“Prez Jiova in Nem”

1-2. Wetin go ɛp wi fɔ ɔndastand aw Jiova de fil we dɛn de pwɛl in nem?

TINK bɔt dis ɛgzampul: Imajin se pɔsin we yu lɛk tɔk bad bad tin bɔt yu. Yu no se na lay; bɔt stil, sɔm pipul dɛn biliv am. Ɛn di tin we bad pas ɔl na dat, dɛn bigin tɛl ɔda pipul dɛn bɔt dis lay, ɛn bɔku pan dɛn biliv am bak. Aw dat go mek yu fil? If yu bisin bɔt pipul dɛn ɛn yu gudnem, di lay lay tin we dɛn de tɔk bɔt yu go mek yu fil bad, nɔto so?​—Prɔv. 22:1.

² Dis ɛgzampul go ɛp wi fɔ ɔndastand aw Jiova bin fil we dɛn bin pwɛl in gudnem. Wan pan in enjɛl dɛn bin lay pan am to di fɔs uman, we na Iv. Iv bin biliv da lay de. Da lay de bin mek wi fɔs mama ɛn papa tɔn dɛn bak pan Jiova. Dis bin mek sin ɛn day kam na di wɔl. (Jɛn. 3:​1-6; Rom. 5:12) Ɔl di prɔblɛm dɛn we wi de si na di wɔl tide, lɛk day, wɔ, ɛn di sɔfa we wi de sɔfa, de apin bikɔs ɔf di lay lay tin dɛn we Setan bin bigin fɔ tɔk na di gadin we bin de na Idɛn. Fɔ se Jiova de fil pen bikɔs ɔf di lay lay tin dɛn we dɛn de tɔk bɔt am ɛn di bad tin dɛn we de apin bikɔs ɔf dat? Wan dawt nɔ de se i de fil am. Bɔt pan ɔl dat, Jiova nɔ vɛks. Infakt, in na “Gɔd we gladi” ɔltɛm.​—1 Tim. 1:11.

 3. Us ɔnɔ wi gɛt?

³ Wi gɛt di ɔnɔ fɔ ɛp fɔ pul di badnem we Jiova dɔn gɛt bay we wi de obe dis simpul kɔmand we se: “Prez Jiova in nem.” (Sam 113:1) Wi kin du dat we wi de tɛl ɔda pipul dɛn di tru bɔt Am. Yu go gri fɔ prez Jiova in nem? Lɛ wi tɔk bɔt tri pawaful tin dɛn we go ɛp wi fɔ prez wi Gɔd in nem wit ɔl wi at.

WI DE MEK JIOVA GLADI WE WI PREZ IN NEM

 4. Wetin mek Jiova kin gladi we wi de prez am? Gi wan ɛgzampul. (Luk bak di pikchɔ.)

⁴ Wi kin mek wi Papa we de na ɛvin gladi we wi de prez in nem. (Sam 119:108) Bɔt fɔ se dis min se di ɔlmayti Gɔd tan lɛk mɔtalman dɛn we nɔ pafɛkt we kin want fɔ mek dɛn prez dɛn bikɔs dɛn want fɔ fil gud bɔt dɛnsɛf? Nɔ. Tink bɔt dis ɛgzampul. Imajin wan smɔl titi we rɔn to in papa, ɔg am, ɛn tɛl am se, “Yu na di bɛst papa na di wan ol wɔl!” Di papa smayl, ɛn i rili gladi fɔ wetin di pikin du. Wetin mek? Yu tink se di papa want fɔ mek di pikin prez am so dat i go fil gud bɔt insɛf? Nɔ. Bifo dat, di papa gladi we i si in galpikin de sho se i lɛk am ɛn de tɛl am tɛnki. Di papa no se as di pikin de big, dɛn kayn kwaliti dɛn ya go ɛp am fɔ gɛt gladi-at. Semweso, Jiova, we na di Papa we pas ɔl ɔda papa dɛn kin gladi we wi de prez am.

 5. We wi de prez Gɔd in nem, wetin wi de pruv se na lay?

⁵ We wi de prez wi Papa we de na ɛvin, wi de ɛp fɔ pruv se wetin Setan tɔk bɔt wi na lay. Setan tɔk se no mɔtalman nɔ go ebul kɔntinyu fɔ tinap tranga wan fɔ Gɔd in nem. I tɔk se no mɔtalman nɔ go kɔntinyu fɔ sav Jiova fetful wan we sɔntin tɛst am. I se wi ɔl go tɔn wi bak pan Gɔd if wi tink se dat go bɛnifit wi. (Job 1:​9-11; 2:4) Bɔt Job we bin fetful bin pruv se Setan na layman. Fɔ se yusɛf go kɔntinyu fɔ fetful to Gɔd? Wi ɔl gɛt di ɔnɔ fɔ tinap tranga wan fɔ wi Papa in nem, ɛn wi go mek i gladi bay we wi de sav am fetful wan. (Prɔv. 27:11) Fɔ tru, na big big ɔnɔ wi gɛt fɔ du dat.

 6. Aw wi go falamakata Kiŋ Devid ɛn di Livayt dɛn? (Nɛimaya 9:5)

⁶ Na bikɔs fetful pipul dɛn lɛk Gɔd, na dat mek dɛn de prez in nem wit ɔl dɛn at. Kiŋ Devid bin rayt se: “Lɛ a prez Jiova; lɛ ɔltin we de insay mi prez in oli nem.” (Sam 103:1) Devid bin no se fɔ prez Jiova in nem min se na Jiova insɛf sɛf wi de prez. We wi yɛri Jiova in nem, i de mek wi tink bɔt di kayn pɔsin we i bi, wi kin tink bɔt ɔl in fayn fayn kwaliti dɛn ɛn di wɔndaful tin dɛn we i de du. Devid bin want fɔ tek in Papa in nem as sɔntin we oli ɛn fɔ prez am. I bin want fɔ du dat wit “ɔltin” we de insay am, dat na wit ɔl in at. Semweso, di Livayt dɛn bin de bifo fɔ prez Jiova. Dɛn bin put dɛnsɛf dɔŋ ɛn gri se dɛn wɔd dɛn nɔ go ɛva du fɔ prez Jiova in oli nem di we aw i rili fit fɔ mek wi prez am. (Rid Nɛimaya 9:5.) Wan dawt nɔ de se dis kayn we aw dɛn put dɛnsɛf dɔŋ fɔ prez Jiova wit ɔl dɛn at, bin mek Jiova gladi.

 7. Aw wi go prez Jiova we wi de prich ɛn bay di we aw wi de liv wi layf ɛvride?

⁷ Tide, wi kin mek Jiova gladi we wi de tɔk bɔt am di kayn we we de sho se wi gɛt tɛnki ɛn wi rili lɛk am. We wi de prich, wi fɔ mɛmba se di men rizin we mek wi de du dis wok na fɔ ɛp ɔda pipul dɛn fɔ kam nia Jiova ɛn fɔ fil di sem we aw wi de fil bɔt wi Papa we gɛt lɔv. (Jems 4:8) Wi kin gladi fɔ sho pipul dɛn aw di Baybul tɔk bɔt Jiova. Di Baybul se i gɛt lɔv, i de du tin tret, i gɛt sɛns, pawa, ɛn ɔda fayn fayn kwaliti dɛn. Wi de prez Jiova bak ɛn mek i gladi bay we wi de tray tranga wan fɔ falamakata am. (Ɛfi. 5:1) We wi de du dat, wi de sho se wi difrɛn frɔm pipul dɛn na dis wikɛd wɔl. Pipul dɛn go notis se wi difrɛn ɛn dɛn go wɔnda wetin mek. (Mat. 5:​14-16) As wi de tɔk wit dɛn ɛvride, wi go ebul fɔ ɛksplen wetin mek wi de biev di we aw wi de biev. Dis kin mek di wan dɛn we want fɔ no di trut kam nia wi Gɔd. We wi de prez Jiova dɛn we dɛn ya, wi de mek i gladi.—1 Tim. 2:​3, 4.

WI DE MEK JIZƆS GLADI WE WI PREZ JIOVA IN NEM

 8. Aw Jizɔs sho se na in de bifo fɔ prez Jiova in nem?

⁸ Nɔbɔdi nɔ de na ɛvin ɛn na dis wɔl we no Jiova gud gud wan lɛk Jizɔs. (Mat. 11:27) Jizɔs lɛk in Papa, ɛn na in de bifo fɔ prez Jiova in nem. (Jɔn 14:31) We i bin de pre to in Papa di nɛt bifo i day, i tɔk bɔt di tin we impɔtant pas ɔl we i bin du na dis wɔl. I se: “A dɔn mek dɛn no yu nem.” (Jɔn 17:26) Wetin i bin min?

 9. Aw Jizɔs bin yuz parebul fɔ ɛksplen klia wan uskayn pɔsin in Papa rili bi?

⁹ Jizɔs nɔ bin jɔs tɛl pipul dɛn se Gɔd in nem na Jiova, bɔt i bin du pas dat. Di Ju pipul dɛn we Jizɔs bin de tich bin ɔlrɛdi sabi Gɔd in nem. Bɔt na Jizɔs bin de bifo fɔ “ɛksplen bɔt Am.” (Jɔn 1:​17, 18) Fɔ ɛgzampul, di Ibru Skripchɔ dɛn sho se Jiova na Gɔd we gɛt sɔri-at. (Ɛks. 34:​5-7) Jizɔs bin sho klia wan se dis na tru bay we i pul wan parebul bɔt wan trangayes bɔbɔ ɛn in papa. Insay da stori de, wi lan se we di papa si in bɔypikin we bin dɔn ripɛnt, i rɔn go mit am “we i de fa de kam,” i ɔg am, ɛn fɔgiv am wit ɔl in at. Dis stori sho klia wan aw Jiova de sho sɔri-at. (Lyuk 15:​11-32) Jizɔs ɛp wi fɔ ɔndastand uskayn pɔsin in Papa rili bi.

10. (a) Aw wi no se Jizɔs bin yuz in Papa in nem ɛn i bin want ɔda pipul dɛn fɔ yuz am? (Mak 5:19) (Luk bak di pikchɔ.) (b) Wetin Jizɔs want wi fɔ du tide?

¹⁰ Yu tink se Jizɔs bin want ɔda pipul dɛn fɔ yuz in Papa in nem? Yɛs. I go bi se sɔm bigman dɛn pan Gɔd biznɛs bin biliv se fɔ yuz Gɔd in nem nɔ de sho wan rɛspɛkt, bɔt Jizɔs nɔ bin ɛva alaw dɛn kayn tradishɔn dɛn ya fɔ mek i nɔ ɔnɔ in Papa in nem. Tink bɔt di tɛm we Jizɔs bin mɛn wan man we bin gɛt dimɔn na di eria usay di Gɛrasin dɛn de. Di pipul dɛn bin fred, ɛn dɛn beg Jizɔs fɔ kɔmɔt na di eria, so i bin kɔmɔt de. (Mak 5:​16, 17) Bɔt stil, Jizɔs bin want pipul dɛn na da eria de fɔ no Jiova in nem. So i tɛl di man we i mɛn fɔ tɛl di pipul dɛn wetin Jiova dɔn du fɔ am, nɔto wetin in dɔn du. (Rid Mak 5:19.)a Tide, Jizɔs want wi bak fɔ ɛp ɔlman na di wɔl fɔ no in Papa in nem! (Mat. 24:14; 28:​19, 20) We wi du dat, wi de mek wi Kiŋ, we na Jizɔs gladi.

11. Wetin Jizɔs tich in disaypul dɛn fɔ pre fɔ? Wetin mek dat impɔtant? (Izikɛl 36:23)

¹¹ Jizɔs bin no se Jiova want fɔ mek In nem oli, dat na fɔ pruv se ɔl di lay lay tin dɛn we dɛn de tɔk bɔt Am nɔto tru. Na dat mek wi Masta bin tich in disaypul dɛn fɔ pre se: “Wi Papa we de na ɛvin, lɛ ɔlman tek yu nem as sɔntin we oli.” (Mat. 6:9) Jizɔs bin ɔndastand se fɔ mek in Papa in nem oli na di tin we impɔtant pas ɔl we mɔtalman fɔ no. (Rid Izikɛl 36:23.) Nɔbɔdi nɔ de na di wan ol wɔl we dɔn du mɔ tin dɛn fɔ mek Jiova in nem oli pas Jizɔs. Bɔt pan ɔl dat, we dɛn bin arɛst Jizɔs, us sin in ɛnimi dɛn bin se i kɔmit? Dɛn se i tɔk bad tin dɛn bɔt Gɔd we sho se i nɔ gɛt wan rɛspɛkt fɔ in Papa. Jizɔs bin no klia wan se fɔ mek dɛn tek in Papa in nem as sɔntin we nɔ oli ɔ fɔ mek dɛn tɔk bad bɔt am na di sin we wɔs pas ɔl. In at bin rili pwɛl fɔ no se na fɔ dis kraym dɛn go chaj am ɛn se i gilti. I go bi se na dat na di men rizin we mek Jizɔs “in at bin so pwɛl” di tɛm we dɛn fɔ arɛst am.​—Lyuk 22:​41-44.

12. Us we Jizɔs bin mek in Papa in nem oli we pas ɔl?

¹² Fɔ lɛ Jizɔs mek in Papa in nem oli, i bin gɛt fɔ bia di sɔfa we dɛn bin de mek i sɔfa, di bad tin dɛn we dɛn bin de tɛl am, ɛn di lay we dɛn bin de lay pan am. I bin no se i dɔn obe in Papa pan ɔltin, ɛn i nɔ bin gɛt ɛni rizin fɔ shem. (Ibru. 12:2) I bin no bak se na Setan bin de mek dɛn atak am da tɛm de we tin nɔ bin rili izi fɔ am. (Lyuk 22:​2-4; 23:​33, 34) Setan bin rili want mek Jizɔs kɔmɔt biɛn Jiova; bɔt, i bin fel bad bad wan! Jizɔs bin pruv se Setan na wikɛd layman ɛn Jiova gɛt fetful savant dɛn we nɔ de kɔmɔt biɛn am ilɛk dɛn gɛt siriɔs prɔblɛm dɛn!

13. Aw yu ebul mek yu Kiŋ we de rul gladi?

¹³ Yu want fɔ mek yu Kiŋ we de rul gladi? If na so i bi, na fɔ kɔntinyu fɔ prez Jiova in nem ɛn ɛp ɔda pipul dɛn fɔ lan bɔt wi Gɔd in fayn fayn kwaliti dɛn. We yu du dat, yu de sho se yu de falamakata Jizɔs. (1 Pit. 2:21) Jɔs lɛk Jizɔs, yu de mek Jiova gladi ɛn yu de pruv se In ɛnimi, we na Setan, na big big layman!

WE WI DE PREZ JIOVA IN NEM, WI DE ƐP FƆ SEV PIPUL DƐN LAYF

14-15. Us wɔndaful tin dɛn kin apin we wi tich pipul dɛn bɔt Jiova?

¹⁴ We wi de prez Jiova in nem, wi de ɛp fɔ sev pipul dɛn layf. Aw? Wɛl, Setan “dɔn blayn dɛn maynd.” (2 Kɔr. 4:4) Dis dɔn mek dɛn dɔn kam fɔ biliv dɛn lay lay tin dɛn ya we Setan de tɔk, lɛk: Gɔd nɔ de, Gɔd de fa ɛn i nɔ bisin bɔt mɔtalman, Gɔd wikɛd ɛn i de mek pipul dɛn we de du bad sɔfa sote go. Setan de tɔk dɛn lay lay tin dɛn ya bikɔs i jɔs want fɔ pwɛl Jiova in gudnem, ɛn i nɔ want mek pipul dɛn kam nia am. Bɔt di prichin wok we wi de du de mek Setan nɔ ebul du wetin i want. Wi de tich pipul dɛn di tru tin dɛn bɔt wi Papa ɛn prez wi Gɔd in oli nem. Wetin de apin we wi du dat?

¹⁵ Di tru tin dɛn insay Gɔd in Wɔd rili gɛt pawa. We wi de tich pipul dɛn bɔt Jiova ɛn udat i rili bi, wi kin si sɔntin we rili wɔndaful. Setan nɔ kin ebul ful pipul dɛn igen, ɛn dɛn kin bigin fɔ si di fayn fayn kwaliti dɛn we wi Papa gɛt. Dɛn kin kɔle we dɛn si di kayn pawa we i gɛt. (Ayz. 40:26) Dɛn kin kam fɔ biliv se in na Gɔd we de du tin tret ɔltɛm. (Dit. 32:4) Dɛn kin lan bɔku tin dɛn frɔm di pasmak sɛns we i gɛt. (Ayz. 55:9; Rom. 11:33) Ɛn we dɛn lan se in na lɔv, dat de ɛnkɔrej dɛn. (1 Jɔn 4:8) As dɛn de kam nia Jiova, di op we dɛn gɛt fɔ de sote go as in pikin dɛn de strɔng mɔ ɛn mɔ. Na big big ɔnɔ wi gɛt fɔ ɛp pipul dɛn fɔ kam nia dɛn Papa! We wi de du dat, Jiova de si wi as in “kɔmpin wokman dɛn.”​—1 Kɔr. 3:​5, 9.

16. We sɔm pipul dɛn kam fɔ sabi Gɔd in nem, aw dat dɔn afɛkt dɛn? Gi ɛgzampul dɛn.

¹⁶ Fɔs, wi go jɔs tich pipul dɛn se Gɔd in nem na Jiova. If pɔsin rili want fɔ no bɔt Gɔd, da tin de we i lan kin rili tɔch in at. Fɔ ɛgzampul, wan yɔŋuman we nem Aliab bin mɛn as pɔsin we nɔto Kristian. Bɔt i nɔ bin satisfay wit in rilijɔn, ɛn i bin fil se i nɔ gɛt padi biznɛs wit Gɔd. Afta i bigin fɔ stɔdi wit Jiova Witnɛs dɛn, da we de aw i bin de fil bin chenj. I bigin fɔ si Gɔd as in Padi. Ɛn i bin sɔprayz fɔ no se dɛn dɔn pul Gɔd in nem na bɔku Baybul dɛn ɛn dɛn jɔs put taytul dɛn lɛk, Lɔd. We i lan bɔt Jiova in nem, dat bin chenj in layf. I bin gladi fɔ tɔk se: “Mi bɛst Padi gɛt nem!” Wetin bin apin afta dat? I tɔk se: “Naw a rili gɛt kolat. A rili gladi.” Wan man we nem Stiv, we na bin myuzishian, kɔmɔt na Ju famili we rili strikt. I nɔ bin want fɔ de na rilijɔn bikɔs i si se bɔku pipul dɛn we de insay rilijɔn ipokrit. Bɔt afta in mama day, i bin gri fɔ jɔyn wan Baybul stɔdi we wan Jiova Witnɛs bin de kɔndɔkt. I bin rili gladi fɔ lan Gɔd in nem. I se: “A nɔ bin ɛva sabi Gɔd in nem.” I tɔk bak se: “Fɔ di fɔs tɛm, a ɔndastand se Gɔd rial! A bin si am as Pɔsin. Da tɛm de, a bin kam fɔ no se a dɔn fɛn Padi.”

17. Wetin mek yu dɔn mekɔp yu maynd fɔ kɔntinyu fɔ prez Jiova in nem? (Luk bak di pikchɔ.)

¹⁷ We yu de du yu prichin ɛn tichin wok, yu de tɛl pipul dɛn bɔt Jiova in nem? Yu de ɛp dɛn fɔ no di kayn pɔsin we wi Gɔd rili bi? We yu du dat, yu de prez Gɔd in nem. Kɔntinyu fɔ prez Jiova in oli nem bay we yu de ɛp pipul dɛn fɔ no di Pɔsin we gɛt da nem de. We yu du dat, yu go sev pipul dɛn layf. Yu go falamakata yu Kiŋ, we na Jizɔs Krays. Ɛn wetin pas ɔl na dat, yu go mek Jiova we na yu Papa we lɛk yu, gladi. Na fɔ ‘prez in nem sote go’!​—Sam 145:2.