, una ɔl go de tink di sem we, una go de fil fɔ una kɔmpin dɛn, una fɔ rili lɛk unasɛf lɛk aw brɔda dɛn kin lɛk dɛnsɛf, una fɔ rili sho se una gɛt sɔri-at, ɛn una fɔ ɔmbul. 9 Una nɔ du bad to pɔsin we du una bad; if pɔsin tɛl una bad wɔd, una nɔ tɛl am bad wɔd bak. Bifo dat, una blɛs am, bikɔs na dis mek dɛn kɔl una, so dat una go gɛt blɛsin.

10 “Ɛnibɔdi we lɛk layf ɛn we want fɔ gladi di tɛm we i de alayv, fɔ kɔntrol in tɔŋ lɛ i nɔ tɔk bad ɛn kɔntrol in lip lɛ i nɔ lay. 11 Lɛ i lɛf fɔ du bad ɛn du gud, lɛ i luk fɔ pis ɛn tray tranga wan fɔ gɛt am. 12 Jiova* in yay de pan di wan dɛn we de du wetin rayt, ɛn in yes de to dɛn we dɛn de rili beg am, bɔt Jiova* de tɔn in fes pan di wan dɛn we de du bad.”

13 Fɔ tru, udat go du una bad if una gɛt zil fɔ du wetin gud? 14 Bɔt ivin if una fɔ sɔfa bikɔs una de du wetin rayt, una gladi. Una nɔ fred wetin dɛn de fred,* ɛn una nɔ wɔri. 15 Bɔt una tek di Krays as Masta ɛn as pɔsin we oli na una at, una fɔ rɛdi ɔltɛm fɔ ansa ɛnibɔdi we aks una fɔ di rizin we mek una gɛt op, bɔt una fɔ tek tɛm du am ɛn sho se una gɛt dip rɛspɛkt.

16 Una kɔntinyu fɔ gɛt klin kɔnshɛns, so dat ilɛk aw dɛn tɔk bad bɔt una, di wan dɛn we de tɔk bad bɔt una go shem bikɔs una de biev fayn as pipul dɛn we de fala Krays. 17 I bɛtɛ fɔ sɔfa bikɔs una de du gud, if na dat Gɔd alaw, pas fɔ mek una sɔfa bikɔs una de du bad. 18 Na wan tɛm nɔmɔ Krays day fɔ sin, pɔsin we de du wetin rayt day fɔ di wan dɛn we nɔ de du wetin rayt, so dat i go kɛr una go to Gɔd. I day wit mɔtalman bɔdi, bɔt i gɛt layf bak wit spirit bɔdi. 19 Ɛn na so i bin de we i go prich to di spirit dɛn na prizin, 20 we nɔ bin de obe we Gɔd bin de peshɛnt wet insay Noa in tɛm, we dɛn bin de bil di ak,* we bin kɛr smɔl pipul dɛn, dat na, et sol* dɛn, sef wan pantap di wata.

21 Na so baptizim bak tan, we insɛf de sev una naw (nɔto fɔ se i de pul di dɔti na di bɔdi, bɔt na bay we una de beg Gɔd fɔ klin kɔnshɛns), tru di layf we Jizɔs Krays gɛt bak. 22 I go na ɛvin ɛn i de na Gɔd in raytan, ɛn Gɔd mek di enjɛl dɛn, di wan dɛn we de rul, ɛn di wan dɛn we gɛt pawa de ɔnda am.