Una Lɛf Ɔltin we De Wɔri Una na Jiova in An

1, 2. (a) Wetin mek wi kin wɔri? (Luk di pikchɔ nia dis atikul in taytul.) (b) Wetin wi go tɔk bɔt na dis atikul?

TIDE, Setan “de go ɔlɔbɔt lɛkɛ aŋri layɔn, fɔ fɛn udat in go fɔdɔm pan.” (Pita In Fɔs Lɛta 5:​8; Rɛvɛleshɔn 12:​17) Dis dɔn mek layf nɔ izi, ɛn ivin Gɔd in savant dɛn kin wɔri. Trade trade, tɛm bin de we Gɔd in savant dɛn bin de wɔri. Fɔ ɛgzampul, di Baybul se sɔntɛnde Kiŋ Devid bin de wɔri. (Sam 13:​2) Ɛn apɔsul Pɔl bin de “wɔri fɔ ɔl di kɔngrigeshɔn dɛn.” (Sɛkɛn Lɛta Fɔ Kɔrint 11:​28, NW) Bɔt wetin wi fɔ du we wi de wɔri pasmak?

² Wi papa na ɛvin bin ɛp in savant dɛn trade fɔ mek dɛn lɛf fɔ wɔri tumɔs, ɛn i want fɔ du di sem tin fɔ wi tide. Di Baybul tɛl wi se: “Una lɛf ɔltin we de wɔri una na Gɔd in an, bikɔs i bisin bɔt una.” (Pita In Fɔs Lɛta 5:​7, NW) Aw yu go ebul fɔ du dat? Lɛ wi tɔk bɔt 4 tin dɛn we yu go du. Yu kin (1) pre, (2) rid Gɔd in Wɔd ɛn tink gud wan, (3) alaw Jiova in oli spirit fɔ ɛp yu, ɛn (4) tɔk to sɔmbɔdi we yu biliv ɛn tɛl am aw yu de fil. As wi de tɔk bɔt dɛn 4 tin dɛn ya, tray fɔ si us wan pan dɛn yu nid fɔ du mɔ.

 3. Aw yu go “trowe yu prɔblɛm pan Jiova”?

³ Di fɔs we aw wi go ebul trowe wi prɔblɛm pan Jiova na we wi pre to am wit ɔl wi at. We yu de wɔri, yu papa na ɛvin we lɛk yu want yu fɔ tɛl am yu bɛlɛ wɔd ɔ tɛl am aw yu rili de fil. Devid bin beg Jiova se: “O Gɔd, lisin to mi prea.” Na dis sem Sam, Devid tɔk bak se: “Lɛf yu prɔblɛm pan Jiova, ɛn i go ɛp yu. (Sam 55:​1, 22, NW) Afta yu dɔn du ɔl wetin yu ebul fɔ sɔlv yu prɔblɛm, if yu pre to Jiova wit ɔl yu at, dat go ɛp yu mɔ pas we yu wɔri pasmak. Bɔt aw prea kin ɛp? Aw i kin ɛp wi lɛ sɔntin nɔ mek wi wɔri pasmak?—Sam 94:​18, 19.

 4. Wetin mek i impɔtant fɔ pre we wi de wɔri?

⁴ Rid Lɛta Fɔ Filipay 4:​6, 7. We wi nɔ givɔp fɔ pre to Jiova wit ɔl wi at, wetin Jiova kin du? I kin ɛp wi fɔ fil fayn ɛn tink di rayt we. Fɔ lɛ wi nɔ wɔri ɛn fred, Gɔd de ɛp wi fɔ gɛt kolat we wi nɔ wande gɛt yet. Bɔku pan wi brɔda ɛn sista dɛn dɔn gɛt dis kayn kolat. Yusɛf go gɛt dis sem kolat. Di “kol at” we Gɔd de gi go ɛp yu fɔ sɔlv ɔ bia ɛni prɔblɛm! Yu go rili biliv wetin Jiova tɔk we i se: “Nɔ pwɛl at, bikɔs mi na yu Gɔd; a go gi yu trɛnk, a go ɛp yu.”—Ayzaya 41:​10.

 5. Aw Gɔd in Wɔd go ɛp yu fɔ gɛt kolat?

⁵ Di sɛkɔn we aw wi go gɛt kolat na we wi rid ɛn tink gud wan bɔt sɔm vas dɛn na di Baybul. Wetin mek dis impɔtant? Di Baybul na Gɔd in Wɔd. Insay de Gɔd gi wi fayn advays dɛn we go gi wi sɛns. I nɔ mata ustɛm yu de wɔri, yu kin tink gud wan bɔt aw di advays dɛn na Gɔd in Wɔd go kɔrej yu. Dis go ɛp yu fɔ lɛf fɔ wɔri pasmak, ɔ avɔyd ɛnitin we go mek yu wɔri. Jiova mek wi no klia wan se we wi rid in Wɔd dat go mek wi “tek kɔrej ɛn gɛt maynd” ɛn wi nɔ go “fred” ɔ “trimbul.”—Jɔshwa 1:​7-9, NW.

 6. Aw Jizɔs in wɔd dɛn go bɛnifit yu?

⁶ Insay Gɔd in Wɔd, wi kin rid bɔt aw Jizɔs bin de tɔk to pipul dɛn. Dɛn bin lɛk fɔ lisin to am bikɔs wetin i bin de tɔk bin de kɔrej dɛn ɛn mek dɛn fil fayn, mɔ di wan dɛn we wik ɔ gɛt pwɛl at. (Rid Matyu 11:​28-30.) Jizɔs bin rili bisin bɔt aw ɔda pipul dɛn de fil. (Mak 6:​30-32) Jɔs lɛk we Jizɔs prɔmis fɔ ɛp di apɔsul dɛn we bin de travul wit am, i go ɛp wisɛf tide. Nɔto pas wi de wit Jizɔs bifo wi bɛnifit. Ivin we i dɔn bi Kiŋ na ɛvin i stil de kɔntinyu fɔ sho se i lɛk wi. So we yu de wɔri, jɔs no se i go de de fɔ yu ɛn ɛp yu di rayt tɛm. Jizɔs de gi wi op ɛn maynd we de ɛp wi fɔ lɛf fɔ wɔri pasmak.—Di Ibru Pipul Dɛn 2:​17, 18; 4:​16.

 7. Aw Gɔd in oli spirit go bɛnifit wi?

⁷ Jizɔs bin prɔmis wi se wi Papa go gi wi oli spirit we wi aks fɔ am. (Lyuk 11:​10-13) Aw dis tɔd tin we wi go du go ɛp wi nɔ fɔ wɔri pasmak? Gɔd in oli spirit go ɛp wi fɔ gɛt kwaliti dɛn we wi Gɔd we gɛt pawa pas ɔlman gɛt. (Lɛta Fɔ Kɔlɔse 3:​10) Insay di Baybul, dɛn kɔl dɛn kwaliti ya “di kwaliti dɛn we di spirit de ɛp wi fɔ gɛt.” (Rid Lɛta Fɔ Galeshya 5:​22, 23, NW.) We wi gɛt dɛn gud kwaliti dɛn ya, wi padi biznɛs wit ɔda pipul dɛn go go bifo, ɛn wi go avɔyd ɛnitin we go mek wi wɔri. Lɛ wi si aw di kwaliti dɛn we di spirit de gi go ɛp wi sɔm patikyula we dɛn.

8-12. Aw di kwaliti dɛn we Gɔd in oli spirit de gi go ɛp wi?

⁸ “Lɔv, gladi at, kolat.” We yu trit ɔda pipul dɛn wit rɛspɛkt, yu go si se yu nɔ de wɔri pasmak. Aw dat kin bi? We yu sho se yu rili lɛk ɛn rɛspɛkt yu brɔda dɛn, yu go avɔyd tin dɛn we go mek yu vɛks pasmak, wɔri, ɔ mek yu at pwɛl. Dis go mek am izi fɔ mek yu kɔntinyu fɔ gɛt pis wit ɔda pipul dɛn.—Lɛta Fɔ Rom 12:​10.

⁹ “Peshɛnt, . . .  bisin bɔt ɔda pɔsin, . . .  du gud.” Di Baybul se: “Una fɔ de du gud ɛn gɛt sɔri at fɔ una kɔmpin. Una fɔ de padin [“fɔgiv”, NW] una kɔmpin” dɛn. (Lɛta Fɔ Ɛfisɔs 4:​32) We wi fala dis advays, wi go gɛt pis wit ɔda pipul dɛn, ɛn wi go avɔyd tin dɛn we go mek wi wɔri. Ɛn i go izi bak fɔ lɛ wi sɔlv prɔblɛm dɛn we kin kam wi we bikɔs wi nɔ pafɛkt.

¹⁰ “Fet.” Tide, bɔku tɛm wi kin wɔri bɔt mɔni ɛn prɔpati. (Prɔvabs 18:​11) Aw wi go avɔyd fɔ wɔri dis kayn we? Wi fɔ fala apɔsul Pɔl in advays we i se “una fɔ satisfay wit wetin una gɛt.” We wi gɛt strɔng fet pan Jiova, dat go ɛp wi fɔ biliv se i go gi wi di tin dɛn we wi nid. I dɔn prɔmis wi se: “A nɔ go ɛva lɛf una, ɛn a nɔ go tɔn mi bak pan una.” Na dat mek wi go tɔk lɛk Pɔl se “Na Jiova de ɛp mi; a nɔ go fred. Wetin Mɔtalman go ebul du to mi?”—Di Ibru Pipul Dɛn 13:​5, 6, NW.

¹¹ “I de ɛp wi nɔ fɔ vɛks kwik, i de ɛp wi fɔ kɔntrol wisɛf.” Tink bɔt aw yu go bɛnifit we yu kɔntrol yusɛf ɛn nɔ vɛks kwik. Dɛn kwaliti dɛn ya go ɛp yu fɔ avɔyd fɔ du ɔ se sɔntin we go mek yu wɔri, ɛn yu go bɛnifit we yu nɔ “gɛt bad at,” “wam at,” ɛn we yu nɔ de “ala pan ɛnibɔdi” ɔ “kɔs.”—Lɛta Fɔ Ɛfisɔs 4:​31.

¹² Yu nid fɔ put yusɛf dɔŋ fɔ abop pan “Gɔd in pawaful an” ɛn fɔ “lɛf ɔltin we de wɔri [yu] na Gɔd in an.” (Pita In Fɔs Lɛta 5:​6, 7, NW) If yu put yusɛf dɔŋ, Jiova go sɔpɔt yu ɛn kia fɔ yu. We yu no wetin yu ebul fɔ du ɛn wetin yu nɔ ebul fɔ du, dat go mek yu nɔ abop pan yusɛf. Yu nɔ go wɔri bɔt sɔntin pasmak bikɔs yu go abop pan Gɔd.—Mayka 6:​8.

13. Wetin Jizɔs bin min we i se: “Una fɔ lɛf tumara yon wɔri”?

¹³ Na Matyu 6:​34 (rid), Jizɔs bin advays wi se: “Una fɔ lɛf tumara yon wɔri.” I go luk lɛk se wi nɔ go ebul fɔ fala dis advays. Bɔt wetin Jizɔs bin min? Wi bin dɔn ɔlrɛdi lan se sɔntɛnde Devid ɛn Pɔl bin de wɔri. Jizɔs nɔ bin min se pɔsin we de sav Gɔd nɔ go ɛva wɔri. Bifo dat, i bin de ɛp in disaypul dɛn fɔ ɔndastand se fɔ wɔri fɔ sɔntin we dɛn nɔ nid fɔ wɔri bɔt, ɔ fɔ wɔri pasmak nɔ kin sɔlv prɔblɛm. Ɛvride gɛt in yon prɔblɛm, so Kristian dɛn nɔ nid fɔ ad pan dɛn wɔri bay we dɛn de tink bɔt prɔblɛm dɛn we dɔn pas ɔ we gɛt fɔ apin tumara. Aw Jizɔs in advays go ɛp yu nɔ fɔ wɔri tumɔs?

14. Jɔs lɛk Devid, aw yu go lɛf fɔ wɔri tumɔs?

¹⁴ Sɔntɛnde pipul dɛn kin wɔri fɔseka di mistek we dɛn bin dɔn mek trade. Dɛn kin rili fil bad fɔ wetin dɛn bin dɔn du, pan ɔl we i dɔn tek lɔng tɛm. Wan wan tɛm Kiŋ Devid bin de fil bad fɔ di mistek dɛn we i bin dɔn mek. I bin tɔk se: “A de pini ol de bikɔs mi at so ebi.” (Sam 38:​3, 4, 8, 18) Di tɛm we Devid bin de fil dis we, i bin du sɔntin we mek sɛns. I bin biliv se Jiova go sɔri fɔ am ɛn fɔgiv am. Ɛn Devid bin gladi fɔ no se Gɔd dɔn fɔgiv am.—Rid Sam 32:​1-3, 5.

15. (a) Wetin bak wi lan frɔm Devid? (b) Wetin yu go du fɔ lɛf fɔ wɔri tumɔs? (Luk di bɔks we se “Tin dɛn We Go Ɛp Yu fɔ Lɛf fɔ Wɔri Tumɔs.”)

¹⁵ Sɔm ɔda tɛm dɛn, yu go de wɔri bɔt sɔntin we de apin naw. Fɔ ɛgzampul, we Devid bin rayt Sam 55, i bin de fred se dɛn go kil am. (Sam 55:​2-5) Bɔt pan ɔl dat, i nɔ bin alaw lɛ wɔri mek i lɛf fɔ abop pan Jiova. Devid beg Jiova fɔ ɛp am wit in prɔblɛm dɛn, bɔt i bin no se i impɔtant bak fɔ du sɔntin bɔt in prɔblɛm. (Sɛkɛn Samiɛl 15:​30-34) Yu kin lan sɔntin frɔm Devid. Bifo yu alaw yu prɔblɛm fɔ mek yu wɔri tumɔs, du wetin yu ebul fɔ sɔlv di prɔblɛm, ɛn abop se Jiova go kia fɔ yu.

16. Aw di minin we Gɔd in nem gɛt go mek yu gɛt mɔ fet?

¹⁶ Sɔntɛnde, sɔm Kristian dɛn kin wɔri bɔt prɔblɛm dɛn we dɛn tink se go apin tumara bambay. Bɔt yu nɔ nid fɔ wɔri bɔt tin dɛn we nɔ apin yet. Wetin mek? Bikɔs plɛnti tɛm, tin nɔ kin kɔmɔt bad lɛk aw wi bin de tink se i go bi. Ɛn mɛmba bak se natin nɔ de we Gɔd nɔ ebul fɔ du. I nem min “A Go Bi Ɛnitin we A Want fɔ Bi.” (Ɛksodɔs 3:​14, NW) So wi nɔ nid fɔ wɔri bɔt tumara bambay, bikɔs Gɔd in nem sho se ɔl wetin i want fɔ mɔtalman go bi. Yu fɔ biliv se Gɔd go blɛs in savant dɛn we fetful to am ɛn ɛp dɛn fɔ mek dɛn nɔ wɔri pasmak bɔt tin dɛn we dɔn apin trade, we de apin naw, ɛn we go apin tumara bambay.

17, 18. We yu tɔk wit ɔda pipul dɛn, aw dat go ɛp yu we yu de wɔri?

¹⁷ Di numba 4 tin we go ɛp yu we yu de wɔri na we yu tɛl pɔsin we yu biliv aw yu rili de fil. Di pɔsin we yu mared to, yu tayt padi, ɔ wan pan di ɛlda dɛn na di kɔngrigeshɔn go ebul fɔ ɛp yu fɔ ɔndastand wetin rili de apin to yu. Di Baybul tɛl wi se: “Udat de wɔndrin tumɔs nɔ de api, bɔt if dɛn kɔrej am, i go bɔk ɔp.” (Prɔvabs 12:​25) I tɛl wi bak se: “If yu nɔ gɛt bɔku advays yu plan go fel yu, bɔt if yu gɛt bɔku advays, bɛtɛ go fala yu.”—Prɔvabs 15:​22.

¹⁸ Wi mitin dɛn de ɛp wi fɔ lɛf fɔ wɔri tumɔs. Na di mitin dɛn ɛni wik, yu de spɛnd tɛm wit yu brɔda ɛn sista dɛn we bisin bɔt yu ɛn we want fɔ ɛnkɔrej yu. (Di Ibru Pipul Dɛn 10:​24, 25) Da kayn we we wi de “ɛnkɔrej wisɛf” go mek yu strɔng ɛn i go izi fɔ mek yu nɔ wɔri tumɔs.—Lɛta Fɔ Rom 1:​12.

19. Wetin mek yu fɔ biliv se yu padi biznɛs wit Jiova go ɛp yu?

¹⁹ Wan ɛlda na Kanada, bin dɔn lan wetin mek i impɔtant fɔ lɛf ɔltin we de wɔri am na Jiova in an. I gɛt wok we nɔ rili izi fɔ am. In na ticha ɛn pɔsin we de gi advays to skul pikin dɛn, ɛn i gɛt wɛlbɔdi prɔblɛm we kin mek i wɔri. Wetin dɔn ɛp am nɔ fɔ wɔri tumɔs? Di men tin we dɔn ɛp am na dat, i de wok tranga wan fɔ gɛt tayt padi biznɛs wit Jiova. In tru tru padi dɛn dɔn rili ɛp am di tɛm we tin kin tranga, ɛn i kin tɛl in wɛf bɔt aw i rili de fil. Apat frɔm dat, in kɔmpin ɛlda dɛn ɛn di sakit ovasia dɔn ɛp am fɔ si in prɔblɛm di we aw Jiova de si am. Ɛn bak wan dɔktɔ dɔn ɛp dis brɔda fɔ ɔndastand in wɛlbɔdi prɔblɛm, ɛn i bin ebul fɔ ajɔst in tɛm so dat i go de ɛksasayz ɛn blo. Smɔl smɔl, i lan aw fɔ kɔntrol di tin dɛn we de apin to am ɛn di we aw i de fil. If sɔntin apin we i nɔ ebul fɔ kɔntrol, i kin abop pan Jiova fɔ ɛp am.

20. (a) Aw wi go lɛf wetin de wɔri wi na Gɔd in an? (b) Wetin wi go tɔk bɔt na di ɔda atikul?

²⁰ Insay dis atikul, wi dɔn lan wetin mek i impɔtant fɔ lɛf wetin de wɔri wi na Gɔd in an bay we wi pre to Jiova ɛn we wi rid in Wɔd ɛn tink gud wan bɔt am. Wi dɔn lan bak se i impɔtant fɔ alaw Jiova in oli spirit fɔ ɛp wi, fɔ tɔk to pɔsin we wi biliv, ɛn fɔ de go wi mitin dɛn. Insay di ɔda atikul, wi go lan aw Jiova de ɛp wi bay we i gi wi op se i go blɛs wi.—Di Ibru Pipul Dɛn 11:​6.