STƆDI ATIKUL 14
“Ɔlman Go No se Una Na Mi Disaypul Dɛn”
“If una lɛk una kɔmpin dɛn, ɔlman go no se una na mi disaypul dɛn.”—JƆN 13:35.
SIŊ 106 Lɛ Wi Kɔntinyu fɔ Sho Lɔv
WETIN WI GO LAN?a
Wetin bɔku pipul dɛn we nɔto Jiova Witnɛs kin tink we dɛn si se Jiova in pipul dɛn de sho se dɛn lɛk dɛnsɛf? (Luk na paregraf 1)
1. Wetin bɔku pipul dɛn kin notis we dɛn atɛnd wi mitin fɔ di fɔs tɛm? (Luk bak di pikchɔ.)
IMAJIN se wan maredman ɛn in wɛf atɛnd mitin na Kiŋdɔm Ɔl fɔ di fɔs tɛm. I rili tɔch dɛn at we dɛn si di fayn we aw di brɔda ɛn sista dɛn de biev ɛn aw dɛn de sho se dɛn lɛk dɛnsɛf. We dɛn de go bak na os, di wɛf tɛl in man se, ‘Dɛn pipul dɛn ya difrɛn frɔm ɔda pipul dɛn we wi dɔn mit, ɛn a bin rili ɛnjɔy fɔ de wit dɛn.’
2. Wetin mek sɔm pipul dɛn dɔn stɔp fɔ sav Jiova?
2 Di lɔv we de na di Kristian kɔngrigeshɔn rili spɛshal. As wi no, Jiova Witnɛs dɛn nɔ pafɛkt. (1 Jɔn 1:8) So di mɔ we wi de no wi brɔda ɛn sista dɛn na di kɔngrigeshɔn, sɔntɛm na di mɔ wi go si sɔm pan dɛn fɔlt dɛn. (Rom. 3:23) I sɔri fɔ no se sɔm dɔn alaw ɔda pipul dɛn mistek fɔ stɔp dɛn fɔ sav Jiova.
3. Wetin go mek pipul dɛn no Jizɔs in tru tru disaypul dɛn? (Jɔn 13:34, 35)
3 Luk bak di tim skripchɔ fɔ dis atikul. (Rid Jɔn 13:34, 35.) Wetin go mek pipul dɛn no Jizɔs in tru tru disaypul dɛn? Na lɔv. Di Baybul nɔ tɛl wi se dɛn go pafɛkt. Notis bak se Jizɔs nɔ bin se: ‘Una go no se una na mi disaypul dɛn.’ I bin se: “Ɔlman go no se una na mi disaypul dɛn.” So Jizɔs bin sho se in disaypul dɛn ɛn di wan dɛn we nɔto in disaypul dɛn go no di wan dɛn we na in tru tru disaypul dɛn bay we dɛn de sho se dɛn rili lɛk dɛn kɔmpin dɛn.
4. Wetin sɔm pipul dɛn go want fɔ no bɔt tru Kristian dɛn?
4 Sɔntɛm sɔm pipul dɛn we nɔto Jiova Witnɛs go de wɔnda: ‘Aw lɔv go ɛp wi fɔ no Jizɔs in tru tru disaypul dɛn? Aw Jizɔs bin sho se i lɛk in apɔsul dɛn? Ɛn aw i pɔsibul fɔ mek wi falamakata Jizɔs in ɛgzampul tide?’ Di wan dɛn we na Jiova Witnɛs fɔ tink bɔt di ansa to dɛn kwɛstyɔn dɛn de. We wi du dat, i go ɛp wi fɔ sho lɔv mɔ ɛn mɔ, mɔ we wi de bia wi kɔmpin Kristian dɛn we nɔ pafɛkt.—Ɛfi. 5:2.
WETIN MEK LƆV NA DI WANGREN TIN WE GO MEK PIPUL DƐN NO JIZƆS IN TRU TRU DISAYPUL DƐN?
5. Ɛksplen wetin Jizɔs in wɔd dɛn we de na Jɔn 15:12, 13 min.
5 Jizɔs bin tɔk klia wan se in disaypul dɛn go lɛk dɛnsɛf wan spɛshal we. (Rid Jɔn 15:12, 13.) Notis se Jizɔs bin tɛl dɛn se: “Una fɔ lɛk una kɔmpin dɛn jɔs lɛk aw a lɛk una.” Wetin dat min? As Jizɔs bin kɔntinyu fɔ ɛksplen, dat min se dɛn fɔ lɛk ɔda pipul dɛn pas aw dɛn lɛk dɛnsɛf, ɔ dɛn fɔ gɛt di kayn lɔv we go mek Kristian day fɔ in kɔmpin, if nid de.b
6. Aw Gɔd in Wɔd sho se lɔv rili impɔtant?
6 Gɔd in Wɔd tich wi se lɔv rili impɔtant. Fɔ ɛgzampul, fɔ bɔku pipul dɛn, dis na sɔm skripchɔ dɛn we dɛn lɛk: “Gɔd na lɔv.” (1 Jɔn 4:8) “Yu fɔ lɛk yu neba lɛk aw yu lɛk yusɛf.” (Mat. 22:39) “Lɔv de kɔba bɔku bɔku sin dɛn.” (1 Pit. 4:8) “Lɔv nɔ de ɛva fel.” (1 Kɔr. 13:8) Dɛn skripchɔ dɛn ya ɛn ɔda wan dɛn de mek wi no se i rili impɔtant fɔ gɛt ɛn sho dis fayn kwaliti.
7. Wetin mek Setan nɔ go ɛva ebul fɔ tich pipul dɛn fɔ lɛk dɛnsɛf ɛn mek dɛn gɛt wanwɔd?
7 Bɔku pipul dɛn kin aks se: ‘Aw i pɔsibul fɔ no di tru rilijɔn? Ɔl di rilijɔn dɛn de tɔk se dɛn de tich di tru, bɔt dɛn ɔl de tich sɔntin we difrɛn bɔt Gɔd.’ Setan dɔn mek bɔku lay lay rilijɔn dɛn, ɛn dis dɔn mek i nɔ izi fɔ mek pipul dɛn no us rilijɔn na di tru rilijɔn. Bɔt i nɔ go ɛva ebul fɔ briŋ pipul dɛn we de ɔlsay na di wɔl togɛda so dat dɛn ɔl go lɛk dɛnsɛf. Na Jiova wangren ebul fɔ du dat. Wi no dis bikɔs lɔv kɔmɔt frɔm Gɔd. Na di wan dɛn nɔmɔ we gɛt Jiova in spirit ɛn in blɛsin go ebul fɔ gɛt tru tru lɔv fɔ dɛn kɔmpin. (1 Jɔn 4:7) Na dat mek Jizɔs bin se na in disaypul dɛn nɔmɔ go gɛt tru tru lɔv fɔ dɛn kɔmpin dɛn.
8-9. Aw di lɔv we Jiova Witnɛs dɛn gɛt fɔ dɛn kɔmpin dɔn afɛkt bɔku pipul dɛn?
8 Jɔs lɛk aw Jizɔs bin dɔn tɔk, bɔku pipul dɛn dɔn kam fɔ no in tru tru disaypul dɛn bikɔs ɔf di tru lɔv we dɛn gɛt fɔ dɛnsɛf. Fɔ ɛgzampul, wan brɔda we nem Iyan mɛmba di fɔs kɔnvɛnshɔn we i bin atɛnd, we dɛn mek na wan stediɔm we de nia in os. Iyan bin dɔn go na da stediɔm de sɔm mɔnt bifo di kɔnvɛnshɔn fɔ go wach gem. I tɔk se: “Di we aw di pipul dɛn na di kɔnvɛnshɔn bin biev bin rili difrɛn frɔm di we aw di pipul dɛn we bin de wach gem bin biev. Di Witnɛs dɛn bin de biev fayn ɛn dɛn bin drɛs fayn, ɛn dɛn pikin dɛn bin de biev fayn.” I kɔntinyu fɔ tɔk se: “Wetin pas ɔl na dat dɛn pipul dɛn ya luk lɛk pipul dɛn we gɛt satisfay maynd ɛn pis. Dat na wetin a bin want na mi layf. A nɔ mɛmba ɛniwan pan di tɔk dɛn we dɛn bin gi da de de, bɔt a stil mɛmba aw di Witnɛs dɛn bin biev.”c Na bikɔs wi gɛt tru lɔv fɔ wi kɔmpin dɛn na in mek wi de biev da kayn we de. Wi de rɛspɛkt wi brɔda ɛn sista dɛn ɛn trit dɛn fayn bikɔs wi lɛk dɛn.
9 Wan brɔda we nem Jɔn bin fil di sem we we i bin stat fɔ atɛnd mitin. I tɔk se: “Di fayn we aw ɔlman bin de biev bin tɔch mi at. Di we aw dɛn bin rili nays bin mek a tink se dɛn na pipul dɛn we pafɛkt. Di tru lɔv we dɛn bin de sho bin mek a biliv tranga wan se a dɔn fɛn di tru rilijɔn.”d Dɛn ɛkspiriɛns dɛn ya ɛn bɔku ɔda wan dɛn de sho se Jiova in pipul dɛn na tru Kristian dɛn.
10. Ustɛm mɔ wi go gɛt di chans fɔ sho Kristian lɔv? (Luk bak di futnot.)
10 As wi dɔn tɔk na di biginin insay dis atikul, ɔl wi kɔmpin Kristian dɛn nɔ pafɛkt. Sɔntɛnde, dɛn go tɔk ɔ du tin dɛn we go mek wi fil bad.e (Jems 3:2) We dat apin, i de gi wi di chans mɔ fɔ sho Kristian lɔv bay wetin wi go se ɔ du. We tin lɛk dat apin, wetin wi go lan frɔm Jizɔs in ɛgzampul?—Jɔn 13:15.
AW JIZƆS BIN SHO SE I LƐK IN APƆSUL DƐN?
Jizɔs bin sho se i lɛk in apɔsul dɛn pan ɔl we dɛn bin de mek bɔku mistek dɛn (Luk na paregraf 11 to 13)
11. Us bad abit Jems ɛn Jɔn bin sho? (Luk bak di pikchɔ.)
11 Jizɔs nɔ bin de ɛkspɛkt in disaypul dɛn fɔ pafɛkt. Bifo dat, i bin tek tɛm ɛp dɛn fɔ kɔrɛkt dɛn bad abit dɛn so dat dɛn go mek Jiova gladi. Wan tɛm, tu pan in apɔsul dɛn we na Jems ɛn Jɔn bin mek dɛn mama aks Jizɔs fɔ gi dɛn ay pozishɔn dɛn na di Kiŋdɔm. (Mat. 20:20, 21) Jems ɛn Jɔn bin sho se dɛn prawd ɛn dɛn want fɔ impɔtant pas di ɔda apɔsul dɛn.—Prɔv. 16:18.
12. Fɔ se na Jems ɛn Jɔn nɔmɔ bin sho se dɛn gɛt bad abit? Ɛksplen.
12 Nɔto Jems ɛn Jɔn nɔmɔ bin sho se dɛn gɛt bad abit we da tin de bin apin. Notis wetin di ɔda apɔsul dɛn bin du: “We di ɔda tɛn disaypul dɛn yɛri dis, dɛn vɛks pan di tu brɔda dɛn.” (Mat. 20:24) Wi go imajin se Jems ɛn Jɔn ɛn di ɔda apɔsul dɛn bin agyu bita bita wan. Sɔntɛm di ɔda apɔsul dɛn bin tɔk sɔntin lɛk dis: ‘Udat una tink se una bi fɔ aks fɔ ay pozishɔn na di Kiŋdɔm? Nɔto una nɔmɔ dɔn wok tranga wan wit Jizɔs. Wisɛf kwalifay jɔs lɛk una fɔ gɛt spɛshal pozishɔn!’ Wetin dɛn bin tink ɛn se da de de bin sho se dɛn fɔgɛt se dɛn fɔ sho lɔv ɛn du gud to dɛn kɔmpin dɛn ɔltɛm.
13. Wetin Jizɔs bin du we in apɔsul dɛn nɔ bin biev fayn? (Matyu 20:25-28)
13 Wetin Jizɔs bin du? I nɔ bin vɛks pan dɛn. I nɔ bin se i de go luk fɔ ɔda apɔsul dɛn we rili ɔmbul ɛn we go sho lɔv to dɛn kɔmpin dɛn ɔltɛm. Bifo dat, Jizɔs bin tek tɛm tɔk wit dɛn bikɔs i bin no se dɛn bin want fɔ du wetin rayt. (Rid Matyu 20:25-28.) Jizɔs bin de trit in apɔsul dɛn fayn ɔltɛm, pan ɔl we dɛn bin de agyu bɔku tɛm bɔt udat impɔtant pas dɛn ɔl.—Mak 9:34; Lyuk 22:24.
14. Aw di say we Jizɔs in apɔsul dɛn mɛn bin afɛkt dɛn?
14 Wan dawt nɔ de se Jizɔs bin tink bɔt aw di kɔlchɔ we bin de usay di apɔsul dɛn mɛn bin afɛkt dɛn. (Jɔn 2:24, 25) Di bigman dɛn pan Gɔd biznɛs bin de tich se na we pipul dɛn gɛt ay pozishɔn nɔmɔ go mek dɛn impɔtant. (Mat. 23:6; luk di vidio we gɛt di taytul, The Front Seats in the Synagogue na di stɔdi not fɔ Matyu 23:6.) Di Ju bigman dɛn pan Gɔd biznɛs bin de tink bak se dɛn impɔtant pas ɔda pipul dɛn.f (Lyuk 18:9-12) Jizɔs bin ɔndastand se dis kayn we aw pipul dɛn de tink go afɛkt di we aw di apɔsul dɛn de si dɛnsɛf ɛn ɔda pipul dɛn. (Prɔv. 19:11) I nɔ bin de ɛkspɛkt se in disaypul dɛn nɔ go ɛva mek mistek, ɛn i bin peshɛnt wit dɛn we dɛn bin de mek mistek. I bin no se in disaypul dɛn gɛt gudat, so i bin peshɛnt fɔ ɛp dɛn fɔ mek dɛn bi pipul dɛn we ɔmbul ɛn we lɛk ɔda pipul dɛn, ɛn fɔ avɔyd fɔ de tink se dɛn bɛtɛ pas ɔda pipul dɛn.
AW WI GO FALAMAKATA JIZƆS IN ƐGZAMPUL?
15. Wetin wi lan frɔm wetin bin apin bitwin Jems, Jɔn, ɛn di ɔda apɔsul dɛn?
15 Wi go lan bɔku tin frɔm wetin bin apin bitwin Jems, Jɔn, ɛn di ɔda apɔsul dɛn. Dɛn bin rɔng fɔ aks fɔ ay pozishɔn dɛn na di Kiŋdɔm. Di ɔda apɔsul dɛn bak bin rɔng bay we dɛn alaw di tin we Jems ɛn Jɔn du fɔ ambɔg di wanwɔd we dɛn gɛt. Bɔt Jizɔs bin trit ɔl di 12 apɔsul dɛn fayn. Wetin na di lɛsin fɔ wi? Di prɔblɛm nɔto jɔs wetin ɔda pipul dɛn du, bɔt na wetin wi go du we dɛn mek mistek ɛn du ɔda bad tin dɛn. Wetin go ɛp wi? We wi kɔmpin Kristian du wi sɔntin we mek wi vɛks, i go fayn mek wi aks wisɛf se: ‘Wetin mek a vɛks pasmak bikɔs ɔf di tin we i du? Fɔ se i sho se a gɛt bad abit we a nid fɔ tray tranga wan fɔ ajɔst? Fɔ se sɔntɛm di pɔsin we mek a vɛks gɛt prɔblɛm we de mɔna am? Ivin if a tink se a gɛt gud rizin fɔ vɛks, a go sho se a lɛk di pɔsin ɛn jɔs tray fɔ fɔgiv am?’ Di mɔ wi trit ɔda pipul dɛn fayn, na di mɔ wi de pruv se wi na Jizɔs in tru tru disaypul dɛn.
16. Wetin bak wi go lan frɔm Jizɔs in ɛgzampul?
16 Jizɔs in ɛgzampul de tich wi bak se wi fɔ tray fɔ ɔndastand wi kɔmpin Kristian dɛn. (Prɔv. 20:5) Jizɔs ebul fɔ rid mɔtalman at. Wi nɔ ebul. Bɔt wi go ebul fɔ peshɛnt wit wi brɔda ɛn sista dɛn we dɛn du tin dɛn we mek wi vɛks. (Ɛfi. 4:1, 2; 1 Pit. 3:8) I go izi fɔ mek wi ebul fɔ du dat if wi lan mɔ bɔt dɛn. Lɛ wi tɔk bɔt wan ɛgzampul.
17. Aw wan sakit ovasia bin bɛnifit we i kam fɔ ɔndastand in kɔmpin Kristian mɔ ɛn mɔ?
17 Wan sakit ovasia mɛmba wan brɔda na wan pan di kɔngrigeshɔn dɛn we i bin de na Ist Afrika. Fɔs, di sakit ovasia bin tink se dis brɔda nɔ de trit pipul dɛn fayn. Wetin di sakit ovasia bin du? I tɔk se: “Bifo a avɔyd di brɔda, a bin disayd fɔ no am mɔ.” We di sakit ovasia spɛn tɛm wit di brɔda, i bin lan bɔt aw di brɔda mɛn ɛn aw dis dɔn afɛkt di we aw i de trit ɔda pipul dɛn. Di sakit ovasia kɔntinyu fɔ tɔk se: “We a kam fɔ no se i nɔ izi fɔ am fɔ mek di chenj dɛn we i want fɔ mek so dat i go trit ɔda pipul dɛn fayn ɛn aw i dɔn tray tranga wan fɔ mek sɔm chenj dɛn, a bin kɔle am. Wi bin kam fɔ bi gud padi dɛn.” We wi tray fɔ ɔndastand wi brɔda ɛn sista dɛn, bɔku tɛm i kin izi fɔ sho dɛn se wi lɛk dɛn.
18. Us kwɛstyɔn dɛn wi go aks wisɛf if wi kɔmpin Kristian du sɔntin we mek wi vɛks? (Prɔvabs 26:20)
18 Sɔntɛnde, wi kin tink se nid de fɔ go mit wi kɔmpin Kristian we dɔn du sɔntin we mek wi vɛks. Bɔt fɔs, i go fayn fɔ mek wi aks wisɛf dɛn kwɛstyɔn dɛn ya: ‘A rili ɔndastand wetin apin?’ (Prɔv. 18:13) ‘Fɔ se i nɔ min fɔ ɔfɛn mi?’ (Ɛkli. 7:20) ‘Misɛf dɔn ɛva mek da sem mistek de?’ (Ɛkli. 7:21, 22) ‘If a tɔk to di pɔsin bɔt dis, i go mek di prɔblɛm wɔs?’ (Rid Prɔvabs 26:20.) We wi tink bɔt dɛn kwɛstyɔn dɛn ya, wi go kam fɔ no se na lɔv go muv wi fɔ stɔp fɔ tink bɔt wetin dɔn apin.
19. Wetin yu dɔn mekɔp yu maynd fɔ du?
19 Jiova Witnɛs dɛn de pruv se dɛn na Jizɔs in tru tru disaypul dɛn bay we dɛn de sho se dɛn lɛk dɛnsɛf. Ɛniwan pan wi go sho se wi na Jizɔs in tru tru disaypul dɛn we wi sho se wi lɛk wi brɔda ɛn sista dɛn pan ɔl we dɛn nɔ pafɛkt. We wi sho se wi lɛk wi brɔda ɛn sista dɛn, sɔntɛm wi go ɛp ɔda pipul dɛn fɔ no di tru rilijɔn ɛn jɔyn wi fɔ wɔship Jiova, di Gɔd we gɛt lɔv. Lɛ wi mekɔp wi maynd fɔ kɔntinyu fɔ sho lɔv, we na in de mek pipul dɛn no di tru Kristian dɛn.
SIŊ 17 ‘A Wan Ɛp’
a Bɔku pipul dɛn kin want fɔ lan mɔ bɔt Jiova ɛn in Wɔd bikɔs dɛn de si se wi de sho tru tru lɔv to wi kɔmpin dɛn. Bɔt wi nɔ pafɛkt, so sɔntɛnde, i nɔ kin izi fɔ lɛ wi sho se wi lɛk wi kɔmpin dɛn. Lɛ wi tɔk bɔt wetin mek lɔv rili impɔtant ɛn aw wi go falamakata Jizɔs in ɛgzampul we i kam to aw wi de trit ɔda pipul dɛn we dɛn mek mistek.
b Rid di buk we gɛt di taytul “Come Be My Follower,” chapta 17, paregraf 10 ɛn 11.
c Rid di atikul we gɛt di taytul “At Last, My Life Has a Purpose,” na di Novɛmba 1, 2012 Wachtawa, pej 13 ɛn 14.
d Rid di atikul we gɛt di taytul “My Life Seemed Good,” na di Me 1, 2012 Wachtawa, pej 18 ɛn 19.
e Dis atikul nɔ de tɔk bɔt siriɔs sin dɛn we na di ɛlda dɛn fɔ andul, lɛk di sin dɛn we dɛn tɔk bɔt na 1 Kɔrintians 6:9, 10.
f Dɛn bin gi ripɔt dɛn biɛn tɛm ya se wan rabay [ticha] bin tɔk se: “Di pipul dɛn we de du wetin rayt lɛk Ebraam nɔ rich tati na di wɔl. If di pipul dɛn we de du wetin rayt rich tati, mi ɛn mi bɔypikin na tu pan dɛn; if na tɛn, mi ɛn mi bɔypikin na tu pan dɛn; if na fayv, mi ɛn mi bɔypikin na tu pan dɛn; if na tu, na mi ɛn mi bɔypikin nɔmɔ; if na wan, na mi.”