LƐSIN 18
Aw Wi Go Ebul fɔ No Tru Kristian Dɛn?
Bɔku pipul dɛn de se dɛn na Kristian. Bɔt dɛn ɔl nɔ biliv di sem tin ɛn dɛn ɔl nɔ de biev di sem we. So aw wi go ebul fɔ no udat dɛn na tru Kristian?
1. Udat na Kristian?
Kristian dɛn na disaypul dɛn ɔ pipul dɛn we de fala Jizɔs Krays. (Rid Akt 11:26.) Aw dɛn de sho se dɛn na Jizɔs in disaypul dɛn? Jizɔs bin se: “If una de du wetin a tɛl una fɔ du, una na mi tru tru disaypul dɛn.” (Jɔn 8:31) Dis min se tru Kristian dɛn fɔ obe di tin dɛn we Jizɔs de tich. Jizɔs bin de tich wetin de na di Baybul ɔltɛm, so tru Kristian dɛnsɛf de du di sem tin.—Rid Lyuk 24:27.
2. Aw tru Kristian dɛn de sho lɔv?
Jizɔs bin tɛl in disaypul dɛn se: “Una fɔ lɛk una kɔmpin dɛn jɔs lɛk aw a lɛk una.” (Jɔn 15:12) Aw Jizɔs bin sho se i lɛk in disaypul dɛn? I bin de spɛn tɛm wit dɛn, ɛnkɔrej dɛn, ɛn ɛp dɛn. I bin ivin gi in layf fɔ dɛn. (1 Jɔn 3:16) Semweso, tru Kristian dɛn nɔ jɔs de tɔk bɔt lɔv, bɔt dɛn de sho se dɛn gɛt lɔv bay di tin dɛn we dɛn de du fɔ dɛn kɔmpin Kristian dɛn.
3. Us wok tru Kristian dɛn bizi de du?
Jizɔs bin gi in disaypul dɛn wok. “I sɛn dɛn fɔ go prich bɔt Gɔd in Kiŋdɔm.” (Lyuk 9:2) Di fɔstɛm Kristian dɛn bin de prich; bɔt dɛn nɔ bin jɔs de prich na di say dɛn we dɛn bin de mit fɔ wɔship. Dɛn bin de prich bak na say dɛn we bɔku pipul dɛn de, ɛn dɛn bin de go mit pipul dɛn bak na dɛn os fɔ prich to dɛn. (Rid Akt 5:42; 17:17.) Tide bak, tru Kristian dɛn de prich bɔt di tru tin dɛn we de insay di Baybul ɛnisay we pipul dɛn de. Dɛn lɛk dɛn neba dɛn, so dɛn de gladi fɔ yuz dɛn tɛm ɛn dɛn trɛnk fɔ tɛl dɛn bɔt di Baybul in mɛsej we de gi kɔrej ɛn op.—Mak 12:31.
LAN MƆ
Lan mɔ bɔt aw tru Kristian dɛn difrɛn frɔm pipul dɛn we nɔ de fala Jizɔs in ɛgzampul ɛn di tin dɛn we i de tich.
4. Dɛn de tray fɔ ɔndastand di tru tin dɛn we de insay di Baybul
Di fɔstɛm Kristian dɛn bin valyu Gɔd in Wɔd
Nɔto ɔlman we se in na Kristian valyu di tru tin dɛn we de insay di Baybul. Ple di VIDIO, dɔn una tɔk bɔt di kwɛstyɔn we de dɔŋ.
Wetin sɔm chɔch dɛn we se dɛn na Kristian dɔn du fɔ mek pipul dɛn nɔ lan wetin Jizɔs de tich?
Jizɔs bin de tich di tru tin we de insay Gɔd in Wɔd. Rid Jɔn 18:37, dɔn una tɔk bɔt dis kwɛstyɔn:
Akɔdin to Jizɔs, aw wi go ebul fɔ no Kristian dɛn we “de fɔ di trut”?
5. Dɛn de prich bɔt di tru tin dɛn we de na di Baybul
Di fɔstɛm Kristian dɛn bin de prich to ɔda pipul dɛn
Bifo Jizɔs bin go na ɛvin, i bin gi in disaypul dɛn wok we de kɔntinyu insay wi yon tɛm. Rid Matyu 28:19, 20 ɛn Akt 1:8, dɔn una tɔk bɔt dis kwɛstyɔn:
Aw lɔng di prichin wok go kɔntinyu?
6. Dɛn de du wetin dɛn de prich
Wetin mek wan man we nem Tɔm biliv se i dɔn fɛn tru Kristian dɛn? Ple di VIDIO, dɔn una tɔk bɔt di kwɛstyɔn dɛn we de dɔŋ.
Insay di vidio, wetin bin mek Tɔm giv-ɔp pan rilijɔn?
Wetin mek i biliv se i dɔn fɛn di wan dɛn we rili de fala Jizɔs?
Di tin dɛn we pɔsin de du impɔtant pas di tin dɛn we pɔsin de tɔk. Rid Matyu 7:21, dɔn una tɔk bɔt dis kwɛstyɔn:
Wetin yu tink se impɔtant to Jizɔs mɔ, na wetin pɔsin de tɔk se i biliv ɔ wetin di pɔsin de du?
7. Dɛn lɛk dɛn kɔmpin dɛn
Di fɔstɛm Kristian dɛn bin lɛk dɛn kɔmpin Kristian dɛn
Yu tink se Kristian dɛn dɔn rili risk dɛn layf fɔ dɛn kɔmpin Kristian dɛn? Ple di VIDIO, dɔn una tɔk bɔt di kwɛstyɔn dɛn we de dɔŋ.
Insay di vidio, wetin bin mek Lɔyd risk in layf fɔ Brɔda Joansin?
Yu tink se i biev lɛk tru Kristian?
Rid Jɔn 13:34, 35, dɔn una tɔk bɔt dɛn kwɛstyɔn dɛn ya:
Aw Jizɔs in disaypul dɛn (tru Kristian dɛn) go trit pipul dɛn we kɔmɔt ɔda kɔntri?
Aw dɛn go du dat di tɛm we wɔ de?
SƆM PIPUL DƐN KIN SE: “Ɔl Kristian na di sem, i nɔ mata us chɔch yu de go.”
Us skripchɔ yu go yuz we go sho aw fɔ no udat dɛn na tru Kristian?
WETIN YU DƆN LAN?
Tru Kristian dɛn de fala wetin di Baybul se, dɛn de sho lɔv, ɛn dɛn de prich bɔt di tru tin we de insay di Baybul.
Rivyu
Usay tru Kristian dɛn de pul di tin dɛn we dɛn de tich?
Us kwaliti de sho se pɔsin na tru Kristian?
Us wok tru Kristian dɛn de du?
DU MƆ RISACH
Lan mɔ bɔt wan grup we de du dɛn bɛst fɔ fala Jizɔs in ɛgzampul ɛn di tin dɛn we i de tich.
Lan bɔt wetin bin apin we wan mɔda fɛn in tru spirichwal familli?
“Dɛn De Yuz di Baybul fɔ Ansa Ɛni Kwɛstyɔn!” (Di Wachtawa, Epril 1, 2014)
Lan aw tru Kristian dɛn de sho lɔv we dɛn Kristian brɔda ɛn sista dɛn nid ɛp.
We Wi De Ɛp Wi Brɔda dɛn We Dɛn Gɛt Prɔblɛm—Shɔt Pat (3:57)
Lan bɔt aw di fɔstɛm Kristian dɛn ɛn tru Kristian dɛn we de tide, de du di tin dɛn we Jizɔs bin tɔk se in tru tru disaypul dɛn go du.
“Wetin De Sho se Pɔsin Na Tru Kristian?” (Di Wachtawa, Mach 1, 2012)