Yɔŋ Brɔda dɛn, Una Tray fɔ Bi Machɔ Kristian Dɛn

 1. Wetin brɔda we na Kristian go du fɔ mek bɛtɛ fala am?

KIŊ Devid bin tɛl Sɔlɔmɔn se: “Gɛt maynd ɛn sho se yu na man.” (1 Kiŋ 2:​1-3, NWT) Da advays de impɔtant fɔ ɔl di man dɛn we de tray fɔ falamakata Jizɔs tide. Fɔ mek bɛtɛ fala dɛn, dɛn fɔ lan fɔ obe Gɔd in lɔ dɛn ɛn aplay Baybul prinsipul dɛn pan ɔl wetin dɛn de du. (Lyuk 2:52) Wetin mek i rili impɔtrant fɔ yɔŋ brɔda dɛn fɔ tray fɔ bi machɔ Kristian dɛn?

2-3. Wetin mek i impɔtant fɔ lɛ yɔŋ brɔda tray fɔ bi machɔ Kristian?

² Man we na Kristian gɛt bɔku impɔtant wok dɛn fɔ du na di famili ɛn na di kɔngrigeshɔn. Wan dawt nɔ de se yɔŋ brɔda dɛn go dɔn tink bɔt di wok dɛn we dɛn go du tumara bambay. Sɔntɛm yu go want fɔ bi payɔnia, ministerial savant, ɛn leta, bi ɛlda. Ɔ sɔntɛm yu go want bak fɔ mared ɛn bɔn pikin dɛn. (Ɛfi. 6:4; 1 Tim. 3:1) Fɔ mek yu go ebul du dɛn tin dɛn de, yu nid fɔ bi machɔ Kristian.b

³ Wetin go ɛp yu fɔ bi machɔ Kristian? Impɔtant tin dɛn de we yu nid fɔ lan ɛn sabi fɔ du. Bɔt wetin yu go du naw fɔ rɛdi fɔ ɛni wok we yu go du tumara bambay so dat yu go ebul fɔ du am fayn fayn wan?

 4. Usay yu go fɛn gud ɛgzampul dɛn fɔ falamakata? (Luk bak di pikchɔ.)

⁴ Pik pipul dɛn we de sɛt fayn ɛgzampul we yu go falamakata. Di Baybul gɛt bɔku pipul we bin sɛt fayn ɛgzampul we yɔŋ brɔda dɛn kin falamakata. Dɛn man dɛn de we bin de trade bin lɛk Gɔd ɛn dɛn bin gɛt difrɛn wok dɛn we dɛn bin de du fɔ kia fɔ Gɔd in pipul dɛn. Yu go ebul bak fɔ fɛn machɔ Kristian brɔda dɛn na yu famili ɛn kɔngrigeshɔn. (Ibru. 13:7) Ɛn yu gɛt pɔsin we na pafɛkt ɛgzampul we yu go ebul falamakata, we na Jizɔs Krays. (1 Pit. 2:21) As yu de tek tɛm stɔdi dɛn ɛgzampul dɛn ya, tink bɔt di kwaliti dɛn we yu de kɔle pan dɛn man dɛn ya. (Ibru. 12:​1, 2) Dɔn tink bɔt aw yu go falamakata dɛn.

 5. Aw yu go ebul lan fɔ tink fayn fayn wan? Wetin mek dat impɔtant? (Sam 119:9)

⁵ Tray fɔ bi pɔsin we “de tink fayn fayn wan” ɛn kɔntinyu fɔ gɛt da kwaliti de. (Prɔv. 3:​21, NWT) Man we ebul fɔ tink fayn fayn wan de tek tɛm tink bifo i du sɔntin. So tray tranga wan fɔ gɛt dis kwaliti ɛn kɔntinyu fɔ gɛt am. Wetin mek? Dis wɔl fu-lɔp wit yɔŋman dɛn we de fala wetin dɛn tink ɔ we de alaw di we aw dɛn de fil fɔ kɔntrol di tin dɛn we dɛn de du. (Prɔv. 7:7; 29:11) Dɔn bak, tɛlivishɔn program dɛn, fim dɛn, di Intanɛt, ɛn soshal midia kin afɛkt di we aw yu de tink ɛn du tin. Bɔt wetin yu go du fɔ mek yu ebul fɔ de tink fayn fayn wan? Fɔs, lan frɔm di Baybul bɔt aw Jiova de tink ɛn fil. Dɔn, tink bɔt wetin mek i fayn fɔ mek yu du wetin i se. Ɛn yuz di tin dɛn we yu dɔn lan fɔ ɛp yu fɔ disayd fɔ du tin dɛn we go mek Jiova gladi. (Rid Sam 119:9.) If yu tray fɔ gɛt di abit fɔ tink dis kayn we, dat go rili ɛp yu fɔ bi machɔ Kristian. (Prɔv. 2:​11, 12; Ibru. 5:14) Lɛ wi tɔk bɔt aw fɔ ebul tink fayn fayn wan go bɛnifit yu tu we dɛn: (1) we i kam pan aw yu de biev wit sista dɛn (2) we i kam pan aw yu de drɛs.

 6. We yɔŋ brɔda de tink fayn fayn wan, aw dat go ɛp am fɔ sho se i de rɛspɛkt sista dɛn?

⁶ Man we dɔn lan fɔ tink lɛk aw Jiova de tink de rɛspɛkt uman dɛn. Fɔ ɛgzampul, sɔntɛm wan yɔŋ brɔda go si wan sista we i lɛk ɛn natin nɔ rɔng wit dat. Bɔt, yɔŋ brɔda we de tink lɛk aw Jiova de tink nɔ go tɔk, rayt, ɔ du ɛnitin we go mek di sista fil lɛk se i want am, we i bi se i nɔ want fɔ mared am. (1 Tim. 5:​1, 2) If in ɛn wan sista de wach dɛnsɛf, i go protɛkt di gudnem we di sista gɛt bay we i nɔ go ɛva de wit am na ples we ɔda pipul dɛn nɔ de si dɛn.​—1 Kɔr. 6:18.

 7. We yɔŋ brɔda de tink fayn fayn wan, aw dat go ɛp am fɔ disayd uskayn klos fɔ wɛr ɛn uskayn ia stayl fɔ mek?

⁷ Yɔŋ brɔda we gɛt di abit fɔ tink fayn fayn wan go sho dis abit bak bay di klos dɛn we i de wɛr ɛn di kayn ia stayl dɛn we i de mek. Bɔku pan di wan dɛn we de dizayn ɛn advatayz nyu stayl dɛn pan klos nɔ de rɛspɛkt Jiova. Dɔn bak, dɛn de liv fri layf. So di klos dɛn we dɛn de dizayn kin rili tayt ɔ kin mek man dɛn luk lɛk uman dɛn. Yɔŋ brɔda we de tray fɔ bi machɔ Kristian go alaw Baybul prinsipul dɛn ɛn gud ɛgzampul dɛn na di kɔngrigeshɔn fɔ gayd am we i de pik wetin fɔ wɛr. I go aks insɛf dɛn kwɛstyɔn dɛn ya: ‘Di tin dɛn we a de pik fɔ wɛr de sho se a de tink di rayt we ɛn a rɛspɛkt ɔda pipul dɛn? Di we aw a de drɛs de mek i izi fɔ ɔda pipul dɛn fɔ biliv se a de sav Gɔd?’ (1 Kɔr. 10:​31-33; Tay. 2:6) Yɔŋ brɔda we gɛt di abit fɔ tink fayn fayn wan nɔ go jɔs gɛt rɛspɛkt frɔm in brɔda ɛn sista dɛn na di kɔngrigeshɔn, bɔt in Papa we de na ɛvin sɛf go rɛspɛkt am.

 8. Aw yɔŋ brɔda go ebul lan fɔ bi pɔsin we ɔda pipul dɛn kin abop pan?

⁸ Bi pɔsin we pipul dɛn kin abop pan. Yɔŋ brɔda we ɔda pipul dɛn kin abop pan go tray tranga wan fɔ du ɔl in wok dɛn. (Lyuk 16:10) Tink bɔt Jizɔs in pafɛkt ɛgzampul. In nɔto pɔsin we nɔ bin de tek in wok siriɔs. I bin du di wok dɛn we Jiova bin gi am ivin we i nɔ bin izi fɔ am fɔ du dɛn. I bin lɛk pipul dɛn, mɔ in disaypul dɛn ɛn i bin rɛdi fɔ gi in layf fɔ dɛn. (Jɔn 13:1) Fɔ falamakata Jizɔs, tray tranga wan fɔ du ɛni wok we dɛn gi yu. Put yusɛf dɔŋ ɛn aks machɔ brɔda dɛn fɔ ɛp yu if yu nɔ shɔ bɔt aw fɔ du am. Nɔ jɔs du af ɛn lɛf af. (Rom. 12:11) Bifo dat, dɔn di wok we dɛn gi yu fɔ du, du am “lɛk se na fɔ Jiova [yu] de du am, ɛn nɔto fɔ mɔtalman.” (Kol. 3:23) Yu nɔ pafɛkt, so put yusɛf dɔŋ ɛn gri fɔ tek di blem fɔ ɛni mistek we yu mek.​—Prɔv. 11:2.

 9. Wetin mek yɔŋ brɔda fɔ lan fɔ du wok dɛn?

⁹ Fɔ mek yu go bi machɔ Kristian, yu nid fɔ lan fɔ du tin dɛn we go ɛp yu na layf. Dis go ɛp yu fɔ mek yu go ebul fɔ du wok dɛn na di kɔngrigeshɔn, fɔ ebul gɛt wok fɔ sɔpɔt yusɛf ɔ yu famili, ɛn fɔ gɛt tayt padi biznɛs wit ɔda pipul dɛn. Lɛ wi tɔk bɔt sɔm impɔtant tin dɛn we yu fɔ lan fɔ du.

10-11. Aw yɔŋ brɔda go bɛnifit insɛf ɛn di kɔngrigeshɔn bay we i lan fɔ rid ɛn rayt fayn fayn wan? (Sam 1:​1-3) (Luk bak di pikchɔ.)

¹⁰ Lan fɔ rid ɛn rayt fayn fayn wan. Di Baybul se bɛtɛ de fala man we de fɛn tɛm fɔ rid Gɔd in Wɔd ɛn tink gud gud wan bɔt am, ɛn i de gladi. (Rid Sam 1:​1-3.) We i de rid di Baybul ɛvride, i go kam fɔ no aw Jiova de tink ɛn dis go ɛp am fɔ tink di rayt we ɛn lan fɔ aplay di Skripchɔ dɛn. (Prɔv. 1:​3, 4) Na dɛn kayn man dɛn de dɛn nid na di kɔngrigeshɔn. Wetin mek?

¹¹ Wi brɔda ɛn sista dɛn nid man dɛn we ebul fɔ yuz di Baybul fɔ tich ɛn gi advays we go ɛp dɛn. (Tay. 1:9) If yu sabi rid ɛn rayt fayn fayn wan, yu go ebul fɔ pripia fayn fayn tɔk ɛn kɔmɛnt dɛn we go bɛnifit ɔda pipul dɛn ɛn ɛp dɛn fɔ gɛt mɔ fet. Yu go ebul bak fɔ tek not dɛn we yu de stɔdi ɛn lisin to tɔk dɛn na mitin, asɛmbli, ɛn kɔnvɛnshɔn dɛn we go rili ɛp yu. Dɛn not dɛn de go ɛp yu fɔ gɛt fet mɔ ɛn mɔ ɛn fɔ ɛnkɔrej ɔda pipul dɛn.

12. Wetin go ɛp yu fɔ bi pɔsin we de tek tɛm lisin ɛn tɔk fayn fayn wan?

¹² Lan fɔ lisin ɛn tɔk fayn fayn wan. Man we na Kristian nid fɔ lan fɔ lisin ɛn tɔk fayn fayn wan. Dis min se i nid fɔ lisin ɛn tray fɔ ɔndastand aw ɔda pipul dɛn de tink ɛn fil. (Prɔv. 20:5) I kin tray fɔ no wetin ɔda pipul dɛn de tink ɔ aw dɛn de fil bay aw dɛn vɔys de we dɛn de tɔk ɛn aw dɛn mek dɛn fes ɛn dɛn bɔdi. Yu nɔ go ebul fɔ du dis if yu nɔ de spɛn tɛm wit ɔda pipul dɛn. If na bay imel ɛn tɛks mɛsej yu dɔn yus fɔ tɔk to ɔda pipul dɛn, i nɔ go izi fɔ lɛ yu tɔk to dɛn fes-to-fes. So mek tɛm fɔ tɔk wit ɔda pipul dɛn fes-to-fes.​—2 Jɔn 12.

13. Wetin bak yɔŋman nid fɔ lan fɔ du? (1 Timoti 5:8) (Luk bak di pikchɔ.)

¹³ Lan fɔ sɔpɔt yusɛf. Man we na machɔ Kristian fɔ ebul sɔpɔt insɛf ɛn di wan dɛn we de na in os. (Rid 1 Timoti 5:8.) Insay sɔm kɔntri dɛn, yɔŋ brɔda dɛn kin lan aw fɔ du patikyula wok dɛn frɔm dɛn papa ɔ ɔda fambul dɛn. Na ɔda kɔntri dɛn, dɛn kin lan aw fɔ du biznɛs ɔ ɔda wok di tɛm we dɛn de go skul. Ilɛk aw i bi, i fayn fɔ sabi du sɔntin we go ɛp yu fɔ fɛn wok. (Akt 18:​2, 3; 20:34; Ɛfi. 4:28) Gɛt di abit fɔ wok tranga wan ɛn dɔn ɛni wok we yu stat. Ɔda pipul dɛn go notis dis abit ɛn tɔk gud tin bɔt yu wok. If yu du dat, i go izi mɔ fɔ mek yu gɛt wok ɛn wok nɔ go lɛf yu. Di kwaliti dɛn we yu fɔ gɛt ɛn di tin dɛn we yu fɔ sabi du we wi dɔn tɔk bɔt impɔtant bak fɔ man we na Kristian so dat i go ebul fɔ du di wok dɛn we i go gɛt tumara bambay. Lɛ wi tɔk bɔt sɔm pan dɛn wok dɛn de.

14. Wetin go ɛp yɔŋ brɔda fɔ rɛdi fɔ yuz ɔl in tɛm fɔ sav Jiova?

¹⁴ Pɔsin we de yuz ɔl in tɛm fɔ sav Jiova. Bɔku man dɛn we na machɔ Kristian dɛn bin bigin fɔ yuz ɔl dɛn tɛm fɔ sav Jiova we dɛn bin yɔŋ. We yɔŋ brɔda de payɔnia, dat de ɛp am fɔ sabi aw fɔ wok fayn fayn wan wit difrɛn pipul dɛn. I de ɛp am bak fɔ sabi yuz di mɔni we i de gɛt wit sɛns ɛn nɔ spɛn pas wetin i de gɛt. (Fil. 4:​11-13) Wan fayn we fɔ bigin yuz ɔl yu tɛm fɔ sav Jiova na we yu de ɔgzilari payɔnia. Bɔku brɔda dɛn bin ɔgzilari payɔnia fɔ sɔm tɛm, ɛn dat bin ɛp dɛn fɔ bigin rɛgyula payɔnia. We pɔsin de payɔnia, dat de mek i gɛt chans fɔ du ɔda wok dɛn lɛk fɔ bi kɔnstrɔkshɔn savant, ɛn fɔ wok na Bɛtɛl.

15-16. Wetin go ɛp yɔŋ brɔda fɔ bi ministerial savant ɔ ɛlda?

¹⁵ Ministerial savant ɔ ɛlda. Ɔl brɔda dɛn fɔ tray fɔ kwalifay ɛn gɛt di kwaliti dɛn we dɛn nid fɔ wok fɔ dɛn brɔda ɛn sista dɛn as ɛlda dɛn na di kɔngrigeshɔn. Di Baybul se man dɛn we de tray fɔ du dis na “fayn wok [dɛn] want fɔ du.” (1 Tim. 3:1) Bifo brɔda kwalifay fɔ bi ɛlda, i fɔ kwalifay fɔs fɔ wok as ministerial savant. Ministerial savant dɛn de ɛp di ɛlda dɛn fɔ du impɔtant wok dɛn. Ɛlda ɛn ministerial savant dɛn de put dɛnsɛf dɔŋ fɔ wok fɔ dɛn brɔda ɛn sista dɛn ɛn fɔ du di prichin wok wit zil. Yɔŋ brɔda dɛn go ebul kwalifay fɔ bi ministerial savant ivin we dɛn stil de bitwin 17 ɛn 19 ia. Ɛn ministerial savant we rili kwalifay kin bi ɛlda ivin we i jɔs 20 ia.

¹⁶ Aw yu go gɛt di kwaliti we yu nid fɔ bi ministerial savant ɛn fɔ bi ɛlda leta? Di Baybul tɔk bɔt di kwaliti dɛn we yu nid fɔ gɛt we go mek yu kwalifay. Bɔt, mɛmba se na di lɛk we yu lɛk Jiova, yu famili, ɛn di kɔngrigeshɔn go mek yu gɛt dɛn kwaliti dɛn de. (1 Tim. 3:​1-13; Tay. 1:​6-9; 1 Pit. 5:​2, 3) Tray tranga wan fɔ ɔndastand dɛn kwaliti dɛn de we go ɛp yu fɔ kwalifay. Pre fɔ mek Jiova ɛp yu fɔ gɛt dɛn kwaliti dɛn ya.c

17. Wetin go ɛp yɔŋ brɔda fɔ rɛdi fɔ bi maredman ɛn pɔsin we de oba in famili? (Luk bak di pikchɔ.)

¹⁷ Maredman ɛn pɔsin we de oba in famili. As Jizɔs bin tɔk, sɔm man dɛn we na machɔ Kristian dɛn kin disayd nɔ fɔ mared. (Mat. 19:12) Bɔt, if yu disayd fɔ mared, yu go gɛt mɔ wok dɛn lɛk fɔ bi maredman ɛn pɔsin we de oba in famili. (1 Kɔr. 11:3) Jiova de ɛkspɛkt maredman fɔ lɛk in wɛf ɛn kia fɔ di tin dɛn we i nid, fɔ bi in tayt padi, ɛn fɔ ɛp am fɔ kɔntinyu fɔ de nia Jiova. (Ɛfi. 5:​28, 29) Di kwaliti dɛn ɛn di tin dɛn we yu fɔ lan we wi dɔn tɔk bɔt insay dis atikul, lɛk fɔ tink gud gud wan, fɔ rɛspɛkt uman dɛn, ɛn fɔ bi pɔsin we ɔda pipul dɛn kin abop pan go ɛp yu fɔ bi gud maredman. Yu go ebul fɔ rɛdi gud gud wan fɔ du yu wok as maredman ɛn pɔsin we de oba in famili.

18. Wetin go ɛp yɔŋ brɔda fɔ rɛdi fɔ bi papa?

¹⁸ Papa. Afta yu mared, sɔntɛm yu go bi papa. Wetin yu go ebul lan frɔm Jiova bɔt aw fɔ bi gud papa? Bɔku lɛsin dɛn de we yu go lan. (Ɛfi. 6:4) Jiova bin tɛl Jizɔs we na in Bɔypikin se i lɛk am ɛn gladi fɔ am usay ɔda pipul dɛn bin de. (Mat. 3:17) If yu bi papa, mek shɔ se yu ɛp yu pikin dɛn fɔ no ɔltɛm se yu lɛk dɛn. Tɛl dɛn tɛnki fɔ di gud tin dɛn we dɛn de du. Papa dɛn we de falamakata Jiova in ɛgzampul de ɛp dɛn pikin dɛn fɔ bi machɔ Kristian man ɛn uman dɛn. Yu go ebul fɔ rɛdi naw fɔ bi gud papa bay we yu de sho se yu lɛk ɛn kia fɔ ɔda pipul dɛn na yu famili ɛn na di kɔngrigeshɔn, ɛn we yu de tɛl dɛn se yu lɛk ɛn valyu dɛn. (Jɔn 15:9) Dis go ɛp yu fɔ bi gud maredman ɛn papa tumara bambay. Bɔt rayt naw, yu go ebul bi pɔsin we valyu to Jiova, yu famili, ɛn di kɔngrigeshɔn.

19-20. Wetin go ɛp yɔŋ brɔda fɔ bi machɔ Kristian? (Luk di pikchɔ na di frɔnt pej.)

¹⁹ Yɔŋ brɔda dɛn, nɔto wantɛm wantɛm una go bi machɔ Kristian dɛn. Una nid fɔ pik pipul dɛn we de sɛt fayn ɛgzampul dɛn we una kin falamakata, fɔ ebul tink fayn fayn wan, fɔ bi pɔsin we ɔda pipul dɛn kin abop pan, fɔ lan wok dɛn, ɛn fɔ rɛdi fɔ di wok dɛn we una go du tumara bambay.

²⁰ We yu tink bɔt ɔl di tin dɛn we yu nid fɔ du, sɔntɛm yu go fil se dɛn tu at fɔ du. Bɔt yu go ebul fɔ du dɛn. Mɛmba se Jiova rili want fɔ ɛp yu. (Ayz. 41:​10, 13) Fɔ tru, yu brɔda ɛn sista dɛn na di kɔngrigeshɔn go ɛp yu bak. We yu bi di kayn man we Jiova want yu fɔ bi, yu go ɛnjɔy yu layf ɛn satisfay. Wi lɛk una wi yɔŋ brɔda dɛn! Mek Jiova kɔntinyu fɔ blɛs una as una de wok naw fɔ bi machɔ Kristian dɛn.​—Prɔv. 22:4.