“Jiova in Wɔd Kɔntinyu fɔ Rich na Bɔku Say Dɛn”

1-4. Us bad tin bin mit Pita? Aw yu go fil if yu na bin Pita?

AFTA Pita go insay, di big big ayɛn get mek lawd nɔys as dɛn de lɔk am. Pita bin de bitwin tu Roman gaydman dɛn as dɛn de kɛr am go na in sɛl. I wet fɔ lɔng tɛm, sɔntɛm sɔm dez, fɔ no wetin dɛn gɛt fɔ du wit am. Natin nɔ bin de fɔ lɛ i de wach, pas di prizin wɔl dɛn, di ba dɛn, in chen dɛn, ɛn in gaydman dɛn.

² Faynali, dɛn tɛl Pita bad bad nyuz. Kiŋ Ɛrɔd Agripa I dɔn mekɔp in maynd se Pita fɔ day.a Infakt, dɛn go sho Pita to di pipul dɛn afta di Pasova, ɛn di day we i fɔ day go tan lɛk gift to di pipul dɛn fɔ mek dɛn gladi. Dis nɔto ɔdinari trɛtin. I nɔ tu te yet we dis sem kiŋ kil wan pan Pita in kɔmpin apɔsul dɛn we nem Jems.

³ Imajin di ivintɛm bifo di de we dɛn fɔ kil Pita. Wetin Pita go dɔn de tink bɔt na in dak sɛl? Fɔ se i go de tink se trade trade Jizɔs bin dɔn tɔk se wande dɛn go tay am ɛn kɛr am go usay i nɔ want fɔ go, we min se dɛn go kil am? (Jɔn 21:​18, 19) Sɔntɛm Pita go de wɔnda if na di tɛm dɔn rich so.

⁴ If yu na bin Pita, aw yu bin fɔ fil? Bɔku pipul dɛn at go pwɛl, dɛn go de tink se dɛn nɔ gɛt op igen. Bɔt fɔ pɔsin we rili de fala Jizɔs Krays, ɛnitin de we go mit am we go mek i nɔ gɛt op igen? Wetin wi go lan frɔm wetin Pita ɛn in kɔmpin Kristian dɛn bin du we pipul dɛn bin de mek dɛn sɔfa? Lɛ wi si.

5, 6. (a) Wetin mek Kiŋ Ɛrɔd Agripa I bin atak di Kristian kɔngrigeshɔn? Aw i du dat? (b) Wetin mek Jems in day na bin tɛst fɔ di kɔngrigeshɔn?

⁵ As wi bin dɔn lan na di chapta bifo dis wan, di Kristian kɔngrigeshɔn bin rili gladi we Kɔnilyɔs ɛn in famili we na Jɛntayl dɛn kam fɔ bi Kristian. Bɔt Ju dɛn we nɔto Kristian bin shɔk we dɛn si se Ju Kristian dɛn de wɔship fri wan wit pipul dɛn we nɔto Ju.

⁶ Ɛrɔd we na bin pɔlitishian we gɛt sɛns bin si dis as chans fɔ mek di Ju dɛn lɛk am, so i bigin fɔ trit di Kristian dɛn bad. I go bi se Jizɔs Krays bin rili lɛk di apɔsul Jems. So Ɛrɔd “bin kil Jems we na Jɔn in brɔda wit sɔd.” (Akt 12:​2) Dat na bin big tɛst fɔ di kɔngrigeshɔn! Jems na wan pan di tri pipul dɛn we bin si we Jizɔs bin chenj, ɛn i bin si ɔda mirekul dɛn we di ɔda apɔsul dɛn nɔ bin si. (Mat. 17:​1, 2; Mak 5:​37-42) Jizɔs bin kɔl Jems ɛn in brɔda Jɔn “Tɛnda in Pikin dɛn” bikɔs ɔf di pasmak zil we dɛn bin gɛt. (Mak 3:​17) So di kɔngrigeshɔn lɔs wan fetful witnɛs we gɛt maynd ɛn apɔsul we dɛn rili lɛk.

7, 8. Wetin di kɔngrigeshɔn bin du we dɛn put Pita na prizin?

⁷ Di kil we dɛn kil Jems bin mek di Ju dɛn gladi jɔs lɛk aw Agripa bin op se i go bi. Dis bin mek i gɛt maynd ɛn di ɔda pɔsin we i bin tray fɔ kech na Pita. Lɛk aw wi bin dɔn tɔk we wi bigin dis chapta, i bin arɛst Pita. Agripa go dɔn mɛmba se fɔ put di apɔsul dɛn na prizin nɔto di bɛst we fɔ kip dɛn lɛk aw wi bin dɔn lan na Chapta 5 insay dis buk. Fɔ mek shɔ se Pita nɔ ɛskep, Ɛrɔd bin mek dɛn chen Pita midul tu gaydman dɛn, ɛn i bin gɛt 16 gaydman dɛn we bin de wok de ɛn nɛt bay shift. If Pita ɛskep, di gaydman dɛn go gɛt di pɔnishmɛnt we Pita fɔ gɛt. Wetin Pita in kɔmpin Kristian dɛn go du insay dis tɛm we nɔ izi?

⁸ Di kɔngrigeshɔn bin no wetin dɛn nid fɔ du. Akt 12:​5 tɔk se: “So Pita bin de na prizin, bɔt di kɔngrigeshɔn bin de rili pre to Gɔd fɔ am.” Fɔ tru, dɛn bin de rili pre wit ɔl dɛn at fɔ dɛn brɔda we dɛn rili lɛk. Jems in day nɔ bin mek dɛn at pwɛl pasmak ɛn si prea as sɔntin we nɔ valyu. Prea rili valyu to Jiova. If di prea dɛn gri wit wetin i want, i go ansa dɛn. (Ibru. 13:​18, 19; Jems 5:​16) Dis na impɔtant lɛsin we Kristian dɛn tide fɔ mɛmba.

 9. Wetin wi kin lan frɔm Pita in kɔmpin Kristian dɛn ɛgzampul we i kam to prea?

⁹ Yu sabi ɛniwan pan yu kɔmpin Kristian dɛn we gɛt prɔblɛm dɛn? I go bi se dɛn de bia di sɔfa we pipul dɛn de mek dɛn sɔfa, gɔvmɛnt dɔn ban dɛn wok, ɔ dɛn de na say usay nachɔral dizasta dɔn apin. Yu nɔ tink se i go fayn fɔ de pre fɔ dɛn frɔm yu at? Sɔntɛm yu sabi sɔm Kristian dɛn we de go tru prɔblɛm dɛn we nɔ izi fɔ notis, lɛk famili prɔblɛm dɛn, dɛn at pwɛl, ɔ sɔntin de apin to dɛn we de tɛst dɛn fet. If yu tink gud gud wan bifo yu de pre, sɔntɛm yu go mɛmba sɔm pipul dɛn nem dɛn we yu go kɔl as yu de tɔk to Jiova “we de ansa wi prea.” (Sam 65:​2) Wi shɔ se yu go want yu brɔda ɛn sista dɛn fɔ du di sem tin fɔ yu we yusɛf go gɛt prɔblɛm dɛn.

10, 11. Ɛksplen aw Jiova in enjɛl bin pul Pita na prizin.

¹⁰ Fɔ se Pita bin de wɔri bɔt di prɔblɛm we i gɛt? Wi nɔ go se na so i bi, bɔt di las nɛt we Pita bin de na prizin, i bin de slip gud gud wan midul tu gaydman dɛn we bin de wach. Dis man we bin gɛt fet bin no se ilɛk wetin go apin tumara, i sef na Jiova in an. (Rom. 14:​7, 8) Bɔt i go bi se Pita nɔ bin de ɛva imajin di wɔndaful tin dɛn we gɛt fɔ kam apin. Wantɛm wantɛm, brayt layt bin shayn na di wan ol sɛl. Enjɛl bin tinap nia Pita ɛn wek am kwik kwik wan. I go mɔs bi se di gaydman dɛn nɔ bin si di enjɛl. Ɛn di chen dɛn we bin tay na in an we bin tan lɛk se dɛn nɔ go brok bin fɔdɔm jɔs lɛk dat!

¹¹ Di enjɛl bin tɛl Pita di tin dɛn we i fɔ du. I tɛl am se: “Grap kwik! . . . Drɛs ɛn wɛr yu sandal. . . . Wɛr yu klos we yu kin wɛr pantap.” Pita du wetin i tɛl am kwik kwik wan. Dɔn, di enjɛl tɛl Pita se: “Fala mi,” ɛn Pita du am. Dɛn kɔmɔt na di sɛl ɛn pas di gaydman dɛn post we de na do, ɛn dɛn waka saful wan te dɛn rich na di big ayɛn get. Aw dɛn go pas de? If Pita bin de tink bɔt dis, i nɔ bin nid fɔ tink bɔt am fɔ lɔng tɛm. As dɛn rich nia di get, di get “opin fɔ insɛf.” Bifo Pita de no wetin de apin, dɛn pas na di get ɛn go dɔŋ wan strit, ɛn wantɛm wantɛm, di enjɛl lɔs pan am. Na da tɛm de i kam fɔ no se ɔl di tin dɛn we bin apin bin rial. Dis nɔto bin vishɔn. I bin dɔn fri!​—Akt 12:​7-11.

12. Wetin mek wi go gɛt kɔrej we wi tek tɛm tink bɔt aw Jiova bin sev Pita?

¹² Yu nɔ tink se wi go gɛt kɔrej we wi tek tɛm tink bɔt di kayn pawa we Jiova gɛt fɔ sev in savant dɛn? Di gɔvmɛnt we bin gɛt pawa pas ɔl ɔda gɔvmɛnt dɛn tɛm dɛn de bin de sɔpɔt di kiŋ we bin ol Pita. Pan ɔl dat, Pita waka kɔmɔt na di prizin jɔs lɛk dat! Bɔt Jiova nɔ de pafɔm dis kayn mirekul fɔ ɔl in savant dɛn. I nɔ bin du dat fɔ Jems ɛn leta, I nɔ bin du dat fɔ Pita we Jizɔs in wɔd dɛn we i bin tɔk bɔt Pita faynali kam tru. Kristian dɛn tide nɔ de ɛkspɛkt se Jiova go pafɔm mirekul fɔ sev dɛn. Bɔt wi fɔ mɛmba se Jiova nɔ chenj yet. (Mal. 3:​6) Ɛn i nɔ go te igen, i go yuz in Bɔypikin fɔ fri bɔku bɔku pipul dɛn frɔm di prizin we pas ɔl, we na day. (Jɔn 5:​28, 29) Dɛn prɔmis dɛn ya kin rili kɔrej wi we wi gɛt prɔblɛm dɛn tide.

13-15. (a) Aw di brɔda ɛn sista dɛn we bin de na Meri in os bin fil we Pita kam? (b) Wetin di Baybul buk we nem Akt bigin fɔ tɔk bɔt? Wetin Pita bin kɔntinyu fɔ du fɔ in brɔda ɛn sista dɛn?

¹³ Pita bin tinap na di strit we dak ɛn de tink bɔt usay fɔ go. Dɔn i disayd usay fɔ go. Wan Kristian uman we nem Meri bin de nia usay i de. I go mɔs bi se dis uman we in man bin dɔn day bin jɛntri, ɛn i bin gɛt big os usay wan ol kɔngrigeshɔn go ebul fɔ mit. In na bin Jɔn Mak in mama. Dis na di fɔstɛm we dɛn tɔk bɔt Jɔn Mak na di Baybul buk we nem Akt, ɛn leta, i bin kam fɔ bi lɛk pikin to Pita. (1 Pit. 5:​13) Bɔku pipul dɛn na da kɔngrigeshɔn de bin de na Meri in os da nɛt de de pre wit ɔl dɛn at pan ɔl we tɛm bin dɔn let. Wan dawt nɔ de se dɛn bin de pre fɔ mek dɛn fri Pita, bɔt dɛn nɔ bin de ɛkspɛkt di we aw Jiova go ansa dɛn prea!

¹⁴ Pita nak na di get. Wan savant gal we nem Roda bin kam na di get. Roda na Grik nem we min “Roz.” Pita tɔk to am, bɔt i nɔ bin biliv wetin i yɛri. Bifo i opin di get, dis titi we bin rili gladi bin lɛf Pita tinap na di strit, rɔn go insay di os, ɛn tray fɔ mek di brɔda ɛn sista dɛn biliv se na Pita de nak na di get. Dɛn bin tɔk se i dɔn kres, bɔt i bin mekɔp in maynd fɔ mek dɛn biliv se wetin i de tɔk na tru. I kɔntinyu fɔ tɔk se na tru i de tɔk. Sɔm pan di wan dɛn we bin biliv se sɔntɛm i yɛri sɔntin bigin fɔ tɔk se sɔntɛm na enjɛl tinap fɔ Pita. (Akt 12:​12-15) Ɔl dis tɛm, Pita bin kɔntinyu fɔ nak te dɛn faynali opin di get.

¹⁵ We dɛn opin di get, “dɛn si am ɛn dɛn sɔprayz”! (Akt 12:​16) Pita bin tɛl in brɔda ɛn sista dɛn we bin gladi fɔ lɛf fɔ ala so dat i go tɛl dɛn wetin apin, ɛn i tɛl dɛn fɔ tɛl di disaypul Jems ɛn di brɔda dɛn bɔt wetin apin. Dɔn i go, so dat Ɛrɔd in sojaman dɛn nɔ go kam kech am. Pita bin go ɛn kɔntinyu in fetful savis na say we sef. Dɛn nɔ bin tɔk bɔt am igen na di Baybul buk we nem Akt, pas di tɛm we dɛn bin de sɔlv di prɔblɛm bɔt if pipul dɛn fɔ sakɔmsayz ɔ dɛn nɔ fɔ sakɔmsayz, we Akt chapta 15 tɔk bɔt. Di Baybul buk we nem Akt bigin fɔ tɔk naw bɔt di wok we apɔsul Pɔl bin du ɛn di travul we i bin de travul. Bɔt wi shɔ se Pita bin de ɛp in brɔda ɛn sista dɛn fɔ gɛt mɔ fet ɛnisay we i bin de go. Di brɔda ɛn sista dɛn na Meri in os go mɔs dɔn gladi afta Pita lɛf dɛn.

16. Wetin mek wi shɔ se bɔku tin dɛn go apin tumara bambay we go mek wi gladi?

¹⁶ Sɔntɛnde, Jiova kin gi in savant dɛn pas wetin dɛn de ɛkspɛkt we kin mek dɛn gladi pasmak. Na da we de Pita in Kristian brɔda ɛn sista dɛn bin fil da nɛt de. Sɔntɛnde, na so wisɛf kin fil we Jiova kin blɛs wi. (Prɔv. 10:​22) Tumara bambay, wi go si ɔl di prɔmis dɛn we Jiova dɔn prɔmis wi de apin ɔlsay na di wɔl. Di wɔndaful tin dɛn we go apin go pas ɛnitin we wi go imajin tide. So wans wi kɔntinyu fɔ fetful, wi go ɛnjɔy bɔku blɛsin dɛn tumara bambay.

17, 18. Wetin bin mek di pipul dɛn prez Ɛrɔd pasmak?

¹⁷ Di ɛskep we Pita ɛskep bin mek Ɛrɔd sɔprayz, bɔt nɔto bin gud sɔprayz fɔ am. Wantɛm wantɛm, i bin mek lɛ dɛn wach gud gud wan fɔ Pita, dɔn i aks di gaydman dɛn we bin de wit am kwɛstyɔn dɛn. Dɛn bin “kɛr dɛn go fɔ go pɔnish dɛn,” ɛn i go mɔs bi se dɛn bin kil dɛn. (Akt 12:​19) Ɛrɔd Agripa nɔto man we bin de sho masi ɔ gɛt sɔri-at. Fɔ se dɛn go ɛva pɔnish dis man?

¹⁸ Agripa go mɔs dɔn shem we i nɔ ebul fɔ kil Pita. Bɔt i nɔ tu te, i bigin fɔ mek prawd bak. Sɔntin bin apin we bin mek in ɛnimi dɛn bin want fɔ mek pis wit am, ɛn i go mɔs bi se i bin rili want fɔ tɔk bifo bɔku bɔku pipul dɛn. Lyuk bin tɔk se fɔ pripia fɔ dis big de, “Ɛrɔd wɛr kiŋ klos.” Wan Ju istorian we nem Josifɔs bin rayt se dɛn yuz silva fɔ mek Ɛrɔd in klos so dat we layt go pan di kiŋ in klos, i go tan lɛk se i de shayn wit glori. Dis pɔlitishian we bin prawd bin go tɔk to di pipul dɛn. Fɔ mek in ed big, di pipul dɛn bin ala se: “Da vɔys de na wan gɔd in vɔys, nɔto mɔtalman vɔys!”​—Akt 12:​20-22.

19, 20. (a) Wetin mek Jiova bin pɔnish Ɛrɔd? (b) Aw di we aw Ɛrɔd Agripa day kwik kwik wan de kɔrej wi?

¹⁹ Na Gɔd fɔ gɛt da kayn glori de, ɛn Gɔd bin de wach! Ɛrɔd bin gɛt di chans fɔ avɔyd prɔblɛm. I fɔ dɔn tɛl di pipul dɛn fɔ stɔp ɔ nɔ gri wit wetin dɛn se. Bifo dat, i du wetin sho se dis prɔvab we se: “If yu de kak, yu go kapsay,” na tru. (Prɔv. 16:​18) “Wantɛm wantɛm, Jiova in enjɛl mek i sik,” ɛn dat bin mek dis prawd man we bin de fil se in kayn nɔ de, sɔfa bad bad wan bifo i day. “Tumbu dɛn it [Ɛrɔd] ɛn i day.” (Akt 12:​23) Josifɔs sɛf tɔk se Agripa bin sik wantɛm wantɛm, ɛn i tɔk bak se di kiŋ bin se i de day bikɔs di pipul dɛn prez am pasmak. Josifɔs rayt se Agripa sɔfa fɔ fayv dez bifo i day.b

²⁰ Sɔntɛnde, i kin tan lɛk se pipul dɛn we nɔ de sav Gɔd kin du ɔlkayn bad tin dɛn, ɛn dɛn nɔ kin gɛt pɔnishmɛnt fɔ am. Dat nɔ fɔ sɔprayz wi bikɔs “di wan ol wɔl de na di wikɛd wan in an.” (1 Jɔn 5:​19) Bɔt sɔm tɛm dɛn de, pipul dɛn we de sav Gɔd fetful wan kin stil wɔri bikɔs i tan lɛk se pipul dɛn we de du bad nɔ kin gɛt ɛni pɔnishmɛnt. Dat na wan rizin we mek stori dɛn lɛk dis wan kin ɛnkɔrej wi. Dis sho se Jiova de du sɔntin fɔ mek ɔl di wan dɛn we de sav am mɛmba se in na Gɔd we lɛk jɔstis. (Sam 33:​5) I nɔ go te igen, i go mek jɔstis de ɔlsay na di wɔl.

21. Wetin na di men lɛsin we de na Akt chapta 12? Aw i go ɛnkɔrej wi tide?

²¹ Dis stori dɔn wit wan lɛsin we go ɛnkɔrej wi, dat na: “Jiova in wɔd kɔntinyu fɔ rich na bɔku say dɛn ɛn plɛnti pipul dɛn biliv.” (Akt 12:​24) Dis ripɔt bɔt di we aw di prichin wok bin de go bifo de mɛmba wi bɔt aw Jiova de blɛs dis sem wok insay wi yon tɛm. Fɔ tru, di tin dɛn we de na Akt chapta 12 nɔ jɔs de tɔk bɔt di day we wan apɔsul bin day ɛn di ɛskep we wan ɔda apɔsul bin ɛskep. Di men tin we i de tɔk bɔt na bɔt Jiova ɛn di tin we i de du fɔ pwɛl di tray we Setan de tray fɔ dɔnawe wit di Kristian kɔngrigeshɔn ɛn di zil we dɛn gɛt fɔ du di prichin wok. Setan nɔ bin ebul fɔ stɔp di Kristian dɛn, ɛn na so bak ɔl in plan dɛn go fel. (Ayz. 54:​17) Bɔt di wan dɛn we de sɔpɔt Jiova ɛn Jizɔs Krays de du wok we nɔ go ɛva fel. Yu nɔ tink se dat na fayn tin fɔ tink bɔt? Na big big ɔnɔ wi gɛt fɔ ɛp fɔ prich “Jiova in Wɔd” tide!