Aw Kristian dɛn Fɔ Si Rɔm?

Ɔlsay na di wɔl, pipul dɛn gɛt difrɛn we dɛn aw dɛn de tink bɔt rɔm. Sɔm pipul dɛn kin ɛnjɔy fɔ drink wan wan tɛm wit dɛn padi dɛn. Ɔda pipul dɛn kin disayd nɔ fɔ drink rɔm atɔl. Stil sɔm pipul dɛn kin drink te dɛn chak. Wetin di Baybul se bɔt rɔm?

1. I bad fɔ drink rɔm?

Di Baybul nɔ tɔk se i bad fɔ drink rɔm. We i de tɔk bɔt di bɔku fayn fayn gift dɛn we Gɔd gi wi, di Baybul tɔk bɔt “wayn we de mek man at swit.” (Sam 104:​14, 15) Sɔm fetful man ɛn uman dɛn we di Baybul tɔk bɔt bin de drink wayn.​—1 Timoti 5:​23.

2. Us advays di Baybul gi di wan dɛn we disayd fɔ drink?

Jiova kɔndɛm pasmak drink ɛn fɔ chak. (Galeshians 5:​21) In Wɔd, di Baybul se: “Nɔ miks wit pipul dɛn we de drink wayn pasmak.” (Prɔvabs 23:​20, NWT) So if wi disayd fɔ drink, ilɛk na wi wan de, wi nɔ fɔ drink te wi nɔ ebul fɔ tink di rayt we, wi nɔ ebul fɔ kɔntrol wetin wi de tɔk ɛn du, ɔ wi ambɔg wi wɛlbɔdi. If wi nɔ ebul kɔntrol aw wi de drink, i go bɛtɛ lɛ wi nɔ drink atɔl.

3. Aw wi go sho se wi rɛspɛkt wetin ɔda pipul dɛn disayd bɔt rɔm?

Ɔlman fɔ disayd fɔ insɛf if i go drink rɔm ɔ i nɔ go drink. Wi nɔ fɔ jɔj pɔsin we disayd se i go drink smɔl, ɛn wi nɔ fɔ fos pɔsin we disayd se i nɔ go drink atɔl. (Romans 14:​10) Wi kin disayd nɔ fɔ drink if dat go ambɔg ɔda pipul dɛn. (Rid Romans 14:​21.) Wi de “tray fɔ du tin we go bɛnifit ɔda pɔsin, nɔto wetin go bɛnifit [wi].”​—Rid 1 Kɔrintians 10:​23, 24.

LAN MƆ

4. Disayd if yu go drink rɔm

Wetin Jizɔs bin tink bɔt fɔ drink rɔm? Fɔ sabi di ansa to da kwɛstyɔn, lan bɔt di fɔs mirekul we i bin pafɔm. Rid Jɔn 2:​1-​11, dɔn una tɔk bɔt dɛn kwɛstyɔn dɛn ya:

• Frɔm dis mirekul, wetin wi lan bɔt aw Jizɔs de si rɔm ɛn di wan dɛn we de drink am?

• Bikɔs Jizɔs nɔ se i bad fɔ drink rɔm, aw Kristian dɛn fɔ si pɔsin we disayd fɔ drink am?

Bikɔs Kristian dɛn fri fɔ drink rɔm, dat nɔ min se dɛn fɔ de drink am ɔltɛm. Rid Prɔvabs 22:​3, dɔn una tɔk bɔt aw di pɔynt dɛn we de dɔŋ go ɛp yu fɔ disayd if yu fɔ drink rɔm:

• We yu gɛt fɔ drayv ɔ ɔpret mashin.

• We yu gɛt bɛlɛ.

• We dɔktɔ bin dɔn advays yu nɔ fɔ drink rɔm.

• We yu gɛt prɔblɛm fɔ kɔntrol ɔmɔs rɔm yu fɔ drink.

• We di lɔ nɔ alaw yu fɔ drink rɔm.

• We yu de wit pɔsin we disayd nɔ fɔ drink bikɔs i bin gɛt prɔblɛm fɔ kɔntrol ɔmɔs i fɔ drink trade.

Yu fɔ sav rɔm pan mared risɛpshɔn ɔ pan ɔda program dɛn? Fɔ si wetin go ɛp yu fɔ disayd, ple di VIDIO.

VIDIO: A Fɔ Sav Rɔm? (2:​41)

Rid Romans 13:​13 ɛn 1 Kɔrintians 10:​31, 32. Afta una rid ɛniwan pan dɛn skripchɔ dɛn, una tɔk bɔt dis kwɛstyɔn:

• We yu aplay dis prinsipul, aw dat go ɛp yu fɔ disayd fɔ du sɔntin we go mek Jiova gladi?

5. Disayd ɔmɔs rɔm yu fɔ drink

If yu disayd fɔ drink rɔm, mɛmba dis: Jiova nɔ se i bad fɔ drink rɔm bɔt i se i bad fɔ drink pasmak. Wetin mek? Rid Ozie 4:​11, 18, dɔn una tɔk bɔt dis kwɛstyɔn:

• Wetin kin apin we pɔsin drink pasmak?

Aw wi go avɔyd fɔ drink pasmak? Wi nid fɔ no usay fɔ stɔp we i kam pan rɔm biznɛs. Rid Prɔvabs 11:​2, dɔn una tɔk bɔt dis kwɛstyɔn:

• Wetin mek i fayn fɔ sɛt limit bɔt ɔmɔs rɔm yu fɔ drink?

6. Wetin go ɛp pɔsin nɔ fɔ drink pasmak?

VIDIO: ‘A Bin Taya wit di We Aw A Bin De Liv Mi Layf’ (6:​32)

• Insay di vidio, aw rɔm bin de afɛkt di we aw Dimitri bin de biev?

• I bin ebul fɔ lɛf wantɛm wantɛm?

• Aw i bin ebul fɔ lɛf di abit fɔ drink rɔm?

Rid 1 Kɔrintians 6:​9-11, dɔn una tɔk bɔt dɛn kwɛstyɔn dɛn ya:

• Wetin di Baybul se bɔt fɔ drink te yu chak?

• Wetin sho se pɔsin we de drink te i chak kin chenj?

Rid Matyu 5:​30, dɔn una tɔk bɔt dis kwɛstyɔn:

• We Jizɔs bin yuz di ɛgzampul se pɔsin fɔ kɔt in an, i bin min se wi go nid fɔ giv-ɔp sɔntin fɔ mek Jiova gladi. Wetin yu go du if yu si am se i nɔ izi fɔ yu fɔ lɛf fɔ drink pasmak?a

Rid 1 Kɔrintians 15:​33, dɔn una tɔk bɔt dis kwɛstyɔn:

• Wetin go apin if yu de spɛn tɛm wit pipul dɛn we lɛk fɔ drink pasmak?

WETIN YU DƆN LAN?

Jiova mek rɔm fɔ lɛ wi ɛnjɔy wisɛf, bɔt i se i bad fɔ drink am pasmak ɛn fɔ chak.

Rivyu

• Wetin di Baybul se bɔt rɔm?

• Wetin na di bad tin dɛn we go apin if wi drink rɔm pasmak?

• Aw wi go sho se wi rɛspɛkt wetin ɔda pipul dɛn disayd bɔt rɔm?

DU MƆ RISACH

Aw yɔŋ wan dɛn go disayd di rayt tin we i kam pan rɔm?

Tink bɔt Wetin Go Apin We Yu Drink (2:​31)

Lan wetin-ɛn-wetin yu go du fɔ lɛf fɔ drink pasmak.

“Tink di Rayt We bɔt Rɔm” (Di Wachtawa, Janwari 1, 2010)

Kristian fɔ tost?

“Kwɛstyɔn dɛn we Pipul dɛn Kin Aks” (Di Wachtawa, Fɛbwari 15, 2007)

Insay di stori we gɛt di taytul “Mi Na Bin Drɔm we Nɔ Gɛt Bɔtɔm,” lan aw wan man bin lɛf fɔ drink pasmak.

“Di Baybul De Chenj Pipul dɛn Layf” (Di Wachtawa, Me 1, 2012)