Yu Tink se di Baybul Ebul fɔ Ɛp Pɔsin we Sik Siriɔs Wan?

Yɛs. Gɔd bisin bɔt ɔl in savant dɛn we sik. Di Baybul tɔk bɔt wan in fetful savant se: “PAPA GƆD [“Jiova,” NWT] go . . . mek i grap nain sik bed.” (Sam 41:​3) If yu sik siriɔs wan, dɛn tri advays dɛn ya go ɛp yu fɔ bia:

1. Pre fɔ mek yu gɛt trɛnk fɔ bia. Yu go ebul fɔ gɛt “di pis we Gɔd de gi we mɔtalman nɔ ebul ɔndastand,” ɛn dat go mek yu nɔ wɔri pasmak ɛn ɛp yu fɔ bia.—Filipians 4:​6, 7.

2. Tink di rayt we. Di Baybul se: “Wɛn yu at layt yu de gɛt wɛlbɔdi, bɔt if yu at pwɛl, ɔltɛm yu sik.” (Prɔvabs 17:​22, Krio Fɔs Oli Baybul) Tray fɔ de du tin we go mek yu laf ɔ smayl, bikɔs dat nɔ go jɔs ɛp yu fɔ mek yu gladi, bɔt i go ɛp yu wɛlbɔdi wan.

3. Go de tink bɔt yu op fɔ tumara bambay. Strɔng op go ɛp yu fɔ gɛt gladi-at ilɛksɛf yu sik siriɔs wan. (Romans 12:​12) Di Baybul tɔk bɔt di tɛm we “nɔbɔdi . . . nɔ go se ‘A nɔ wɛl.’” (Ayzaya 33:​24) Da tɛm de Gɔd go mɛn ɔl di sik dɛn we sayɛnsman dɛn nɔ ebul fɔ mɛn naw. Fɔ ɛgzampul, di Baybul tɔk bɔt aw di wan dɛn we dɔn ol go yɔŋ bak. I se: “Lɛ i yɔŋ bak, lɛk i chenj bak lɛk aw i bin yɔŋ ɛn trɔŋ.”—Job 33:​25.

Mɛmba dis: Pan ɔl we Jiova Witnɛs dɛn abop se Gɔd go ɛp dɛn, dɛn kin stil go na ɔspitul we dɛn sik siriɔs wan. (Mak 2:​17) Wi nɔ de tɛl ɛnibɔdi us patikyula tritmɛnt i fɔ tek, wi tink se ɔlman fɔ disayd fɔ insɛf us tritmɛnt i go tek.