“Una Kɔntinyu fɔ De Tink di Rayt We, Una Go De Wach!”

 1. Wetin Jizɔs bin tɛl in disaypul dɛn bɔt di ɛnd? Us wɔnin i gi dɛn?

SHƆT tɛm bifo Jizɔs day, 4 pan in disaypul dɛn bin aks am se: “Us sayn go sho se di tɛm want fɔ dɔn?” (Mat. 24:​3) I go bi se dɛn disaypul dɛn de bin de wɔnda aw dɛn go ebul fɔ no di tɛm we dɛn go dɔnawe wit Jerusɛlɛm ɛn in tɛmpul. Fɔ ansa dɛn, Jizɔs nɔ bin jɔs tɔk bɔt di tɛm we dɛn go dɔnawe wit Jerusɛlɛm ɛn in tɛmpul, bɔt i bin tɔk bak bɔt ustɛm di tɛm we wi de so naw go dɔn. We Jizɔs bin de tɔk bɔt di tɛm we di wɔl go dɔn, i bin se: “Nɔbɔdi nɔ no di de ɔ di awa, di enjɛl dɛn na ɛvin nɔ no ɛn di Pikin nɔ no, na di Papa wangren no.” Dɔn i bin wɔn ɔl in disaypul dɛn fɔ mek “dɛn nɔ slip” ɛn fɔ mek dɛn “go de wach.”—Mak 13:​32-37.

 2. Wetin mek i bin impɔtant fɔ di fɔstɛm Kristian dɛn fɔ kɔntinyu fɔ de wach?

² Di fɔstɛm Kristian dɛn we na bin Ju bin nid fɔ kɔntinyu fɔ de wach so dat dɛn go sev dɛn layf. Jizɔs bin tɛl in disaypul dɛn wetin dɛn fɔ luk fɔ, fɔ no ustɛm dɛn go dɔnawe wit Jerusɛlɛm ɛn in tɛmpul. I bin se: “We una si sojaman dɛn de rawnd Jerusɛlɛm, una no se di tɛm fɔ lɛ dɛn pwɛl am dɔn kam nia.” We dat apin, dɛn bin nid fɔ obe Jizɔs in wɔnin ɛn “bigin rɔn go na di mawntin dɛn.” (Lyuk 21:​20, 21) Di wan dɛn we bin pe atɛnshɔn to Jizɔs in wɔnin bin sev dɛn layf di tɛm we di Roman dɛn bin dɔnawe wit Jerusɛlɛm.

 3. Wetin wi go tɔk bɔt insay dis atikul?

³ Tide wi de na tɛm we dis wikɛd wɔl go dɔn. So wisɛf fɔ kɔntinyu fɔ de tink di rayt we ɛn fɔ de wach. Insay dis atikul, wi go tɔk bɔt aw wi go tink di rayt we as wi de tek tɛm wach aw tin dɛn de apin na di wɔl, aw wi go tek tɛm wit di tin dɛn we wi de du, ɛn aw wi go yuz di tɛm we dɔn lɛf di bɛst we.

 4. Wetin mek wi fɔ rili want fɔ no bɔt aw di tin dɛn we de apin na di wɔl naw de mek Baybul prɔfɛsi kam tru?

⁴ Wi gɛt gud rizin we mek wi want fɔ no aw di tin dɛn we de apin na di wɔl rayt naw de mek Baybul prɔfɛsi dɛn de kam tru. Fɔ ɛgzampul, Jizɔs bin tɔk bɔt sɔm patikyula tin dɛn we go apin fɔ ɛp wi fɔ no we di tɛm de nia fɔ lɛ Setan in wikɛd wɔl dɔn. (Mat. 24:​3-14) Apɔsul Pita bin ɛnkɔrej wi fɔ pe atɛnshɔn to prɔfɛsi we de kam tru so dat wi go kɔntinyu fɔ gɛt strɔng fet. (2 Pit. 1:​19-21) Di las buk na di Baybul bigin wit dɛn wɔd dɛn ya: “Dis na di tin dɛn we Gɔd sho Jizɔs Krays fɔ sho in slev dɛn di tin dɛn we go apin jisnɔ.” (Rɛv. 1:​1) So wi rili want fɔ no bɔt di tin dɛn we de apin na di wɔl naw ɛn wi want fɔ no aw dɛn de mek Baybul prɔfɛsi kam tru. Ɛn sɔntɛm wi go gladi fɔ tɔk bɔt dɛn tin dɛn de to ɔda pipul dɛn.

 5. Wetin wi fɔ avɔyd? Wetin wi fɔ du? (Luk bak di pikchɔ dɛn.)

⁵ We wi de tɔk bɔt Baybul prɔfɛsi, wi fɔ avɔyd fɔ de gɛs. Wetin mek? Na bikɔs wi nɔ want fɔ se ɛnitin we go mek wanwɔd nɔ de na di kɔngrigeshɔn. Fɔ ɛgzampul, sɔntɛm wi go yɛri we di wan dɛn we de bifo na di wɔl de tɔk bɔt aw dɛn go sɔlv wan patikyula prɔblɛm ɛn briŋ pis ɛn mek natin nɔ de fɔ fred. Bifo wi gɛs se da tin de we dɛn tɔk de mek di Baybul prɔfɛsi na 1 Tɛsalonians 5:​3 kam tru, wi nid fɔ no di infɔmeshɔn we di ɔganayzeshɔn dɔn pul dɛn biɛn tɛm ya bɔt dɛn tin dɛn de. Wi go ɛp di kɔngrigeshɔn fɔ kɔntinyu fɔ gɛt “wanwɔd ɛn fɔ tink di sem we” if di tin dɛn we wi de tɔk kɔmɔt na Jiova in ɔganayzeshɔn.—1 Kɔr. 1:​10; 4:​6

 6. Us lɛsin dɛn wi go lan frɔm 2 Pita 3:​11-13?

⁶ Rid 2 Pita 3:​11-13. Apɔsul Pita de ɛp wi fɔ kɔntinyu fɔ tink di rayt we bɔt Baybul prɔfɛsi. I ɛnkɔrej wi fɔ “tink ɔltɛm bɔt di tɛm we Jiova in de go kam.” Wetin mek? Nɔto bikɔs wi want fɔ no di de ɔ di awa we Jiova go briŋ Amagɛdɔn, bɔt na bikɔs wi want fɔ yuz di tɛm we dɔn lɛf fɔ “bi pipul dɛn we de biev oli we ɛn we de du tin dɛn we de sho se wi fetful to Gɔd.” (Mat. 24:​36; Lyuk 12:​40) Dis min se wi want fɔ kɔntinyu fɔ biev fayn ɛn mek shɔ se ɔl wetin wi de du fɔ Jiova na bikɔs wi lɛk am. Fɔ lɛ wi ebul fɔ du dat, wi fɔ tek tɛm wit di tin dɛn we wi de du.

 7. Aw wi go sho se wi de tek tɛm wit wetin wi de du? (Lyuk 21:​34)

⁷ Jizɔs bin tɛl in disaypul dɛn fɔ tek tɛm we i kam to di tin dɛn we de apin na di wɔl ɛn fɔ tek tɛm wit wetin dɛn de du. Wi si dat klia wan na di wɔnin we de na Lyuk 21:​34. (Rid.) Notis wetin Jizɔs tɔk, i se: “Una tek tɛm.” Pɔsin we de tek tɛm wit wetin i de du de tray fɔ no ɛni denja we go ambɔg in padi biznɛs wit Jiova, ɛn i de du tin dɛn fɔ avɔyd dɛn. We i du dat, i de kɔntinyu fɔ mek Gɔd lɛk am.—Prɔv. 22:​3; Jud 20, 21.

 8. Wetin apɔsul Pɔl bin tɛl Kristian dɛn?

⁸ Apɔsul Pɔl bin tɛl Kristian dɛn fɔ tek tɛm wit wetin dɛn de du. Fɔ ɛgzampul, i bin tɛl di Kristian dɛn na Ɛfisɔs se: “Una wach gud wan so dat di we aw una de waka nɔ go bi lɛk di wan dɛn we nɔ gɛt sɛns bɔt lɛk di wan dɛn we gɛt sɛns.” (Ɛfi. 5:​15, 16) Setan de tray ɔltɛm fɔ pwɛl wi padi biznɛs wit Jiova, na dat mek di Baybul de ɛnkɔrej wi fɔ “kɔntinyu fɔ de ɔndastand wetin Jiova want” so dat wi go protɛkt wisɛf frɔm ɛnitin we Setan de yuz fɔ atak wi.—Ɛfi. 5:​17.

 9. Aw wi go ebul fɔ no wetin Jiova want fɔ wi?

⁹ Di Baybul nɔ sho wi ɔl di tin dɛn we go ambɔg wi padi biznɛs wit Jiova. Bɔku tɛm, wi kin nid fɔ disayd fɔ du tin dɛn we di Baybul nɔ tɔk bɔt. Fɔ mek wi go ebul disayd fɔ du di rayt tin, wi nid fɔ ɔndastand “wetin Jiova want.” Wi go ebul fɔ du dis bay we wi de stɔdi Gɔd in Wɔd ɔltɛm ɛn tink gud wan bɔt am. Di mɔ wi de ɔndastand wetin Jiova want ɛn tray fɔ no “aw Krays de tink,” na di mɔ wi go waka lɛk “di wan dɛn we gɛt sɛns” ivin if wi nɔ gɛt patikyula lɔ dɛn we de tɛl wi wetin fɔ du. (1 Kɔr. 2:​14-16) Sɔntɛnde, i kin izi fɔ lɛ wi no wetin wi fɔ avɔyd, bɔt ɔda tɛm dɛn i nɔ kin izi fɔ no wetin wi fɔ avɔyd.

10. Wetin na sɔm denja dɛn we wi fɔ avɔyd?

¹⁰ Sɔm denja dɛn we wi fɔ avɔyd na fɔ mek lɛk se wi want pɔsin we wi rili nɔ want am, fɔ drink tumɔs, it tumɔs, tɔk tin dɛn we de mek ɔda pipul dɛn fil bad, ɛn fɔ wach fim dɛn we gɛt fɔ du wit fɛt-fɛt, rud rud pikchɔ dɛn ɛn tin dɛn lɛk dat. (Sam 101:​3) Wi ɛnimi we na di Dɛbul de tray ɔltɛm fɔ luk fɔ ɛni chans we i gɛt fɔ pwɛl wi padi biznɛs wit Jiova. (1 Pit. 5:​8) If wi nɔ tek tɛm, Setan go mek wi bigin tink ɛn fil fɔ du tin dɛn lɛk fɔ milɛ, nɔ fɔ ɔnɛs, fɔ want ɔltin fɔ wisɛf, fɔ et ɔda pipul dɛn, fɔ mek prawd ɛn fɔ kip grɔj. (Gal. 5:​19-21) Fɔs, wi go tink se dɛn we dɛn ya aw wi de tink ɛn fil nɔ bad, bɔt if wi nɔ du sɔntin wantɛm wantɛm fɔ pul dɛn we dɛn ya aw wi tink ɛn fil na wi at ɛn maynd, dɛn go kɔntinyu fɔ gro ɛn mek wi du bad tin.—Jems 1:​14, 15.

11. Wetin na wan denja we nɔ izi fɔ si we wi nid fɔ avɔyd? Wetin mek?

¹¹ Wan denja we wi nid fɔ avɔyd we nɔ izi fɔ si na bad padi. Tink bɔt dis ɛgzampul. Lɛ wi se yu de wok wit pɔsin we nɔto Jiova Witnɛs. Yu want dis yu wokmet fɔ tink gud tin bɔt Jiova Witnɛs dɛn, so yu de du gud to am ɛn ɛp am. Sɔntɛnde, yu kin ivin gri fɔ it lɔnch wit dis pɔsin. I nɔ tu te, yu bigin fɔ it lɔnch wit am fast fast. Wan wantɛm, di tin we dis pɔsin kin tɔk gɛt fɔ du wit mami ɛn dadi biznɛs, ɛn yu kin sho se yu nɔ lɛk da kayn tɔk de. Bɔt as tɛm de go, bikɔs yu dɔn yus fɔ yɛri da kayn tɔk de, yu nɔ de vɛks igen. Dɔn wan de, yu wokmet invayt yu fɔ go tek drink wit am afta wok, ɛn yu gri. Leta, yu bigin fɔ tink lɛk yu wokmet. I nɔ go te, yu go bigin fɔ du tin lɛk dis yu wokmet. As Jiova Witnɛs dɛn, wi de du gud to ɔlman ɛn rɛspɛkt dɛn, bɔt wi fɔ mɛmba se i izi fɔ mek wi tan lɛk di pipul dɛn we wi de spɛn tɛm wit. (1 Kɔr. 15:​33) If wi tek tɛm wit wetin wi de du lɛk aw Jizɔs ɛnkɔrej wi, wi go avɔyd fɔ spɛn tɛm wit pipul dɛn we nɔ de fala Jiova in lɔ, mɔ if wi nɔ nid fɔ spɛn tɛm wit dɛn. (2 Kɔr. 6:​15) Wi go si di denja ɛn avɔyd am.

12. Wetin Jizɔs in disaypul dɛn bin fɔ du as dɛn de wet fɔ di tɛm we dɛn go dɔnawe wit Jerusɛlɛm ɛn di tɛmpul?

¹² Jizɔs bin want fɔ mek in disaypul dɛn bizi as dɛn de wet fɔ di tɛm we dɛn go dɔnawe wit Jerusɛlɛm ɛn di tɛmpul. Jizɔs bin gi dɛn wok fɔ du. I bin tɛl dɛn fɔ prich di gud nyuz “na Jerusɛlɛm, ɛn ɔlsay na Judia ɛn Sameria, ɛn na di say we fa pas ɔl na di wɔl.” (Akt 1:​6-8) Dis na big big wok we Jizɔs gi in disaypul dɛn. Dɛn bin ebul fɔ yuz dɛn tɛm di bɛst we bay we dɛn bin de du ɔl wetin dɛn ebul fɔ prich to ɔda pipul dɛn.

13. Wetin mek wi nid fɔ yuz wi tɛm di bɛst we? (Koloshians 4:​5)

¹³ Rid Koloshians 4:​5. Fɔ mek wi go tek tɛm wit wetin wi de du, wi nid fɔ tink siriɔs wan bɔt aw wi de yuz wi tɛm. Tin dɛn we wi nɔ kin de ɛkspɛkt kin apin to ɛniwan pan wi. (Ɛkli. 9:​11, NWT) I pɔsibul fɔ lɛ wi day di tɛm we wi nɔ de ɛkspɛkt.

14-15. Aw wi go ebul yuz wi tɛm di bɛst we? (Ibruz 6:​11, 12) (Luk bak di pikchɔ.)

¹⁴ Wi go ebul fɔ yuz wi tɛm di bɛst we bay we wi de du wetin Jiova want ɛn mek wi padi biznɛs wit am tayt mɔ ɛn mɔ. (Jɔn 14:​21) Wi nid fɔ “tinap tranga wan, lɛ natin nɔ shek wi, ɛn fɔ de du plɛnti wok fɔ di Masta ɔltɛm.” (1 Kɔr. 15:​58) We wi du dɛn tin dɛn ya, wi nɔ go gɛt natin fɔ rigrɛt, ilɛksɛf wi day ɔ di ɛnd kam.—Mat. 24:​13; Rom. 14:​8.

¹⁵ Tide, Jizɔs de kɔntinyu fɔ dayrɛkt in disaypul dɛn as dɛn de prich bɔt Gɔd in Kiŋdɔm ɔlsay na di wɔl. I dɔn du in yon pat. Jizɔs de yuz Jiova in ɔganayzeshɔn fɔ tren wi fɔ no aw fɔ du di prichin wok ɛn fɔ gi wi di tin dɛn we wi nid fɔ prich di gud nyuz ɔlsay na di wɔl. (Mat. 28:​18-20) Wi go du wetin Jizɔs de ɛkspɛkt wi fɔ du bay we wi de wok tranga wan fɔ prich to ɔda pipul dɛn ɛn tich dɛn, ɛn bay we wi de kɔntinyu fɔ wach as wi de wet fɔ di tɛm we Jiova go dɔnawe wit Setan in wikɛd wɔl. We wi de aplay di advays we de na Ibruz 6:​11, 12, wi go kɔntinyu fɔ gɛt op “te di ɛnd” kam.—Rid.

16. Wetin wi dɔn mekɔp wi maynd fɔ du?

¹⁶ Jiova dɔn pik di de ɛn awa we i go dɔnawe wit Setan in wɔl. We da de de kam, Jiova go mek ɔl di prɔfɛsi dɛn we de na in Wɔd kam tru. Rayt naw, wi go de tink se di ɛnd de westɛm fɔ kam, bɔt Jiova in de “nɔ go let!” (Aba. 2:​3, NWT) So lɛ wi mekɔp wi maynd fɔ “kɔntinyu fɔ luk to Jiova,” lɛ wi “wet fɔ di Gɔd we go sev wi.”—Mayk. 7:​7, NWT.