Aw Yu Go Bi Gɔd In Padi?

1, 2. Udat na bin sɔm pan Jiova in padi dɛn?

UDAT yu go want fɔ mek i bi yu padi? Na pɔsin we yu lɛk, pɔsin we yu ɛn in gri ɛn pɔsin we gɛt fayn abit ɛn kwaliti dɛn we yu kin kɔle.

² Jiova Gɔd bin pik sɔm pipul dɛn fɔ bi in padi dɛn. Fɔ ɛgzampul, Ebraam na bin wan pan Jiova in padi dɛn. (Ayzaya 41:​8; Jems 2:​23) Dɔn Jiova bin lɛk Devid. I bin tɔk se Devid na ‘pɔsin we i gladi fɔ.’ (Di Apɔsul Dɛn Wok [Akt] 13:​22) Ɛn Jiova bin lɛk di prɔfɛt Daniɛl “bad bad wan.”—Daniɛl 9:​23.

 3. Wetin mek Ebraam, Devid, ɛn Daniɛl bin bi Jiova in padi?

³ Wetin Ebraam, Devid, ɛn Daniɛl bin du fɔ mek dɛn bi Jiova in padi? Jiova bin tɛl Ebraam se: “Yu dɔn lisin to wetin a tɛl yu.” (Jɛnɛsis 22:​18, NW) Jiova de bi padi to di wan dɛn we de put dɛnsɛf dɔŋ ɛn lisin to am. Ivin bɔku pipul dɛn we de na wan neshɔn kin bi in padi. Jiova bin tɛl di Izrɛlayt dɛn se lɛ dɛn ‘obe in vɔys, ɛn i go bi dɛn Gɔd ɛn dɛn go bi in pipul dɛn.’ (Jɛrimaya 7:​23) So if yusɛf rili want fɔ bi Jiova in padi, yu nid fɔ lisin to am.

4, 5. Aw Jiova de protɛkt in padi dɛn?

⁴ Di Baybul se Jiova de luk fɔ we dɛn “fɔ sho in pawa fɔseka di wan dɛn we dɛn at klin fɔ am.” (Sɛkɛn Kronikul 16:​9) Jiova bin prɔmis in padi dɛn na Sam 32:​8 se: “A go tich yu ɛn tɛl yu wetin fɔ du, mi yay go fala yu.”

⁵ Wan ɛnimi we gɛt pawa want fɔ stɔp wi fɔ mek wi nɔ bi Gɔd in padi. Bɔt Jiova want fɔ protɛkt wi. (Rid Sam 55:​22.) As Jiova in padi dɛn, wi de wɔship am wit ɔl wi at. Wi nɔ de kɔmɔt biɛn Jiova ivin we wi gɛt prɔblɛm dɛn we de mɔna wi. Ɛn wi gɛt di sem kɔnfidɛns we wan pan di man dɛn we rayt di Sam buk bin gɛt. I bin rayt bɔt Jiova se: “PAPA GƆD [“Jiova,” NW] de wit mi ɔltɛm ɛn bikɔs i de wit mi, a nɔ de fred natin.” (Sam 16:​8; 63:​8) Aw Setan de tray fɔ stɔp wi fɔ mek wi nɔ bi Jiova in padi?

 6. Wetin Setan bin tɔk bɔt mɔtalman?

⁶ Insay Chapta 11, wi bin lan se Setan bin chalenj Jiova ɛn tɛl am se in na layman, ɛn i bin du bad we i nɔ alaw Adam ɛn Iv fɔ disayd fɔ dɛnsɛf wetin rayt ɛn rɔng. Di Baybul buk we nem Job tɛl wi se Setan kin lay pan pipul dɛn we want fɔ bi Gɔd in padi. Setan bin se dɛn de sav Gɔd bikɔs dɛn de gɛt sɔntin frɔm Gɔd, nɔto bikɔs dɛn lɛk Am. Setan bin ivin se i go tɔn ɛnibɔdi agens Gɔd. Mek wi si wetin wi go lan frɔm Job ɛn aw Jiova bin protɛkt am.

7, 8. (a) Aw Jiova bin fil bɔt Job? (b) Wetin Setan bin se bɔt Job?

⁷ Udat na bin Job? Na lɛk 3,600 ia so dɔn pas we dis gud man bin de na di wɔl. Jiova bin se da tɛm de, nɔbɔdi nɔ de we tan lɛk am na di wɔl. Job bin rili gɛt rɛspɛkt fɔ Gɔd, ɛn i bin et wetin bad. (Job 1:​8) Job na bin Jiova in tru tru padi.

⁸ Setan bin se Job de sav Jiova fɔ wetin i de gi am. Setan bin tɛl Jiova se i dɔn mek ‘i nɔ ebul du Job, in famili ɛn ɔl wetin i gɛt natin.’ I se Jiova “dɔn mek bɛtɛ de fala Job pan ɔl wetin i de du ɛn [i] dɔn gi am animal dɛn ɔlɔbɔt na di land.” Bɔt Setan se mek i jɔs “tret in an ɛn tek ɔl wetin i bin dɔn gi Job, i go mɔs tɔk bad bɔt am bifo in fes.”—Job 1:​10, 11.

 9. Wetin Jiova bin alaw Setan fɔ du?

⁹ Setan bin lay pan Job se i jɔs de sav Jiova fɔ wetin Jiova de gi am. Setan bin tɔk bak se i go ebul fɔ mek Job lɛf fɔ sav Jiova. Jiova nɔ bin gri wit wetin Setan se, bɔt I bin alaw Setan fɔ tɛst Job fɔ si if Job bin bi in padi bikɔs i lɛk am.

10. Wetin Setan bin du to Job? Wetin Job bin du?

¹⁰ Fɔs, Setan bin tif ɔ kil ɔl di animal dɛn we Job bin gɛt. Dɔn Setan bin kil bɔku pan Job in savant dɛn. Job bin lɔs ɔltin. Di las tin we Setan bin du na dat i mek big briz blo ɛn kil Job in tɛn pikin dɛn. Bɔt Job nɔ bin kɔmɔt biɛn Jiova. “Pan ɔl wetin bi, Job nɔ sin ɛn i nɔ blem PAPA GƆD.”—Job 1:​12-19, 22.

11. (a) Wetin bak Setan bin du to Job? (b) Wetin Job bin du?

¹¹ Setan nɔ bin taya. I bin chalenj Gɔd bay we i se: “Tret yu an ɛn tɔch in bon ɛn in bɔdi mek yu si if i nɔ go kɔs yu bifo yu fes.” So Setan bin mek Job gɛt wan bad bad sik. (Job 2:​5, 7) Bɔt stil, Job nɔ bin kɔmɔt biɛn Jiova. I bin se: “Te a day, a nɔ go ɛva lɛf fɔ sav Gɔd.”—Job 27:​5, NW.

12. Wetin Job bin du we sho se Setan de lay?

¹² Job nɔ bin no natin bɔt Setan in lay ɔ wetin mek i bin de sɔfa pasmak. I bin tink se na Jiova bin de mek ɔl dɛn prɔblɛm dɛn ya de mit am. (Job 6:​4; 16:​11-14) Bɔt pan ɔl dat, Job bin kɔntinyu fɔ de biɛn Jiova. Job nɔ bin gɛt wan dawt. Job nɔ bin jɔs bisin bɔt insɛf. In na bin Gɔd in padi bikɔs i lɛk Gɔd. Ɔl wetin Setan bin se na lay!

13. Wetin bin apin we Job nɔ bin kɔmɔt biɛn Gɔd?

¹³ Pan ɔl we Job nɔ bin no wetin bin de apin na ɛvin, i nɔ bin kɔmɔt biɛn Gɔd ɛn i bin sho se Setan na wikɛd pɔsin. Jiova bin blɛs Job fɔ we i nɔ kɔmɔt biɛn am as in padi.—Job 42:​12-17.

14, 15. Wetin Setan bin tɔk bɔt ɔlman?

¹⁴ Yu kin lan impɔtant lɛsin dɛn frɔm wetin bin apin to Job. Tide, Setan kin lay pan wi fɔ se wi de sav Jiova fɔ wetin i de gi wi. Insay Job 2:​4, Setan bin se: “Pɔsin kin du ɛnitin fɔ mek i nɔ day.” Setan nɔ bin jɔs lay pan Job nɔmɔ, bɔt i de lay pan ɔlman se dɛn jɔs bisin bɔt dɛnsɛf. Pan ɔl we lɔng tɛm dɔn pas we Job day, Setan stil de fityay Jiova ɛn i de lay pan in savant dɛn. Fɔ ɛgzampul, Prɔvabs 27:​11 se: “Mi pikin, sho se yu gɛt sɛns ɛn mek a gladi, so a go ebul ansa ɛnibɔdi we briŋ fityay to mi.”

¹⁵ Yu kin disayd fɔ lisin to Jiova ɛn de biɛn am as in padi bay we yu sho se Setan na layman. Di bɛst tin we yu go disayd fɔ du, na we yu mek chenj na yu layf so dat yu go bi Gɔd in padi! Di disayd we yu de disayd na impɔtant tin. Setan bin se yu nɔ go ebul fɔ de biɛn Gɔd we yu gɛt prɔblɛm. I kin tray fɔ ful wi fɔ mek wi go kɔmɔt biɛn Gɔd. Aw i de du dat?

16. (a) Us we dɛn Setan de yuz fɔ mek pipul dɛn stɔp fɔ sav Jiova? (b) Aw Setan go tray fɔ stɔp yu fɔ mek yu nɔ sav Jiova?

¹⁶ Setan de yuz difrɛn we dɛn fɔ tray fɔ stɔp wi fɔ mek wi nɔ bi Gɔd in padi. I de atak wi “lɛkɛ aŋri layɔn, fɔ fɛn udat in go fɔdɔm pan.” (Pita In Fɔs Lɛta 5:​8) Yu nɔ fɔ sɔprayz if yu padi dɛn, fambul dɛn, ɔ ɔda pipul dɛn de tray fɔ stɔp yu fɔ stɔdi di Baybul ɛn fɔ du wetin rayt. Yu go fil lɛk se dɛn de atak yu.a (Jɔn 15:​19, 20) Setan de mek lɛk se in na “enjɛl we de briŋ layt.” So i go tray fɔ ful wi fɔ mek wi nɔ go lisin to Jiova. (Sɛkɛn Lɛta Fɔ Kɔrint 11:​14) Ɔda tin we Setan de du fɔ tray fɔ stɔp wi nɔ fɔ sav Jiova na fɔ mek wi tink se wi nɔ fit fɔ sav Gɔd.—Prɔvabs 24:​10, NW.

17. Wetin mek wi de obe Jiova?

¹⁷ We wi obe Jiova, wi de sho se Setan na layman. Wetin go ɛp wi fɔ obe? Di Baybul se: “Dɛn fɔ lɛk PAPA GƆD [“Jiova,” NW] wit ɔl dɛn at, wit ɔl dɛn sol ɛn wit ɔl dɛn trɛnk.” (Ditarɔnɔmi 6:​5) Wi de obe Jiova bikɔs wi lɛk am. As wi de lɛk Jiova mɔ ɛn mɔ, wi go want fɔ du ɔltin we i tɛl wi fɔ du. Di apɔsul Jɔn bin rayt se: “We wi lɛk Gɔd wi de du ɔl wetin i tɛl wi fɔ du. Wetin i tɛl wi fɔ du nɔ traŋa fɔ wi.”—Jɔn In Fɔs Lɛta 5:​3.

18, 19. (a) Wetin na sɔm tin dɛn we Jiova se bad? (b) Aw wi no se Jiova nɔ de tɛl wi fɔ du sɔntin we wi nɔ ebul fɔ du?

¹⁸ Wetin na sɔm tin dɛn we Jiova tɛl wi se na bad tin dɛn? Sɔm ɛgzampul dɛn de na di bɔks we se “Et Wetin Jiova Et.” Fɔs, yu go tink se sɔm pan dɛn tin dɛn ya nɔ rili bad. Bɔt we yu rid di vas dɛn we de na di Baybul ɛn tek tɛm tink bɔt dɛn, yu go ɔndastand se i mek sɛns fɔ mek wi obe Jiova in lɔ dɛn. Yu go no bak se yu nid fɔ mek sɔm chenj dɛn na yu layf. Pan ɔl we sɔntɛnde i nɔ go izi, if yu mek dɛn chenj dɛn ya, yu go gɛt kolat, ɛn yu go gladi fɔ we yu de biɛn Gɔd as in padi. (Ayzaya 48:​17, 18) Aw wi kam fɔ no se i pɔsibul fɔ mek dɛn chenj dɛn ya?

¹⁹ Jiova nɔ de ɛva tɛl wi fɔ du ɛnitin we wi nɔ ebul fɔ du. (Ditarɔnɔmi 30:​11-14) As tru tru Padi, i sabi wi pas aw wi sabi wisɛf. I no wetin wi ebul fɔ du ɛn wetin wi nɔ ebul fɔ du. (Sam 103:​14) Di apɔsul Pɔl bin ɛnkɔrej wi se: “Gɔd we de du ɛnitin we i prɔmis fɔ du, nɔ go mek una fil fɔ du ɛni bad tin we una nɔ go gɛt pawa fɔ lɛf; bɔt wɛn una fil fɔ du bad, da sem tɛm de Gɔd go mek una ebul tinap traŋa ɛn i go sho una wetin fɔ du mek una nɔ go du di bad tin we una bin want fɔ du.” (Fɔs Lɛta Fɔ Kɔrint 10:​13) Wi fɔ biliv se Jiova go gi wi di trɛnk fɔ du wetin rayt ɔltɛm. I go gi yu “di pawa fɔ kɔntrol ɔltin” fɔ ɛp yu fɔ bia ɛni prɔblɛm dɛn we yu go gɛt. (Sɛkɛn Lɛta Fɔ Kɔrint 4:​7) Afta we Jiova bin dɔn ɛp Pɔl, Pɔl bin se: “A ebul fɔ du ɔltin bikɔs sɔmbɔdi de we de gi mi pawa.”—Lɛta Fɔ Filipay 4:​13, NW.

20. Us kwaliti dɛn yu fɔ falamakata? Wetin mek yu fɔ falamakata dɛn kwaliti dɛn de?

²⁰ If wi want fɔ bi Jiova in padi, wi fɔ stɔp fɔ du di tin dɛn we Jiova se bad, bɔt nɔto dat nɔmɔ, wi fɔ du mɔ. (Lɛta Fɔ Rom 12:​9) Gɔd in padi dɛn lɛk wetin i lɛk. Dɛn tɔk bɔt dɛn na Sam 15:​1-5. (Rid.) Jiova in padi dɛn fɔ falamakata in kwaliti dɛn ɛn sho se dɛn gɛt “lɔv, gladi at, kolat, peshɛnt.” Dɛn “fɔ bisin bɔt ɔda pɔsin,” dɛn “fɔ du gud,” dɛn “fɔ gɛt fet,” dɛn “nɔ fɔ vɛks kwik,” ɛn dɛn “fɔ kɔntrol” dɛnsɛf.—Lɛta Fɔ Galeshya 5:​22, 23.

21. Aw yu go lan fɔ sho di kwaliti dɛn we Gɔd lɛk?

²¹ Aw yu go lan fɔ sho dɛn fayn fayn kwaliti dɛn de? Yu nid fɔ lan wetin Jiova lɛk bay we yu de rid ɛn stɔdi di Baybul ɔltɛm. (Ayzaya 30:​20, 21) We yu de du dis, yu go lɛk Jiova mɔ, ɛn as tɛm de go, yu go want fɔ obe am.

22. Wetin go apin if yu obe Jiova?

²² Di chenj dɛn we yu go nid fɔ mek na yu layf, go tan lɛk we yu de pul ol klos ɛn wɛr nyu wan. Di Baybul se una nid fɔ “lɛf una ol layf [ɔ, abit]” ɛn una fɔ “bi nyu pipul.” (Lɛta Fɔ Kɔlɔse 3:​9, 10) Pan ɔl we i nɔ go izi, we wi mek dɛn chenj dɛn ya ɛn obe Jiova, i dɔn prɔmis wi se i go “blɛs” wi. (Sam 19:​11) Disayd fɔ obe Jiova ɛn sho se Setan na layman. Nɔ sav Jiova bikɔs i dɔn prɔmis fɔ blɛs yu tumara bambay, bɔt yu fɔ sav am bikɔs yu rili lɛk am. Dɔn yu go bi Gɔd in tru tru padi!