Baptizim Na Fayn Gol!

Jizɔs bin tich se ɔl Kristian dɛn fɔ baptayz. (Rid Matyu 28:​19, 20.) Bɔt wetin na baptizim? Ɛn wetin pɔsin fɔ du fɔ mek i baptayz?

1. Wetin na baptizim?

Di wɔd “baptayz” kɔmɔt frɔm wan Grik wɔd we min fɔ put sɔntin “dip” ɔnda wata. We dɛn bin de baptayz Jizɔs na Riva Jɔdan, dɛn put in wan ol bɔdi ɔnda di wata, dɔn i “kɔmɔt insay di wata.” (Mak 1:​9, 10) Semweso, we tru Kristian dɛn de baptayz, dɛn wan ol bɔdi fɔ go ɔnda wata.

2. Wetin baptizim de sho?

We pɔsin baptayz, i de sho se i dɔn gi in layf to Jiova Gɔd. Aw pɔsin de gi in layf to Jiova? Bifo di pɔsin baptayz, in wan de pre to Jiova ɛn tɛl am se i want fɔ sav Am sote go. I de prɔmis Jiova se na in wan i go wɔship ɛn na wetin I want na in go bi di tin we impɔtant pas ɔl na in layf. Di pɔsin de disayd “nɔ fɔ du wetin in want ɛn . . . kɔntinyu fɔ fala” di tin dɛn we Jizɔs de tich ɛn in ɛgzampul. (Matyu 16:​24) We pɔsin gi in layf to Gɔd ɛn baptayz, dat de mek am pɔsibul fɔ lɛ i gɛt tayt padi biznɛs wit Jiova ɛn di wan dɛn we de wɔship Am.

3. Wetin-ɛn-wetin pɔsin fɔ du bifo i baptayz?

Yu kin rɛdi yusɛf fɔ baptayz bay we yu lan bɔt Jiova ɛn gɛt fet pan am. (Rid Ibruz 11:​6.) As yu de lan mɔ ɛn yu fet de gro, na so yu go kɔntinyu fɔ lɛk Jiova. Dat go mek yu want fɔ prich to ɔda pipul dɛn bɔt am ɛn liv yu layf di we aw i want. (2 Timoti 4:​2; 1 Jɔn 5:​3) We pɔsin bigin liv in layf “di we aw Jiova want fɔ lɛ . . . i gladi,” di pɔsin go disayd fɔ gi in layf to Gɔd ɛn baptayz.​—Koloshians 1:​9, 10.a

LAN MƆ

4. Wi kin lan frɔm Jizɔs in baptizim

Rid Matyu 3:​13-​17 fɔ lan mɔ tin dɛn bɔt Jizɔs in baptizim. Dɔn una tɔk bɔt dɛn kwɛstyɔn dɛn ya:

• Jizɔs na bin bebi we i baptayz?

• Aw dɛn bin baptayz am? Dɛn bin jɔs sprinkul wata na in ed?

We Jizɔs baptayz, i bigin du di spɛshal wok we Gɔd gi am na di wɔl. Rid Lyuk 3:​21-​23 ɛn Jɔn 6:​38, dɔn una tɔk bɔt dis kwɛstyɔn:

• Afta we Jizɔs baptayz, us wok i bin put fɔs na in layf?

5. Yu go ebul rich di gol fɔ baptayz

Sɔntɛm yu go de tink se fɔ gi yu layf to Gɔd ɛn baptayz na tin we nɔ izi fɔ du. Bɔt yu go ebul fɔ du tin dɛn we go mek yu fil se yu dɔn rɛdi fɔ disayd fɔ du da impɔtant tin de. Fɔ lan frɔm sɔm pipul dɛn we bin dɔn du dat, ple di VIDIO.

VIDIO: Gɛt Tayt Padi Biznɛs wit Jiova (1:​11)

Rid Jɔn 17:​3 ɛn Jems 1:​5, dɔn una tɔk bɔt dis kwɛstyɔn:

• Wetin go ɛp pɔsin fɔ rɛdi fɔ baptayz?

1. Wi de gi wi layf to Jiova bay we wi pre to am ɛn tɛl am se wi want fɔ sav am sote go

2. Di tɛm we wi de baptayz, wi de sho ɔlman we de luk wi se wi bin dɔn gi wi layf to Gɔd

6. We yu baptayz, yu de jɔyn Jiova in famili

We yu baptayz, yu de jɔyn wan famili we de ɔlsay na di wɔl ɛn we gɛt wanwɔd. Pan ɔl we wi kɔmɔt difrɛn ples dɛn ɛn wi ɔl mɛn difrɛn we dɛn, wi ɔl biliv di sem tin ɛn wi de liv wi layf di we aw Gɔd want. Rid Sam 25:​14 ɛn 1 Pita 2:​17, dɔn una tɔk bɔt dis kwɛstyɔn:

• Aw baptizim de afɛkt pɔsin in padi biznɛs wit Jiova ɛn di wan dɛn we de wɔship Am?

WETIN YU DƆN LAN?

Jizɔs bin tich se ɔl Kristian dɛn fɔ baptayz. Fɔ mek pɔsin go baptayz, i nid fɔ gɛt strɔng fet pan Jiova, liv in layf di we aw I want, ɛn gi in layf to Am.

Rivyu

• Wetin na baptizim? Wetin mek i impɔtant?

• Wetin baptizim de sho?

• Wetin pɔsin nid fɔ du bifo i gi in layf to Gɔd ɛn baptayz?

DU MƆ RISACH

Lan wetin baptizim min ɛn wetin i nɔ min.

“Wetin Na Baptizim?” (Atikul na di wɛbsayt)

Lan bɔt difrɛn tin dɛn we pɔsin go du bifo i baptayz.

“We Yu Lɛk Jiova ɛn Gladi fɔ Wetin Yu De Lan Dat Go Ɛp Yu fɔ Baptayz” (Di Wachtawa, Mach 2020)

Rid bɔt wan man we bin disayd fɔ baptayz bikɔs ɔf wetin i dɔn lan ɛn nɔto bikɔs ɔf aw i de fil.

“Dɛn Bin Want Mi fɔ Pruv to Misɛf se Dis Na di Trut” (Di Wachtawa, Fɛbwari 1, 2013)

Lan bɔt wetin mek baptizim na impɔtant gol ɛn aw yu go rɛdi yusɛf fɔ baptayz.

“A Fɔ Baptayz?” (Kwɛstyɔn dɛn we Yɔŋ Pipul dɛn Kin Aks​—Ansa dɛn we De Ɛp, Vɔlyum 2, chapta 37)